##Harivamsha Maha Puranam - Part 3 - Bhavishya Parva Chapter 53 Battle Begins between Devas and Asuras Itranslated by G. Schaufelberger schaufel @ wanadoo.fr November 10, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha tripa~nchAshattamo.adhyAyaH devAsurayuddhAdyAraMbhe sanakAdyAgamanam vaishampAyana uvAcha tataH pravR^itto.asuradevavigraha- stadadbhuto bhAti surAsurAkulaH | velAmatikramya yugAntakAle mahArNavAnyonyamivAshrayantaH ||3-53-1 nAnAyudhoddyotavidIpitA~NgA mahAbalA vyAyatakArmukAste | raNotsukhA vAraNahastahastAH sudurjayAstoyadanAdanAdAH ||3-53-2 visphArayantaH sahasA dhanUMShi chakrANi chAdityasamaprabhANi | samutkShipanto hyashanIshcha ghorAn khaDgAMshcha te vajramukhAshcha shaktIH ||3-53-3 mahAgadAH kA~nchanapaTTanaddhA- stathAyasAnkarmukamudgarAMshcha | shUlAMshcha vR^ikShAMshcha vigR^ihya dIptA- nnadanti shUrAH shatasho raNasthAH ||3-53-4 vaishampAyana uvAcha etasminnantare teShAmanyonyamabhinighnatAm | dvandvayuddhAnyavartanta devAnAM dAnavaiH saha ||3-53-5 marutAM pa~nchamo yastu sa bANenAbhyayudhyata | mahAbalaH suravaraH sAvitra iti yaM viduH ||3-53-6 anAyuShAyAH putrastu balo nAma mahAsuraH | so.ayudhyata raNe.atyugro dhrUveNa vasunA saha ||3-53-7 namuchishchAsurashreShTho dhareNa saha yudhyata | pravarau vishvakarmANau khyAtau devAsureshvarau ||3-53-8 pulomA tu mahAdaityo vAyunA saha yudhyata | sasainyaH parvatAkAro raNe.ayudhyata daMshitaH ||3-53-9 hayagrIvastu ditijaH saha pUShNA tvayudhyata | shUreNAmitavIryeNa bhAskarAkAravarchasA ||3-53-10 shamburastu mahAdaityo mahAmAyo mahAsuraH | bhagenAyudhyata tadA sahito yuddhadurmadaH ||3-53-11 sharabhaH shalabhashchaiva daityAnAM chandrabhAskarau | prayuddhau saha somena shaishirAstreNa dhImatA ||3-53-12 virochanastu balavAn balerbalavataH pitA | viShvaksenena sAdhyena devena cha sa yudhyata ||3-53-13 kujambhastu mahAtejA hiraNyakashipoH sutaH | aMshenAyudhyata tadA prAsapraharaNena vai ||3-53-14 asilomA tu balinA mArutena samaM vibho | tadAyudhyata dIptAsyo vikR^itaH parvatAyudhaH ||3-53-15 anAyuShAyAH putrastu vR^itro nAma mahAsuraH | ashvibhyAM devavaidyAbhyAM saha yudhyata saMyuge ||3-53-16 ekachakrastu ditijashchakrahasto durAsadaH | sahAyudhyata devena sAdhyena ditijAriNA || 3-53-17 balastu madhupi~NgAkSho vR^itrabhrAtA mahAsuraH | mR^igavyAdhena rudreNa sahAyudhyata vIryavAn ||3-53-18 rAhustu vikR^itAkAraH shatashIrShA mahodaraH | ajaikapAdena raNe sahAyudhyata daMshitaH ||3-53-19 keshI tu dAnavashreShThaH prAvR^iTkAlAmbudaprabhaH | dhaneshvareNa bhImena sahAyudhyata saMyuge ||3-53-20 vR^iShaparvA tu balinA nikumbhena mahAraNe | vishvedevena vihshveshaH sahAyudhyata vIryavAn ||3-53-21 prahlAdastu mahAvIryo vIraiH svaistanayairvR^itaH | yuyudhe saha kAlena raNe kAla ivAparaH ||3-53-22 anuhrAdaH kubereNa dhanadena mahAraNe | gadAhastena yuyudhe shobhayanripuvAhinIM ||3-53-23 viprachittistu daiteyo varuNena mahAtmanA | pravR^itto vai raNaM kartuM daityANAM nandivardhanaH ||3-53-24 balistu saha shakreNa sureshena mahAtmanA | yuyudhe devarAjena balinA balavAnraNe ||3-53-25 sheShA devAshcha daityAshcha jaghnuranyonyamAhave | vinardanto mahAnAdAnprAsAsisharashaktibhiH ||3-53-26 adR^ishyanta mahotpAtA ye proktA jagataH kShaye | mArutAH sapta te kShubdhA vyashIryanta mahIdharAH ||3-53-27 sapta chaivotthitAH sUryAH shoShayanto mahArNavAn | bahunAbhidyata dharA vAyunA mathitA yathA ||3-53-28 vyutthitAshcha mahAmeghAH shakrachApA~NkitodarAH | praNeduH sarvabhUtAni sarvAH satimirA dishaH ||3-53-29 devAnAmajayo ghoro dR^ishyate kAlanirmitaH | ghorotpAtaH samudbhUto yugAntasamaye yathA ||3-53-30 na hyantarIkShaM na disho na bhUmi- rna bhAskaro.adR^ishyata reNujAlaiH | vavushcha vAtAstumulAH sudhUmA dishashcha sarvAstimiropagUDhAH ||3-53-31 ete chAnye cha bahavo dR^ishyante devanirmitAH | bhUmau tathAntarikShe cha mahotpAtAH samantataH ||3-53-32 tadyuddhaM devairdaityAnAM bhImAnAM bhImadarshanam | apashyata gururbrahmA sarvaireva suraiH saha ||33-53-33 vedaishchaturbhiH sA~Ngaishcha vidyAbhishcha sanAtanaH | padmayonirvR^itaH shrImAnsiddhaishcha paramarShibhiH ||3-53-34 nAnAmaNistambhasahasrachitra- mAruhya yAnaM dadR^ishe svayaMbhUH | subhAsvaraM bhUtasahasrayuktaM pradIpyamAnaM vapuShA vareNa ||3-53-35 sutaptajAmbUnadabhaktichitra- mAnandabherIshatasaMpraNAdam | nakShatrachaNDAMshubhiraMshumantaM vaiDUryasomArkavibhUShitA~Ngam ||3-53-36 tamAtmajo vai pulahaM pulastya- stathA marIchirbhR^igura~NgirAshcha | R^iksAmabhiH samyagabhiShTuvantaH sevanti devaM varadaM vimAne ||3-53-37 taM pAvakA lokaguruM svayaMbhuvaM sA~NgAshcha vedA makhadevatAshcha | sevanti devaM bhuvaneshvareshaM bhUtAni chAnyAni mahAnubhAvam ||3-53-38 ete babhUvushcha maharShisa~NghA vaishvAnarAH pAvakayonayashcha | sarve yayurdevapurohitAshcha yuddhotsukAH sarvasurAsurANAm ||3-53-39 yogeshvarAH ShaT cha divAkarAbhA vibhUShaNairbhUShitasarvadehAH | antarhitA vai dadR^ishurnabhaHsthA nArAyaNashchaiva narashcha devAH ||3-53-40 vaktraishchaturvedadharaishchaturbhiH saMpUrNachandrapratimaiH sukAntaiH | sarvA disho nistimirAshchakAra navodito.asau sharadIva chandraH ||3-53-41 iti shrImahAbhArate khileShu harivaMshe bhaviShyaparvaNi devAsurayuddhe sanakAdikAgamanaM nAma triipa~nchAshattamo.adhyAyaH