##Harivamsha Maha Puranam - Part 3 - Bhavishya Parva Chapter 33 The Divine Sleep and the Waking up Itranslated by G. Schaufelberger schaufel @ wanadoo.fr September 24, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha trayastriMsho.adhyAyaH varAhaprAdurbhAvavarNanam janamejaya uvAcha prAdurbhAvaH purANeShu viShNoramitatejasaH | satAM kathayatAM vipra vArAha iti naH shrutaH ||3-33-1 na jAnate.asya charitaM na vidhiM naiva vistaram | na karma guNavadbhAvaM na hetuM na manIShitam ||3-33-2 kimAtmako varAho.asau kA mUrtiH kAsya devatA | kimAchAraH kimprabhAvaH kiM vA tena purA kR^itam ||3-33-3 etanme saMshayatvena vArAhaM shrutivistaram | yaj~nArthaM cha sametAnAM dvijAtInAM mahAtmanAm ||3-33-4 vaishampAyana uvAcha etatte kathayiShyAmi purANaM brahmasaMmitam | nAnAshrutisamAyuktaM kR^iShNadvaipAyaneritam | mahAvarAhacharitaM kR^iShNasyAdbhutakarmaNaH ||3-33-5 yathA nArAyaNo rAjanvArAhaM vapurAsthitaH | daMShTrayA gAM samudrasthAmujjahArArisUdanaH ||3-33-6 ChAndasIbhirudArAbhiH shrutibhiH samalaMkR^itaH | shuchiH prayatnavAnbhUtvA nibodha janamejaya ||3-33-7 idaM purANaM paramaM puNyaM vedaishcha saMmitam | nAnAshrutisamAyuktaM nAstikAya na kIrtayet ||3-33-8 purANametadakhilaM sAMkhyaM yogaM tathaiva cha | kArtsnyena vidhinA proktaM yo.asyArthaM j~nAsyate pumAn ||3-33-9 vishvedevAstathA sAdhyA rudrAdityAstathAshvinau | prajAnAM patayashchaiva sapta chaiva maharShayaH ||3-33-10 manaHsa~NkalpajAshchaiva pUrvajAshcha maharShayaH | vasavo.apsarasashchaiva gandharvA yakSharAkShasAH ||3-33-11 daityAH pishAchA nAgAshcha bhUtAni vividhAni cha | brAhmaNAH kShatriyA vaishyAH shUdrA mlechChAdayo bhuvi ||3-33-12 chatuShpadAni sarvANi tiryagyonigatAni cha | ja~NgamAni cha sattvAni yachchAnyajjIvasaMj~nitam ||3-33-13 pUrNe yugasahasrAnte brAhme.ahani tathAgate | nirvANe sarvabhUtAnAM sarvotpAtasamudbhave ||3-33-14 hiraNyaretAstrishikastato bhUtvA vR^iShAkapiH | shikhAbhirvividhA.NllokAntsaMshoShayati dehinaH ||3-33-15 dahyamAnAstatastasya tejorAshibhiragrataH | vivarNavarNA dagdhA~NgA hatArchiShmadbhirAnanaiH ||3-33-16 sA~NgopaniShadA vedA itihAsapurogamAH | sarvavidyAshrAyashchaiva satyadharmaparAyaNAH ||3-33-17 brahmANamagrataH kR^itvA Chandato vishvatomukham | sarve devagaNAshchaiva trayastriMshachcha koTayaH ||3-33-18 tasminnahani saMprApte taM haMsaM mahadakSharam | pravishanti mahAyogaM hariM nArAyaNaM prabhuM ||3-33-19 teShAM bhUyaH praviShTAnAM nidhanotpattiruchyate | yathA sUryasya satatamudayAstamayAviha ||3-33-20 pUrNe yugasahasrAnte kalpo niHsheSha uchyate | tasmi~njIvakR^itaM sarvaM niHsheShamavatiShThate ||3-33-21 saMhR^itya lokAnsarvAnsa sadevAsurapannagAn | kR^itvAtmagarbhe bhagavAnAsta eko jagadguruH ||3-33-22 yaH sraShThA sarvabhUtAnAM kalpAnteShu punaH punaH | avyaktaH shAshvato devastasya sarvamidaM jagat ||3-33-23 naShTArkakiraNe loke chandrarashmivivarjite | tyaktabhUtAgnipavane kShINayaj~navaShaTkriye ||3-33-24 apakShigaNasa~NghAte sarvaprANyachare pathi | amaryAdAkule raudre sarvatastamasA vR^ite ||3-33-25 adR^ishye sarvaloke.asminnabhAve sarvakarmaNAm | prashAnte sarvasaMpAte naShTe vairaparigrahe ||3-33-26 gate svabhAvasaMsthAnaM loke nArAyaNAtmake | parameShThI hR^iShIkeshaH shayanAyopachakrame ||3-33-27 pItavAsA lohitAkShaH kR^iShNo jImUtasannibhaH | shikhAsahasravikachaM jaTAbhAraM samudvahan ||3-33-28 shrIvatsakalilaM puNyaM raktachandanabuUShitam | vakSho bibhranmahAbAhuH savidyudiva toyadaH ||3-33-29 puNDarIkasahasrasya mAlAsya shushubhe tadA | patnI chaiva svayaM lakShmIrdehamAvR^itya tiShThati ||3-33-30 tataH svapiti dharmAtmA sarvalokapitAmahaH | kimapyamitavikrAnto nidrAyogamupAgataH ||3-33-31 tato varShasahasre tu pUrNe sa puruShottamaH | svayameva vibhurbhUtvA budhyate vibudhAdhipaH ||3-33-32 tatashchintayate bhUyaH sR^iShTiM lokasya lokakR^it | pitR^idevAsuranarAnpArameShThyena karmaNA ||3-33-33 tatashchintayataH kAryaM deveShu samiti~njayaH | saMbhavaM sarvalokasya vidadhAti sa vAkpatiH ||3-33-34 kartA chaiva vikartA cha saMhartA cha prajApatiH | dhAtA vidhAtA cha tathA saMyamo niyamo yamaH ||3-33-35 nArAyaNaparA devA nArAyaNaparAH kriyAH | nArAyaNaparo yaj~no nArAyaNaparA shrutiH ||3-33-36 nArAyaNaparo mokSho nArAyaNaparA gatiH | nArAyaNaparo dharmo nArAyaNaparaM kratuH ||3-33-37 nArAyaNaparaM j~nAnaM nArAyaNaparaM tapaH | nArAyaNaparaM satyaM nArAyaNaparaM padam | nArAyaNaparo devo na bhUto na bhaviShyati ||3-33-38 svayaMbhUriti vij~neyaH sa brahmA bhuvanAdhipaH | sa vAyuriti vij~neya eSha yaj~naH sanAtanaH ||3-33-39 sadasachcha sa vij~neyaH sa yaj~naH sa prajAkaraH | yadveditavyaM tridashaistadeSha parivindati ||3-33-40 yachcha vedyaM bhagavato devA api na tadviduH | prajAnAM patayaH sapta R^iShayashcha sahAmaraiH ||3-33-41 nAsyAntamadhigachChanti tato.ananta iti shrutiH | yadasya paramaM rUpaM tatra pashyanti devatAH ||3-33-42 prAdurbhAveShu saMbhUtaM yattadarchanti devatAH | yanna darshitavAndevaH kastadanveShTumarhati ||3-33-43 grAmaNIH sarvabhUtAnAmagnimArutayorgatiH | tejasastapasashchaiva nidhAnamamR^itasya cha ||3-33-44 chaturAshramavarNeShu chaturhotraphalAshanaH | chatuHsAgaraparyantashchaturyugavivartakaH ||3-33-45 tadeSha saMhR^itya jagatkR^itvA garbhasthamAtmanaH | mumochANDaM mahAyogI dhR^itaM varShasahasrikam ||3-33-46 surAsuradvijabhujagApsarogaNai- rmahauShadhikShitidharayakShaguhyakaiH | prajApatiH shrutidhararakShasAM kulaM tadAsR^ijajjagadidamAtmanA prabhuH ||3-33-47 iti shrImahAbhArate khileShu harivaMshe bhaviShyaparvaNi vArAhe prAdurbhAve trayastriMsho.adhyAyaH