##Harivamsha Maha Puranam - Part 3 - Bhavishya Parva Chapter 52 Devas Prepare for Battle Itranslated by G. Schaufelberger schaufel @ wanadoo.fr November 9, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha dvipa~nchAshattamo.adhyAyaH devasainyAnAM yuddhodyogaH vaishampAyana uvAcha shrutaste daityasainyasya vistaro janamejaya | bhUyastridashasainyasya shR^iNu vistaramAditaH ||3-52-1 surAdhipastu bhagavAnAj~nApayata vai surAn | marudgaNAMstathAdityAnvishvAndevAMshcha vAsavaH ||3-52-2 vasUnaShTau bhR^ishaM sarvAnyakSharakShomahoragAn | vidyAdharagaNAnsarvAngandharvAMshcha mahAbalAn ||3-52-3 mahArNavAMshcha shailAMshcha tathA rudrAnmahaujasaH | yamavaishravaNau chobhau varuNaM cha janAdhipam ||3-52-4 ye tu siddhA mahAtmAnaH pitarashcha manasvinaH | rAjarShayashcha shatasho yogasiddhAstathaiva cha ||3-52-5 tridashAj~nApakaH shakra Aj~nApayati vIryavAn | bhavanto daityanAshAya sannahyantAmiti prabhuH ||3-52-6 shakrasya vachanaM shrutvA tataH sarve divaukasaH | sannahyanta mahAtmAnaH shakrasya samavikramAH ||3-52-7 nAnAkavachinaH sarve vichitrakavachadhvajAH | nAnAyudhodyatakarA mattA iva mahAgajAH ||3-52-8 kechidAruruhurvyAghrAnkechidAruruhurgajAn | kechidAruruhurnAgAnkechidAruruhurvR^iShAn ||3-52-9 harinetro harishmashrurdviradairAvR^itadhvajam | rathaM harihayairyuktaM sa prAyAtsamaraM prati ||3-52-10 AdityavarNaM virajaM sudhautaM tvaShTrA svayaM nirmitamIshvarArtham | jAlaishcha jAmbUnadabhaktichitrai- ralaMkR^itaM kA~nchanadAmabhishcha ||3-52-11 sakUbaropaskarabandhureShaM vidyutprabhAbhiH kR^itamAbhitAmram | kailAsashR^i~NgopamamindrayAnaM suchAruchArupratichakrachakram ||3-52-12 tArAsahasraiH khachitaM jvaladbhi- rdevArhamAlyArchitasarvadeham | samuchChritaM shrIdhvajamakShayAkShaM prajvAlyamAnaM puruShottamena ||3-52-13 AsthAya taM bhAskaramAshuvegaM shachipatirlokapatiH sureshaH | vajrasya dhartA bhuvanasya goptA yayau mahAtmA bhagavAnmahendraH ||3-52-14 Amuchya varmAtha sahasratAraM hutAshanAdityasamaprabhAvam | sUryaprabhaM chAmumuche kirITaM mAlAM cha jAmbUnadavaijayantIm ||3-52-15 tvaShTrA kR^itaM bhAskararashmidIptaM sutIkShNaghorAmalatIvradhAram | mahAsurANAM rudhirArdramugraM jagR^ihya vajraM shataparvabhImam ||3-52-16 mahAshanI dve cha mahAgrahabhe dIptAmamoghAM cha sa shaktimugrAm | chakraM tathaindraM sumahatpratApaM pragR^ihya shakraH prayayau raNAya ||3-52-17 sahasradR^igbhUtapatiH sanAtanaH sanAtanAnAmapi yaH sanAtanaH | khaDgaM cha devAdhipatirmahAtmA vaiyAghramAdAya cha charma chitram ||3-52-18 kShIrodadhikShobhasamuchChritAni purAmR^itAduttamabhUShaNAni | devAsurANAM samanirjitAni somArkanakShatrataDitprabhANi ||3-52-19 dattAnyadityA maNikuNDalAni yuddhe prayAtasya sureshvarasya | tairbhUShito bhAti sahasrachakShu- ruddyotayanvai vidisho dishashcha ||3-52-20 hariH prabhurnetrasahasrachitro vibhAti yuddhAbhimukhaH surendraH | yathA sitaM shAradamabhrakalpaM nabhastalaM hyR^ikShasahasrachitram ||3-52-21 stuvanti yAntaM vipilairvachobhi- rjayAshiShA chorjitasattvavIryam | atrirvasiShTho jamadagnirurvo bR^ihaspatirnAradaparvatau cha ||3-52-22 tamanvayurdevagaNA mahendraM prayAntamAdityasamAnavarchasam | vishve cha devA marutastathaiva sAdhyAstathAdityagaNAshcha sarve ||3-52-23 te devarAjasya puraMdarasya hayAshcha ye mAtalisa~NgR^ihItAH | prayAnti deveshvaramudvahanto nabhastalaM padbhirivAkShipantaH ||3-52-24 brahmarShayashchaiva maharShayashcha rAjarShayashchAkShayapuNyalokAH | sarve.anujagmuH sahasA jvalantaM tejo.anvitaM shakramamitrasAham ||3-52-25 pragR^ihya shUlAMshcha parashvadhAMshcha dIptAni chApAnnyashanIrvichitrAH | varmANi chAmuchya hiraNmayAni prayAnti suryAMshusamaprabhANi ||3-52-26 tathA kubero.ashvasahasrayuktaM shreShThaM rathaM sarvasahaM mahArham | divyaM samAruhya raNAya yato dhaneshvaro dIptagadAgrahastaH |3-52-27 nishAcharAH pAvakadhUmakAyA rakShovR^iShA rudrasakhasya tasya | vishAlanAnAyudhadIptahastA yAntyagrato vaishravaNasya rAj~naH ||3-52-28 te lohitAkShAH parivArya devaM vrajanti bhinnA~njanachUrNavarNAH | yakShottamA yakShapatiM dhaneshaM rakShanti vai pAshagadAsihastAH ||3-52-29 puNyaH prabhuH prANapatirjitAtmA vaivasvato dharmabhR^itAM variShThaH | taDidgaNAbhaM shatavAjiyuktaM rathaM samArohata sUryakalpam ||3-52-30 taM lokapAlaM pitaro.anujagmu- rviviktapApA jvalitAstapobhiH | sarve cha bhUtA bhuvanapradhAnA nAnAyudhavyagrakarAH subhImAH ||3-52-31 daNDaM mahAstraM parigR^ihya devo lokA~NkushaM nigrahanishchitArtham | hiraNmayAnAM kamalotpalAnAM mAlAM manoj~nAmavasajya kaNThe ||3-52-32 sthito.asthimedAmiShalohitArdraM sarvAsurANAM nidhanaM virUpam | tejomayaM mudgaramugrarUpaM vikarShamANo.aruNadhUmranetraH ||3-52-33 samanvito vyAdhishatairanekai- ryayau harishmashrurudArasattvaH | mahAsurANAM nidhanAya buddhiM chakre tadA vyAdhipatiH kR^itAntaH ||3-52-34 tatastrishIShairbhujagairbR^ihadbhi- ryuktaM rathaM hemachitaM mahAtmA | AsthAya kundendunibhaM jalesho yayau raNAyAsuradarpahantA ||3-52-35 vaiDUryamuktAmaNibhUShitA~Nga- stejomayaH pAshagR^ihItahastaH | mahAsurANAM nidhanAya devaH prayAti rUpyA~NgadabaddhabAhuH ||3-52-36 [ anvIyamAno jaladevatAbhi- rniShechyamANo jalajalaishcha sattvaiH | saMstUyamAnashcha maharShivR^indaiH saMpUjyamAnashcha mahAbhuja~NgaiH ] kailAsashR^~Ngapratimo.aprameyaH samudranAtho.amR^itapo mahAtmA | mahoragaiH svaistanayaiH sugupto yayau rathenArkasamaprabheNa ||3-52-37 yuddhAyataM yAntamadInasattvaM nabhastale chandramivAtikAntam | pashyanti bhUtAni mahAnubhAvaM saMhR^iShTaromANi kR^itA~njalIni ||3-52-38 dhAtAryamAMsho.atha bhago vivasvA- nparjanyamitrau cha shachI cha devaH | tvaShTA tathaivorjitavishvakarmA pUShA cha sAkShAddivi devarAjaH ||3-52-39 saurachChadaiH sadhvajaki~NkiNIkai- rvaiDUryaniShkaishchitahemakaNThaiH | hayairvaraiH shakrarathaprakAshai- ryuktAnrathAnAruruhuH surAste ||3-52-40 divAkarAkAranibhAni kechi- ddhutAshanArchiHpratimAni kechit | nishAkarAMshupratimAni kechi- ttaDidgaNoddyotanibhAni kechit ||3-52-41 nIlAMshumeghapratimAni kechi- tkArShNAyasAkAranibhAni kechit | varmANi divyAni mahAprabhANi tvaShTrA kR^itAnyuttamabhAnumanti ||3-52-42 Amuchya mAlAshcha suvarNapuShpAH prayAnti toyanilatulyavegAH | dvAvashvinau chaiva mahAnubhAvau rUpottamau dharmabhR^itAM variShThau ||3-52-43 rathaM samAruhya suvarNachitraM raNaM gatau kA~nchanatulyavarNau | bhAnoH sutA vai vasavashcha sarve balotkaTA daityavadhAya devAH ||3-52-44 rathAMshcha nAgAMshcha mahApramANA- nAsthAya jagmuH sushubhAstrahastAH | rudrAshcha sarve.aruNadhUmavarNAH shvetairyayurgopatibhirbR^ihadbhiH ||3-52-45 mahaujasaH sarvaguNopapannA dIptAtmano bhAbhiriva jvalantaH | nAnAyudhavyagrakarairbhujaistai- rlokAnsamastAniva nirdahantaH ||3-52-46 yayuH sasainyAstapanIyanaddhAH savidyutastoyadharA yathaiva | vishve cha devAstapasA jvalanto vIryottamAH sUryamarIchivarNAH ||3-52-47 yayuH sasainyA yudhi durnivAryA balotkaTAH padmasahasramAlAH | rathaiH suyuktaistapanIyavarNai- rvaiDUryamuktAmaNidAmachitraiH ||3-52-48 nAnAvidhAkArasamAkulAste pAriplavaishchaiva sitAtapatraiH | tejomayaiH kA~nchanachAruchitraiH sunirmalaiH pAvakasannibhAste ||3-52-49 urachChadaiH sadhvajaki~NkiNIkai- rhayaishcha vAyoH samavegavadbhiH | dishAM gajaishchaiva mahAbalaistaiH kailAsashR^i~NgapratimairmahadbhiH ||3-52-50 prajagmurugrAyudhachApahastA- shchaturyugAnte jvalitA ivolkAH | sAdhyAshcha devAH sumahAprabhAvAH svAdhInachakrAH pratidIptavaktrAH | prayAnti jAmbUnadabhUShitA~NgA gA~NgaughamAtrairgaganairbalaughaiH ||3-52-51 vidyotayanto vidisho dishAshcha mahAbalAste jayatAM variShThAH | variShThapuShTauShThabhujAH sudR^iptA vaishvAnarArkapratimaprabhAvAH ||3-52-52 te brahmavidbhishcha samasyamAnAH saMpUjyamAnAshcha suraiH sashakraiH | gandharvasa~NghairanugamyamAnA vadhAya teShAmasurAdhipAnAm ||3-52-53 vaiDUryavajrasphaTikAgrachitrai- rdhvajaiH suvarNaishcha pariShkR^itAnAm | rUpaM babhau chotkaTAbhuShanAnAM daityendranAshAya vibhUShitAnAm ||3-52-54 AtmaprabhhAbhishcha raNotkaTAbhi- rvarmaprabhAbhishha tamonudAbhiH | dhvajottamAbhiH svasharIrabhAbhi- rmahAprabhAbhishcha mahojjvalAbhiH ||3-52-55 vibhAnti te devavarAH sasAdhyAH pradhmAtasha~NkhasvanasiMhanAdAH ||3-52-56 mahArathasthAstridivaukasaste mahAbalAH shatrubalaM prayAnti | mahAstrahastA yayurugrakAyA mahAsurANAM nidhanAya devAH ||3-52-57 tathaiva sarve mahato.ativIryA balotkaTAste samaraM pratItAH | yayurmahAmeghasamAnavarNA- shchakrAyudhAstoyadanAdanAdAH |V3-52-58 mahendraketupratimA mahAbalAH pragR^ihya sarvAsurasUdanAM gadAm | raNotkaTA lohitachandanAktAH sahemamAlyAmbarabhUShitA~NgAH ||3-52-59 te yuddhashauNDAH sabhujAstravIryA balotkaTAH krodhaviloDitAkShAH | yayuH sajAmbUnadapadmamAlA yatheShTanAnAvidhakAmarUpAH | khaDgaprabhAshyAmalitAMsapIThAH puraMdaraM vai parivArya devAH ||3-52-60 vaiDUryachAmIkarachArurupA- NyAbadhya gAtreShu mahAprabhANi | varmANi daityAstranivAraNAni prayAnti yuddhAya sapatnasAhAH ||3-52-61 tairutthitaiH kA~nchanavedikADhyai- rvaradhvajairbhAskararashmivarNaiH | yayau surANAM pR^itanograbhAsA samunnadantI yudhi siMhanAdAn ||3-52-62 ityevamuktaM tridiveshvarasya sainyaM tadAsItsumahatprabhAvam | yuddhaM prayAtasya jayAvahasya vadhAya teShAmasurAdhipAnAm ||3-52-63 iti shrImahAbhArate khileShu harivaMshe bhaviShyaparvaNi vAmanaprAdurbhAve dvipa~nchAshattamo.adhyAyaH