## Harivamsha Mahapuranam - Part 1 - Harivamsha Parva Chapter 33 Yaduvamsha Varnanam and Kartaviryotpatti Itranslated and proofread by K S Ramachandran ramachandran_ksr@yahoo.ca, June 21, 2007 ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- trayastriMsho.adhyAyaH yaduvaMshavarNanaM kArtavIryotpattishcha vaishampAyana uvAcha babhUvustu yadoH putrAH pa~ncha devasutopamAH | sahasradaH payodashcha kroShTA nIlo.a~njikastathA || 1-33-1 sahasradasya dAyAdAstrayaH paramadhArmikAH | haihayashcha hayashchaiva rAjanveNuhayastathA || 1-33-2 haihasyAbhavatputro dharmanetra iti smR^itaH | dharmanetrasya kArtastu sAha~njastasya chAtmajaH || 1-33-3 sAha~njanI nAma purI yena rAj~nA niveshitA | sAha~njasya tu dAyAdo mahiShmAnnAma pArthivaH || 1-33-4 mAhiShmatI nAma purI yena rAj~nA niveshitA | AsInmAhiShmataH putro bhadrashreNyaH pratApavAn || 1-33-5 vArANasyadhipo rAjA katithaH pUrvameva tu | bhadrashreNyasya putrastu durdamo nAma vishrutaH || 1-33-6 durdamasya suto dhImAnkanako nAma vIryavAn | kanakasya tu dAyAdAshchatvAro lokavishrutAH || 1-33-7 kR^itavIryaH kR^itaujAshcha kR^itavarmA tathaiva cha | kR^itAgnistu chaturtho.abUutkR^itavIryAttathArjunaH || 1-33-8 yastu bAhusahasreNa saptadvIpeshvaro.abhavat | jigAya pR^ithivImeko rathenAdityavarchasA || 1-33-9 sa hi varShAyutaM taptvA tapaH paramadushcharam | dattamArAdhayAmAsa kArtavIryo.atrisaMbhavam || 1-33-10 tasmai datto varAnprAdAchchaturo bhUritejasaH | pUrvaM bAhusahasraM tu prArthitaM sumahadvaram || 1-33-11 adharme vartamAnasya sadbhistatra nivAraNam | ugreNa pR^ithivIM jitvA svadharmeNAnura~njanam || 1-33-12 saMgrAmAnsubahUnkR^itvA hatvA chArInsahasrashaH | saMgrAme vartamAnasya vadhaM chApyadhikAdraNe || 1-33-13 tasya bAhusahasraM tu yudhyataH kila bhArata | yogAdyogeshvarasyaiva prAdurbhavati mAyayA || 1-33-14 teneyaM pR^ithivI sarvA saptadvIpA sapattanA | sasamudrA sanagarA ugreNa vidhinA jitA || 1-33-15 tena saptasu dvIpeShu sapta yaj~nashatAni vai | prAptAni vidhinA rAj~nA shrUyante janamejaya || 1-33-16 sarve yaj~nA mahAbAhostasyAsanbhUridakShiNAH | sarve kA~nchanayUpAshcha sarve kA~nchanavedayaH || 1-33-17 sarvairdevairmahArAjA vimAnasthairala~NkR^itAH | gandharvairapsarobhishcha nityamevopashobhitAH || 1-33-18 yasya yaj~ne jagau gAthAM gandharvo nAradastathA | varIdAsAtmajo vidvAnmahimnA tasya vismitaH || 1-33-19 nArada uvAcha na nUnaM kArtavIryasya gatiM yAsyAnti pArthivAH | yaj~nairdAnaistapobhirvA vikrameNa shrutena cha || 1-33-20 sa hi saptasu dvIpeShu khadgI charmI sharAsanI | rathI dvIpAnanucharanyogI saMdR^ishyate nR^ibhiH || 1-33-21 anaShTadravyatA chaiva na shoko na cha vibhramaH | prabhAveNa mahArAj~naH prajA dharmeNa rakShataH || 1-33-22 pa~nchAshItisahasrANi varShANAM vai narAdhipaH | sa sarvaratnabhAksaMrAT chakravartI babhUva ha || 1-33-23 sa eva yaj~napAlo.abhUtkShetrapAlaH sa eva cha | sa eva vR^iShTyAM parjanyo yogitvAdarjuno.abhavat || 1-33-24 sa vai bAhusahasreNA jyAghAtakaThinatvachA | bhAti rashmisahasreNa sharadIva divAkaraH || 1-33-25 sa hi nAgAnmanuShyeShu mAhiShmatyAM mahAdyutiH | karkoTakasutA~njitvA puryAM tasyAM nyaveshayat || 1-33-26 sa vai vegaM samudrasya prAvR^iTkAle.aMbujekShaNaH | krIDanniva bhujodbhinnaM pratisrotashchakAra ha || 1-33-27 luNThitA krIDitA tena phenasragdAmamAlinI | chaladUrmisahasreNa sha~NkitAbhyeti narmadA || 1-33-28 tasya bAhusahasreNa kShubhyamANe mahodadhau | bhayAnnilInA nishcheShTAH pAtAlasthA mahAsurAH || 1-33-29 chUrNIkR^itamahAvIchiM chalamInamahAtimim | mArutAviddhaphenaughamAvartakShobhaduHsaham || 1-33-30 prAvartayattadA rAjA sahasreNa cha bAhunA | devAsurasamAkShiptaH kShIrodamiva mandaraH || 1-33-31 mandarakShobhachakitA amR^itodbhavasha~NkitAH | sahasotpatitA bhItA bhImaM dR^iShTvA nR^ipottamam || 1-33-32 natA nishchalamUrdhAno babhUvuste mahoragAH | sAyAhne kadalIkhaNDaiH kaMpitAstasya vAyunA || 1-33-33 sa vai baddhvA dhanurjyAbhirutsiktaM pa~nchabhiH sharaiH | la~NkeshaM mohayitvA tu sabalaM rAvaNaM balAt | nirjityaiva samAnIya mAhiShmatyAM babandha tam || 1-33-34 shrutvA tu baddhaM paulastyaM rAvaNaM tvarjunena tu | tato gatvA pulastyastamarjunaM dadR^ishe svayam | mumocha rakShaH paulastyaM pulastyenAnuyAchitaH || 1-33-35 yasya bAhusahasrasya babhUva jyAtalasvanaH | yugAnte tvambudasyeva sphuTato hyashaneriva || 1-33-36 aho bata mR^idhe vIryaM bhArgavasya yadachChinat | rAj~no bAhusahasraM tu haimaM tAlavanaM yathA || 1-33-37 tR^iShitena kadAchitsa bhikShitashchitrabhAnunA | sa bhikShAmadadAdvIraH saptadvIpAnvibhAvasoH || 1-33-38 purANi grAmaghoShAMshcha viShayAMshchaiva sarvashaH | jajvAla tasya sarvANi chitrabhAnurdidhakShayA || 1-33-39 sa tasya puruShendrasya prabhAvena mahAtmanaH | dadAha kArtavIryasya shailAMshchaiva vanAni cha || 1-33-40 sa shUnyamAshramaM ramyaM varuNasyAtmajasya vai | dadAha vanavadbhItashchitrabhAnuH sahaihayaH || 1-33-41 yaM lebhe varuNaH putraM purA bhAsvantamuttamam | vasiShThaM nAma sa muniH khyAta Apava ityuta || 1-33-42 yatrApavastu taM krodhAchChaptavAnarjunaM vibhuH | yasmAnna varjitamidaM vanaM te mama haihaya || 1-33-43 tasmAtte duShkaraM karma kR^itamanyo haniShyati | rAmo nAma mahAbAhurjAmadagnyaH pratApavAn || 1-33-44 ChittvA bahusahasraM te pramathya tarasA balI | tapasvI brAhmaNashcha tvAM vadhiShyati sa bhArgavaH || 1-33-45 vaishampAyana uvAcha anaShTadravyatA yasya babhUvAmitrakarshana | prabhAvena narendrasya prajA dharmeNa rakShataH || 1-33-46 rAmAttato.asya mR^ityurvai tasya shApAnmunernR^ipa | varashchaiva hi kauravya svayameva vR^itaH purA || 1-33-47 tasya putrashatasyAsanpa~ncha sheShA mahAtmanaH | kR^itAstrA balinaH shUrA dharmAtmAno yashasvinaH || 1-33-48 shUrasenashcha shUrashcha dhR^iShToktaH kR^iShNa eva cha | jayadhvajashcha nAmnA.a.asIdAvantyo nR^ipatirmahAn || 1-33-49 kArtavIryasya tanayA vIryavanto mahArathAH | jayadhvajasya putrastu tAlaja~Ngho mahAbalaH || 1-33-50 tasya putrAH shataM khyAtAstAlaja~NghA iti shrutAH | teShAM kule mahArAja haihayAnAM mahAtmanAm || 1-33-51 vItihotrAH sujAtAshcha bhojAshchAvantayaH smR^itAH | tauNDikerA iti khyAtAstAlaja~NghAstathaiva cha || 1-33-52 bharatAshca sutA jAtA bahutvAnnAnukIrtitAH | vR^iShaprabhR^itayo rAjanyAdavAH pUrNakarmiNaH || 1-33-53 vR^iSho vaMshadharastatra tasya putro.abhavanmadhuH | madhoH putrashataM tvAsIdvR^iShaNastasya vaMshabhAk || 1-33-54 vR^iShaNAdvR^iShNayaH sarve madhostu mAdhavAH smR^itAH | yAdavA yadunA chAgre niruchyante cha haihayAH || 1-33-55 shUrAshcha shUravIrAshcha shUrasenAstathAnagha | shUrasena iti khyAtastasya desho mahAtmanaH || 1-33-56 na tasya vittanAsho.asti naShTaM pratilabhechcha saH | kArtavIryasya yo janma kIrtayediha nityashaH || 1-33-57 ete yayAtiputrANAM pa~ncha vaMshA vishAMpate | kIrtitA lokavIrANAM ye lokAndhArayanti vai | bhUtAnIva mahArAja pa~ncha sthAvaraja~NgamAn || 1-33-58 shrutvA pa~nchavisargaM tu rAjA dharmArthakovidaH | vashI bhavati pa~nchAnAmAtmajAnAM tatheshvaraH || 1-33-59 labhetpa~ncha varAMshchaiva durlabhAniha laukikAn | AyuH kIrtiM tathA putrAnaishvaryaM bhUmimeva cha | dhAraNAchChravaNAchchaiva pa~nchavargasya bhArata || 1-33-60 kroShTostu shR^iNu rAjendra vaMshamuttamapauruSham | yadorvaMshadharasyAtha yajvanaH puNyakarmaNaH || 1-33-61 kroShTurhi vaMshaM shrutvemaM sarvapApaiH pramuchyate | yasyAnvavAyajo viShNurharirvR^iShNikulodvahaH || 1-33-62 iti shrImahAbhArate khileShu harivaMshe harivaMshaparvaNi trayastriMsho.adhyAyaH