Harivamsha, volume II, Appendix II, BORI, 1971 shrIgaNeshAya namaH hari OM sheShadharmaprakaraNam 16 sheShadharmaprashaMsA itranslated by A. Purushothaman, purushothaman_avaroth @yahoo.com vaishaMpAyana uvAcha | evamuktastu kR^iShNena dharmaputro mahAmatiH | punareva shubhaM vAkyaM jagannAthamuvAcha ha || 16-1 aNoraNIyAMsamajaM purANaM brahmANamIshaM cha vishAM patInAM | bhaktapriyaM tvAM yadunAthamIDyaM namAmi visvesvara sheShashAyin || 16-2 dinoditAni karmANi vaktumarhasi me prabho | tvatpAdakamalAdanyadgatirmama na vidyate || 16-3 shrIbhagavAnuvAcha | shR^iNu pArtha mahAbhAga sarvadharmArthakovida | dharmasAraM pravakShyAmi punareva mahAmate || 16-4 prAtaHkAle samuthAya dharmakIrtanatatparaH | snAnaM karoti rAjendra sa gachChedvai surAlayam || 16-5 yAmyaM tu narakaM ghoraM nityasnAyI na pashyati | nityasnAnena shuddhAtmA prayAti suramandiram || 16-6 prAtaHsnAnaM haredbhUpa sabAhyAbhyantaraM malam | madhyAhne vApi rAjendra yo gachChetsuramandiram || 16-7 snAnAdvinA tu yo bhu~Nktve sa malAshI na saMshayaH | tasmAtsnAtvA tu yo.ashnIyAtsa bhR^ityo mama uchyate || 16-8 snAtvA devAnR^iShIMshchaiva pitR^INapi cha tarpayet | divyanAmAni me japtvA muchyate sarvapAtakaiH || 16-9 dhautavastro naraShreShTha shuchirmaunI samAhitaH | arghyaM dattvA cha mAM dhyAyanpUjyate cha sadAmaraiH || 16-10 yadarghyaM yo namaskAro yA pUjA kriyate vibho | yajjapyaM yA stutirbhAnostanmAmeva prapadyate || 16-11 samAdhAnamatiryastu japaM kuryAtkurUdvaha | sa muktaH sarvapApebhyo ga~NgAsnAnaphalaM labhet || 16-12 aShTottarashataM yastu gAyatrIM vedamAtaram | japetprayatnato yastu tasya puNyaphalaM shR^iNu || 16-13 dine dine cha yatkiMchijj~nAnAj~nAnakR^itaM cha yat | tatsarvaM vilayaM yAti pAtakaM pApavarjitaH || 16-14 aShTottarasahasraM yo gAyatrIM lokavanditAm | japettasya phalaM vakShye shR^iNu nAnyamanAH prabho || 16-15 ShaNmAsAtsarvapApebhyo muchyate nAtra saMshayaH | saMvatsarajapAdrAjansarvAnkAmAnsamashnute || 16-16 apatyadhanaratnAni pashukShetraM cha bhArata | japamAno labhedvidvAngAyatryAstu prabhAvataH || 16-17 satkarmaNAM japAnAM tu snAnaM mUlaM hi pANDava | prabhAte snAnashIlAnAM nAsti nAsti mahadbhayam | tasmAtsnAtvA tu kaunteya sarvAndharmAMstataH kuru || 16-18 yudhiShThira uvAcha | devadeva jagannAtha yadUnAM kuruvardhana | kA.NllokAnsamavApnoti gAyatryAstu prabhAvataH || 16-19 tatsarvaM cha bhavAnvetti mantrAdIno mahAmate | kR^ipayA vada sarvesha lokanAtha namo.astu te || 16-20 shrIbhagavAnuvAcha | gAyatryAstu samaM kiMchitrIShu lokeShu no nR^ipa || 16-21 gAyatrI mokShadA j~neyA gayatrI pApanAshinI | svargalokapradA devI brahmalokapradAyinI || 16-22 rudralokapradA shaiva sUryalokapradA tu sA | dhruvalokapradA devI chandralokapradA tu sA | mama lokaM cha kaunteya gAyatrI saMprayachChati || 16-23 sa snAtaH sarvatIrtheShu sarvayaj~neShu dikShitaH | gAyatrI sevyate yena taptaM tenAkhilaM tapaH || 16-24 gAyatrIM bhajate yastu manmanA hi mahIpate | gAndharvaiH stUyamAnastu mama lokaM sa gachChati || 16-25 brahmayaj~naphalaM vakShye shR^iNu somakulodbhava | brahmayaj~naM tu yaH kuryAd brahmaNorUpamavyayam | mama sAlokyamApnoti satyaM satyaM mayoditam || 16-26 praNavaM byAhR^itiM choktvA gAyatrIM vedamAtaram | pAdaM pAdaM japaM kuryAttato vedaM yathAkramam || 16-27 idaM tu manmataM rAjanmatpriyaM kuru pANDava | yajjaptvA sarvapApebhyo muchyate nAtra samshayaH || 16-28 brahmayaj~namidaM shrautaM yaH karoti sa muktibhAk | brahmayaj~nattapovR^iddhirbrahmatejaH pravardhate || 16-29 yasho balaM cha kaunteya dharmavR^iddhiH prajAyate | kurute yadi pApAni hyavadhUya divaM vrajet || 16-30 vaishvadevaM tataH pashrAdbalikarma vidhAnataH | kriyate yena rAjendra jitaM tena triviShTapam || 16-31 balikarma prakurvanti chakrAkAraM dvijottamAH | te sarve chakriNo bhUtvA prayAnti mama mandiraM || 16-32 rAjyakAmo dhvajAkAraM putrArthI shUrpavannR^ipa | chakrAkAraM tu bhogArthI valmIkaM bahuputravAn || 16-33 chakrAkArapradAtR^INAmeteShAM phalado hyaham | evaM chaturvidhaM j~neyam balikarma nR^ipottama || 16-34 tUryaM tava hitaM j~neyaM chakrAkAraM nR^ipottama | mokShaM saMprApayAtyAshu kAmAMshcha vividhAnnR^ipa || 16-35 mAM dhyAyanbhojanekAle maunI saMstutavAgdvijaH | kurute bhojanaM yastu amR^itatvaM sa gachChati || 16-36 dvAtriMshatkavalaM yastu bhojanaM kurute dvijaH | suralokamavApnoti gandharvairupasevitaH || 16-37 mitAhAro bhavedyastu nIrujo gatakalmaShaH | puNyalokamavApnoti pUjito divi daivataiH || 16-38 pashchimAM tu tathA saMdhyAM sAdityAM prArthayettu yaH | bhAnau hyanudite pUrvAM saMgachChetsUryasaMnidhim || 16-39 devAnR^iShIMstu saMtarpya ravau madhyAhnamAgate | namaskAraM prakurvIta tato.arghyaM savituH kuru || 16-40 yadyevaM kurute nityaM sa mukto nAtra saMshayaH | kAle kAle tu yaH kuryAddevatApUjanaM gR^ihe || 16-41 puruShasUktavidhAnena sa mukto nAtra saMshayaH | gR^ihArchanA gR^ihasthasya sarvapApapraNAshinI || 16-42 manmUrtiH sarvadA pUjyA saMsAraM tartumichChatA | kushodakaM tu rAjendra gAyatryA hyabhimantritam | pibedanudinaM yastu so.annadoShairna lipyate || 16-43 mR^idubhAShI sadA maunI kAmakrodhavivarjitaH | yaH samaH sarvabhUteShu so.ahaM pArtha na saMshayaH || 16-44 charAcharAtmakaM visvamahameveti yo vadet | sa evAhaM naraShreShTha tvamapyevaM vichAraya | tasmAtsarvaprayatnena bhaja mAM pANDunandana || 16-45 yogAbhyAsaratA ye tu prANAyAmaparAyaNAH | jitendriyA narA ye cha parastrIShu parA~NmukhAH || te narA rAjashArdUla sarvatra paripUjitAH || 16-46 vaishaMpAyana uvAcha | etadbhagavatA proktaM dharmaM pApapraNAshanam | shR^iNuyAdyo hi rAjendra vrajatyeva triviShTapam || 16-48 January 3, 2009