##Harivamsha Maha Puranam - Part 3 - Bhavishya Parva Chapter 3-7 Creation of the Universe - Janamejaya's Questions Itranslated by G. Schaufelberger schaufel@wanadoo.fr August 22, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com --------------------------------------------------------------- atha saptamo.adhyAyaH puShkaraprAdurbhAvaH janamejaya uvAcha prabhAvaM padmanAbhasya svapataH sAgarAmbhasi | puShkare vai yathodbhUtA devAH sarShigaNAH purA ||3-7-1 etadAkhyAhi nikhilaM yogaM yogavidAM pate | shR^iNvatastasya me kIrtiM na tR^iptirabhijAyate ||3-7-2 kiyantaM chaiva kAlaM vai shayitA puruShottamaH | kimarthaM shayate kAlaM tasya kAlasya saMbhavaH ||3-7-3 kiyatA chaiva kAlena prabudhyati surAdhipAH | kathamutthAya bhagavAnasR^ijannikhilaM jagat ||3-7-4 ke prajApatayastAta AsanpUrvaM mahAmune | kathaM nirmitavAMshchaiva chitraM loke sanAtanaH ||3-7-5 evamekArNave loke naShTe sthAvatraja~Ngame | naShTe devAsuragaNe pranaShToragarAkShase ||3-7-6 naShTAnalAnile loke naShTAkAshamahItale | kevalaM gahvarIbhUte mahAbhUtaviparyaye ||3-7-7 prabhurmahAbhUtapatirmahAtejA mahAtatiH | Aste suragurushreShTho vidhimAdAya kaM mune ||3-7-8 tanme tvamupapannAya brahmannetadasaMshayam | vaktumarhasi dharmiShTha yasho nArAyaNAtmakam ||3-7-9 prAdurbhAvaM puraskR^itya bhUtaM bhavyaM mahAtmanaH | shrAddhAnAmupaviShTAnAM bhagavanvaktumarhasi ||3-7-10 vaishampAyana uvAcha nArAyaNayashoj~nAne yA bhavedbhavataH spR^ihA | tvadvaMshAnagha pUtasya kAryaM kurukularShabha ||3-7-11 shR^iNushvAdipurANebhyo devatAbhyo yathashruti | brAhmaNAnAM cha vadatAM shruto.asmAbhirmahAtmanAm ||3-7-12 tathA cha tapasA dR^iShTo bR^ihaspatisamadyutiH | pArAsharyastataH shrImAngururdvaipAyano.abravIt ||3-7-13 tatte.ahaM saMpravakShyAmi yathApraj~naM yathAshrutam | na vij~nAtuM mayA shakyamR^iShimAtreNa bhArata ||3-7-14 kaH samutsahate j~nAtuM paraM nArAyaNAtmakam | vishvAtmano.ayaM brahmApi na vedayati tattvataH ||3-7-15 shrutaM me vishvadevAnAM yadrahasyaM maharShiNAm | tadidaM sarvadevAnAM tattvatastattvavAdinAm ||3-7-16 tadadhyAtmavidAM chintyaM kAraNaM chaiva karmiNAm | adhidaivaM cha yaddaivaM taddaivamiti saMj~nitam ||3-7-17 yadbhUtamadhibhUtaM cha yatparaM cha maharShiNAm | yatsatyaM devadR^iShTaM cha yattadvedavido viduH ||3-7-18 yaH kartA kArako buddhirmanaH kShetraj~na eva cha | pradhAnaM puruShaH shAstA ekastadabhishabdyate ||3-7-19 kAlaH kAlaM svapayati draShTA svAdhIna eva cha | prANaH pa~nchavidhashchaiva dhruvamakShaya eva cha ||3-7-20 uchyate vividhairbhAvaistasyaivAnagha tatparaiH | sa eva bhagavAnsarvaM karoti vikaroti cha ||3-7-21 yo.asmAnkArayate karma tenAsma vyAkulIkR^itAH | yajAmahe tameveshaM tamevechChAma nirvR^itAH ||3-7-22 yo vaktA yashcha vaktavyo yashchAhaM tadbravImi vaH | idaM shR^iNuta yachChreyo yachchAnyatparijalpatha ||3-7-23 yAH kathAshchaiva vartante shrutayo vAtha gahvarAH | vishvaM vishvapatirdevAH sarvaM nArAyaNAtmakam ||3-7-24 yatsatyaM yadanR^itamAdimakSharaM vai yadbhUtaM bhavati mithashcha yadbhaviShyam | yatki~nchichcharamacharAvyayaM triloke tatsarvaM puruShavaraH prabhUrvariShThaH ||3-7-25 iti shrImahAbhArate khileShu harivaMshe bhaviShyaparvaNi puShkaraprAdurbhAve saptamo.adhyAyaH