##HarivaMsha purAnam - Part 1 harivaMsha parva Chapter 16 - ShrAddha kalpa prasangam Itranslated and proofread by K S Ramchandran ramachandran_ksr @ yahoo.ca, May 3, 2007## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- SoDasho.adhyAyaH shrAddhakalpaprasa~NgaH janamejaya uvAcha kathaM vai shrAddhadevatvamAdityasya vivasvataH | shrotumichChAmi viprAgrya shrAddhasya cha paraM vidhim ||1-16-1 pitR^INAmAdisargaM cha ka ete pitaraH smR^itAH | evaM cha shrutamasmAbhiH kathyamAnaM dvijAtibhiH || 1-16-2 svargasthAH pitaro ye cha devAnAmapi devatAH | iti vedavidaH prAhuretadichChAmi veditum || 1-16-3 ye cha teSAM gaNAH proktA yachcha teSAM balaM param | yathA cha kR^itamasmAbhiH shrAddhaM prINAti vai pitR^In ||1-16-4 prItAshcha pitaro ye sma shreyasA yojayanti hi | evaM veditumichChAmi pitR^INAM sargamuttamam ||1-16-5 vaishampAyana uvAcha hanta te kathayiSyAmi pitR^INAM sargamuttamam | yathA cha kR^itamasmAbhiH shrAddhaM prINAti vai pitR^In | prItAshcha pitaro ye sma shreyasA yojayanti hi ||1-16-6 mArkaNDeyena kathitaM bhISmAya paripR^ichChate | apR^ichChaddharmarAjo hi sharatalpagataM purA | evameva purA prashnaM yanmAM tvaM paripR^ichChasi ||1-16-7 tatte.anupUrvyA vakShyAmi bhISmeNodAhR^itaM yathA | gItaM sanatkumAreNa mArkaNDeyAya pR^ichChate || 1-16-8 yudhiSThira uvAcha puShTikAmena dharmaj~na kathaM puShTiravApyate | etadvai shrotumichChAmi kiM kurvANo na shochati || 1-16-9 bhIShma uvAcha shrAddhaiH prINAti hi pitR^Insarva kAma phalaistu yaH | tatparaH prayataH shrAddhI pretya cheha cha modate ||1-16-10 pitaro dharmakAmasya prajAkAmasya cha prajAm | puShTikAmasya puShTiM cha prayachChanti yudhiShThira ||1-16-11 yudhiShThira uvAcha vartante pitaraH svarge keShAMchinnarake punaH | prANinAM niyataM vApi karmajaM phalamuchyate ||1-16-12 shrAddhAni chaiva kurvanti phalakAmAH sada narAH | abhisandhAya pitaraM pitushcha pitaraM tathA || 1-16-13 pituH pitAmahaM chaiva triShu piNDeShu nityashaH | tAni shrAddhAni dattAni kathaM gachChanti vai pitR^In || 1-16-14 kathaM cha saktAste dAtuM narakasthAH phalaM punaH | ke vA te pitaro.anye sma kAnyajAmo vayaM punaH ||1-16-15 devA api pitR^Insvarge yajantIti cha naH shrutam | etadichChAmyahaM shrotuM vistareNa mahAdyute ||1-16-16 sa bhavAnkathayatvetAM kathAmamitabuddhimAn | yathA dattaM pitR^INAM vai tAraNAyeha kalpate || 1-16-17 bhIShma uvAcha atra te kIrtayiShyAmi yathAshrutamariMdama | ye cha te pitaro.anye sma yAnyajAmo vayaM punaH | pitrA mama purA gItaM lokAntaragatena vai ||1-16-18 shrAddhakAle mama piturmayA piNDaH samudyataH | taM pitA mama hastena bhittvA bhUmimayAchata ||1-16-19 hastAbharaNapUrNena keyUrAbharaNena cha | raktA~NgulitalenAtha yahA dR^IShTaH purA mayA ||1-16-20 naiSha kalpe vidhirdR^iShTa iti sa~Nchintya chApyaham | kusheShveva tapaH piNDaM dattavAnavichArayan ||1-16-21 tataH pitA me suprIto vAchA madhurayA tadA | uvAcha bharatashreShTha prIyamANo mayAnagha ||1-16-22 tvayA dAyAdavAnasmi kR^itArtho.amutra cheha cha | satputreNa tvayA putra dharmaj~nena vipashchitA ||1-16-23 mayA tu tava jij~nAsA prayuktaiShA dR^iDhavrata | vyavasthAnaM tu dharmeShu kartuM lokasya chAnagha ||1-16-24 yathA chaturthaM dharmasya rakShitA labhate phalam | pApasya hi tathA mUDhaH phalaM prApnotyarakShitA ||1-16-25 pramANaM yaddhi kurute dharmAchAreShu pArthivaH | prajAstadanuvartante pramANAcharitaM sadA ||1-16-26 tvayA cha bharatashreShTha vedadharmAshcha shAshvatAH | kR^itAH pramANaM pR^Itishcha mama nirvartitAtulA |1-16-27 tasmAttavAhaM suprItaH prItyA cha varamuttamam | dadAmi taM pratIchCha tvaM triShu lokeShu durlabham ||1-16-28 na te prabhavitA mR^ituryAvajjIvitumichChasi | tvatto.abhyanuj~nAM samprApaya mR^ityuH prabhavitA tava || 1-16-29 kiM vA te prArthitaM bhUyo dadAmi varamuttamam | tadbrUhi bharatashreShTha yatte manasi vartate ||1-16-30 ityuktavantaM tamahamabhivAdya kR^itA~njaliH | abruvaM kR^itakR^ityo.ahaM prasanne tvayi sattama ||1-16-31 yadi tvanugrahaM bhUyastvatto.arhAmi mahAdyute | prashnamichChAmi vai ki~nchidvyAhR^itaM bhavatA svayam ||1-16-32 sa mAmuvAcha dharmAtmA brUhi bhIShma yadichChasi | ChettAsmi samshayaM sarvaM yanmAM pR^ichChasi bhArata || 1-16-33 apR^ichChaM tamahaM tAtaM tatrAntarhitameva cha | gataM sukR^itinAM lokaM kautUhalasamanvitaH ||1-16-34 bhIShma uvAcha shrUyante pitaro devA devAnAmapi devatAH | devAshcha pitaro.anye cha kAnyajAmo vayaM punaH ||1-16-35 kathaM cha dattamasmAbhiH shrAddhaM prINAtyatho pitR^In | lokAntaragataMstAta kinnu shrAddhasya vA phalam || 1-16-36 kAnyajanti sma lokA vai sadevanaradAnavAH | sayakShoragagandharvAH sakinnaramahoragAH || 1-16-37 atra me saMshayastIvraH kautUhalamatIva cha | tadbrUhi mama dharmaj~na sarvaj~no hyasi me mataH | etachChrutvA vachastasya bhIShmasyovAcha vai pitA ||1-16-38 shantanuruvAcha saMkShepeNaiva te vakShye yanmAM pR^ichChasi bhArata | pitarashcha yathodbhUtAH phalaM dattasya chAnagha ||1-16-39 pitR^INAM kAraNaM shrAddhe shR^iNu sarvaM samAhitaH | AdidevasutAstAta pitaro divi devatAH||1-16-40 tAnyajanti sma vai lokAH sadevAsuramAnuShAH | sayakShoragagandharvAH sakinnaramahoragAH || 1-16-41 ApyAyitAshcha te shrAddhe punarApyAyayanti cha | jagatsadevagandharvamiti brahmAnushAsanam ||1-16-42 tAnyajasva mahAbhAga shrAddhairagryairatandritaH | te te shreyo vidhAsyanti sarvakAmaphalapradAH ||1-16-43 tvayA chArAdhyamAnAste nAmagotrAdikIrtanaiH | asmAnApyAyayiShyanti svargasthAnapi bhArata ||1-16--44 mArkaNDeyastu te sheShametatsarvaM pravakShyati | eSha vai pitR^ibhaktashcha viditAtmA cha bhArata || 1-16-45 upasthitashcha shrAddhe.adya mamaivAnugrahAya vai | enaM pR^ichCha mahAbhAgamityuktvAntaradhIyata || 1-16-46 iti shrImahAbhArate khileShu harivaMshe harivaMshaparvaNi shrAddhakalpaprasa~Ngo nAma ShoDasho.adhyAyaH