## Harivamsha Mahapuranam -  Part  1  -   Harivamsha Parva
Chapter 21   -   Pitrukalpa  5  
Itranslated and proofread by K S Ramachandran 
ramachandran_ksr@yahoo.ca,  May  14,   2007
Note: One page in CH Edn is missing.  I have typed verses  1  to 34 
from  Gita Edn 
 ##
 Further proof-read by Gilles Schaufelberger, schaufel @ wanadoo.fr
 If you find any errors compared to Chitrashala Press edn,
 send corrections to A. Harindranath, harindranath_a @ yahoo.com
 ---------------------------------------------------------------------
 
 
  ekaviMsho.adhyAyaH
   pitR^ikalpaH  -  5
   
   mArkaNDeya uvAcha 
   shrAddhe pratiShThito lokaH shrAddhe yogaH pravartate |
   hanta te vartayiShyAmi shrAddhasya phalamuttamam || 1-21-1
   brahmadattena yatprAptaM saptaj~nAtiShu bhArata |
   tata eva hi dharmasya buddhirnirvartate shanaiH || 1-21-2
   pIDayApyatha dharmasya kR^ite shrAddhe purAnagha |
   yatprAptaM brAhmaNaiH pUrvaM tannibodha mahAmate || 1-21-3
   tato.ahaM tAta dharmiShThAnkurukShetre pitR^ivratAn |
   sanatkumAranirdiShTAnapashyaM sapta vai dvijAn || 1-21-4
   divyena chakShuShA tena yAnuvAcha purA vibhuH |
   vAgduShTaH krodhano hiMsraH pishunaH kavireva cha |
   khasR^imaH pitR^ivartI cha nAmabhirmarmabhistathA || 1-21-5
   kaushikasya sutAstAta shiShyA gArgyasya bhArata |
   pitaryuparate sarve vratavantastadAbhavan || 1-21-6
   viniyogAdgurostasya gAM dogdhrIM samakAlayan |
   samAnavatsAM kapilAM sarve nyAyAgatAM tadA || 1-21-7
   teShAM pathi kShudhArtAnAM bAlyAnmohAchcha bhArata |
   krUrA buddhiH samabhavattAM gAM vai hiMsituM tadA || 1-21-8
   tAnkaviH khasR^Imashchaiva yAchete neti vai tadA |
   na chAshakyanta te tAbhyAM tadA vArayituM dvijAH || 1-21-9
   pitR^ivartI tu yasteShAM nityaM shrAddhAhniko dvijaH |
   sa sarvAnabravIdbhrAtR^InkopAddharme samAhitaH || 1-21-10
   yadyavashyaM prahantavyA pitR^Inuddishya sAdhvimAM |
   prakurvImahi gAM saMyaksarva eva samAhitaH || 1-21-11
   evamepitR^IbhyaHShApi gaurdharmaM prApsyate nAtra saMshayaH |
   pitR^Inabhyarchya dharmeNa nAdharmo.asmAnbhaviShyati || 1-21-12
   tathetyuktvA cha te sarve prokShayitvA cha gAM tataH |
   pitR^ibhyaH kalpayitvainAmupAyu~njata bhArata || 1-21-13
   upayujya cha gAM sarve gurostasya nyavedayan |
   shArdUlena hatA dhenurvatso.ayaM gR^ihyatAmiti || 1-21-14
   ArjavAtsa tu taM vatsaM pratijagrAha vai dvihaH |
   mithyopacharyate taM tu gurumanyAyato dvijAH |
   kAlena samayujyanta sarva evAyuShaH kShaye || 1-21-15
   te vai krUratayA hiMsrA anAryatvAdgurau tathA |
   ugrA hiMsAvihArAshcha saptAjAyanta sodarAH || 1-21-16
   lubdhakasyAtmajAstAta balavanto manasvinaH |
   pitR^Inabhyarchya dharmeNa prokShayitvA cha gAM tadA || 1-21-17
   smR^itiH pratyavamarshashcha teShAM jAtyantare.abhavat |
   jAtA vyAdhA dashArNeShu sapta dharmavichakShaNAH || 1-21-18
   svakarmaniratAH sarve lobhAnR^itavivarjitAH |
   tAvanmAtraM prakurvanti yAvatA prANadhAraNam || 1-21-19
   sheShaM dhyAnaparAH kAlAmanudhyAyanti karma tat |
   nAmadheyAni chApyeShAmimAnyAsannarAdhipa || 1-21-20
   nirvairo nirvR^itiH shAnto nirmanyuH kR^itireva cha |
   vaidhaso mAtR^IvartI cha vyAdhAH paramadhArmikAH || 1-21-21
   tairevamuShitaistAta hiMsAdhamarataiH sadA |
   mAtA cha pUjitA vR^iddhA pitA cha paritoShitaH ||| 1-21-22
   yadA mAtA pitA chaiva saMyuktau kAladharmaNA |
   tadA dhanUMShi te tyaktvA vane prANAnavAsR^ijan || 1-21-23
   shubhena karmaNA tena jAtA jAtismarA mR^igAH |
   trAsAnutpAdya saMvignA ramye kAla~njare girau || 1-21-24
   unmukho nityavitrastaH stabdhakarNo vilochanaH |
   paNDito ghasmaro nAdI nAmataste.abhavanmR^igAH || 1-21-25 
   tamevArthamanudhyAyanto jAtismaraNasaMbhavam |
   AsanvanacharAH kShAntA nirdvandvA niShparigrahAH || 1-21-26
   te sarve shubhakarmANaH sadharmANo vanecharAH |
   yogadharmamanuprAptA viharanti sma tatra ha || 1-21-27
   jahuH prANAnmaruM sAdhya laghvAhArAstapasvinaH |
   teShAM maruM sAdhayatAM padasthAnAni bhArata |
   tathaivAdyApi dR^ishyante girau kAla~njare nR^ipa || 1-21-28 
   karmaNA tena te tAta shubhenAshubhavarjitAH |
   shubhAchChubhatarAM yoniM chakravAkatvamAgatAH || 1-21-29
   shubhe deshe sharadvIpe saptaivAsa~njalaukasaH |
   tyaktvA sahacharIdharmaM munayo brahmachAriNaH || 1-21-30 ||
   niHspR^iho nirmamaH kShAnto nirdvandvo niShparigrahaH |
   nirvR^ittirnibhR^itashchaiva shakunA nAmataH smR^itAH || 1-21-31
   te tatra pakShiNaH sarve shakunA dharmachAriNaH |
   nirAhArA jahuH prANAMstapoyuktAH sarittaTe || 1-21-32
   atha te sodarA jAtA haMsA mAnasachAriNaH |
   jAtismarAH susaMyuktAH saptaiva brahmachAriNaH || 1-21-33  
   viprayonau yato mohAnmithyopacharito guruH |
   tiryagyonau tato jAtAH saMsAre paribabhramuH || 1-21-34
   yatashcha pitR^ivAkyArthaH kR^itaH svArthe vyavasthitaiH |
   tato j~nAnaM cha jAtiM cha te hi prApurguNottarAm || 1-21-35
   sumanAH shuchivAkChuddhaH pa~nchamashChidradarshanaH |
   sunetrashcha svatantrashcha shakunA nAmataH  smR^itAH || 1-21-36
   pa~nchamaH pA~nchikastatra saptajAtiShvajAyata |
   ShaShThastu kaNDarIko.abhUdbrahmadattastu saptamaH || 1-21-37
   teShAM tu tapasA tena saptajAtikR^itena vai |
   yogasya chApi nirvR^ittyA pratibhAnAchcha shobhanAt || 1-21-38
   pUrvajAtiShu yadbrahma shrutaM gurukuleShu vai |
   tathaivAvasthitA buddhiH saMsAreShvapi vartatAm || 1-21-39
   te brahmachAriNaH sarve viha~NgA brahmavAdinaH |
   yogadharmamanudhyAnto viharanti sma tatra ha || 1-21-40
   teShAM tatra viha~NgAnAM charatAM sahachAriNAm |
   nIpAnAmIshvaro rAjA vibhrAjaH pauravAnvayaH || 1-21-41
   vibhrAjamAno vapuShA prabhAvena samanvitaH |
   shrImAnantaHpuravR^ito vanaM tatpravivesha ha || 1-21-42
   svatantrashcha viha~Ngo.asau spR^ihayAmAsa taM nR^ipam |
   dR^iShTvA yAntaM  shriyopetaM bhaveyamahamIdR^ishaH || 1-21-43
   yadyasti sukR^itaM ki~nchittapo vA niyamo.api vA |
   khinno.asmi hyupavAsena tapasA niShphalena cha || 1-21-44
   
   iti shrImahAbhArate khileShu harivaMshe harivaMshaparvaNi pitR^ikalpe
ekaviMsho.adhyAyaH