## Harivamsha Mahapuranam Part 1 - Harivamsha Parva
Chapter 27 amAvasuvaMshakIrtanam
Itranslated and proofread by K S Ramachandran
ramachandran_ksr@yahoo.ca>, May 17, 2007
Note: Two pages are missing from Ch edn.
Verses 1-23-12 to End of the chapter have been
taken from Gita Press edn ##
Further proof-read by Gilles Schaufelberger, schaufel @ wanadoo.fr
If you find any errors compared to Chitrashala Press edn,
send corrections to A. Harindranath, harindranath_a @ yahoo.com
---------------------------------------------------------------------
saptaviMsho.adhyAyaH
amAvasuvaMshakIrtanam
vaishaMpAyana uvAcha
ailaputrA babhUvuste sarve devasutopamAH |
divi jAtA mahAtmAna AyurdhImAnamAvasuH || 1-27-1
vishvAyushchaiva dharmAtmA shrutAyushcha tathAparaH |
dhR^iDhAyushcha vanAyushcha shatAyushchorvashIsutAH |
amAvasoshcha dAyAdo bhImo rAjAtha nagnajit || 1-27-2
shrImAnbhImasya dAyAdo rAjAsItkA~nchanaprabhaH |
vidvAMstu kA~nchanasyApi suhotro.abhUnmahAbalaH || 1-27-3
sauhotrirabhavajjahnuH keshinyA garbhasaMbhavaH |
Ajahre yo mahatsatraM sarvamedhamahAmakham || 1-27-4
patilobhena yaM ga~NgA patitve.abhisasAra ha |
nechChataH plAvayAmAsa tasya ga~NgA cha tatsadaH |
sa tayA plAvitaM dR^iShTvA yaj~navATaM samantataH || 1-27-5
sauhitrirabravIdga~NgAM kruddho bharatasattama || 1-27-6
eSha te viphalaM yatnaM pibannambhaH karomyaham |
asya ga~Nge.avalepasya sadyaH phlamavApnuhi || 1-27-7
rAjarShiNA tataH pItAM ga~NgAM dR^iShTvA maharShayaH |
upaninyurmahAbhAgAM duhitR^tvena jAhnavIm || 1-27-8
yuvanAshvasya putrIM tu kAverIM jahnurAvahat |
yuavanAshvasya shApena ga~NgA.ardhena vinirmame || 1-27-9
kAverIM saritAM shreShThAM jahnorbhAryAmaninditAm |
jahnastu dayitaM putraM sunahaM nAma dhArmikam |
kAveryAM janayAmAsa ajakastasya chAtmajaH || 1-27-10
ajakasya tu dAyAdo balAkAshvo mahIpatiH |
babhUva mR^igayAshIlaH kushastasyAtmajo.abhavat || 1-27-11
kushaputrA babhUvurhi chatvAro devavarchasaH |
kushikaH kushanAbhashcha kushAmbo mUrtimAMstathA || 1-27-12
pahlavaiH saha saMvR^iddhiM rAjA vanacharaistadA |
kushikastu tapastepe putramindrasamaprabham |
labheyamiti taM shakrastrAsAdabhyetya jaj~nivAn || 1-27-13
pUrNe varShasahasre vai taM tu shakro hyapashyata
atyugratapasaM dR^iShTvA sahasrAkShaH puraMdaraH || 1-27-14
samarthaH putrajanane svamevAMshamavAsayat |
putratve kalpayAmAsa sa devendraH surottamaH || 1-27-15
sa gAdhirabhavadrAjA maghavAnkaushikaH svayam |
paurukutsyabhavadbhAryA gAdhistasyAmajAyata || 1-27-16
gAdheH kanyA mahAbhAgA nAmnA satyavatI shubhA |
tAM gAdhirbhR^iguputrAya R^ichIkAya dadau prabhuH || 1-27-17
tasyAH prIto.abhavadbhartA bhArgavo bhR^igunanadanaH |
putrArthaM kArayAmAsa charuM gAdhestathaiva cha || 1-27-18
uvAchAhUya tAM bhartA R^ichIko bhArgavastadA |
upayojyashcharurayaM tvayA mAtrA tvayaM tava || 1-27-19
tasyAM janiShyate putro dIptimAnkShatriyarShabhaH |
ajeyaH kShatriyairloke kShatriyarShabhasUdanaH || 1-27-20
tavApi putraM kalyANi dhR^itimantaM taponidhim |
shamAtmakaM dvijashreShThaM charureSha vidhAsyati || 1-27-21
evamuktvA tu tAM bhAryAmR^ichIko bhR^igunandanaH |
tapasyAbhirato nityamaraNyaM pravivesha ha || 1-27-22
gAdhiH sadArastu tadA R^ichIkAvAsamabhyagAt |
tIrthayAtrAprasa~Ngena sutAM draShTuM janeshvaraH || 1-27-23
charudvayaM gR^ihItvA tadR^iSheH satyavatI tadA |
charumAdAya yatnena sA tu mAtre nyavedayat || 1-27-24
mAtA vyatyasya daivena duhitre svaM charuM dadau |
tasyAshcharumathAj~nAnAdAtmasaMsthaM chakAra ha || 1-27-25
atha satyavatI garbhaM kShatriyAntakaraM tadA
dhArayAmAsa dIptena vapuShA ghoradarshanam || 1-27-26
tAmR^ichIkastato dR^iShTvA yogenAbhyanusR^itya cha |
tAmabravIddvijashreShThaH svAM bhAryAM varavarNinIm || 1-27-27
mAtrAsi va~nchitA bhadre charuvyatyAsahetunA |
janiShyati hi putraste krUrakarmAtidAruNaH || 1-27-28
bhrAtA janiShyate chApi brahmabhUtastapodhanaH |
vishvaM hi brahmatapasA mayA tasminsamarpitam || 1-27-29
evamuktA mahAbhAgA bhartrA satyavatI tadA |
prasAdayAmAsa patiM putro me nedR^isho bhavet |
brAhmaNApasadastatra ityukto munirabravIt || 1-27-30
naiSha saMkalpitaH kAmo mayA bhadre tathAstviti |
ugrakarmA bhavetputraH piturmAtushcha kAraNAt |
punaH satyavatI vAkyamevamuktAbravIdidaM || 1-27-31
ichCha.NllokAnapi mune sR^ijethAH kiM punaH sutam |
shamAtmakamR^ijuM tvaM me putraM dAtumihArhasi || 1-27-32
kAmamevaMvidhaH pautro mama syAttava cha prabho |
yadyanyathA na shakyaM vai kartumetaddvijottama || 1-27-33
tataH prasAdamakarotsa tasyAstapaso balAt |
bhadre nAsti visheSho me pautre cha varavaNini|
tvayA yathoktaM vachanaM tathA bhadraM bhaviShyati || 1-27-34
tataH satyavatI putraM janayAmAsa bhArgavam |
tapasyAbhirataM dAntaM jamadagniM shamAtmakam || 1-27-35
bhR^igoshcharuviparyAse raudravaiShNavayoH purA |
yajanAdvaiShNave.athAMshe jamadagnirajAyata || 1-27-36
sA hi satyavatI puNyA satyadharmaparAyaNA |
kaushikIti samAkhyAtA pravR^itteyaM mahAnadI || 1-27-37
ikShvAkuvaMshaprabhavo reNurnAma narAdhipaH |
tasya kanyA mahAbhAgA kAmalI nAma reNukA || 1-27-38
reNukAyAM tu kAmalyAM tapovidyAsamanvitaH |
Archiko janayAmAsa jAmadagnyaM sudAruNam || 1-27-39
sarvavidyAnugaM shreShThaM dhanurvedasya pAragam |
rAmaM kShatriyahantAraM pradIptamiva pAvakam || 1-27-40
aurvasyaivamR^ichIkasya satyavatyAM mahAyashAH |
jamadagnistapovIryAjjaj~ne brahmavidAM varaH || 1-27-41
madhyamashcha shunaHshepaH shunaHpuchChaH kaniShThakaH |
vishvAmitraM tu dAyAdaM gAdhiH kushikanandanaH || 1-27-42
janayAmAsa putraM tu tapovidyAshamAtmakam |
prApya brahmarShisamatAM yo.ayaM saptarShitAM gataH || 1-27-43
vishvAmitrastu dharmAtmA nAmnA vishvarathaH smR^itaH |
jaj~ne bhR^iguprasAdena kaushikAdvaMshavardhanaH || 1-27-44
vishvAmitrasya cha sutA devarAtAdayaH smR^itAH |
prakhyAtAstriShu lokeShu teShAM nAmAni me shR^iNu || 1-27-45
devashravAH katishchaiva yasmAtkAtyAyanAH smR^itAH |
shAlAvatyAM hiraNyAkSho reNorjaj~ne.atha reNumAn || 1-27-46
sAMkR^itirgAlavashchaiva mudgalashcheti vishrutAH |
madhuchChando jayashchaiva devalashcha tathAShTakaH || 1-27-47
kachChapo hAritashchaiva vishvAmitrasya vai sutAH |
teShAM khyAtAni gotrANi kaushikAnAM mahAtmanAm || 1-27-48
pANino babhravashchaiva dhyAnajapyAstathaiva cha |
pArthivA devarAtAshcha shAla~NkAyanabAShkalAH || 1-27-49
lohitA yamadUtAshcha tathA kArIShavaH smR^itAH |
saushrutAH kaushikA rAjaMstathAnye saindhavAyanAH || 1-27-50
devalA reNavashchaiva yAj~nyavalkyAghamarShaNAH |
auduMbarA hyabhiShNAtAstArakAyanachu~nchulAH || 1-27-51
shAlAvatyA hiraNyAkShAH sAMkR^ityA gAlavAstathA |
bAdarAyaNinashchAnye vishvAmitrasya dhImataH || 1-27-52
R^iShyantaravivAhyAshcha kaushikA bahavaH smR^itAH |
pauravasya mahArAja brahmarShiH kaushikasya cha |
saMbandho.apyasya vaMshe.asminbrahmakShatrasya vishrutaH || 1-27-53
vishvAmitrAtmajAnAM tu shunaHshepo.agrajaH smR^itaH |
bhArgavaH kaushikatvaM hi prAptaH sa munisattamaH || 1-27-54
vishvAmitrasya putrastu shunaHshepo.abhavatkila |
haridashvasya yaj~ne tu pashutve viniyojitaH || 1-27-55
devairdattaH shunaHshepo vishvAmitrAya vai punaH |
devairdattaH sa vai yasmAddevarAtastato.abhavat || 1-27-56
devarAtAdayaH sapta vishvAmitrasya vai sutAH |
dR^iShadvatIsutashchApi vishvAmitrAttathAShTakaH || 1-27-57
aShTakasya suto lauhiH prokto jahrugaNo mayA |
atha UrdhvaM pravakShyAmi vaMshamAyormahAtmanaH || 1-27-58
iti shrImahAbhArate khileShu harivaMshe harivaMshaparvaNi
amAvasuvaMshakIrtanaM nAma saptaviMsho.adhyAyaH