##Harivamsha Maha Puranam - Part 3 - Bhavishya Parva Chapter 38 Fight Breaks out between Devas and Asuras - Indra Paralysed Itranslated by G. Schaufelberger schaufel @ wanadoo.fr October 15, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- athAShTAtriMsho.adhyAyaH devAsurayuddhodyogaH tadyuddhavarNanaM cha vaishampAyana uvAcha kadAchittu sapakShAste parvatA dharaNIdharAH | prasthitA dharaNIM tyaktvA nUnaM tasyaiva mAyayA ||3-38-1 tadAsurANAM nilayaM hiraNyAkSheNa pAlitam | dishaM pratIchImAgatya hR^ide.amajjanyathA gajAH ||3-38-2 tatrAsurebhyaH shaMsanta AdhipatyaM surAshrayam | tachChrutvAthAsurAH sarve chakrurudyogamuttamam ||3-38-3 krUrAM cha buddhimatulAM pR^ithivIharaNe ratAH | AyudhAni cha sarvANi jagR^ihurbhImavikramAH ||3-38-4 chakrAshanIMstasthA khaDgAnbhushuNDIshcha dhanuMShi cha | prAsAnpAshAMshcha shaktIshcha musalAni gadAMstathA ||3-38-5 kechitkavachinaH sajjA mattanAgAMstathA pare | kechidashvarathAnyuktA apare.ashvAnmahAsurAH ||3-38-6 kechiduShTrAMstathA khaDgAnmahiShAngardabhAnapi | svabAhubalamAsthAya kechichchApi padAtayaH ||3-38-7 parivArya hiraNyAkShaM talabaddhAH kalApinaH | itashchetashcha nishcherurhR^iShTAH sarve yuyutsavaH ||3-38-8 tato devagaNAH pashchAtpuraMdarapurogamAH | daityAnAM viditodyogAshchakrurudyogamuttamam ||3-38-9 mahatA chatura~NgeNa balena susamAhitAH | baddhagodhA~NgulitrANAstUNavantaH samArgaNAH ||3-38-10 ugrAyudhadharA devAH sveShvanIkeShvavAsthitAH | airAvatagataM shakramanvagachChanta pR^iShThataH ||3-38-11 tatastUryaninAdena bherINAM cha mahAsvanaiH | abhyadravaddhiraNyAkSho devarAjaM puraMdaram ||3-38-12 tIkShNaH parashunistriMshairgadAtomarashaktibhiH | musalaiH paTTishaishchaiva chChadayAmAsa vAsavam ||3-38-13 tato.astrabalavegena sArchiShmatyaH sudAruNAH | ghorarUpA mahAvegA nipeturbANavR^iShTayaH ||3-38-14 shiShTAshcha daityA balinaH sitadhAraiH parashvadhaiH | parighairAyasaiH khaDgaiH kShepaNIyaishcha mudgaraiH ||3-38-15 gaNDashailaishcha vividhaiH raShmibhishchAdrisannibhaiH | ghAtanIbhishcha gurvIbhiH shataghnIbhistathaiva cha ||3-38-16 yugairyantraishcha nirmuktairargalaishcha vidAraNaiH | sarvAn devagaNAndaityAH sannijaghnuH savAsavAN ||3-38-17 dhUmrakeshaM harishmashruM nAnApraharaNAyudhaM | raktasaMdhyAbhrasa~NkAshaM kirITottamadhAriNam ||3-38-18 nIlapItAmbaradharaM shatadaMShTrordhvadhAriNam | AjAnubAhuM haryakShaM vaiDUryAbharaNojjvalam ||3-38-19 samudyatAyudhaM dR^iShTvA sarve devagaNAstadA | te hiraNyAkShamasuraM daityAnAmagrataH sthitam ||3-38-20 yugAntasamaye bhImaM sthitaM mR^ityumivAgrataH | pravivyathuH surAH sarve tadA shakrapurogamAH ||3-38-21 dR^iShTvA.a.ayAntaM hiraNyAkShaM mahAdrimiva ja~Ngamam | devAH saMvignamanasaH pragR^ihItasharAsanAH ||3-38-22 sahasrAkShaM puraskR^itya tasthuH sa~NgrAmamUrdhani | sA cha daityachamU reje hiraNyakavachojjvalA ||3-38-23 pravR^iddhanakShatragaNA shAradI dyaurivAmalA | te.anyonyamapi saMpetuH pAtayantaH parasparam ||3-38-24 babha~njurbAhubhirbAhUndvandvamanye yuyutsavaH | gadAnipAtairbhagnA~NgA bANaishcha vyathitorasaH ||3-38-25 vinipetuH pR^ithakkechittathAnye.api vijaghnire | babha~njire rathAnkechitkechitsaMmArditA rathaiH ||3-38-26 saMbAdhamanye saMprAptA na shekushchalituM rathAt | dAnavendrabalaM tatra devAnAM cha mahadbalam ||3-38-27 anyonyabANavarSheNa yuddhadurdinamAbabhau | hiraNyAkShastu balavAnkruddhaH sa ditinandanaH ||3-38-28 vyavardhata mahAtejAH samudra iva parvaNi | tasya kruddhasya sahasA mukhAnnishcherurarchiShaH ||3-38-29 [ sAgnidhUmashcha pavano yayau tasya samIpataH ] shastrajAlairbahuvidhairdhanurbhiH parighairapi | sarvamAkAshamAvavre parvatairutthitairiva ||3-38-30 bahubhiH shastranistriMshaishChinnabhinnashirorasaH | na shekushchalituM devA hiraNyAkShArditA yudhi ||3-38-31 sarve vitrAsitA devA hiraNyAkSheNa saMyuge | na shekuryatnavanto.api yatnaM kartuM vichetasaH ||3-38-32 tena shakraH sahasrAkShaH stambhito.astreNa dhImatA | airavatagataH sa~Nkhye nAshakachchalituM bhayAt ||3-38-33 sarvAMshcha devAnakhilAntsa parAjitya dAnavaH | stambayitvA cha deveshamAtmasthaM manyate jagat ||3-38-34 satoyameghapratimograniHsvanaM prabhinnamAta~NgavilAsAvigraham | dhanurvidhunvantamudAravarchasaM tadA surendraM dadR^ishuH surAH sthitAH ||3-38-35 iti shrImahAbhArate khileShu harivaMshe bhaviShyaparvaNi vArAhe shakrastambhane aShTAtriMsho.adhyAyaH