## Harivamsha Mahapuranam - Part 1 - Harivamsha Parva Chapter 35 - Shri Krishnavamshavarnanam Itranslated and proofread by K S Ramachandran ramachandran_ksr@yahoo.ca, June 23, 2007 ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- atha pa~nchatriMsho.adhyAyaH kR^iShNavaMshavarNanam vaishampAyana uvAcha yAH patnyo vasudevasya chaturdasha varA~NganAH | pauravI rohiNI nAma indirA cha tathA varA || 1-35-1 vaishAkhI cha tathA bhadrA sunAmnI chaiva pa~nchamI| sahadevA shAntidevA shrIdevA devarakShitA || 1-35-2 vR^ikadevyupadevI cha devakI chaiva saptamI | sutanurbaDavA chaiva dve ete parichArike || 1-35-3 pauravI rohiNI nAma bAhlikasyAtmajAbhavat | jyeShThA patnI mahArAja dayitA.a.anakadundubheH || 1-35-4 lebhe jyeShThaM sutaM rAmaM sAraNaM shaThameva cha | durdamaM damanaM shvabhraM piNDArakamushInaram || 1-35-5 chitrAM nAma kumArIM cha rohiNI tanayA dasha | chitrA subhadreti punarvikhyAtA kurunandana || 1-35-6 vasudevAchcha devakyAM jaj~ne shaurirmahAyashAH | rAmAchcha nishaTho jaj~ne revatyAM dayitaH sutaH || 1-35-7 subhadrAyAM rathI pArthAdabhimanyurajAyata | akrUrAtkAshikanyAyAM satyaketurajAyata || 1-35-8 vasudevasya bhAryAsu mahAbhAgAsu saptasu | ye putrA jaj~nire shUrA nAmatastAnnibodha me || 1-35-9 bhojashcha vijayashchaiva shAntidevAsutAvubhau | vR^ikadevaH sunAmAyAM gadashchAstAM sutAvubhau || 1-35-10 upAsa~NgavaraM lebhe tanayaM devarakShitA | agAvahaM mahAtmAnaM vR^ikadevI vyajAyata || 1-35-11 kanyA trigartarAjasya bhartA vai shaishirAyaNaH | jij~nAsAM pauruShe chakre na chaskande.atha pauruSham || 1-35-12 kR^iShNAyasasamaprakhyo varShe dvAdashame tathA | mithyAbhishapto gArgyastu manyunAbhisamIritaH || 1-35-13 gopakanyAmupAdAya maithunAyopachakrame | gopAlI tvapsarAstasya gopastrIveShadhAriNI || 1-35-14 dhArayAmAsa gArgyasya garbhaM durdharamachyutam | mAnuShyAM gArgyabhAryAyAM niyogAchChUlapANinaH || 1-35-15 sa kAlayavano nAma jaj~ne rAjA mahAbalaH | vR^iShapUrvArdhakAyAstamavahanvAjino raNe || 1-35-16 aputrasya sa rAj~nastu vavR^idhe.antaHpure shishuH | yavanasya mahArAja sa kAlayavano.abhavat || 1-35-17 sa yuddhakAmI nR^ipatiH paryapR^ichChaddvijottamAn | vR^IShNandhakakulaM tasya nArado.akathayadvibhuH || 1-35-18 akShauhiNyA tu sainyasya mathurAmabhyayAttadA | dUtaM sampreShayAmAsa vR^iShNyandhakaniveshanam || 1-35-19 tato vR^IShNyandhakAH kR^iShNaM puraskR^itya mahAmatim | sametA mantrayAmAsuryavanasya bhayAttadA || 1-35-20 kR^itvA cha nishchayaM sarve palAyanaparAyaNAH | vihAya mathurAM ramyAM mAnayantaH pinAkinam || 1-35-21 kushasthalIM dvAravatIM niveshayitumIpsavaH | iti kR^iShNasya janmedaM yaH shuchirniyatendriyaH | parvasu shrAvayedvidvAnanR^iNaH sa sukhI bhavet || 1-35-22 iti shrImahAbhArate khileShu harivaMshe harivaMshaparvaNi shrikR^iShNajanmAnukIrtanaM nAma pa~nchatriMsho.adhyAyaH