Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam 23 jantujananakramaH shrIbhagavAnuvAcha dharmAtmandharmiNAM shreShTha jitAmitra shubhavrata | AjanmamaraNAntAni shR^iNu karmANi dehinAM || 23-1 kAmena bAdhitAH sarve narAstu pashujAtayaH | maithunaM bhAvamAshritya krIdanti cha parasparam || 23-2 stanAshrayaM tu nArINAM shonitaM shuklavardhanam | puMsAM bIjAshrayaM shuklaM strINAM sa~Ngena vardhate || 23-3 punashcha shuklavR^idhyA cha nArIshonitavardhanam | shuklasya patane kAle jIvAMshaH puruShasya hi || 23-4 antarvishati tadgarbhe shoNitena vivardhate | jIvapraveshAttadgarbhe puruShasya kurUttama || 23-5 mayUrapiNDavanmAMsAnmR^idutvaM pratipadyate | chaitanyamulbamabhavanmAsAdupari pANDava || 23-6 malamUtrAdidoSheNa baddho bramati sarvashaH | pUrNe mAsadvaye pashchAnmatsyAkAraM prapatyate || 23-7 pUrNe mAsatraye garbho hastapAdaiH prayujyate | mAsAnAM pa~nchame vR^iddhiH ShaShThe jIvapraveshanaM || 23-8 saptame romavR^iddhiH syAdaShTame vR^iddhimeti cha | vardhiShyati yathA garbhAstathA mUtraM purIShakam || 23-9 tenaiva liptasarvA~NgaH kleshameti rudanbahu | kaTvamlalavaNAtyuShNatIkShNarUkSheNa tapyate | bramanvai kleshamasahannAste garbhe narottama || 23-10 pUrvajanmakR^itaM pApaM smarankleshAdrudanbahu | samR^iddhaj~nAnasaMpannaH svayamAshvAsya vartate || 23-11 garbhasya vedanAM soDhumashaktaH pralapanbahu | malamUtrAdisaMbaddho nindannAste kurUdvaha || 23-12 yudhiShThira UvAcha trailokyanAtha sarvaj~na mAyAtIta mahAmate | kathaM nindansvamAtmAnam kathaM vai vilapanprabho | garbhe tiShThati pApena tanme brUhi janArdhana || 23-13 shrIbhagavAnuvAcha malamUtrAdisaMbaddho dehi garbhe tu yadvadet | taM vadAmi cha te prItyA shR^iNu nAnyamanAH prabho || 23-14 jIva uvAcha aho.ahaM pApadhIrnityaM janmakoTishateShu cha | putramitrakalatrArthamapahR^itya vasUni cha || 23-15 kShetrANyapi cha sAdhUnAmIdR^ishIM garbhavedanAm | prApto.ahamIdR^ishaH pApI kadA mokSho bhaviShyati || 23-16 pareShAM dharmapatnInAM sa~NgaM kR^itvA tu mohitaH | malamUtrAdipa~NkeShu garbheShu pariduHkhitaH | pApasya me kadA mokSho bhaviShyati na vA khalu || 23-17 eko.ahaM pApakarmA hi sthAvaratvamavApya cha | tatrApi duHkaM bahulamanubhUtaM mayA purA || 23-18 mAtustApAddahyamAno jarAyupariveShTitaH | malapa~NkamahAbdau cha magnadeho dunomi cha || 23-19 mayA poShitaputrAdyAH svakarmavashavartinaH | gatAnyatra striyo mitraM dahyAmyatrAtmanA tvaham || 23-20 aho duHkhamaho duHkhamaho duHkhaM hi dehinAM | dehastu pApAtsaMjAtAstasmAtpApaM na kArayet || 23-21 putramitrakalatrArthamanyadravyaM hR^itaM mayA | tena pApena dahyAmi jarAyupariveShTitaH || 23-22 dR^iShTvAnyasya striyaM pUrvaM saMtapto.ahamasUyayA | garbhAgninA tu dahyAmi pApAtmA pApasambhavaH || 23-23 kAyena manasA vAchA parapIDAmakAriSham | tena pApena dahyAmi ahameko.atiduHkhitaH || 23-24 akR^itvA devakaryANi pitR^ikAryANi laukikAn | agnidevagR^ihAnviprAnIdR^ishIM yAtanAM gataH || 23-25 japasnAnavihInatvAdasadbhiH sahavAsanAt | sadA pAparatatvAchcha prApto.ahaM garbhavedanAm || 23-26 sadA shAstravihIno.ahaM shravaNeShu tathAlasaH | anindyAnnindyamAno.ahamevaM prApto mahadbhayaM || 23-27 evaM bahuvidhaM janturvilapya svayameva hi | AtmanAtmAnamAshvAsya buddhiM dharma niyujya cha || 23-28 dharmaM kR^itvA yathAnyAyaM satsa~NgeShu pravartya cha | kR^itvA devAgnipUjAM cha yAsye.ahaM paramAM gatim || 23-29 ArAdhya tu jagannAthaM sarvakAmArthadaM prabhum | jagadyonimudArA~NgaM visvarUpaM jagadgurum || 23-30 devagandharvanichayairvidyAdharamunIsvaraiH | digdantibhishcha dikpAlaishchandrasUryAdibhirgrahaiH || 23-31 R^iShidevagaNairviprairindrAdaiH sasurAsuraiH | archyamAnaM sadA shuddhaM sR^iShTisthityantakAriNam || 23-32 sarvagaM sarvalokAnAmIshvaraM puruShottamaM | AnandamakSharaM nityam svaprakAshaM niranjanam || 23-33 sUryakoTipratIkAshaM chandrakoTisushItalam | kAlameghanibhaM devaM vidyuchcha~nchalalochanam || 23-34 pItAmbaradharaM devaM sha~NkachakrAdisevitam | lakShmIpatiM vishAlAkShaM sarvAlaMkArashobhitam || 23-35 anantamajaraM viShNuM dhyAtvA nityamatandritaH | garbhAttu nirgato.ahaM vai muktiM yAsyAmi nishchitam || 23-36 atikramiShye saMsAraM ghoraM jaladhisaMnibham || 23-37 sarvatra hi bhayaM nAsti sarvatra sukhameva me | iti vai chintamAnasya jantorgarbhagatasya cha | prasUtikAlavAyushcha puraH sthitvA cha karShati || 23-38 tenaiva vAyunA baddhaH prAjApatyena pANDava | mAtushcha duHkhamatulaM kurvankarmabalena cha | AkR^iShyamANo nirgachChedyoniyantraprapIDitaH || 23-39 niHsaMj~naM tu vicheShTantaM rudantaM cha vilakShaNam | ujjIvayati taM vAyurbAhyavartI kurUdvaha || 23-40 sparshanAdbAhyavAyoshchAnantaraM sa shishurnR^ipa | naShTasmR^itistathA duHkhamatulaM cha prapadyate || 23-41 daivAdbAlatvamApanno janturduHkhAdvimuchyate | vaktuM sa tu na shaknoti kiMchichchApi na veda saH || 23-42 svadehamalamUtraishcha liptA~Ngo duHkhakarshitaH | AdhyAtmikAdiduHkhaishcha pIDyamAno rudanvaset || 23-43 kShuttR^iDbhyAM pIDito nityaM mashakairyUkadaMshakaiH | svapanrudaMshcha bahusho vartate peTake nR^ipa || 23-44 kShudhayA pIDite bAle jananI bAndhavA api | udare vedanAstIti shishorasya vadanti hi || 23-45 stanyaM deyamaho kaShTaM shisho kiMchinna vidyate | vadantyauShadhamanyo.api deyaM deyamiti prabho || 23-46 evaM bhogamanuprApya hyanyAdhInatayA nR^ipa | pIDito maladamshAdyairbAlyabhAvaM prapadyate || 23-47 vaishaMpAyana uvAcha | evaM shrutvA mahAbhAgo dharmaputro mahAmatiH | AshcharyaM paramaM gatvA namaskR^ityedamabravIt || 23-48 yudhiShThira uvAcha pAhi lokapate deva vAsudevArimardana | tvameva gatirasmAkam sarvakAle yadUttama || 23-49 pA~nchAlIM pANDavAnsAdhUnkutIM dharmabhR^itAM vara | pAlayAmyanishaM bhaktAnityuvAcha purA prabho || 23-50 tasmAttvAM prArthayAmyadya tvadvaktrakamalasnutam | pAtuM dharmAmR^itaM nAtha yadupuMgava saMprati || 23-51 bhagavansarvalokesha praNatArtipraNAshana | nato.asmi te pAdamUlaM bhaktaM mAM paripAlaya || 23-52 bAlye cha yauvane kR^iShNa vArdhake charame.anagha | kA bAdhA kiM sukhaM tAta tanme tvaM kR^ipayA vada || 23-53 vaishaMpAyana uvAcha evamukto jagannAtho yogidhyeyo munIshvaraH | pratyuvAcha sa dharmAtmA pANDuputraM bahushrutam || 23-54 gaditaM dharmarAjAya vasudevena viShNunA | shR^iNoti yaH sadA bhaktyA ga~NgAsnAnaphalaM labhet || 23-55 January 25, 2009