Harivamsha, volume II, Appendix II, BORI, 1971 shrIgaNeshAya namaH hari OM sheShadharmaprakaraNam - 15 itranslated by A. Purushothaman, purushothaman_avaroth @yahoo.com sarvadharmaprashaMsA vaishaMpAyana uvAcha shrutvaivaM dharmasaMvAdaM dharmaputro yadUttamAt | paprachCha taM namskR^itya dharmaM tava pitAmahaH || 15-1 yudhiShThira uvAcha sh~NkhachakragadApANe dvArakAnilayAchyuta | govinda puNDarIkAkSha rakSha mAM sharaNAgatam || 15-2 yAni ma~NgalapuShpANi phalAni rasavanti cha | sALagrAmashilAdAne li~NgadAne cha yatphalam || 15-3 puShpadAnAni chitrANi sphaTikAdIni vR^iShNipa | eShAM dAneShu yatpuNyaM tanmamAchakShva visvadhR^ik || 15-4 shrIbhagavAnuvAcha mAghamAsaM puraskR^itya prapAM kR^itvA sushobhanAM | sarveShAmeva dAnAnAM shItaM pAnIyamuttamam | yo dadAti dayAyuktastasya puNyaM vadAmi te || 15-5 ihaloke chiraM bhuktvA sarvaishvaryasamanvitaH | brahmalokamavApnoti satyaM satyaM mayoditam || 15-6 chatuShpathe mahAmArge shAlAM kR^itvA sushobhanAM | pAnIyaM cha yavAgUM cha kR^iShNadhAnyamayImapi | pathi shrAntAya yo dadyAttasya puNyam vadAmi te || 15-7 shibikAyAnamAropya devadUtAH priyaMvadAH | vyajanAni pradUnvanto vishanti cha surAlayam || 15-8 vimAne sUryasaMkAshe samAropya mamAj~nayA | pravishanti cha taM loke tatastu brahmaNaH padaM || 15-9 tatra koTiyugaM sthitvA dvikoTikulasaMyutaH | mama lokamavApnoti tatraiva parimuchyate || 15-10 kastUrikarpUrayutaM shrIgandhaM tu dvijAtaye | yo dadAti narashreShTha somaloke sukhI bhavet || 15-11 kapitthado divaM yAti kauberaM panasapradaH | chUtajambUphalaM dattvA sUryaloke mahIyate || 15-12 sharkarAmadhurAyuktam pakvaM rambhAphalaM naraH | yo dadAti dvijebhyastu suraloke sukhI bhavet || 15-13 apUpabhakShyabhojyAni dadanviprAya bhaktimAn | dhruvalokamavApnoti yAvadAchandratArakam || 15-14 vAruNaM lokamApnoti maheshaM lavaNapradaH || 15-16 rUkShadravyapradAnena tilagodhUmamudrakAn | kR^iShNadhAnyaM yavavrIhingandhakaM pippalAdhikam | eteShAM tu pradAnena brahmalokaM prayAti vai || 15-17 shAkamUlapradAtR^INAM tathA bhojanapAtrakAn | suralokaM sthiraM rAjanmama bhaktiparo yadi || 15-18 mallikAjAtipuShpANi ketakIchaMpakAni cha | dadAmi viShNavetyuktvA yo dadAti dvijAtaye | tasya chaivAnishaM pArtha yogakShemaM vahAmyaham || 15-19 sALagrAmashilAdAne hyeteShAM tu phalaM bhavet || 15-20 sALagrAmashilAdAnaM yo dadAti kurUdvaha | tasya puNyaphalaM chitraM sAvadhAnamanAH shR^iNu || 15-21 chatuHsAgaraparyantAM sashailavanakAnanAM | dattvA yatphalamApnoti sALagrAmAttadashnute || 15-22 sALagrAmashilAyAstu mama chakraM prashasyate | taddAnaM ye prayachChanti matpriyAnviddhi tAnprabho || 15-23 sALagrAmashilA yatra tattIrthaM tattapovanam | tatraiva muktiM yAsyanti madarchanaparAyaNAH || 15-24 sALagrAmashilAdAnamatidAnaM prakIrtitam | sarveShAmeva dAnAnAmuttamaM tatprachakShate || 15-25 sALagrAmaM tathA li~NgaM yo dadAti kurUdvaha | mama lokamavApnoti punarAvR^ittivarjitam || 15-26 brahmANDakoTidAnena yatphalaM bhavati prabho | tatphalaM samavApnoti shivali~NgapradAnataH || 15-27 yo dadAti naro dIpaM sALagrAmasya saMnidhau | yogasiddhirbhavettasya j~nAnaM cha bhuvi durlabham || 15-28 mahatAM cha yatInAM cha maThe dIpapradAyakaH | ga~NgAsnAnaphalaM tasya dinenaikena saMbhavet || 15-29 ratnAnvitasuvarNasya pradAnena nR^ipottama | paraM mokShamavApnoti mahAdAnaM yataH smR^itam || 15-30 vajramANikyaratnaM yo dadAti nR^ipasattama | mama lokamavApnoti punarAvR^ittivarjitam || 15-31 vaidUryavidrumAnrAjanbrAhmaNAya dadAti yaH | rudralokamavApnoti puShparAgapradashcha yaH || 15-32 seSharatnapradAnena hyalaMkArapradashcha yaH | sarvatra sulabho lokaH sarvatra sukhamashnute || 15-33 gavAM tR^iNapradAnena sevayA bharatarShabha | rudralokamavApnoti punarAvR^ittivarjitam || 15-34 AshramAchAraniratAH saddharmeShu sadodyatAH | adAmbikA gatAsUyAH prayAnti suramandiram || 15-35 paropadeshaniratA vItarAgA vimatsarAH | mama pAdArchanaratAH prayAnti brahmaNaH padam || 15-36 satsa~NgAhlAdaniratAH sarvabhUtahite ratAH | parApavAdavimukhAH prayAnti brahmaNaH padam || 15-37 nityaM hitakaro yastu brAhmaNeShu cha goShu cha | parastrIsa~Ngavimukho na pashyati yamAlayam || 15-38 satyavAdI tathA maunI mR^idubhAShI kShamArataH | parApavAdavimukhAH prayAnti brahmaNaH padam || 15-39 agnishuShrUShavashchaiva gurushuShrUShavastathA | yatishuShrUShavashchaiva na yAnti yamayAtanAm || 15-40 anAtham viprakuNapaM yo vahetkurusattama | pade pade.asvamedhasya phalaM prApnoti puShkalam || 15-41 pUjayA rahitaM viShNuM li~NgaM vA pUjayettu yaH | brahmaloke sukhaM bhuktvA tato mokShamavApnuyAt || 15-42 devatAyatane yastu saMmArjAnaparo bhavet | pAMsavastasya pApAni nAshayanti na saMshayaH || 15-43 jalena gomayenApi sechanaM devatAgR^ihe | karoti yaH sadA bhaktyA sarvapApaiH pramuchyate || 15-44 gandhodakena dhUpena karpUrasahitena cha | dhUpasechanakR^inmartyo gachChechcha mama mandiram || 15-45 pradakShiNanamaskAraM kAle kAle karoti yaH | sarvapApavishuddhAtmA vAjapeyaphalaM labhet || 15-46 rAjan pradakShiNaikena sarvapApaM vyapohati | dvitIyena divaM yAti tR^itIyenendrasaMpadam || 15-47 chaturbhirmama lokaH syAtpa~nchame sarvalokabhAk | ShaShThe tu mahadaishvaryaM saptame mama kiMkaraH || 15-48 aShTame mama sAlokyaM sAmIpyaM navame nR^ipa | sArUpyaM dashame viddhi sa~NgamekAdashe tathA || 15-49 sAyUjyaM dvAdashe viddhi sAyUjyAdaparo na cha || 15-50 sA~NgapradakShiNaikena sarvapApapraNAshanam | tvagdoShaM vyAdhipIDA cha na cha mR^ityorbhayaM punaH || 15-51 shivapradakShiNe martyaH somasutraM na la~Nghayet | la~Nghane tvekamekaM syAdala~Nghye hyayutatrayam || 15-52 rudrasUktena yo vipraH prabhAte snAnatatparaH | abhiShekaparo rudre shivasAlokyamashnute || 15-53 vAmadevAdimantreNa tathA traiyambakena cha | abhiShekanamaskArAchChivasAlokyatAM vrajet || 15-54 ekakAlaM dvikAlaM vA trikAlaM vApi nityashaH | shivadarshanamAtreNa pAtakaiH parimuchyate || 15-55 vR^iShasya vR^iShaNaM spR^iShTvA shR^i~Ngamadhye pinAkinam | dR^iShTamAtre naro yAti kailAse shivasamnidhiM || 15-56 mR^ida~NgagItavAdyaishcha ghaNTAkAhaLasha~NkhakaiH | devaM mAM sevayedyastu sa mukto nAtra saMshayaH || 15-57 saMmArjayitvA prathamaM gomayena tu lepayet | tasya puNyaphalaM chitraM shR^iNu vakShyAmi suvrata || 15-58 sarvayaj~naphalaM prApya sarvalokAnvijitya cha | koTivaMshasamAyukto mama lokaM sa gachChati || 15-59 devatAyatane yastu dhvajastambhaM prakalpayet | tena puNyaprabhAvena dhvajI rAjA bhaveddhruvam || 15-60 akhaNDadIpaM yaH kuryAnmama rudrasya saMnidhau | dine dine.asvamedhasya prApnotyavikalaM phalam || 15-61 evamAdyA mahAbhAga dharmA bahuvidhAH nR^ipa | yasmindharme yasya ruchistenaiva sukhamashnute || 15-62 eteShAM dharmakaraNe prItirasti tavApi chet | kuruShva nR^ipashArdUla paraM shreyo gamiShyasi || 15-63 dharmAdarthashcha kAmashcha mokShashcha bharatarShabha | tasmAnmayi sadA bhaktiM kuruShva cha dadasva cha || 15-64 yudhiShThira tvam bhuvanasya goptA gantA puraH sarvamahIpatInAM | shR^iNuShva chittaM punareva vakShye dharmasvarUpaM paripAlanAya || 15-65 vaishaMpAyana uvAcha | ya idaM puNyamAkhyAnaM shR^iNoti satataM naraH | tasya dharma sthirA buddhirjAyate kurunandana || January 2, 2009