## itrans encoding of Harivamsham - Part I - Harivamsha parva- Chapter 8 Encoded and proofread by: K S Ramachandran ksrkal @ dataone.in. March 2007. Source: Chitrashala Press edn, read with Gita Press edn. ## Further proof-read by Gilles Schaufelberger schaufel @ wanadoo.fr If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- aShTamo.adhyAyaH manvantaragaNanAyAm janamejaya uvAcha manvantarasya sa~NkhyAnaM yugAnAM cha mahAmate | brahmaNo.ahnaH pramANaM cha vaktumarhasi me dvija || 1-8-1 vaiShampAyana uvAcha ahorAtraM bhajet sUryo mAnavaM laukikaM param | tAmupAdAya gaNanAM shR^iNu saMkhyAmariMdama ll 1-8-2 nimeShaiH pa~nchadashabhiH kAShThA triMshattu tAH kalAH | triMshatkalo muhUrtastu triMshatA tairmanIShiNaH || 1-8-3 ahorAtramiti prAhushchandrasUryagatiM nR^ipa | visheSheNa tu sarveShu ahorAtre cha nityashaH || 1-8-4 ahorAtrAH pa~nchadasha pakSha ityabhishabditaH | dvau pakShau tu smR^ito mAso mAsau dvAvR^ituruchyate || 1-8-5 abdaM dvyayanamuktaM cha ayanaM tvR^itubhistribhiH | dakShiNaM chottaraM chaiva saMkhyAtattvavishAradaiH || 1-8-6 mAnenAnena yo mAsaH pakShadvayasamanvitaH | pitR^INAM tadahorAtramiti kAlavido viduH || 1-8-7 kR^IShNapakShastvahasteShAM shuklapakShastu sharvarI | kR^iShNapakShaM tvahaH shrAddhaM pitR^INAM vartate nR^ipa || 1-8-8 mAnuSheNa tu mAnena yo vai saMvatsaraH smR^itaH | devAnAM tadahorAtraM divA chaivottarAyaNam | dakShiNAyanaM smR^itA rAtriH prAj~naistattvArthakovidaiH ||1-8-9 divyamabdaM dashaguNamahorAtraM manoH smR^itam | ahorAtraM dashaguNaM mAnavaH pakSha uchyate || 1-8-10 pakSho dashaguNo mAso mAsairdvAdashabhirguNaiH | R^iturmanUnAM saMproktaH prAj~naistatvArthadarshibhiH R^itutrayeNa tvayanaM taddvayenaiva vatsaraH || 1-8-11 chatvAryeva sahasrANi varShANAM tu kR^itaM yugam | tAvachChatI bhavetsandhyA sandhyAMshashcha tathA nR^ipa || 1-8-12 trINi varShasahasrANi tretA syAt parimANataH | tasyAshcha trishatI sandhyA sandhyAMshashcha tathAvidhaH || 1-8-13 tathA varShasahasre dve dvAparaM parikIrtitam | tasyApi dvishatI sandhyA sandhyAMshashcha tathAvidhaH || 1-8-14 kalivarShasahasraM cha saMkhyAto.atra manIShibhiH | tasyApi shatikA sandhyA sandhyAMshashchaiva tadvidhaH || 1-8-15 eShA dvAdashasAhasrI yugasaMkhyA prakIrtitA | divyenAnena mAnena yugasaMkhyAM nibodha me || 1-8-16 kR^itaM tretA dvAparaM cha kalishchaiva chaturyugI | yugaM tadekasaptatyA gaNitaM nR^ipasattama || 1-8-17 manvantaramiti proktaM saMkhyAnArthavishAradaiH | ayanaM chApi tatproktaM dve.ayane dakShiNottare || 1-8-18 manuH pralIyate yatra samApte chAyane prabhoH | tato.aparo manuH kAlametAvantaM bhavatyuta || 1-8-19 samatIteShu rAjendra proktaH saMvatsaraH sa vai | tadeva chAyutaM proktaM muninA tattvadarshinA || 1-8-20 brahmaNastadahaH proktaM kalpashcheti sa kathyate | sahsrayugaparyantA yA nishA prochyate budhaiH || 1-8-21 nimajjatyapsu yatrorvI sashailavanakAnanA | tasmin yugasahasre tu pUrNe bharatasattama || 1-8-22 brAhme divasaparyante kalpo niHsheSha uchyate | yugAni saptatistAni sAgrANi kathitAni te || 1-8-23 kR^itatretAnibaddhAni manorantaramuchyate | chaturdashaite manavaH kIrtitAH kIrtivardhanAH || 1-8-24 vedeShu sapurANeShu sarveShu prabhaviShNavaH | prajAnAM patayo rAjandhanyameShAM prakIrtanam || 1-8-25 manvantareShu saMhArAH saMhArAnteShu saMbhavAH | na shakyamantaraM teShAM vaktuM varShashatairapi || 1-8-26 visargasya prajAnAM vai saMhArasya cha bhArata | manvantareShu saMhArAH shrUyante bharatarShabha || 1-8-27 sasheShAstatra tiShThanti devAH saptarShibhiH saha | tapasA brahmacharyeNa shrutena cha samAhitAH || 1-8-28 pUrNe yugasahasre tu kalpo niHsheSha uchyate | tatra sarvANi bhUtAni dagdhAnyAdityatejasA || 1-8-29 brahmANamagrataH kR^itvA sahAdityagaNairvibhum | yogaM yogIshvaraM devamajaM kShetraj~namachyutam | pravishanti surashreShThaM hariM nArAyaNaM prabhum || 1-8-30 yaH sraShTA sarvabhUtAnAM kalpAnteShu punaH punaH | avyaktaH shAshvato devastasya sarvamidaM jagat || 1-8-31 tatra saMvartate rAtriH sakalaikArNave tadA | nArAyaNodare nidrAM brAhmyaM varShasahasrakam || 1-8-32 tAvantamiti kAlasya rAtrirityabhishabditA | nidrAyogamanuprApto yasyAM shete pitAmahaH || 1-8-33 sA cha rAtrirapakrAntA sahasrayugaparyayA | tadA prabuddho bhagavAnbrahmA lokapitAmahaH || 1-8-34 punaH sisR^ikShayA yuktaH sargAya vidadhe manaH | saiva smR^itiH purANeyaM tadvR^ittaM tadvicheShTitam || 1-8-35 devasthAnAni tAnyeva kevalaM cha viparyayaH | tato dagdhAni bhUtAni sarvANyAdityarashmibhiH || 1-8-36 devarShiyakShagandharvAH pishAchoragarAkShasAH | jAyante cha punastAta yuge bharatasattama || 1-8-37 yathartAvR^ituli~NgAni nAnArUpANi paryaye | dR^ishyante tAni tAnyeva tathA brAhmIShu rAtriShu || 1-8-38 niShkramitvA prajAkAraH prajApatirasaMshayam | ye cha vai mAnavA devAH sarve chaiva maharShayaH || 1-8-39 te saMgatAH shuddhasa~NgAH shashvaddharmavisargataH | na bhavanti punastAta yuge bharatasattama || 1-8-40 tatsarvaM kramayogena kAlasaMkhyAvibhAgavit | sahasrayugasaMkhyAnaM kR^ItvA divasamIshvaraH || 1-8-41 rAtriM yugasahasrAntAM kR^itvA cha bhagavAn vibhuH | saMharatyatha bhUtAni sR^ijate cha punaH punaH || 1-8-42 vyaktAvyakto mahAdevo harirnArAyaNaH prabhuH | tasya te kIrtayiShyAmi manorvaivasvatasya ha || 1-8-43 visargaM bharatashreShTha sAMpratasya mahAdyute| vR^iShNivaMshprasa~Ngena kathyamAnaM purAtanam || 1-8-44 yatrotpanno mahAtmA sa harirvR^iShNikule prabhuH | sarvAsuravinAshAya sarvalokahitAya cha || 1-8-45 iti shrImahAbhArate khileShu harivaMshaparvaNi manvantaragaNanAyAmaShTamo.adhyAyaH