##Harivamsha MahA Puranam- Part 1 - Harivamsha Parva
Chapter 53 - Brahma's advice to Devas
Itranslated and proofread by K S Ramachandran
ramachandran_ksr@yahoo.ca, January 22, 2008##

Further proof-read by Gilles Schaufelberger, schaufel @ wanadoo.fr
If you find any errors compared to Chitrashala Press edn,
send corrections to A. Harindranath, harindranath_a @ yahoo.com
------------------------------------------------------------------------

  atha tripa~nchAshattamo.adhyAyaH
  aMshAvataraNam
  
  vaishaMpAyana uvAcha

  te shrutvA pR^ithivIvAkyam sarva eva divaukasaH |
  tadarthakR^ityaM saMchintya pitAmahamathAbruvan ||1-53-1
  bhagavanhriyatAmasyA dharaNyA bhArasaMtatiH |
  sharIrakartA lokAnAM tvaM hi lokasya cheshvaraH ||1-53-2
  yatkartavyaM mahendreNa yamena varuNena cha |
  yadvA kAryaM dhaneshena svayaM nArAyaNena vA ||1-53-3
  yadvA chandramasA kAryam bhAskareNAnilena vA |
  AdityairvasubhirvApi rudrairvA lokabhAvanaiH ||1-53-4
  ashvibhyAM devavaidyAbhyAM sAdhyairvA tridashAlayaiH |
  bR^ihaspatyushanobhyAM vA kAlena kalinApi vA ||1-53-5
  maheshvareNa vA brahmanvishAkhena guhena vA |
  yakSharAkShasagandharvaishchAranairvA mahoragaiH ||1-53-6
  pata~NgaiH parvataishchApi sAgarairvA mahormibhiH |
  ga~NgAmukhAbhirdivyAbhiH saridbhirvA sureshvara ||1-53-7
  kShipramAj~nApaya vibho kathamaMshaH prayujyatAm |
  yadi te pArthivaM kAryaM karyaM pArthivavigrahe ||1-53-8
  kathamaMshAvataraNaM kurmaH sarve pitAmaha |
  antarikShagatA ye cha pR^ithivyAM pArthivAshcha ye ||1-53-9
  sadasyAnAM cha viprANAM parthivAnaM kuleShu cha |
  ayonijAshchaiva tanUH sR^ijAmo jagatItale ||1-53-10
  surANAmekakAryANAM shrutvaitannishchitaM matam |
  devaiH parivR^itaiH prAha vAkyaM lokapitAmahaH ||1-53-11
  rochate me surashreShThA yuShmAkamapi nishchayaH |
  sR^ijadhvaM svasharIrAMshAMstejasA.a.atmasamAnbhuvi ||1-53-12
  sarva eva surashreShThAstejobhiravarohata |
  bhAvayanto bhuvaM devIM labdhvA tribhuvanashriyam ||1-53-13
  pArthive bhArate vaMshe pUrvameva vijAnatA |
  pR^ithivyAM saMbhramamimam shrUyatAM yanmayA kR^itam ||1-53-14
  samudre.aham purA pUrve velAmAsAdya pashchimAm |
  Ase sArdhaM tanUjena kashyapena mahAtmanA ||1-53-15
  kathAbhiH pUrvavR^ittAbhirlokavedAnugAmibhiH |
  itivR^ittaishcha bahubhiH purANaprabhavairgunAiH ||1-53-16
  kurvatastu kathAstAstAH samudraH saha ga~NgayA |
  samIpamAjagAmAshu yuktastoyadamArutaiH ||1-53-17
  sa vIchiviShamAM kurvangatiM vegatara~NgiNIm |
  yAdogaNavichitreNa saMChannastoyavAsasA ||1-53-18
  sha~NkhamuktAmalatanuH pravAladrumabhUShaNaH |
  yuktachandramasA pUrNaH SAbhragaMbhIraniHsvanaH  ||1-53-19
  sa mAM paribhavanneva svAM velAM samatikraman |
  kledayAmAsa chapalairlAvanairaMbuvisravaiH ||1-53-20
  taM cha deshaM vyavasitaH samudrodbhirvimarditum |
  uktaH saMrabdhayA vAchA shAnto.asIti mayA tadA  ||1-53-21
  shAnto.asItyuktamAtrastu tanutvaM sAgaro gataH |
  saMhatormitara~NgaughaH sthito rAjashriyA jvalan ||1-53-22
  bhUyashchaiva mayA shaptaH samudraH saha ga~NgayA |
  sakAraNAM matiM kR^itvA yuShmAkaM hitakAmyayA ||1-53-23
  yasmAttvaM rAjatulyena  vapuShA samupasthitaH |
  gachChArNava mahIpAlo rAjaiva tvaM bhaviShyasi ||1-53-24
  tatrApi sahajAM lIlAM dhArayansvena tejasA |
  bhaviShyasi nR^iNAM bhartA bhAratAnAM kulodvahaH ||1-53-25
  shAnto.asIti mayoktastvaM yachchAsi tanutAM gataH |
  sutanuryashasA loke shantanustvaM bhaviShyasi ||1-53-26
  iyamapyAyatApa~NgI ga~NgA sarvA~NgashobhanA |
  rUpiNI cha sarichChreShThA tatra tvAmupayAsyati ||1-53-27
  evamuktastu mAM kShubdhaH so.bhivIkShyArNavo.abravIt |
  mAM prabho devadevAnAM kimarthaM shaptavAnasi 1-53-28
  ahaM tava vidheyAtmA tvatkR^itastvatparAyaNaH |
  ashapo.asadR^ishairvAkyairAtmajaM mAM kimAtmanA ||1-53-29
  bhagavaMstvatprasAdena vegAtparvaNi vardhitaH |
  yadyahaM chalito brahmanko.atra doSho mamAtmanaH ||1-53-30
  kShiptAbhiH pavanairadbhiH spR^iShTo yadyasi parvaNi |
  atra me kiM nu bhagavanvidyate shApakAraNam ||1-53-31
  uddhataishcha mahAvAtaiH pravR^iddhaishcha balAhakaiH |
  parvaNA chenduyuktena tribhiH  kShubdho.asmi kAraNaiH ||1-53-32
  evaM yadyaparAddho.ahaM kAraNaistvatprakalpitaiH |
  kShantumarhasi me brahma~nChApo.ayaM vinivartyatAm ||1-53-33
  evaM mayi nirAlambe shApAchChithilatAM gate |
  kAruNyaM kuru devesha pramANaM yadyavekShase ||1-53-34
  asyAstu devaga~NgAyA gAM gatAyAstvadAj~nayA |
  mama doShAtsadoShAyAH prasAdaM kartumarhasi ||1-53-35 
  tamahaM shlakShNayA vAcha mahArNavamathAbruvam |
  akAraNaj~naM devAnAM trastaM shApAnalena tam ||1-53-36
  shAntiM vraja na bhetavyaM prasanno.asmi mahodadhe |
  shApe.asminsaritAM nAtha bhaviShyaM shR^iNu kAraNam ||1-53-37
  tvaM gachCha bhArate vaMshe svaM dehaM svena tejasA |
  Adhatsva saritAM nAtha tyaktvemAM sAgarIM tanum ||1-53-38
  mahodadhe mahIpAlastatra rAjashriyA vR^itaH |
  pAlayaMshchaturo varNAnvraMsyase salileshvara ||1-53-39
  iyaM cha te sarichChreShThA bibhratI rUpamuttamam |
  tatkAlaM ramaNIyA~NgI ga~NgA parichariShyati ||1-53-40
  anayA saha jAhnavyA modamAno mamAj~nayA|
  imaM salilasaMkledaM vismariShyasi sAgara ||1-53-41
  tvaratA chaiva kartavyaM tvayedaM mama shAsanam |
  prAjApatyena vidhinA ga~NgayA saha sAgara ||1-53-42
  vasavaH prachyutAH svargAtpraviShTAshcha rasAtalam |
  teShAmutpAdanArthAya tvaM mayA viniyojitaH ||1-53-43
  aShTau tA~njAhnavI garbhAnapatyArthaM dadhAtviyam |
  vibhAvasostulyaguNAnsurANAM prItivardhanAn  ||1-53-44
  utpAdya tvaM vasU~nChIghraM kR^itvA kurukulaM mahat |
  praveShTAsi tanuM tyaktvA punaH sAgara sAgarIm ||1-53-45
  evametanmayA pUrvaM hitArthaM vaH surottamAH |
  bhaviShyaM pashyatAM bhAraM pR^ithivyAH pArthivAtmakam ||1-53-46
  tadeSha shantanorvaMshaH pR^thivyAM ropito mayA |
  vasavo ye cha ga~NgAyAmutpannAstridivaukasaH ||1-53-47
  adyApi bhuvi gA~Ngeyastatraiva vasuraShTamaH |
  sapteme vasavaH prAptAH sa ekaH parilaMbate ||1-53-48
  dvitIyAyAM sa sR^iShTAyAM dvitIyA shantanostanuH |
  vichitravIryo dyutimAnAsIdrAjA pratApavAn ||1-53-49
  vaichitryavIryau dvAveva pArthivau bhuvi sAMpratam |
  dhR^itarAShTrashcha pANDushcha vikhyAtau puruSharShabhau ||1-53-50
  tatra pANDoH shriyA dhR^iShTe dve bhArye saMbabhUvatuH |
  shubhe kuntI cha mAdrI cha devayoShopame tu te ||1-53-51
  dhR^itarAShTrasya rAj~nastu bhAryaikA tulyachAriNI |
  gAndhArI bhuvi vikhyAtA bharturnityaM vrate sthitA ||1-53-52
  tatra vaMshA vibhajyantAM vipakShAH pakSha eva cha |
  putrANAM hi tayo rAj~norbhavitA vigraho mahAn ||1-53-53
  teshAM vimarde dAyAdye nR^ipANAM bhavitA kShayaH |
  yugAntapratimaM chaiva bhaviShyati mahadbhayam ||1-53-54
  sabaleShu narendreShu shAntayastvitaretaram |
  viviktapurarAShTraughA kShitiH shaithilyameShyati ||1-53-55
  dvAparasya yugasyAnte mayA dR^iShTaM purAtanam |
  kShayaM yAsyanti shastreNa mAnavaiH saha pArthivAH ||1-53-56
  tatrAvashiShTAnmanujAnsuptAnnishi vichetasaH |
  dhakShyate sha~NkarasyAMshaH pAvakenAstratejasA ||1-53-57
  antakapratime tasminnivR^itte krUrakarmaNi |
  samAptamidamAkhyAsye tritIyaM dvAparaM yugam ||1-53-58
  maheshvarAMshe.apasR^ite tato mAheshvaraM yugam |
  shiShyaM pravartate pashchAdyugaM dAruNadarshanam ||1-53-59
  adharmaprAyapuruShaM svalpadharmapratigraham| |
  utsannasatyasaMyogaM vardhitAnR^itasaMchayam ||1-53-60
  maheshvaraM kumAraM cha dvau cha devau samAshritAH |
  bhaviShyanti narAH sarve loke na sthavirAyuShaH ||1-53-61
  tadeSha nirNayaH shreShThaH pR^ithivyAM pArthivAntakaH |
  amshAvataraNaM sarve surAH kuruta mA chiram ||1-53-62
  dharmasyAMshastu kuntyAM vai mAdryAM cha viniyujyatAm |
  vigrahasya kalirmUlaM gAndhAryAM viniyujyatAm ||1-53-63
  etau pakShau bhaviShyanti rAjAnaH kAlachoditAH |
  jAtarAgAH pR^ithivyarthe sarve saMgrAmalAlasAH ||1-53-64
  nAgAyutabalAH kechitkechidoghabalAnvitAH |
  gachChatviyaM vasumatI svAM yoniM lokadhAriNI |
  sR^ishTo.ayaM naiShThiko rAj~nAmupAyo lokavishrutaH ||1-53-65
  shrutvA pitAmahavachaH sA jagAma yathAgatam |
  pR^ithivI saha kAlena vadhAya pR^ithivIkShitAm ||1-53-66
  devAnachodayadbrahmA nigrahArthe suradviShAm |
  naraM chaiva purANarShiM sheShaM cha dharaNIdharam ||1-53-67
  sanatkumAraM sAdhyAMshcha surAMshchAgnipurogamAn |
  varuNam cha yamaM chaiva sUryAchandramasau tadA ||1-53-68
  gandharvApsarasashchaiva rudrAdityAstathAshvinau |
  tato.aMshAnavaniM devAH sarva evAvatArayan ||1-53-69
  yathA te kathitaM pUrvamaMshAvataraNaM mayA |
  ayonijA yonijAshcha te devAH pR^ithivItale ||1-53-70
  daityadAnavahantAraH saMbhUtAH puruSheshvarAH |
  kShIrikAvR^ikShasaMkAshA vajrasaMhananAstathA ||1-53-71
  nAgAyutabalAH kechitkechidoghabalAnvitAH |
  gadAparighashaktInAM sahAH parighabAhavaH ||1-53-72
  girishR^i~NgaprahartAraH sarve parighayodhinaH |
  vR^iShNivaMshasamutpannAH shatasho.atha sahasrashaH ||1-53-73
  kuruvaMshe cha te devAH pa~nchAleShu cha pArthivAH |
  yAj~nikAnAM samR^iddhAnAM brAhmaNAnAM cha yoniShu ||1-53-74
  sarvAstraj~nA maheShvAsA vedavrataparAyaNAH |
  sarvardhiguNasaMpannA yajvAnaH puNyakarmiNaH ||1-53-75
  AchAlayeyurye shailAnkruddhA bhindyurmahItalam |
  utpateyurathAkAshaM kShobhayeyurmahodadhim ||1-53-76
  evamAdishya tAnbrahmA bhUtabhavyabhavatprabhuH |
  nArAyaNe samAveshya lokA~nshAntimupAgamat ||1-53-77
  bhUyaH shR^iNu yathA viShNuravatIrNo mahItale |
  prajAnAM vai hitArthAya prabhuH prANahiteshvaraH ||1-53-78
  yayAtivaMshajasyAtha vasudevasya dhImataH |
  kule pUjye yashaskarmA jaj~ne nArAyaNaH prabhuH ||1-53-79
  
  iti shrImahAbhArate khileShu harivaMshe harivaMshaparvaNi
  devAnAmaMshAvataraNe tripa~nchAshattamo.adhyAyaH