##Harivamsha Maha Puranam - Part 3 - Bhavishya Parva Chapter 72 Bali Banished to the Netherworld i-translated by G. Schaufelberger schaufel @ wanadoo.fr December 19, 2008## Proof-read by K S Rmachandran, ramachandran_ksr @ yahoo.ca. 13, 14, 16, 18: tathA pare -> tathApare?? If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha dvisaptatitamo.adhyAyaH viShNorAdeshAt baleH pAtAlapraveshaH tatkR^itaviShNustavaH baliM prati garuDasya uktipratyuktI vAmanastavaphalakathanaM cha vaishampAyana uvAcha shR^iNu nAmAni sarveShAM rUpANyabhijanAni cha | AyudhAni cha mukhyAni dAnavAnAM mahAtmanAm ||3-72-1 viprachittiH shibiH sha~NkurayaHsha~Nkustathaiva cha | ayaHshirA ashvashirA hayagrIvashcha vIryavAn ||3-72-2 vegavAnketumAnugraH sogravyagro mahAsuraH | puShkaraH puShkalashchaiva sAshvo.ashvapatireva cha ||3-72-3 prahrAdo.ashvashirAH kumbhaH saMhrAdo gaganapriyaH | anuhrAdo hariharau vArAhaH saMharo rujaH ||3-72-4 vR^iShaparvA virUpAkSho atichandraH sulochanaH | niShprabhaH suprabhaH shrImAMstathaiva cha nirUdaraH ||3-72-5 ekavaktro mahAvaktro dvivaktraH kAlasaMnibhaH sharabhaH shalabhashchaiva kuNapaH kulapaH krathaH ||3-72-6 bR^ihatkIrtirmahAgarbhaH sha~NkukarNo mahAdhvaniH | dIrghajihvo.arkavadano mR^idubAhurmR^idupriyaH ||3-72-7 vAyurgaviShTho namuchiH shambaro vikSharo mahAn | chandrahantA krodhahantA krodhavardhana eva cha ||3-72-8 kAlakaH kAlakAkShashcha vR^itraH krodho vimokShaNaH | gaviShThashcha haviShThashcha pralambo narakaH pR^ithuH ||3-72-9 chandratApanavAtApI ketumAnbaladarpitaH | asilomA pulomA cha bAShkalaH pramado madaH ||3-72-10 shR^igAlavadanashchaiva karAlaH keshireva cha | ekAkShashchaikabAhushcha tuhuNDaH sR^imalaH sR^ipaH ||3-72-11 ete chAnye cha bahavaH kramamANaM trivikramam | upatasthurmahAtmAnAM viShNuM daityagaNAstadA ||3-72-12 prAsodyatakarAH kechidvyAditAsyAH kharasvanAH | shataghnIchakrahastAshcha vajrahastAstathA pare ||3-72-13 khaDgapaTTishahastAshcha parashvadhadharAH pare | prAsamudgarahastAshcha tathA parighapANayaH ||3-72-14 mahAshanivyagrakarA maushalAstu mahAbalAH | mahAvR^ikShodyatakarAstathaiva cha dhanurdharAH ||3-72-15 gadAbhushuNDihastAshcha vajrahastAstathA pare | mahApaTTishahastAshcha tathA parighapANayaH ||3-72-16 asikampanahastAshcha dAnavA yuddhadurmadAH | nAnApraharaNA ghorA nAnAveShA mahAbalAH ||3-72-17 kUrmakukkuTavaktrAshcha hastivaktrAstathA pare | kharoShTravadanAshchaiva varAhavadanAstathA ||3-72-18 bhImA makaravaktrAshcha shishumAramukhAstathA | mArjArashukavaktrAshcha dIrghavaktrAshcha dAnavAH ||3-72-19 garuDAnanAH khaDgamukhA mayUravadanAstathA | ashvavaktrA babhruvaktrA ghorA mR^igamukhAstathA ||3-72-20 uShTrashalyakavaktrAshcha dIrghavaktrAshcha dAnavAH | nakulasyeva vaktrAshcha pArAvatamukhAstathA ||3-72-21 chakravAkamukhAshchaiva godhavaktrAstathA pare | tathA mR^igAnanAH shUrA gojAdimahiShAnanAH ||3-72-22 kR^ikalAsamukhAshchaiva vyAghravaktrAstathA pare | R^ikShashArdUlavaktrAshcha siMhavaktrAstathA pare ||3-72-23 gajendracharmavasanAstathA kR^iShNAjinAmbarAH | chIrasaMvR^itagAtrAshcha tathA phalakavAsasaH ||3-72-24 uShNIShiNo mukuTinastathA kuNDalino.asurAH | kirITino lambashikhAH kambugrIvAH suvarchasaH ||3-72-25 nAnAveShadharA daityA nAnAmAlyAnulepanAH | svAnyAyudhAni dIptAni pragR^ihyAsurasattamAH ||3-72-26 kramamANaM hR^iShikeshamupAtiShThanta dAnavAH | pramathya sarvAndaiteyAnpAdahastatalaiH prabhuH ||3-72-27 rUpaM kR^itvA mahAkAyaM jahArAshu sa medinIm | trailokyaM kramamANasya dyutirAdityasaMbhavA ||3-72-28 tasya vikramato bhUmiM chandrAditau stanAntare | nabhaH prakramamANasya sakthideshe vyavasthitau | paraM vikramamANasya jAnudeshe vyavasthitau ||3-72-29 viShNoramitavIryasya vadantyevaM dvijAtayaH | jitvA lokatrayaM kR^itsnaM hatvA chAsurapu~NgavAn ||3-72-30 dadau shakrAya vasudhAM harirlokanamaskR^itaH | sutalaM nAma pAtAlamadhastAdvasudhAtale ||3-72-31 balerdattaM bhagavatA viShNunA prabhaviShNunA | tadavApyAsurashreShThashchakAra matimuttamAm ||3-72-32 rasAtalatale vAsamakarodasurAdhipaH | tatrasthashcha mahAtejA dhyAnaM paramamAsthitaH ||3-72-33 uvAcha vachanaM dhImAnviShNuM lokanamaskR^itam | kiM mayA deva kartavyaM brUhi sarvamasheShataH | tato daityAdhipaM prAha devo viShNuH surottamaH ||3-72-34 viShNuruvAcha dadAmi te mahAbhAga parituShTo.asmi te.asura | varaM varaya bhadraM te yatheShTaM kAmamApnuhi ||3-72-35 mA cha shakrasya vachanaM pratihAsIH kathaMchana | ahamAj~nApayAmi tvAm shreyashchaivamavApsyasi ||3-72-36 atha daityAdhipaM prAha viShNurdevAdhipAnujaH | vAchA paramayA devo vareNyaH prabhurIshvaraH ||3-72-37 yattvayA salilaM dattaM gR^ihItaM pANinA mayA | tasmAtte daitya devebhyo nAsti jAtu bhayaM kvachit ||3-72-38 sutalaM nAma pAtAlaM tatra tvaM sAnugo vasa | sarvadaityagaNaiH sArdhaM matprasAdAnmahAsura ||3-72-39 na cha te devadevasya shakrasyAmitatejasaH | shAsanaM pratihantavyaM smaratA shAsanaM mama ||3-72-40 devatAshchApi te sarvAH pUjyA eva mahAsura | bhogAMshcha vividhansamyagyaj~nAMshcha sahadakShiNAn ||3-72-41 prApsyase cha mahAbhAga divyAnkAmAnyathepsitAn | iha chAmutra chAkShayyAnvividhAMshcha parichChadAn | daityAdhipatyaM cha sadA matprasAdAdavApsyasi ||3-72-42 yadA cha tAM mayA proktAM maryAdAM chAlayiShyasi | vadhiShyanti tadA hi tvAM nAgapAshairmahAbalAH ||3-72-43 namaskAryAshcha te nityaM mahendrAdyA divaukasaH | mama jyeShThaH surashreShTha shAsanaM pratigR^ihyatAm ||3-72-44 baliruvAcha devadeva mahAbhAga sha~NkhachakragadAdhara | surAsuraguro shreShTha sarvalokamaheshvara | tatrAsato me pAtAle bhAgaM brUhi surottama ||3-72-45 mamAnnamashanaM deva prAshanArthamariMdama | tadvadasva surashreShTha tR^iptiryena mamAkShayA ||3-72-46 shrIbhagavAnuvAcha ashrotriyaM shrAddhamadhItamavrata- madakShiNaM yaj~namanartvijA hutaM | ashraddhayA dattamasaMskR^itaM havi- rete pradattAstava daitya bhAgAH ||3-72-47 puNyaM madveShiNAM yachcha madbhaktadveShiNAM tathA | krayavikrayasaktAnAM puNyaM yachchAgnihotriNAm ||3-72-48 ashraddhayA cha yaddAnaM dadatAM yajatAM tathA | tatsarvaM tava daityendra matprasAdAdbhaviShyati VV3-72-49 vaishampAyana uvAcha etachChrutvA tu vachanaM balirviShNormahAtmanaH | evamastviti taM proktvA pAtAlamasurottamaH | pravivesha mahAnAdo devAj~nAM pratipAlayan ||3-72-50 etasminnantare chApi viShNustridashapUjitaH | bhagavAnapi rAjyAnAM pravibhAgAMshchakAra ha ||3-72-51 dadau pUrvAM dishaM chaindrIM shakrAyAmitatejase | yAmyAM yamAya devAya pitR^irAj~ne mahAtmane ||3-72-52 pashchimAM tu dishaM prAdAdvaruNAya mahAtmane | uttarAM cha kuberAya yakShAdhipataye disham ||3-72-53 adhaHsthAM nAgarAjAya somAyordhvAM dishaM dadau | evaM vibhajya trailokyaM viShNurbalavatAM varaH ||3-72-54 jagAma tridivaM devaH pUjyamAno maharShibhiH | vAmanaH sarvabhUteshaH pratiShThApya cha vAsavam ||3-72-55 tasminprayAte durdharShe vAmane.amitatejasi | sarve mumudire devAH puraskR^itya shatakratum ||3-72-56 vaishampAyana uvAcha gate tu tridivaM kR^iShNe baddhvA vairochaniM balim | nAgaiH saptashirobhishcha kambalAshvatarAdibhiH ||3-72-57 nAgabandhanaduHkhArtaM baliM vairochaniM tataH | yadR^ichChayAsau devarShirnAradaH pratyapadyata ||3-72-58 sa taM kR^ichChragataM dR^iShTvA kR^ipayAbhipariplutaH | uvAcha dAnavashreShThaM mokShopAyaM dadAmi te ||3-72-59 stavaM devAdhidevasya vAsudevasya dhImataH | anAdinidhanasyAsya akShayasyAvyayasya cha ||3-72-60 tamadhIShvAtha daityendra vishuddhenAntarAtmanA | tadgatastanmanA bhUtvA drutaM mokShamavApsyasi ||3-72-61 tato virochanasutaH prayataH prA~njaliH shuchiH | mokShaviMshakamavyagro nAradAtsamadhItavAn ||3-72-62 tamadhItya stavaM divyaM nAradena samIritam | pR^ithivI choddhR^itA yena taM jajApa mahAsuraH ||3-72-63 oM namo.astvanantapataye akShayAya mahAtmane | jaleshayAya devAya padmanabhAya viShNave ||3-72-64 saptasUryavapuH kR^itvA trI.NllokAnkAntavAnasi | bhagavankAlakAlastvaM tena satyena mokShaya ||3-72-65 naShTachandrArkagagane kShINayaj~natapaHkriye | punashchintayase lokAMstena satyena mokShaya ||3-72-66 brahmarudrendravAyvagnisaridbhujagaparvatAH | tvatsthA dR^iShTvA dvijendreNa tena satyena mokShaya ||3-72-67 mArkaNDena purA kalpe pravishya jaTharaM tava | charAcharagataM dR^iShTaM tena satyena mokShaya ||3-72-68 eko vidyAsahAyastvaM yogI yogamupAgataH | punastrailokyamutsR^ijya tena satyena mokShaya ||3-72-69 jalashayyAmupAsIno yoganidrAmupAgataH | lokAMshchintayase bhUyastena satyena mokShaya ||3-72-70 vArAhaM rUpamAsthAya vedayaj~napuraskR^itam | dharA jaloddhR^itA yena tena satyena mokShaya ||3-72-71 uddhR^itya daMShTrayA yaj~nAMstrInpiNDAnkR^itavAnasi | tvaM pitR^INAmapi hare tena satyena mokShaya ||3-72-72 pradudruvuH surAH sarve hiraNyAkShabhayArditAH | paritrAtAstvayA deva tena satyena mokShaya ||3-72-73 dIrghavaktreNa rUpeNa hiraNyAkShasya saMyuge | shiro jahAra chakreNa tena satyena mokShaya ||3-72-74 bhagnamUrdhAsthimastiShko hiraNyakashipuH purA | huMkAreNa hato daityastena satyena mokShaya ||3-72-75 dAnavAbhyAM hR^itA vedA brahmaNaH pashyataH purA | paritrAtAstvayA deva tena satyena mokShaya ||3-72-76 kR^itvA hayashirorUpaM hatvA tu madhukaiTabhau | brahmaNe te.arpitA vedAstena satyena mokShaya ||3-72-77 devadAnavagandharvA yakShasiddhamahoragAH | antaM tava na pashyanti tena satyena mokShaya ||3-72-78 apAntaratamA nAma jAto devasya vai sutaH | kR^itAshcha tena vedArthAstena satyena mokShaya ||3-72-79 vedayaj~nAgnihotrANi pitR^iyaj~nahavIMShi cha | rahasyaM tava devasya tena satyena mokShaya ||3-72-80 R^iShirdIrghatamA nAma jAtyandho gurushApataH | tvatprasAdAchcha chakShuShmAMstena satyena mokShaya ||3-72-81 grAhagrastaM gajendraM cha dInaM mR^ityuvashaM gatam | bhaktaM mokShitavAMstvaM hi tena satyena mokShaya ||3-72-82 akShayashchAvyayashcha tvaM brahmaNyo bhaktavatsalaH | uchChritAnAM niyantAsi tena satyena mokShaya ||3-72-83 sha~NkhaM chakraM gadAM padmaM shAr~NgaM garuDameva cha | prasAdayAmi shirasA te bandhAnmokShayantu mAm ||3-72-84 sha~NkhachakragadAtUNashAr~NgaM cha garuDAdayaH | prasAdayAmAsurhariM baliM mokShaya bandhanAt ||3-72-85 tataH prasanno bhagavAnAdidesha khageshvaram | garuDaM nAgahantAraM baliM mokShaya bandhanAt ||3-72-86 tato vikShipya garuDaH pakShAvatulavikramaH | jagAma vasudhAmUlaM yatrAste saMyato baliH ||3-72-87 AgamaM tasya vij~nAya nAgA muktvA mahAsuram | yayuH purIM bhogavatIM vainateyabhayArditAH ||3-72-88 muktaM kR^iShNaprasAdena chintayAnamadhomukham | bhraShTashriyamuvAchedaM garutmAnpannagAshanaH ||3-72-89 garuDa uvAcha dAnavendra mahAbAho viShNustvAmabravItprabhuH | mukto nivasa pAtAle saputrajanabAndhavaH ||3-72-90 itastvayA na gantavyaM gavyUtimapi dAnava | samayaM yadi bhindhyAstvaM mUrdhA te shatadhA bhavet ||3-72-91 pakShIndravachanaM shrutvA dAnavendro.abravIdidam | sthito.asmi samaye tasya anantasya mahAtmanaH ||3-72-92 jIvyopAyaM tu bhagavAnmama ki~nchitkarotu saH | ihastho.ahaM sukhAsIno yenApyAye khageshvara ||3-72-93 balestu vachanaM shrutvA garutmAnidamabravIt | pUrvameva kR^itastena jIvyopAyo mahAtmanA ||3-72-94 vartayiShyanti ye yaj~nA vidhihInA na R^itvijaH | prAyashchittamajAnanto yaj~nabhAgastatastava ||3-72-95 na teShAM yaj~nabhAgaM vai pratigR^ihNanti devatAH | anenApyAyitabalaH sukhamAtraM nivatsyasi ||3-72-96 vaishampAyana uvAcha saMdeshametaM bhagavAndattavAnkashyapAtmajaH | dAnavendra mahAbAho viShNustrailokyabhAvanaH ||3-72-97 imaM stavamanantasya sarvapApapramochanam | yaH paTheta naro bhaktyA tasya nashyati kilbiSham ||3-72-98 gohatyAyAH pramuchyeta brahmaghno brahmahatyayA | aputro labhate putraM kanyA chaivepsitaM patim ||3-72-99 sadyo garbhAtpramuchyeta garbhiNI janayetsutam | ye cha mokShaiShiNo loke yoginaH sA~NkhyakApilAH ||3-72-100 stavenAnena gachChanti shvetadvipamakalmaShAH | sarvakAmaprado hyeSha stavo.anantasya kIrtyate ||3-72-101 yaH paThetprAtarutthAya shuchiH prayatamAnasaH | sarvAnkAmAnavApnoti mAnavo nAtra saMshayaH ||3-72-102 eSha vai vAmano nAma prAdurbhAvo mahAtmanaH | vedavidbhirdvijaireva paThyate vaiShNavaM yashaH ||3-72-103 yastvimaM vAmanaM divyaM prAdurbhAvaM mahAtmanaH | shR^iNuyAnniyato bhaktyA sadA parvasu parvasu ||3-72-104 parAnvijayate rAjA yathA viShNurmahAbalaH | yasho vimalamApnoti vipulaM chApnute vasu ||3-72-105 priyo bhavati bhUtAnAM sarveShAM vAmano yathA | putrapautrAshcha vardhante ArogyaM guNasaMpadaH ||3-72-106 prIyate paThatashchAsya devadevo janardanaH | sarvakAmayutashchaiva kR^iShNadvaipAyano.abravIt ||3-72-107 iti shrImahAbhArate khileShu harivaMshe bhaviShyaparvaNi vAmanaprAdurbhAve dvisaptatitamo.adhyAyaH