##Harivamsha Maha Puranam - Part 3 - Bhavishya Parva Chapter 3-9 Creation of the Grand Ocean Itranslated by G. Schaufelberger schaufel@wanadoo.fr August 25, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha navamo.adhyAyaH ekArNavavidhiH vaishampAyana uvAcha bhUtvA nArAyaNo yogI saptamUrtirvibhAvasuH | gabhastibhiH pradIptAbhiH saMshoShayati sAgarAn ||3-9-1 pItvArNavAMshcha sarvAnsa nadIH kUpAMshcha sarvashaH | parvatAnAM cha salilaM sarvaM pItvA cha rashmibhiH ||3-9-2 bhittvA sahasrashashchaiva mahIM nItvA rasAtalam | rasAtalajalaM kR^itsnaM pibate rasamuttamam ||3-9-3 apsu sR^ijankledamanyaddadAti prANinAM dhruvam | tatsarvamaravindAkSha Adatte puruShottamaH ||3-9-4 vAyushcha balavAnbhUtvA sa vidhUyAkhilaM jagat | prANodayaM surANAM cha vAyunA kurute hariH ||3-9-5 tato devagaNAnAM cha sarveShAmeva dehinAm | ye chendriyagaNAH sarve ye chAnye cha yatodbhavAH ||3-9-6 pUyaM ghrANaM sharIraM cha pR^ithivImAshritA guNAH | jihvA rasashcha kledashcha saMshritAH salilaM guNAH | rUpaM chakShurvipAkashcha jyotirevAshritA guNAH ||3-9-7 sparshaH prANashcha cheShTA cha pavanaM saMshritA gunAH | parameShThinaM vareNyaM cha hR^iShIkeshaM samAshritAH ||3-9-8 tato bhagavatA tatra rashmibhiH parivAritAH | vAyunA kR^iShyamANAshcha rUpAnyonyasamAshrayAt ||3-9-9 teShAM saMgharShaNodbhUtaH pAvakaH shatadhA jvalan | adahannikhilA.NllokAnugraH saMvartako.analaH ||3-9-10 saparvatAMstarUngulmA.NllatAvallIstR^iNAni cha | vimAnAni cha divyAni purANi vividhAni cha ||3-9-11 AshramAMshcha tathA puNyAndivyAnyAyatanAni cha | yAni chAshrayaNIyAni tAni sarvaNi so.adahat ||3-9-12 bhasmIbhUtAMstataH sarvA.NllokA.NllokagururhariH | bhUyo nirvApayAmAsa jalayuktena karmaNA ||3-9-13 sahasradR^i~NmahAtejA bhUtvA kR^iShNo mahAghanaH | diviatoyena haviShA tarpayAmAsa medinIm ||3-9-14 tataH kShIranikAshena svAdunA paramAmbhasA | shivena puNyena mahI nirvANamagamatparam ||3-9-15 te nagA jalasa~nChannAH payasaH sarvatodharAH | ekArNavajalA bhUtvA sarvasattvavivarjitAH ||3-9-16 mahAbhUtAnyapi cha taM praviShTAnyamitaujasam | naShTArkapavanAkAshe sUkShme janavivarjite ||3-9-17 saMshoShayitvA pItvA cha [kalpayitvAcha dehinam | dagdhvA santApayitvA cha] vasatyekaH sanAtanaH | paurANaM rUpamAsthAya kimapyamitabuddhimAn ||3-9-18 ekArNavajale hyAsIdyogI yogamupAgataH | ayutAnAM sahasrANi gatAnyekArNavo.ambhasi | na chainaM kashchidavyaktaM vyaktaM veditumarhati ||3-9-19 janamejaya uvAcha ekarNavavidhiH yo.ayaM yashchaiva parikIrtitaH | ka eSha puruSho nAma kiMyogaH kashcha yogavAn ||3-9-20 vaishampAyana uvAcha etAvantamasau kAlamekArNavavidhiM prati | kariShyatImaM bhagavAniti kashchinna budhyate ||3-9-21 na vai mAtA na cha draShTA na j~nAtA naiva pArshvagaH | tato.avaj~nAyate kashchidR^ite taM devamIshvaram ||3-9-22 nabhaH kShitiM pavanamatha prakAshaya- nprajApatiM bhuvanacharaM sureshvaram | pitAmahaM shrutinilayaM mahAmuniM shashAsa bhUH shayanamarochayatprabhuH ||3-9-23 iti shrImahAbhArate khileShu harivaMshe bhaviShyaparvaNi puShkaraprAdurbhAve navamo.adhyAyaH