Itranslated by G. Schaufelberger schaufel @ wanadoo.fr August 20, 2008
Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edition,
send corrections to A. Harindranath harindranath_a @ yahoo.com##

atha pa~nchamo.adhyAyaH
janamejayAshvamedhaH indrasya kApaTyaM cha

sUta uvAcha

ityevamAshvAsayato rAjAnaM janamejayam |
atItAnAgataM vAkyamR^iSheH pariShadA shrutam ||3-5-1

amR^itasyeva saMvAhaH prabhA chandramaso yathA |
atarpayata tachChrotraM maharShervA~Nmayo rasaH ||3-5-2

dharmakAmArthasaMyuktaM karuNaM vIraharShaNam |
ramanIyaM tadAkhyAnaM kR^itsnaM pariShadA shrutam ||3-5-3

kechidashrUNi mumuchuH shrutvA dadhyustathApare |
itihAsaM tamR^iShiNA pANAviva nidarshitam ||3-5-4

sadasyAnso.abhyanuj~nAya kR^itvA chApi pradakShiNAm |
punardrakShyAma ityuktvA jagAma bhagavAnR^iShiH ||3-5-5

anujagmustadA sarve prayAntamR^iShisattamam |
loke pravadatAM shreShThaM ye vishiShTAstapodhanAH ||3-5-6

yAte bhagavati vyAse tadA brahmarShibhiH saha |
R^itvijaH pArthivAshchaiva pratijagmuryathAgatam ||3-5-7

pannagAnAM sughorANAM kR^itAnAM vairayAtanAm |
jagAma roShamutsR^ijya rAjA viShamivoragaH ||3-5-8

hotrAgnidIptashirasaM paritrAya cha takShakam |
AstIko.athAshramapadaM jagAma sa mahAmuniH ||3-5-9

rAjApi hAstinapuraM jagAma svajanAvR^itaH |
anvashAsachcha muditastadA pramuditAH prajAH ||3-5-10

kasyachittvatha kAlasya sa rAjA janamejayaH |
dIkShito vAjimedhena vidhivadbhUridakShiNaH ||3-5-11

saMj~naptamashvaM tatrAsya devI kAshyA vapuShTamA |
saMviveshopagamyAtha vidhidR^iShTena karmaNA ||3-5-12

tAM tu sarvAnavadyA~NgIM chakame vAsavastadA |
saMj~naptamashvamAvishya tayA mishrIbabhuva saH ||3-5-13

tasminvikAre janite viditvA tattvatashcha tat |
asaMj~napto.ayamashvaste dhvaMsetyadhvaryumabravIt ||3-5-14

adhvaryurj~nAnasaMpannastadindrasya vicheShTitam |
kathayAmAsa rAjarSheH shashApa sa puraMdaram ||3-5-15

janamejaya uvAcha

yadyasti me yaj~naphalaM tapo vA rakShataH prajAH |
phalenAnena sarveNa bravImi shruyatAmidam ||3-5-16

adyaprabhR^iti devendramajitendriyamasthiram |
kShatriyA vAjimedhena na yakShyantIti shaunaka ||3-5-17

R^itvijashchAbravItkruddhaH sa rAjA janamejayaH |
daurbalyaM bhavatAmetadyadayaM dharShitaH kratuH ||3-5-18

viShaye me na vastavyaM gachChadhvaM saha bAndhavaiH |
ityuktAstatyajurviprAstaM nR^ipaM jAtamanyavaH ||3-5-19

amarShAdanvashAsachcha patnIshAlAgatAH striyaH |
rAjA paramadharmaj~nastAmasau janamejayaH ||3-5-20

asatIM vapuShTamAmetAM niryAtayata me gR^ihAt |
yayA me charaNau mUrdhni pAtitau reNuguNThitau ||3-5-21

shauNDIryaM me.anayA bhagnam yasho mAnashcha dUShitaH |
na chainAM draShTumichChAmi parikliShTAmiva srajam ||3-5-22

na svAdu so.ashnAti naraH sukhaM svapiti vA rahaH |
anvAste yaH priyAM bhAryAM pareNa mR^iditAmiha ||3-5-23

punarnaivopabhu~njanti shvAvalIDhaM haviryathA |
evamuchchaiH prabhAShantaM kruddhaM pArIkShitaM nR^ipam |
gandharvarAjaH provAcha vishvAvasuridaM vachaH ||3-5-24

vishvAvasuruvAcha

triyaj~nashatayajvAnaM vAsavastvAM na mR^iShyate |
apsarAstena patnI te vihiteyaM vapuShTamA ||3-5-25

rambhAnAmApsarA devI kAshirAjasutA matA |
saiShA yoShidvarA rAjanratnabhUtAnubhUyatAm ||3-5-26

yaj~ne vivaramAsAdya vighnamindreNa te kR^itam |

yajvA hyasi kurushreShTha samR^iddhyA vasamopamaH ||3-5-27

bibhetyabhibhavAchChakrastava kratuphalairnR^ipa |
tasmAdAvartitashchaiva kraturindreNa te vibho ||3-5-28

mAyaiShA vAsaveneha prayuktA vighnamichChatA |
kratorvivaramAsAdya saMj~naptaM dR^ishya vAjinam ||3-5-29

ratimindreNa rambhAyAM manyase yAM vapuShTamAm |
atha te guravaH shaptAstriyaj~nashatayAjinaH ||3-5-30

bhraMshitastvaM cha viprAshcha balAdindrasamAdiha |
tvattashchaiva sudurdharShAstriyaj~nshatayAjinaH ||3-5-31

bibheti ha sadA tvatto brAhmaNebhyo.api vAsavaH |
ekena vai tadubhayaM tIrNaM shakreNa mAyayA ||3-5-32

sa eSha sumahAtejA vijigIShuH puraMdaraH |
kathamanyairanAchIrNaM napturdArAnavikramet ||3-5-33

vishvAvasuruvAcha

yathaiva hi parA buddhiH paro dharmaH paro damaH |
yathaiva paramaishvaryaM kIrtitaM harivAhane |
tathaiva tvayi durdarShe triyaj~nashatayAjini ||3-5-34

mA vAsavaM mA cha gurumAtmAnaM mA vapuShTamAm |
gachCha doSheNa kAlo hi sarvathA duratikramaH ||3-5-35

aishvaryeNAshvamAvishya devendreNAsi roShitaH |
AnukUlyena devasya vartitavyaM sukhArthinA ||3-5-36

dustaraM pratikUlaM hi pratisrota ivAmbhasaH |
strIratnamupabhu~NkShvemAmapApaM vigatajvaraH ||3-5-37

apApAstyajyamAnA vai tyajeyurapi yoShitaH |
aduShTAstu striyo rAjandivyAstu savisheShataH ||3-5-38

bhAnoH prabhA shikhA vahnervedI hotre tathAhutiH |
parAmR^iShTApyasaMsaktA nopaduShyanti yoShitaH ||3-5-39

grAhyA lAlayitavyAshcha pUjyAshcha satataM budhaiH |
shIlavatyo namaskAryAH pUjyAH shriya iva striyaH ||3-5-40

iti shrImahAbhArate khileShu harivaMshe bhaviShyaparvaNi
vishvAvasuvAkye pa~nchamo.adhyAyaH