Chapter 42 ##Harivamsha Mahapuranam - Part 1 - Harivamsha Parva - Chapter 42 - Vishnorisvaratvakathanam Itranslated and proofread by K S Ramachandran ramachandran_ksr@yahoo.ca, October 18, 2007 NOTE : line 2 of verse 8: ##mahAtmyabhyo## is grammatically incorrect Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com ------------------------------------------------------------------------ atha dvichatvAriMsho.adhyAyaH viShNorIshvaratvakathanam vaishaMpAyana uvAcha vishvatvaM shR^iNu me viShNorharitvaM cha kR^ite yuge | vaikuNThatvaM cha deveShu kR^ShNatvaM mAnuSheShu cha ||1-42-1 IshvaratvaM cha tasyedaM gahanAM karmaNAM gatim | saMpratyatItAM bhAvyAM cha shR^iNu rAjanyathAtatham ||1-42-2 avyakto vyaktali~Ngastho yatraiva bhagavAnprabhuH | nArAyaNo hyanantAtmA prabhavo.avyaya eva cha ||1-42-3 eSha nArAyaNo bhUtvA harirAsItkR^ite yuge | brahmA shakrashcha somashcha dharmaH shukro bR^ihaspatiH ||1-42-4 aditerapi putratvametya yAdavanandanaH | eSha viShNuriti khyAta indrAdavarajo.abhavat ||1-42-5 prasAdajaM hyasya vibhoradityAH putrajanma tat | vadhArthaM surashatrUNAM daityadAnavarakShasAm ||1-42-6 pradhAnAtmA purA hyeSha brahmANamasR^ijatprabhuH | so.asR^IjatpUrvapuruShaH purA kalpe prajApatIn ||1-42-7 te tanvAnAstanUstatra brahmavaMshAnanuttamAn | tebhyo.abhavanmahAtmabhyo bahudhA brahma shAshvatam ||1-42-8 etadAshcharyabUtasya viShNornAmAnukIrtanam | kIrtanIyasya lokeShu kIrtyamAnaM nibodha me ||1-42-9 vR^itte vR^itravadhe tAta vartamAne kR^ite yuge | AsIttrailokyavikhyAtaH saMgrAmastArakAmayaH ||1-42-10 tatrAsandAnavA ghorAH sarve saMgrAmadarpitAH | ghnanti devaganAnsarvAnsayakShoragarAkShasAn ||1-42-11 te vadhyamAnA vimukhAH kShINapraharaNA raNe | trAtAraM manasA jagmurdevaM nArAyaNaM harim ||1-42-12 etasminnantare meghA nirvANA~NgAravarShiNaH | sArkachandragrahagaNaM ChAdayanto nabhastalam ||1-42-13 cha~nchadvidyudgaNAviddhA ghorA nihrAdakAriNaH | anyonyavegAbhihatAH pravavuH sapta mARutAH ||1-42-14 dIptatoyAshanIpAtairvajravegAnilAkulaiH | rarAsa ghorairutpAtairdahyamAnamivAMbaram ||1-42-15 peturulkAsahasrANi muhurAkAshagAnyapi | nyubjAni cha vimAnAni prapatantyutpatanti cha ||1-42-16 chaturyugAntaparyAye lokAnAM yadbhayaM bhavet | tAdR^ishAnyeva rUpANi tasminnutpAtalakShaNe ||1-42-17 tamasA niShprabhaM sarvaM na prAj~nAyata ki~nchana | timiraughaparikShiptA na rejushcha disho dasha ||1-42-18 nisheva rUpiNI kAlI kAlameghAvaguNThitA | dyaurna bhAtyabhibhUtArkA ghoreNa tamasA vR^itA || 1-42-19 tAnghanaughAnsatimirAndorbhyAmutkShipya sa prabhuH | vapuH saMdarshayAmAsa divyaM kR^iShNavapurhariH ||1-42-20 balAhakA~njananibhaM balAhakatanUruham | tejasA vapuShA chaiva kR^iShNaM kR^iShNamivAchalam ||1-42-21 dIptapItAMbaradharaM taptakA~nchanabhUShaNam | dhUmAndhakAravapuShA yugAntAgnimivotthitam ||1-42-22 chaturdviguNapInAMsaM balAkApa~NktibhUShanam | chAmIkarakarAkArairAyudhairupashobhitam ||1-42-23 chandrArkakiraNoddyotaM girikUTaM shilochchayam | nandakAnanditakaraM sharAshIviShadhAriNam ||1-42-24 shaktichitraM halodagraM sha~NkhachakragadAdharam | viShNushailaM kShamAmUlaM shrIvR^ikShaM shAr~Ngadhanvinam ||1-42-25 haryashvarathasaMyukte suparNadhvajashobhite | chandrArkachakraruchire mandarAkShavR^itAntare ||1-42-26 anantarashmisaMyukte dadR^ishe merukUbare | tArakAchitrakusume grahanakshatrabandhure ||1-42-27 bhayeShvabhayadaM vyomni devA daityaparAjitAH | dadR^ishuste sthitaM devaM divyalokamaye rathe ||1-42-28 te kR^itA~njalayaH sarve devAH shakrapurogamAH | jayashabdaM puraskR^itya sharaNyaM sharaNaM gatAH ||1-422-29 sa teShAM tA giraH shrutvA viShNurdayitadevataH | manashchakre vinAshya dAnavAnAM mahAmR^idhe ||1-42-30 AkAshe tu sthito viShNuH sottame puruShottamaH | uvAcha devatAH sarvAH sapratij~namidaM vachaH ||1-42-31 shAntiM bhajata bhadraM vo mA bhaiShTA marutAM gANAH | jitA me dAnavAH sarve trAilokyAM pratigR^ihyatAm ||1-42-32 te tasya satyasaMdhasya viShNorvAkyena toShitAH | devAH prItiM parAM jagmuH prApyevAmR^itamutthitam ||1-42-33 tatastamaH samhR^iyate vineshushcha balAhakAH | pravavushcha shivA vAtAH prAsannAshcha disho dasha ||1-42-34 suprabhANi cha jyotIMShi chandraM chakruH pradakShiNam | dIptimanti cha tejAMsi chakrurarkaM pradakShiNam || 1-42-35 na vigrahaM grahAshchakruH prasannAschApi sindhavaH | nIrajaskA babhurmArgA nAkamArgAdayastrayaH ||1-42-36 yathArthAmUhuH sarito nApi chukShubhire.arNavAH | Asa~nChubhAnIndriyANi narANAmantarAtmasu ||1-42-37 maharShayo vItashokA vedAnuchchairadhIyata | yaj~neShu cha haviH svAdu shivamashnAti pAvakaH ||1-42-38 pravR^ittadharmAH saMvR^ittA lokA muditamAnasAH | prItyA paramayA yuktA devadevasya bhUpateH | viShNoH satyapratij~nasya shrutvArinidhane giram ||1-42-39 iti shrImahAbhArate khileShu harivaMshe harivaMshaparvaNi AshcharyatArakAmaye dvichatvAriMsho.adhyAyaH