##Harivamsha Mahapuranam - Harivamsha Parva Chapter 30 - Yayaticharitrakathanam Note: Verse 33, line 2: paro is an obvious mistake. pUro is appropriate, ia also adopted by Gita edn ## Itranslated and proofread by K S Ramachandran ramachandran_ksr@yahoo.ca Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- triMsho.adhyAyaH yayAticharitrakathanam vaishaMpAyana uvAcha utpannAH pitR^ikanyAyAM virajAyAM mahaujasaH | nahuShasya tu dAyAdAH ShaDindropamatejasaH || 1-30-1 yatiryayAtiH saMyAtirAyatiH pA~nchiko bhavaH | suyAtiH ShaShThasteShAM vai yayAtiH pArthivo.abhavat | yatirjyeShThastu teShAM vai yayAtistu tataH param || 1-30-2 kAkutsthakanyAM gAM nAma lebhe paramadhArmikaH | yatistu mokShamAsthAya brahmabhUto.abhavanmuniH || 1-30-3 teShAM yayAtiH pa~nchAnAM vijitya vasudhAmimAm | devayAnImushanasaH sutAM bhAryAmavApa saH | sharmiShThAmAsurIM chaiva tanayAM vR^iShaparvaNaH || 1-30-4 yaduM cha turvasuM chaiva devayAnI vyajAyata | druhyuM chAnuM cha pUruM cha sharmiShThA vArShaparvaNI || 1-30-5 tasmai shakro dadau prIto rathaM paramabhAsvaram | asa~NgaM kA~nchanaM divyaM divyaiH paramavAjibhiH || 1-30-6 yuktaM manojavaiH shubhrairyena bhAryAmuvAha saH | sa tena rathamukhyena ShaDrAtrenAjayanmahIm | yayAtiryudhi durdharShastathA devAnsavAsavAn || 1-30-7 sa rathaH pauravANAM tu sarveShAmabhavattadA | yAvattu vasunAmno vai kauravAjjanamejayaH || 1-30-8 kuroH putrasya rAjendra rAj~naH pArIkShitasya ha | jagAma sa ratho nAshaM shApAdgArgyasya dhImataH || 1-30-9 gargyasya hi sutaM bAlaM sa rAjA janamejayaH | vAkChUraM hiMsayAmAsa brahmahatyAmavApa saH || 1-30-10 sa lohagandhI rAjarShiH paridhAvannitastataH | paurajAnapadaistyakto na lebhe sharma karhichit || 1-30-11 tataH sa duHkhasaMtapto nAlabhatsaMvidaM kvachit | indrotaH shaunakaM rAjA sharaNaM pratyapadyata || 1-30-12 yAjayAmAsa chendrotaH shaunako janamejayam | ashvamedhena rAjAnaM pAvanArthaM dvijottamaH || 1-30-13 sa lohagandho vyanashattasyAvabhR^ithametya ha | sa cha divyo ratho rAjanvasoshchedipatestadA | dattaH shakreNa tuShTena lebhe tasmAdbR^ihadrathaH || 1-30-14 bR^ihadrathAtkrameNaiva gato bArhadratham nR^ipam | tato hatvA jarAsaMdhaM bhImastaM rathamuttamam || 1-30-15 pradadau vAsudevAya prItyA kauravanandanaH | saptadvIpAM yayAtistu jitvA pR^ithvIM sasAgarAm || 1-30-16 vyabhajatpa~nchadhA rAjanputrANAM nAhuShastadA | dishi dakShiNapUrvasyAM turvasuM matimAnnR^ipaH || 1-30-17 pratIchyAmuttarasyAM cha druhyuM chAnuM cha nAhuShaH | dishi pUrvottarasyAM vai yaduM jyeShThaM nyayojayat || 1-30-18 madhye pUruM cha rAjAnamabhyaShi~nchata nAhuShaH | tairiyaM pR^ithivI sarvA saptadvIpA sapattanA || 1-30-19 yathApradeshamadyApi dharmeNa pratipAlyate | prajAsteShAM purastAttu vakShyAmi nR^ipasattama || 1-30-20 dhanurnyasya pR^iShatkAMshcha pa~nchabhiH puruSharShabhaiH | jarAvAnabhavadrAjA bhAramAveshya bandhuShu | niHkShiptashastraH pR^ithivIM nirIkShya pR^ithivIpatiH || 1-30-21 prItimAnabhavadrAjA yayAtiraparAjitaH | evaM vibhajya pR^ithivIM yayAtiryadumabravIt || 1-30-22 jarAM me pratigR^ihNIShva putra kR^ityAntareNa vai | taruNastava rUpeNa chareyaM pR^ithivImimAm | jarAM tvayi samAdhAya taM yaduH pratyuvAcha ha || 1-30-23 anirdiShTA mayA bhikShA brAhmaNasya pratishrutA | anapAkR^itya tAM rAjanna gR^ihIShyAmi te jarAm || 1-30-24 jarAyAM bahavo doShAH pAnabhojanakAritAH | tasmAjjarAM na te rAjangrahItumahamutsahe || 1-30-25 santi te bahavaH putrAH mattaH priyatarA nR^ipa | pratigrahItuM dharmaj~na putramanyaM vR^iNIShva vai || 1-30-26 sa evamukto yadunA rAjA kopasamanvitaH | uvAcha vadatAM shreShTho yayAtirgarhayansutam || 1-30-27 ka AshrayastavAnyo.asti ko vA dharmo vidhIyate | mAmanAdR^itya durbuddhe yadahaM tava deshikaH || 1-30-28 evamuktvA yaduM tAta shashApainaM sa manyumAn | arAjyA te prajA mUDha bhavitrIti narAdhama || 1-30-29 sa turvasuM cha druhyuM chApyanuM cha bharatarShabha | evamevAbravIdrAjA pratyAkhyAtashcha tairapi || 1-30-30 shashApa tAnatikruddho yayAtiraparAjitaH | yathA te kathitaM pUrvaM mayA rAjarShisattama || 1-30-31 evaM shaptvA sutAnsarvAMshchaturaH pUrupUrvajAn | tadeva vachanaM rAjA pUrumapyAha bhArata || 1-30-32 taruNastava rUpeNa chareyaM pR^ithivImimAm | jarAM tvayi samAdhAya tvaM pUro yadi manyase || 1-30-33 sa jarAM pratijagrAha pituH pUruH pratApavAn | yayAtirapi rUpeNa pUroH paryacharanmahIm || 1-30-34 sa mArgamANaH kAmAnAmantaM bharatasattama | vishvAchyA sahito reme vane chaitrarathe prabhuH || 1-30-35 yadAvitR^iShNaH kAmAnAM bhogeShu sa narAdhipaH | tadA pUroH sakAshAdvai svAM jarAM pratyapadyata || 1-30-36 tatra gAthA mahArAja shR^iNu gItA yayAtinA | yAbhiH pratyAharetkAmAnsarvato.a~NgAni kUrmavat || 1-30-37 na jAtu kAmaH kAmAnAmupabhogena shAmyati | haviShA kR^iShNavartmeva bhUya evAbhivardhate || 1-30-38 yatpR^ithivyAM vrIhiyavaM hiraNyaM pashavaH striyaH | nAlamekasya tatsarvamiti pashyanna muhyati || 1-30-39 yadA bhAvaM na kurute sarvabhUteShu pApakam | karmaNA manasA vAchA brahma saMpadyate tadA || 1-30-40 yadAnyebhyo na bibhyeta yadA chAsmAnna bibhyati | yadA nechChati na dveShTi brahma saMpadyate tadA || 1-30-41 yA dustyajA durmatibhiryA na jIryati jIryataH | yo.asau prANAntiko rogastAM tR^iShNAM tyajataH sukham || 1-30-42 jIryanti jIryataH keshA dantA jIryanti jIryataH | jIvitAshA dhanAshA cha jIryato.api na jIryati || 1-30-43 yachcha kAmasukhaM loke yachcha divyaM mahatsukham | tR^iShNAkShayasukhasyaite nArhataH ShoDashIM kalAm || 1-30-44 evamuktvA sa rAjarShiH sadAraH prAvishadvanam | kAlena mahatA vApi chachAra vipulaM tapaH || 1-30-45 bhR^Igutu~Nge tapastaptvA tapaso.ante mahAtapAH | anashnandehamutsR^ijya sadAraH svargamAptavAn || 1-30-46 tasya vaMshe mahArAja pa~ncha rAjarShisattamAH | yairvyAptA pR^ithivI sarvA sUryasyeva gabhastibhiH || 1-30-47 yadostu shR^iNu rAjarShervaMshaM rAjarShisatkR^itam | yatra nArAyaNo jaj~ne harirvR^iShNikulodvahaH || 1-30-48 dhanyaH prajAvAnAyuShmAnkIrtimAMshcha bhavennaraH | yayAteshcharitaM puNyaM paTha~nChR^iNvannarAdhipa || 1-30-49 iti shrImahAbhArate khileShu harivaMshe harivaMshaparvaNi yayAticharite triMsho.adhyAyaH