##Harivamsha Maha Puranam - Part 3 - Bhavishya Parva Chapter 71 Vamana Transforms to Trivikrama Itranslated by G. Schaufelberger schaufel @ wanadoo.fr December 17, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- athaikasaptatitamo.adhyAyaH vAmanasya baliyaj~ne gamanaM tripAdabhUmilAbhaH trivikramamUrtidhAraNaM cha vaishampAyana uvAcha aho yaj~ne.asureshasya bahubhakShaH susaMskR^itaH | pitAmahasyeva purA yajataH parameShThinaH ||3-71-1 sureshasya cha shakrasya yamasya varuNasya cha | visheShitastvayA yaj~no dAnavendra mahAbala ||3-71-2 yajatA vAjimedhena kratUnAM pravareNa tu | sarvapApavinAshAya tvayA svargapradarshinA ||3-71-3 sarvakAmamayo hyeSha saMmato brahmavAdinAm | kratUnAM pravaraH shrImAnashvamedha iti shrutiH ||3-71-4 suvarNashR^i~Ngo hi mahAnubhAvo lohakShuro vAyujavo mahArathaH | svargekShaNaH kA~nchanagarbhagauraH sa vishvayoniH paramo hi medhyaH ||3-71-5 AsthAya vai vAjinamashvamedha- miShTvA narA duShkR^itamuttaranti | Ahushcha yaM vedavido dvijendrA vaishvAnaraM vAjinamashvamedham ||3-71-6 yathA.a.ashramANAM pravaro gR^ihAshramo yathA narANAM pravarA dvijAtayaH | yathAsurANAM pravaro bhavAniha tathA kratUnAM pravaro.ashvamedhaH ||3-71-7 vaishampAyaba uvAcha etachChrutvA tu vachanaM vAmanena samIritam | mudA paramayA yuktaH prAha daityapatirbaliH ||3-71-8 baliruvAcha kasyAsi brAhmaNashreShTha kimichChasi dadAmi te | varaM varaya bhadraM te yatheShTaM kAmamApnuhi ||3-71-9 vAmana uvAcha na rAjyaM na cha yAnAni na ratnAni na cha striyaH | kAmaye yadi tuShTo.asi dharme cha yadi te matiH ||3-71-10 gurvarthaM me prayachChasva padAni trINi dAnava | tvamagnisharaNArthAya eSha me pravaro varaH | vAmanasya vachaH shrutvA prAha daityapatirbaliH ||3-71-11 baliruvAcha tribhiH kiM tava viprendra padaiH pravadatAM vara | shataM shatasahasrANAM padAnAM mArgatAM bhavAn ||3-71-12 shukra uvAcha mA dadasva mahAbAho na tvaM vetsi mahAsura | eSha mAyApratichChanno bhagavAn pravaro hariH ||3-71-13 vAmanaM rUpamAsthAya shakrapriyahitepsayA | tvAM va~nchayitumAyAto bahurUpadharo vibhuH ||3-71-14 evamuktaH sa shukreNa chiraM sa~nchintya vai baliH | praharSheNa samAyuktaH kimataH pAtramiShyate ||3-71-15 pragR^ihya haste saMbhrAnto bhR^i~NgAraM kanakodbhavam | baliruvAcha viprendra prA~nmukhastiShTha sthito.asmi kamalekShaNa ||3-71-16 pratIchCha dehi kiM bhUmiM kiM mAtrA bhoH padatrayam | dattaM cha pAtaya jalaM naiva mithyA bhavedguruH ||3-71-17 shukra uvAcha bho na deyaM kR^ito daitya vij~nAto.ayaM mayA dhruvam | ko.ayaM viShNuraho prItirva~nchitastvaM na va~nchitaH ||3-71-18 baliruvAcha kathaM sa nAtho.ayaM viShNuryaj~ne svayamupasthitaH | dAsyAmi devadevAya yadyadichChatyayaM vibhuH ||3-71-19 ko vAnyaH pAtrabhUto.asmAdviShNoH parataro bhavet | evamuktvA baliH shIghraM pAtayAmAsa vai jalam ||3-71-20 vAmana uvAcha padAni trINi daityendra paryAptAni mamAnagha | yanmayA pUrvamuktaM hi tattathA na tadanyathA ||3-71-21 vaishampAyana uvAcha ityetadvachanaM shrutvA vAmanasya mahaujasaH | kR^iShNAjinottarIyaM sa kR^itvA vairochanistadA ||3-71-22 evamastviti daityesho vAkyamuktvArisUdanaH | tato vArisamApUrNaM bhR^i~NgAraM sa parAmR^ishat ||3-71-23 vAmano hyasurendrasya chikIrShuH kadanaM mahat | kShipraM prasArayAmAsa daityakShayakaraM karam ||3-71-24 prA~nmukhashchApi daityeshastasmai sumanasA jalam | dAtukAmaH kare yAvattAvattaM pratyaShedhayat ||3-71-25 tasya tadrUpamAlokya hyachintyaM cha mahAtmanaH | abhUtapUrvaM cha harerjihIrShoH shriyamAsurIm ||3-71-26 i~Ngitaj~no.agrataH sthitvA prahrAdastvabravIdvachaH | prahrAda uvAcha mA dadasva jalaM haste vaTorvAmanarUpiNaH ||3-71-27 sa tvasau yena te pUrvaM nihataH prapitAmahaH | viShNureSha mahApraj~nastvAM va~nchayitumAgataH ||3-71-28 baliruvAcha hanta tasmai pradAsyAmi devAyemaM pratigraham | anugrahakaraM devamIdR^ishaM jagataH prabhum ||3-71-29 brahmaNo.api garIyAMsaM pAtraM lapsyAmahe vayam | avashyaM chAsurashreShTha dAtavyaM dIkShitena vai ||3-71-30 ityuktvAsurasa~NghAnAM madhye vairochanistada | devAya pradadau tasmai padAni trINi viShNave ||3-71-31 prahrAdauvAcha dAnaveshvara mA dAstvaM viprAyAsmai pratigraham | nemaM viprashishuM manye nedR^isho bhavati dvijaH ||3-71-32 rUpeNAnena daityendra satyameva bravImi te | nArasiMhamahaM manye tameva punarAgatam ||3-71-33 evamuktastadA tena prahrAdenAmitaujasA | prahrAdamabravIdvAkyamidaM nirbhartsayanniva ||3-71-34 baliruvAcha dehIti yAchate yo hi pratyAkhyAti cha yo.asura | ubhayorapyalakShmyA vai bhAgastaM vishate naram ||3-71-35 pratij~nAya tu yo vipre na dadAti pratigraham | sa yAti narakaM pApI mitragotrasamanvitaH ||3-71-36 alakShmIbhayabhIto.ahaM dadAmyasmai vasuMdharAm | pratigrahItA chApyanyaH kashchidasmAddvijo.atha vai ||3-71-37 nAdhiko vidyate yasmAttaddadAmi vasuMdharAm | hR^idayasya cha me tuShTiH parA bhavati dAnava ||3-71-38 dR^iShTvA vAmanarUpeNa yAchantaM dvijapu~Ngavam | eSha tasmAtpradAsyAmi na sthAsyAmi nivAritaH ||3-71-39 bhUyashcha prAbravIdevaM vAmanaM viprarUpiNam | svalpaiH svallpamate kiM te padaistribhiranuttamam ||3-71-40 kR^itsnAM dadAmi te vipra pR^ithivIM sAgarairvR^itAm | vAmana uvAcha na pR^ithvIM kAmaye kR^itsnAM saMtuShTo.asmi padaistribhiH | eSha eva ruchiShyo me varo dAnavasattama ||3-71-41 vaishampAyana uvAcha tathAstviti baliH prochya sparshayAmAsa dAnavaH | padAni trINi devAya viShNave.amitatejase ||3-71-42 toye tu patite haste vAmano.abhUdavAmanaH | sarvadevamayaM rUpaM darshayAmAsa vai vibhuH ||3-71-43 bhUH pAdau dyauH shirashchAsya chandrAdityau cha chakShuShI | pAdA~NgulyaH pishAchAshcha hastA~Ngulyashcha guhyakAH ||3-71-44 vishvedevAshcha jAnusthA ja~Nghe sAdhyAH surottamAH | yakShA nakheShu saMbhUtA lekhAshchApsarasastathA ||3-71-45 taDidvR^iShTiH suvipulA keshAH sUryAMshavastathA | tArakA romakUpANi romANi cha maharShayaH ||3-71-46 bAhavo vidishashchAsya dishaH shrotre tathaiva cha | ashvinau shravanau chAsya nAsA vAyurmahAbalaH ||3-71-47 prasAdashchandramAshchaiva mano dharmastathaiva cha | satyamasyAbhavadvANI jihvA devI sarasvatI ||3-71-48 grIvA ditirmahAdevI tAluH sUryashcha dIptimAn | dvAraM svargasya nAbhirvai mitrastvaShTA cha vai bhuvau ||3-71-49 mukhaM vaishvAnarashchAsya vR^iShaNau tu prajApatiH | hR^idayaM bhagavAnbrahmA puMstvaM vai vishvato muniH ||3-71-50 pR^iShThe.asya vasavo devA marutaH pAdasandhiShu | sarvachChandAMsi dashanA jyotIMShi vimalAH prabhAH ||3-71-51 UrU rudro mahAdevo dhairyaM chAsya mahArNavaH | Udare chAsya gandharvA bhujagAshcha mahAbalAH ||3-71-52 lakShmIrmedhA dhR^itiH kAntiH sarvavidyA cha vai kaTiH | lalATamasya paramasthAnaM cha paramAtmanaH ||3-71-53 sarvajyotIMShi yAnIha tapaH shakrastu devarAT | tasya devAdhidevasya tejo hyAhurmahAtmanaH ||3-71-54 stanau kakShau cha vedAshcha oShThau chAsya makhAH sthitAH | iShTayaH pashubandhAshcha dvijAnAM cheShTitAni cha ||3-71-55 tasya devamayaM rUpaM dR^iShTvA viShNormahAsurAH | abhyasarpanta sa~NkruddhAH pata~NgA iva pAvakam ||3-71-56 iti shrImahAbhArate khileShu harivaMshe bhaviShyaparvaNi vAmanaprAdurbhAve vishvarUpaprakAshe ekasaptatitamo.adhyAyaH