Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam 37 kAverIkapilAsaMgamaprashaMsA vaishaMpAyana uvAcha prahR^iShTAtmA mahAtejA dharmaputro mahAmatiH | punareva shubhaM vAkyaM namskR^itvedamabravIt || 37-1 brUhi me kapilAyAshcha kAveryAH samgame phalam | yasya shravaNamAtreNa tR^iptirme bhavitAnagha || 37-2 bhIShma uvAcha kAveryAH kapilAyAshcha mAhAtmyaM snAnajaM phalam | vakShyAmi tava saMprItyai shR^iNu nAnyamanAH prabho || 37-3 kAveryAH kapilAyAshcha saMgame vAsinaH prabho | shrIkaNThasya shivasyAsya kIrtanaM pravadAmi te || 37-4 kAverI pAvitA yena nIlakaNThena shaMbhunA | snAtAnAmagratastasya kaivalyaM bhavati prabho || 37-5 kaverakanyA kapilA smR^itA pApapraNAshinI | snAtAnAM mokShadA devI kapilA sarvakAmadA || 37-6 kShetrANAmuttamaM kShetraM tIrthAnAM cha tathottamam | kAverIkapilAyogaM vadanti paramarShayaH || 37-7 kAverIkapilAtIraM brahmAdyAH sarvadevatAH | munayo mAnavAshchaiva sevante puNyakA~nkShiNaH || 37-8 kAverI puNyadA j~neyA nirmitA parameShThinA | pApahAkapilA j~neyA tayoryogastvanuttamaH || 37-9 smR^itArtinAshinI devI kAverI puNyadAyinI | sarvapApakShayakarI sarvopadravanAshinI || 37-10 yAni kShetrANi puNyAni dakShINasyAM dishi prabho | teShaM puNyatamaM j~neyam kAverIkapilAvrajam || 37-11 yanmajjanaM mahApuNyaM durlabhaM hyakR^itAtmanAm | sAdhUnAM sulabhA devI prItA mokShapradAyinI || 37-12 Ije cha vishvasR^ikdhImAnnIlakaNThaM prati prabho | tathA cha munayaH sarve chakrushcha vividhAnmakhAn || 37-13 kAverI kapilA lokaM trAyate puNyavAriNA | snAtAnAM sarvapApAni ChitvA muktiM dadAti cha || 37-14 yatra snAtAH pApino.api pitR^imAtR^ikulAni cha | sahasrANi samuddhR^itya prayAnti paramaM padam || 37-15 kAveryA kapilAyAshcha mahimA kena gaNyate | nAhaM shaknomi gadituM snAtAnAM saMgame phalam || 37-16 tulAmAse mahArAja ga~NgAdyA sakalApagAH | kAveryAvartanaM tAta kurvantyAtmavishuddhaye || 37-17 yAH puNyatithayaH proktAH shAstreShu munipuMgavaiH | tAsu snAti naro bhaktyA brahmalokaM prayAti vai || 37-18 makarasthe ravau mAghe saMgame snAti yo naraH | sarvA.NllokAnvinirjitya viShNulokaM vrajeddhruvam || 37-19 yasyA darshanamAtreNa kAveryA saMgame nR^iNAM | sarvapapAni nashyanti janmAntarakR^itAni cha || 37-20 makarasthe ravau mAghe yo vA snAti tryahaM nR^ipa | sa muktaH sarvapApebhyo yAnArUDho divaM vrajet || 37-21 mAghamAse mahArAja pakShamAtramatandritaH | snAti yaH sakalAnvaMshyAnuddhArya sa divaM vrajet || 37-22 mAsamAtraM naro mAghe kAveryAM kapilAgamam | koTivaMshasamAyukto brahmalokaM sa gachChati || 37-23 ashvamedhasahasrANi vAjapeyashatAni cha | kR^itvA yatphalamApnoti snAtAnAmatra tadbhavet || 37-24 kAverIM smarato nityaM lokAnaM hitakR^ittamAM | sarvadAnaphalaM tasya bhavettatra sthitasya cha || 37-25 dadAti saMgame yamtu sauvarNaM rajataM tu vA | koTikoTiguNaM tasya bhavedphalamanuttamaM || 37-26 yo dadAti cha godAnaM kAverIkapilAtaTe | ekasya koTiguNitaM phalamApnoti dharmaja || 37-27 annaM dadAti yo rAjankAverIkapilAtaTe | pitarastasya tR^ipyanti tR^iptAH syuH sarvadevatAH || 37-28 kanyAdAnaM mahArAja kAverIkapilAtaTe | dadAti brAhmaNebhyo yaH sa viShNoH padamashnute || 37-29 japaM dAnaM cha homashcha sarvaM koTiguNaM bhavet | kurvatastasya kAveryAM pApaM cha kurunandana || 37-30 chandrasUryagrahe chaiva saMkrAntAvayane tathA | vyatIpAte vaidhR^itau cha tathA parvaNi dharmaja || 37-31 yaH snAti saMgame devyAH kapilAyA shubhe dine | mAtR^itaH pitR^itashchaiva tathA shvashuravaMshataH | trikoTikulasaMyukto viShNulokaM sa gachChati || 37-32 brahmAdayaH surAH sarve yoginaH sanakAdayaH | gandharvAH lokapAlAshcha R^iShayashcha tapodhanAH | aNimAdiguNairyuktA ye chAnye tattvadarshinaH || 37-33 brAhmI mAheshvarI lakshmI menAditirditiH | ghR^itAchI menakA rambhA urvashI cha tilottamA || 37-34 gaNAshchApsarasAM sarve pitR^INAM cha gaNAstathA | snAtumAyAnti te sarve kAveryA kapilAgame || 37-35 kimatra bahunoktena brahmaNA nirmitA purA | prajAnAM pApabhIrUNAM shuddhaye muktaye nR^ipa || 37-36 atra varShasahasrANi tapaH kr^itvA sudAruNam | nIlakaNThaprasAdena purA vishravasaH sutaH || 37-38 dhanAnAmAdipatyaM cha sakhitvaM shUlapANinaH | prAptavAnalakAM rAjandevagandharvasevitaH || 37-39 chandrakAntamahAmeghavijayA brAhmaNottamAH | tapaH kRitvA chiraM kAlamatra muktiM prapedire || 37-40 yudhiShThira uvAcha chandrakAntamahAmeghavijayA brAhamaNottamA | kathaM muktiM gatAH snAtAstanme tvaM kripayA vada || 37-41 bhIShma uvAcha yAj~navalkyasutA rAjannete vai lokavishrutAH | chandrakAntamahAmeghavijayAshchandrabhUShanAH || 37-42 jyeShThaM gR^ihe pratiShThApya chandrabhUshamakalmaSham | kAverIkapilAmadhyavartinaM bhuvaneshvaram || 37-43 ArAdhya suchiraM kAlaM tapasA brAhmaNottamAH | muktikAmA mahAtmAnastapaH kuravanti cha sma te || 37-44 chaturdashasahasrANi shiShyAsteShAM mahAtmanam | advaitavAdinaH sarve tapasA dIrghadarshinaH || 37-45 dhyAyantaH puruShaM shaMbhuM sR^iShTisthityantakAriNam | ArAdhyantastaM devamajamakSharamavyayam | stuvanti vividhaiH stotrairnamasyanti hi kechana || 37-46 dhyAyantaH puruShaM kechittiShThanti cha nira~NkushaAH | atyugramatulamM rAjankurvantastapa uttamam || 37-47 pArvatIvallabhasteShAM sAMnidhyamakarotprabhuH | aShTamUrtidharaH shrImAnprahasanvAkyamabravIt || 37-48 kimarthamidamArabdaM tadbrUta dvijasattamAH | dAsyAmi kimahaM sarvamiti sarvAnvacho.abravIt || 37-49 sarve te dvijamukhyAshcha sashiShyAH pANDunandana | saMsaraviShavR^ikShasya ChettA bhava mahesvrara || 37-50 shaMkara uvAcha aho vAkyaM kaTutaraM yuShmadvaktrAtsamuthitam | tasmAdvaH krUrarUpeNa dehena bhavitA mR^itam || 37-51 viShNurdAsharathirbhUtvA mokShayiShyati suvratAH | yuShmAbhiryAdR^ishaM proktaM tAdR^ishaM sa kariShyati | vachasA sadR^ishaM rUpaM yUyamatra gamiShyatha || 37-52 tAdR^ishaM rUpamAstthAya pAlayiShyati sa prabhuH | ityuktvAntardhate devo bhUtaiH saha mahesvaraH || 37-53 tato viShNurdevadevo rAmatvamagamatprabhuH | chandrakAntamahAmeghavijayA brAhmaNottamAH || 37-56 kharashcha dUShaNashchaiva trishirA brAhmaNottamaH | AsanneShAM prashiShyAshcha chaturdashssahasradhA || 37-57 tatra rAmo mahAtejA mahAdevaprachoditaH | jaTAvalkaladhArI cha prayayau daNDakAvanam | painAkaM tu dhanurgR^ihya chichCheda sakalA~nsharaiH || 37-58 te muktAH puNyakarmANaH saMsArAtpANDunandana | tatpAdakamalaM divyaM tatkShaNAttu prapedire || 37-59 Ishasya saMgame yasya pUjanAtphalamIdR^isham | tasmAdadyaiva munayaH snAtvA kapilasaMgame | pUjAM kurvanti yatnena muktyarthaM bharatarShabha || 37-60 kAveryAH kapilAyAshcha saMgme bhuvi durlabhe | snAtvA natvA sa pApo.api tatraiva parimuchyate || 37-61 durlabho mAghamAsAstu kAverI cha sudurlabhA | durlabhaH shaMkaro devaH kapilAsaMgamadhyagaH || 37-61 trayametanmanuShyANAM pApinAM pANDunandana | kimatra bahunoktena kAverI durlabhA kalau || 37-62 ya idaM puNyamAkhyAnam nAradAttu mayA shrutam | shrutvA pApavinirmukto brahmalokaM sa gachChati || March 18, 2009