## Harivamsha Mahapuranam - Part 1 - Harivamsha Parva Chapter 28 - Ayuvamsha Kathanam Itranslated and proofread by K S Ramachandran ramachandran_ksr@yahoo.ca, June 6, 2007 Note. Verse 30. the philosophy propagated by Brihaspati must be nAstivAda, it cannot be nAsti vAda.## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- aShTAviMsho.adhyAyaH AyuvaMshakathanam vaishaMpAyana uvAcha AyoH putrAstathA pa~ncha sarve vIrA mahArathAH | svarbhAnutanayAyAM cha prabhAyAM jaj~nire nR^ipa || 1-28-1 nahuShaH prathamaM jaj~ne vR^iddhasharmA tataH param | rambhorajiranenAshcha triShu lokeShu vishrutAH || 1-28-2 rajiH putrashatAnIha janayAmAsa pa~ncha vai | rAjeyamiti vikhyAtaM kShatramindrabhayAvaham || 1-28-3 yatra devAsure yuddhe samutpanne sudAruNe | devAshchaivAsurAshchaiva pitAmahamathAbruvan || 1-28-4 Avayorbhagavanyuddhe ko vijetA bhaviShyati | brUhi naH sarvabhUtesha shrotumichChAmi te vachaH || 1-28-5 brahmovAcha yeShAmarthAya saMgrAme rajirAttAyudhaH prabhuH | yotsyate te jayiShyanti trI.NllokAnnAtra saMshayaH || 1-28-6 yato rajirdhR^itistatra shrIshcha tatra yato dhR^itiH | yato dhR^itishcha shrIshchaiva dharmastatra jayastathA || 1-28-7 te devadAnavAH prItA devenoktA rajerjaye | abhyayurjayamichChanto vR^iNvAnA bharatarShabham || 1-28-8 sa hi svarbhAnudauhitraH prabhAyAM samapadyata | rAjA paramatejasvI somavaMshapravardhanaH || 1-28-9 te hR^iShTamanasaH sarve rajiM devAshcha dAnavAH | UchurasmajjayAya tvaM gR^ihANa varakArmukam || 1-28-10 athovAcha rajistatra tayorvai devadaityayoH | svArthaj~naH svArthamuddishya yashaH svaM cha prakAshayan || 1-28-11 rajiruvAcha yadi daityagaNAnsarvA~njitvA shakrapurogamAH | indro bhavAmi dharmeNa tato yotsyAmi saMyuge || 1-28-12 devAH prathamato bhUyaH pratyUchurhR^iShTamAnasAH | evaM yatheShTaM nR^ipate kAmaH saMpadyatAM tava || 1-28-13 shrutvA suragaNAnAM tu vAkyaM rAjA rajistatdA | paprachChAsuramukhyAMstu yathA devAnapR^ichChata || 1-28-14 dAnavA darpapUrNAstu svArthamevAnugamya ha | pratyUchuste nR^ipavaraM sAbhimAnamidaM vachaH || 1-28-15 asmAkamindraH prahrAdo yasyArthe vijayAmahe | asmiMstu samaye rAjaMstiShThethA rAjasattama || 1-28-16 sa tatheti bruvanneva devairapyabhichoditaH | bhaviShyasIndro jitvaivaM devairuktastu pArthivaH | jaghAna dAnavAnsarvAnye vadhyA vajrapANinaH || 1-28-17 sa vipranaShTAM devAnAM paramashrIH shriyaM vashI | nihatya dAnavAnsarvAnAjahAra rajiH prabhuH || 1-28-18 tato rajiM mahAvIryaM devaiH saha shatakratuH | rajeH putro.ahamityuktvA punarevAbravIdvachahH || 1-28-19 indro.asi tAta devAnAM sarveShAM nAtra saMshayaH | yasyAhamindraH putraste khyAtiM yAsyAmi karmabhiH || 1-28-20 sa tu shakravachaH shrutvA va~nchitastena mAyayA | tathetyevAbravIdrAjA prIyamANaH shatakratum || 1-28-21 tasmiMstu devasadR^ishe divaM prApte mahIpatau | dAyAdyamindrAdAjahrurAchArAttanayA rajeH || 1-28-22 pa~ncha putrashatAnyasya tadvai sthAnaM shatakratoH | samAkramanta bahudhA svargalokaM triviShTapam || 1-28-23 tato bahutithe kAle samatIte mahAbalaH | hR^itarAjyo.abravIchChakro hR^itabhAgo bR^ihaspatim || 1-28-24 indra uvAcha badarIphalamAtraM vai puroDAshaM vidhatsva me | brahmarShe yena tiShTheyaM tejasA.a.apyAyitaH sadA || 1-28-25 brahmankR^isho.ahaM vimanA hR^itarAjyo hR^itAshanaH | hataujA durbalo mUDho rajiputraiH kR^itaH prabho || 1-28-26 bR^ihaspatiruvAcha yadyevaM choditaH shakra tvayAsyAM pUrvameva hi | nAbhaviShyattvatpriyArthamakartavyaM mamAnagha || 1-28-27 prayatiShyAmi devendra tvatpriyArthaM na saMshayaH | yathA bhAgaM cha rAjyaM cha na chirAtpratilapsyase || 1-28-28 tathA tAta kariShyAmi mA bhUtte viklavaM manaH | tataH karma chakArAsya tejaso vardhanaM tadA || 1-28-29 teShAM cha buddhisaMmohamakaroddvijasattamaH | nAstivAdArthashAstraM hi dharmavidveShaNam param || 1-28-30 paramaM tarkashAstrANAmasatAM tanmano.anugam | na hi dharmapradhAnAnAM rochate tatkathAntare || 1-28-31 te tadbR^ihaspatikR^itaM shAstraM shrutvAlpachetasaH | pUrvoktadharmashAstrANAmabhavandveShiNaH sadA || 1-28-32 pravakturnyAyarahitaM tanmataM bahu menire | tenAdharmeNa te pApAH sarva eva kShayaM gatAH || 1-28-33 trailokyarAjyaM shakrastu prApya duShprApameva cha | bR^ihaspatiprasAdAddhi parAM nirvR^itimabhyayAt || 1-28-34 te yadA tu susaMmUDhA rAgonmattA vidharmiNaH | brahmadviShashcha saMvR^ittA hatavIryaparAkramAH || 1-28-35 tato lebhe suraishvaryamindraH sthAnaM tathottamam | hatvA rajisutAnsarvAnkAmakrodhaparAyaNAn || 1-28-36 ya idaM chyAvanaM sthAnAtpratiShThAM cha shatakratoH | shR^iNuyAddhArayedvApi na sa daurAtmyamApnuyAt || 1-28-37 iti shrImahAbhArate khileShu harivaMshe harivaMshaparvaNi AyorvaMshakIrtanaM nAma aShTAviMsho.adhyAyaH