## Harivamshamahapuranam - Part 1 - Harivamsha Parva Chapter 36 - Kroshtuvamshavarnanam Itranslated and proofread by K S Ramachandran ramachandran_ksr@yahoo.ca, June 27, 2007## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- ShaTtriMsho.adhyAyaH kroShTuvaMshavarNanam vaishampAyana uvAcha kroShTorevAbhavatputro vR^ijinIvAnmahAyashAH | vR^ijinIvatsutashchApi svAhiH svAhAkR^itaM varaH || 1-36-1 svAhiputro.abhavadrAjA ruShadgurvadatAM varaH | mahAkratubhirIje yo vividhairbhUridakShiNaiH || 1-36-2 sutaprasUtimanvichChanruShadguH so.agryamAtmajam | jaj~ne chitrarathastasya putraH karmabhiranvitaH || 1-36-3 AsIchchaitrarathirvIro yajvA vipuladakShiNaH | shashabinduH paraM vR^ittaM rAjarShINAmanuShThitaH || 1-36-4 pR^ithushravAH pR^ithuyashA rAjA.a.asIchChashabindujaH | shaMsanti cha purANaj~nAH pArthashravasamuttaram || 1-36-5 anantaraM suyaj~nastu suyaj~natanayo.abhavat | ushato yaj~namakhilaM svadharmamushatAM varaH || 1-36-6 shineyurabhavatsUnurushataH shatrutApanaH | maruttastasya tanayo rAjarShirabhavannR^ipa || 1-36-7 marutto.alabhata jyeShThaM sutaM kambalabarhiSham | chachAra vipulaM dharmamamarShAtpretyabhAgapi || 1-36-8 sutaprasUtimichChanvai sutaM kaMbalabarhiShaH | babhUva rukmakavachaH shataprasavataH sutaH || 1-36-9 nihatya rukmakavachaH shataM kavachinAM raNe | dhanvinAM nishitairbANairavApa shriyamuttamAm || 1-36-10 jaj~ne.atha rukmakavachAtparAjitparavIrahA | jaj~nire pa~ncha putrAstu mahAvIryAH parAjitaH || 1-36-11 rukmeShuHpR^ithurukmashcha jyAmaghaH palito hariH | pAlitaM cha hariM chaiva videhebhyaH pitA dadau || 1-36-12 rukmeShurabhavadrAjA pR^ithurukmasya saMshritaH | tAbhyAM pravrAjito rAjyAjjyAmagho.avasadAshrame || 1-36-13 prashAntaH sa vanasthastu brAhmaNaishchAvabodhitaH | jigAya rathamAsthAya deshamanyaM dhvajI rathI || 1-36-14 narmadAkUlamekAkI nagarIM mR^ittikAvatIm | R^ikShavantaM giriM jitvA shuktimatyAmuvAsa saH || 1-36-15 jyAmaghasyAbhavadbhAryA shaibyA balavatI satI | aputro.api cha rAjA sa nAnyAM bhAryAmavindata || 1-36-16 tasyAsIdvijayo yuddhe tatra kanyAmavApa saH | bhAryAmuvAcha saMtrastaH snuSheti sa nareshvaraH || 1-36-17 etachChrutvAbravIddevI kasya cheyaM snuSheti vai | abravIttadupashrutya jyAmagho rAjasattamaH || 1-36-18 yaste janiShyate putraH tasya bhAryopadAnavI | ugreNa tapasA tasyAH kanyAyAH sa vyajAyata | putraM vidarbhaM subhagA shaibyA pariNatA satI || 1-36-19 rAjaputryAM tu vidvAMsau snuShAyAM krathakaushikau | pashchAdvidarbho.ajanayachChUrau raNavishAradau || 1-36-20 lomapAdaM tritIyaM tu putraM paramadhArmikam | lomapAdAtmajo babhrurAhvatistasya chAtmajaH || 1-36-21 AhvateH kaushikashchaiva vidvAnparamadhArmikaH | chediH putraH kaushikasya tasmAchchaidyA nR^ipAH smR^itAH || 1-36-22 bhImo vidarbhasya sutaH kuntistasyAtmajo.abhavat | kunterdhR^iShTasuto jaj~ne raNadhR^iShTaH pratApavAn | dhR^iShTasya jaj~nire shUrAstrayaH paramadhArmikAH || 1-36-23 Avantashcha dashArhashcha balI viShaharashcha yaH | dashArhasya suto vyomA vyomno jImUta uchyate || 1-36-24 jImUtaputro bR^ihatistasya bhImarathaH sutaH | atha bhImarathasyAsItputro navarathastathA || 1-36-25 tasya chAsIddasharathAH shakunistasya chAtmajaH | tasmAtkarambhaH kArambhirdevarAto.abhavannR^ipaH || 1-36-26 devakShatro.abhavattasya daivakShatrirmahAyashAH | devagarbhasamo jaj~ne devakShatrasya nandanaH || 1-36-27 madhUnAM vaMshakR^idrAjA madhurmadhuravAgapi | madhorjaj~ne.atha vaidarbhyAM putro maruvasAstathA || 1-36-28 AsInmaruvasaH putraH purudvAnpuruShottamaH | madhurjaj~ne.atha vaidarbhyAM bhadravatyAM kurUdvahaH || 1-36-29 aikShvAkI chAbhavadbhAryA sattvAMstasyAmajAyata | sattvAnsarvaguNopetaH sAttvatAM kIrtivardhanaH || 1-36-30 imAM visR^iShTiM vij~nAya jyAmaghasya mahAtmanaH | yujyate parayA kIrtyA prajAvAMshcha bhavennaraH || 1-36-31 iti shrImahAbhArate khileShu harivaMshe harivaMshaparvaNi ShaTtriMsho.adhyAyaH