## Harivamsha Mahapuranam - Harivamsha Parva Chapter 29 - Kashyapa varnanam Itranslated and proofread by K S Ramachandran ramachandran_ksr@yahoo.ca, June 11, 2007 ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- ekonatriMsho.adhyAyaH kAshyapavarNanam vaishaMpAyana uvAcha rambho.anapatyastatrAsIdvaMshaM vakShyAmyanenasaH | anenasaH suto rAjA pratikShatro mahAyashAH || 1-29-1 pratikShatrasutashchApi sR^i~njayo nAma vishrutaH | sR^i~njayasya jayaH putro vijayastasya chAtmajaH || 1-29-2 vijayasya kR^itiH putrastasya haryashvataH sutaH | haryashvatasuto rAjA sahadevaH pratApavAn || 1-29-3 sahadevasya dharmAtmA nadIna iti vishrutaH | nadInasya jayatseno jayatsenasya saMkR^itiH || 1-29-4 saMkR^iterapi dharmAtmA kShatradharmA mahAyashAH | anenasaH samAkhyAtAH kShatravR^iddhasya me shR^iNu || 1-29-5 kShatravR^iddhAtmajastatra sunahotro mahAyashAH | sunahotrasya dAyAdAstrayaH paramadhArmikAH || 1-29-6 kAshaH shalashcha dvAvetau tathA gR^itsamadaH prabhuH | putro gR^itsamadasyApi shunako yasya shaunakaH || 1-29-7 brAhmaNAH kShatriyAshchaivaM vaishyAH shUdrAstathaiva cha | shalAtmajashchArShTiSheNastanayastasya kAshakaH || 1-29-8 kAshasya kAshayo rAjanputro dIrghatapAstathA | dhanvastu dIrghatapaso vidvAndhanvantaristataH || 1-29-9 tapaso.ante sumahato jAto vR^iddhasya dhImataH | punardhanvantarirdevo mAnuSheShviha jaj~nivAn || 1-29-10 janamejaya uvAcha kathaM dhanvantarirdevo mAnuSheShviha jaj~nivAn | etadveditumichChAmi tanme brUhi yathAtatham || 1-29-11 vaishaMpAyana uvAcha dhanvantareH sambhavo.ayaM shrUyatAM bharatarShabha | jAtaH sa hi samudrAttu mathyamAne purAmR^ite || 1-29-12 utpannaH kalashAtpUrvaM sarvatashcha shriyA vR^itaH | abhyasansiddhikArye hi viShNuM dR^iShTvA hi tasthivAn || 1-29-13 abjastvamiti hovAcha tasmAdabjastu sa smR^itaH | abjaH provAcha viShNuM vai tava putro.asmi vai prabho || 1-29-14 vidhatsva bhAgaM sthAnaM cha mama loke sureshvara | evamuktaH sa dR^iShTvA vai tathyaM provAcha taM prabhuH || 1-29-15 kR^ito yaj~navibhAgo hi yaj~niyairhi suraiH purA | deveShu vinuyuktaM hi viddhi hotraM maharShibhiH || 1-29-16 na shakyamupahomA vai tubhyaM kartuM kadAchana | arvAgbhUto.asi devAnAM putra tvaM tu na hIshvaraH || 1-29-17 dvitIyAyAM tu saMbhUtyAM loke khyAtiM gamiShyasi | aNimAdishcha te siddhirgarbhasthasya bhaviShyati || 1-29-18 tenaiva tvaM sharIreNa devatvaM prApsyase prabho | charumantrairvratairjApyairyakShyanti tvAM dvijAtayaH || 1-29-19 aShTadhA tvaM punashchaivamAyurvedaM vidhAsyasi | avashyabhAvI hyartho.ayaM prAgdR^iShTastvabjayoninA || 1-29-20 dvitIyaM dvAparaM prApya bhavitA tvaM na saMshayaH | imaM tasmai varaM dattvA viShNurantardadhe punaH || 1-29-21 dvitIye dvAparaM prApte saunahotriH sa kAshirAT | putrakAmastapastepe dhinvandIrghatapAstadA || 1-29-22 prapadye devatAM tAM tu yA me putraM pradAsyati | abjaM devaM sutArthAya tadA.a.arAdhitavAnnR^ipaH || 1-29-23 tatastuShTaH sa bhagavAnabjaH provAcha taM nR^ipam | yadichChasi varaM brUhi tatte dAsyAmi suvrata || 1-29-24 nR^ipa uvAcha bhagavanyadi tuShTastvaM putro me khyAtimAnbhava | tatheti samanuj~nAya tatraivAntaradhIyata || 1-29-25 tasya gehe samutpanno devo dhanvantaristadA | kAshirAjo mahArAja sarvarogapraNAshanaH || 1-29-26 AyurvedaM bharadvAjAtprApyeha bhiShjAM kriyAm | tamaShTadhA punarvyasya shiShyebhyaH pratyapAdayat || 1-29-27 dhanvantarestu tanayaH ketumAniti vishrutaH | atha ketumataH putro vIro bhImarathaH smR^itaH || 1-29-28 suto bhImarathasyApi divodAsaH prajeshvaraH | divodAsastu dharmAtmA vArANasyadhipo.abhavat || 1-29-29 etasminneva kAle tu purIM vArANasIM nR^ipa | shUnyAM nivAsayAmAsa kShemako nAma rAkShasaH || 1-29-30 shaptA hi sA matimatA nikuMbhena mahAtmanA | shUnyA varShasahasraM vai bhavitrI nAtra saMshayaH || 1-29-31 tasyAM tu shaptamAtrAyAM divodAsaH prajeshvaraH | viShayAnte purIM ramyAM gomatyAM saMnyaveshayat || 1-29-32 bhadrashreNyasya pUrvaM tu purI vArANasItyabhUt | bhadrashreNyasya putrANAM shatamuttamadhanvinAm || 1-29-33 hatvA niveshayAmAsa divodAso nararShabhaH | bhadrashreNyasya tadrAjyaM hR^itaM tena balIyasA || 1-29-34 janamejaya uvAcha vArANasIM nikumbhastu kimarthaM shaptavAnprabhuH | nikumbhakashcha dharmAtmA siddhikSetraM shashApa yaH || 1-29-35 vaishaMpAyana uvAcha divodAsastu rAjarShirnagarIM prApya pArthivaH | vasati sma mahAtejAH sphItAyAM tu narAdhipaH || 1-29-36 etasminneva kAle tu kR^itadAro maheshvaraH | devyAH sa priyakAmastu nyavasachChvashurAntike || 1-29-37 devAj~nayA pArShadA ye tvadhirUpAstapodhanAH | pUrvoktairupadeshaishcha toShayanti sma pArvatIm || 1-29-38 hR^iShyate vai mahAdevI menA naiva prahR^iShyati | jugupsatyasakR^ittAM vai devIM devaM tathaiva sA || 1-29-39 sapArShadastvanAchArastava bhartA maheshvaraH | daridraH sarvadaivAsau shIlaM tasya na vartate || 1-29-40 mAtrA tathoktA varadA strIsvabhAvAchcha chukrudhe | smitaM kR^itvA cha varadA bhavapArshvamathAgamat || 1-29-41 vivarNavadanA devI mahAdevamabhAShata | neha vatsyAmyahaM deva naya mAM svaM niketanam || 1-29-42 tathA kartuM mahAdevaH sarvalokAnavaikShata | vAsArthaM rochayAmAsa pR^ithivyAM kurunandana || 1-29-43 vArANasI mahAtejAH siddhikSetraM maheshvaraH | divodAsena tAM j~nAtvA niviShTAM nagarIM bhavaH || 1-20-44 pArshve tiShThantamAhUya nikumbhamidamabravIt | gaNeshvara purIM gatvA shUnyAM vArANasIM kuru || 1-29-45 mR^idunaivAbhyupAyena hyativIryaH sa pArthivaH | tato gatvA nikumbhastu pUrIM vArANasIM tadA || 1-29-46 svapne nidarshayAmAsa kaNDukaM nAma nApitam | shreyaste.ahaM kariShyAmi sthAnaM me rochayAnagha || 1-29-47 madrUpAM pratimAM kR^itvA nagaryante tathaiva cha | tataH svapne yathoddiShTaM sarvaM kAritavAnnR^ipa || 1-29-48 purIdvAre tu vij~nApya rAjAnaM cha yathAvidhi | pUjAM tu mahatIM tasya nityameva prayojayat || 1-29-49 gandhaishcha dhUpamAlyaishcha prokShaNIyaistathaiva cha | annapAnaprayogaishcha atyadbhutamivAbhavat| || 1-29-50 evaM saMpUjyate tatra nityameva gaNeshvaraH | tato varasahasraM tu nAgarANAM prayachChati | putrAnhiraNyamAyushcha sarvAnkAmAMstathaiva cha || 1-29-51 rAj~nastu mahiShI shreShThA suyashA nAma vishrutA | putrArthamAgatA devI sAdhvI rAj~nA prachoditA || 1-29-52 pUjAM tu vipulAM kR^itvA devI putramayAchata | punaH punarathAgamya bahushaH putrakAraNAt || 1-29-53 na prayachChati putraM hi nikuMbhaH kAraNena hi | rAjA tu yadi naH kupyetkAryasiddhistato bhavet || 1-29-54 atha dIrgheNa kAlena krodho rAjAnamAvishat | bhUta eSha mahAndvAri nAgarANAM prayachChati || 1-29-55 prIto varAnvai shatasho mama kiM na prayachChati | mAmakaiH pUjyate nityaM nagaryA me sadaiva hi || 1-29-56 vij~nApito mayAtyarthaM devyA me putrakAraNAt | na dadAti cha putraM me kR^itaghnaH kena hetunA || 1-29-57 tato nArhati satkAraM matsakAshAdvisheShataH | tasmAttu nAshayiShyAmi sthAnamasya durAtmanaH || 1-29-58 evaM sa tu vinishchitya durAtmA rAjakilbiShI | sthAnaM gaNapatestasya nAshayAmAsa durmatiH || 1-29-59 bhagnamAyatanaM dR^iShTvA rAjAnamashapatprabhuH | yasmAdanaparAdhasya tvayA sthAnaM vinAshitam | puryakasmAdiyaM shUnyA tava nUnaM bhaviShyati || 1-29-60 tatastena tu shApena shUnyA vArANasI tadA | shaptvA purIM nikuMbhastu mahAdevamathAgamat || 1-29-61 akasmAttu purI sA tu vidrutA sarvatodisham | tasyAM puryAM tato devo nirmame padamAtmanaH || 1-29-62 ramate tatra vai devo ramamANo gireH sutAm | na ratiM tatra vai devI labhate gR^ihavismayAt | vasAmyatra na puryAM tu devI devamathAbravIt || 1-29-63 deva uvAcha nAhaM veshmani vatsyAmi avimuktaM hi me gR^iham | nAhaM tatra gamiShyAmi gachCha devi gR^ihaM prati || 1-29-64 hasannuvAcha bhagavAMstryambakastripurAntakaH | tasmAttadavimuktaM hi proktaM devena vai svayam || 1-29-65 evaM vArANasI shaptA avimuktaM cha kIrtitam || 1-29-66 yasminvasati vai devaH sarvadevanamaskR^itaH | yugeShu triShu dharmAtmA saha devyA maheshvaraH ||1-29-67 antardhAnaM kalau yAti tatpuraM hi mahAtmanaH | antarhite pure tasmin purI sA vasate punaH | evaM vArANasI shaptA niveshaM punarAgatA || 1-29-68 bhadrashreNyasya putro vai durdamo nAma vishrutaH | divodAsena bAleti ghR^iNayA sa vivarjitaH || 1-29-69 haihayasya tu dAyAdyaM kR^itavAnvai mahIpatiH | Ajahre pitR^idAyAdyaM divodAsahR^itaM balAt || 1-29-70 bhadrashreNyasya putreNa durdamena mahAtmanA | vairasyAntaM mahArAja kShatriyeNa vidhitsatA || 1-29-71 divodAsAddR^iShadvatyAM vIro jaj~ne pratardanaH | tena putreNa bAlena prahR^itaM tasya vai punaH || 1-29-72 pratardanasya putrau dvau vatsabhArgau babhUvatuH | vatsaputro hyalarkastu sannatistasya chAtmajaH || 1-29-73 alarkaH kAshirAjastu brahmaNyaH satyasa~NgaraH | alarkaM prati rAjarShiM shloko gItaH purAtanaiH || 1-29-74 ShaShTivarShasahasrANi ShaShTiM varShashatAni cha | yuvA rUpeNa saMpanna AsItkAshikulodvahaH || 1-29-75 lopAmudrAprasAdena paramAyuravApa saH | tasyAsItsumahadrAjyaM rUpayauvanashAlinaH | shApasyAnte mahAbAhurhatvA kShemakarAkShasam || 1-29-76 ramyAM niveshayAmAsa purIM vArANasIM punaH | sannaterapi dAyAdaH sunItho nAma dhArmikaH || 1-29-77 sunIthasya tu dAyAdaH kShemyo nAma mahAyashAH | kShemyasya ketumAnputraH suketustasya chAtmajaH || 1-29-78 suketostanayashchApi dharmaketuriti smR^itaH | dharmaketostu dAyAdaH satyaketurmahArathaH || 1-29-79 satyaketusutashchApi vibhurnAma prajeshvaraH | Anartastu vibhoH putraH sukumArastu tatsutaH || 1-29-80 sukumArasya putrastu dhR^iShTaketuH sudhArmikaH | dhR^iShTaketostu dAyAdo veNuhotraH prajeshvaraH || 1-29-81 veNuhotrasutashchApi bhargo nAma prajeshvaraH | vatsasya vatsbhUmistu bhR^igubhUmistu bhArgavAt || 1-29-82 ete tva~NgirasaH putrA jAtA vaMshe.atha bhArgave | brAhmaNAH kShatriyA vaishyAstayoH putrAH sahasrashaH | ityete kAshayaH proktA nahuShasya nibodha me || 1-29-83 iti shrImahAbhArate khileShu harivaMshe harivaMshaparvaNi kAshyapavarNanaM nAma ekonatriMsho.adhyAyaH