## Harivamsha Mahapuranam Part 1 - Harivamsha Parva Chapter 23 - Pitrukalpa 7 - Hamsavarnanam Itranslated and proofread by K S Ramachandran ramachandran_ksr@yahoo.ca>, May 17, 2007 Note: Two pages are missing from Ch edn. Verses 1-23-12 to End of the chapter have been taken from Gita Press edn ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- trayoviMsho.adhyAyaH pitR^ikalpaH - 7 mArkaNDeya uvAcha te yogadharmaniratAH sapta mAnasachAriNaH | padmagarbho.aravindAkShaH kShIragarbhaH sulochanaH || 1-23-1 urubinduH subindushcha haimagarbhastu saptamaH | vAyvambubhakShAH satataM sharIrANyupashoShayan || 1-23-2 rAjA vibhrAjamAnastu vapuShA tadvanaM tadA | chachArAntaHpuravR^ito nandanaM maghavAniva || 1-23-3 sa tAnapashyatkhacharAnyogadharmAtmakAnnR^ipa | nirvedAchcha tamevArthamanudhyAyanpuraM yayau || 1-23-4 aNuho nAma tasyA.a.asItputraH paramadhArmikaH | aNurdharmaratirnityamaNuM so.adhyagamatpadam || 1-23-5 prAdAtkanyAM shukastasmai kR^itvIM pUjitalakShaNAm | satyashIlaguNopetAM yogadharmaratAM sadA || 1-23-6 sA hyuddiShTA purA bhIShma pitR^ikanyA manIShiNI | sanatkumAreNa tadA sannidhau mama shobhanA || 1-23-7 satyadharmabhR^itAM shreShThA durvij~neyA kR^itAtmabhiH | yogA cha yogapatnI cha yogamAtA tathaiva cha || 1-23-8 yathA te katithaM pUrvaM pitR^ikalpeShu vai mayA | vibhrAjastvaNuhaM rAjye sthApayitvA nareshvaraH || 1-23-9 Amantrya paurAnprItAtmA brAhmaNAnsvati vAchya cha | prAyAtsarastapashchartuM yatra te sahachAriNaH || 1-23-10 sa vai tatra nirAhAro vAyubhakSho mahAtapAH | tyaktvA kAmAMstapastepe sarasastasya pArshvataH || 1-23-11 tasya saMkalpa AsIchcha teShAmekatarasya vai | putratvaM prApya yogena yujyeyamiti bhArata || 1-23-12 kR^itvAbhisandhiM tapasA mahatA sa samanvitaH | mahAtapAH sa vibhrAjo virarAjAMshumAniva || 1-23-13 tato vibhrAjitaM tena vaibhrAjaM nAma tadvanam | sarastachcha kurushreShTha vaibhrAjamiti saMj~nitam || 1-23-14 yatra te shakunA rAjaMshchatvAro yogadharmiNaH | yogabhraShTAstrayashchaiva dehanyAsakR^ito.abhavan || 1-23-15 kAmpilye nagare te tu brahmadattapurogamAH | jAtAH sapta mahAtmAnaH sarve vigatakalmaShAH || 1-23-16 j~nAnadhyAnatapaHpujAvedavedA~NgapAragAH | smR^itimanto.atra chatvArastrayastu parimohitAH || 1-23-17 svatantrastvaNuhAjjaj~ne brahmadatto mahAyashAH | yathA hyAsItpakShibhAve saMkalpaH pUrvachintitaH | j~nAnadhyAnatapaHpUto vedavedA~NgapAragaH || 1-23-18 ChidradarshI sunetrashcha tathA bAbhravyavatsayoH | jAtau shrotriyadAyAdau vedavedA~NgapAragau || 1-23-19 sahAyau brahmadattasya pUrvajAtisahoShitau | pA~nchAlaH pA~nchikashchaiva kaNDarIkastathAparaH || 1-23-20 pA~nchAlo bahvR^ichastvAsIdAchAryatvaM chakAra ha | dvivedaH kaNDarIkastu Chandogo.adhvaryureva cha || 1-23-21 sarvasattvarutaj~nastu rAJA.a.asIdaNuhAtmajaH | pA~nchAlakaNDarIkAbhyAM tasya sakhyamabhUttadA || 1-23-22 te grAmyadharmAbhiratAH kAmasya vashavartinaH | pUrvajAtikR^itenAsandharmakAmArthakovidAH || 1-23-23 aNuhastu nR^ipashreShTho brahmadattamakalmaSham | rAjye.abhiShichya yogAtmA parAM gatimavAptavAn || 1-23-24 brahmadattasya bhAryA tu devalasyAtmajAbhavat | asitasya hi durdharShA sannatirnAma nAmataH || 1-23-25 tAmekabhAvasaMpannAM lebhe kanyAmanuttamAm | sannatiM sannatimatIM devalAdyogadharmiNIm || 1-23-26 pa~nchamaH pA~nchikastatra saptajAtiShu bhArata | ShaShThastu kaNDarIko.abhUdbrahmadattastu saptamaH || 1-23-27 sheShA viha~NgamA ye vai kAmpilye sahachAriNaH | te jAtAH shrotriyakule sudaridre sahodarAH || 1-23-28 dhR^itimAnsumanA vidvAMstattvadarshI cha nAmataH | vedAdhyayanasaMpannAshchatvArashChidradarshinaH || 1-23-29 teShAM saMvittathotpannA pUrvajAtikR^itA tadA | ye yoganiratAH siddhAH prasthitAH sarva eva hi || 1-23-30 Amantrya pitaraM tAta pitA tAnabravIttadA | adharma eSha yuShmAkaM yanmAM tyaktvA gamiShyatha || 1-23-31 dAridryamanapAkR^itya putrArthAMshchaiva puShkalAn | shushrUShAmaprayujyaiva kathaM vai gantumarhatha || 1-23-32 te tamUchurdvijAH sarve pitaraM punareva cha | kariShyAmo vidhAnaM te yena tvaM vartayiShyasi || 1-23-33 imaM shlokaM mahArthaM tvaM rAjAnaM sahamantriNam | shrAvayethAH samAgamya brahmadattamakalmaSham || 1-23-34 prItAtmA dAsyati sa te grAmAnbhogAMshcha puShkalAn | yathepsitAMshcha sarvArthAngachCha tAta yathepsitam || 1-23-35 etAvaduktvA te sarve pUjayitvA cha taM gurum | yogadharmamanuprApya parAM nirvR^itimAyayuH || 1-23-36 iti shrImahAbhArate khileShu harivaMshe harivaMshaparvaNi pitR^ikalpe trayoviMsho.adhyAyaH