Harivamsha, volume II, Appendix II, BORI, 1971 shrIgaNeshAya namaH hari OM sheShadharmaprakaraNam 4 itranslated by A. Purushothaman, purushothaman_avaroth @yahoo.com bhUdAnamAhAtmyam yudhiShThira uvAcha saMprAptashrIrdvijavaraH kiM chakAra gR^ihe svake l tatsarvaM vada tattvena devadeva jagatpate ll 4-1 shrIbhagavAnuvAcha brAhmaNe.abhyAgate tasminvaradAnasamutsake l hemaprAkAranichayaM hematoraNamaNDitam ll 4-2 sharachchandranibhaiH saudhaiH krIDAshAlairvirAjitam l dIrghikAbhirvichitrAbhishchandropalavinirmitaiH l dAsibhirdAsavargaishcha sevakaishcha purohitaiH l ramaNIyaM gR^ihaM dR^iShtvA mudamApa dvijottamaH ll 4-3 samAgataM dvijaM j~nAtvA kalyANi tatpriyA sati l nIrAjanapurogAbhiH kAminIbhiH puro dadhe ll 4-4 niShkakaNThIM svakAM bhAryAM kA~nchIdAmavibhUShitAm l muktAdAmavichitrA~NgIM karNapatravirAjitAm ll 4-5 vajravaiDUryavalayaira~NgadairupashobhitAM l evaMbhUtAM vichitrA~NgIM dR^iShtvA vismayamAgataH ll 4-6 gR^ihaM vivesha dharmAtmA satyavAgvijitendriyaH l chitrairviShayabhogaishcha hyanubhUya dvijottamaH l upaviShTAM svakAM bhAryAM vachanaM chedamabravIt ll 4-7 madvAkyaM shrUyatAM bhadre dharme buddhiM sadA kuru l annadAnamahorAtraM brAhmaNAnAM dadasva ha ll 4-8 mayA kR^itAnAM dharmANAmAnukUlyaM sadA kuru l prAtikUlyena naH shreyaH sarvaM vai nAshameShyati ll 4-9 pativAkyamidaM shrutvA brAhmaNI krodhamUrChitA l raktAkShI bhImavadanA vachanaM chedamabravIt ll 4-10 na dAsye kiMchitviprANAM bandhUnAM cha visheShataH l putrAnsaMprati vardhiShye putrA eva parA gatiH ll 4-11 ko vA bandhujano nAtha mAM pUrvaM pratyapAlayat l bhavantamAtmajAnvApi taM vadasva mahAmate ll 4-12 mUDhavatpratibhAsi tvaM bhavAnadya hi dharmakR^it l bhuktvA gR^ihe madIye tu tUShNIM tiShTha madAj~nayA ll 4-13 ityuktvA sA madonmattA nipIDya karasaMpuTam l AgatAnatithInbandhUnbhartsayAmAsa satvaram ll 4-14 yathAkAmaM svayaM bhuktvA pativAkyavirodhinI l vinindantI svakAnbandhUnAste tatra gR^ihottame ll 4-15 brAhmaNAvaj~nayA chaiva bandhUnAM parivarjanAt l kShayaM prayAtA dharmAtmandagdhAraNyamiva dhruvaM ll 4-16 naShTashriyaM tadA dR^iShtvA sarvashAstrArthatattvavit l sarvanItimayIM prAj~na imaM gItimagAyata ll 4-17 vashyAH sutA vR^ittakarI cha vidyA nIrogatA sajjanasaMgatishcha l iShTA cha bhAryA vashavartinI cha duHkhasya mUloddharaNAni pa~ncha ll 4-18 anukUlA priyA bhAryA yasya nAsti kutumbinaH l araNyaM tena gantavyaM yathAraNyam tathA gR^iham ll 4-19 dharmavighnakarI bhAryA yasya tiShThati mandire l martavyaM tena viduShA na chedduHkhodadhiM vrajet ll 4-20 atyunnatapadArUDhaH pUjyAnnaivAvamAnayet l nahuShaH shakratAM prApya chyuto.agastyAvamAnataH ll 4-21 ityuktvA brAhmaNashreShThaH svakAM patnImabhaShata l tvayA kR^itamidaM doShaM pashya mUrkhe phalam tvidam l gR^ihaM dagdhaM visheSheNa chaurairapahR^itaM dhanam ll 4-22 anAkarNya tu madvAkyamAsye bhasma vyaniShpatat l tatphalaM bhu~NkSha yAsyAmi atra stAtuM na shakyate ll 4-23 pativAkyaM tadA shrutvA duHkhitA vAkyamabravIt l yatkaroShi hi dharmAtmaMstatkaromi dadAmi cha l tvaddAsyA yatkR^itaM nAtha karma tatkShamyatAmiti ll 4-24 ityuktvA patitA mUlaM pAdayorbrAhmaNasya sA l kShamasveti punarnamrA dharmakAryaratAbhavat ll 4-28 tadAprabhR^iti sA chaNDI bhartR^ishushrUShaNodyatA l avashiShTaistvasau vipro dravyairdAnaparo.abhavat ll 4-29 avashiShTaM tu sauvarNaM ratnAni vividhAni cha l dvijebhyo brAhmaNo vAkyaM vimR^ishyAnnaM dadau cha saH ll 4-30 gR^ihakShetramR^ite sarvaM vastradhAnyAni dharmaja l brAhmaNAnAM tu sarveShAM pAtrasAdakaroddvijaH ll 4-31 evaM bhUte tadA vipre vAguvAchAsharIriNI l kimidaM brAhmaNashreShTha nirvedamadhigachChasi ll 4-32 bhUdAnaM kuru viprANAM shrotriyANAM mahAtmanAm l achirAtprApya saubhAgyaM pUrvavatsukhameShyasi l R^iShidevagaNastAta bhUdAnaM prArthayanti hi ll 4-33 Iti khe saMgatAM vANIM shrutvA prIto dvijottamaH l gR^ihaM kShetrANi sarvANi brAhmaNebhyaH pradattavAn ll 4-34 kR^payA brAhmaNAnAM vai shrotriyANAM mahAtmanAm l achiratprApya saubhagyaM mumude bhAryayA saha ll 4-35 annagobhUmidAnAni li~NgakR^iShNAjinAni cha l sALagrAmashilAdIni kurvannAste dvijottamaH ll 4-36 tasmAttvamapi rAjendra bhUdAnam kuru sarvathA l shrotriyANAM daridrANAM dIkShitAnAM mahAtmanAm ll 4-37 asvamedhasahasrANi vAjapeyashatAni cha l kR^itvA yatphalamApnoti bhUmidAnAttadashnute ll 4-38 sarvabhAgyakaraM puNyamAyurvardhanakAraNam l svargadaM putradaM pArtha bhUdAnaM kavayo viduH ll 4-39 manniveshitachittastu mamaivaiti dadAti yat l dadAmi yasya sAyujyaM so.ahaM pArtha na samshayaH ll 4-40 dAnahomAdikAle tu bhojane cha visheShataH l mAM dhyAyankArayedyastu tasyAham muktido nR^ipa ll 4-41 yudhiShThira uvAcha kA.NllokAn samavApnoti sa vipro bhuvaneshvara l etadAchakShva yogIndra tvadbhaktasya namo.astu te ll 4-42 charAcharANAM bhUtAnAmantaryAminyadUttama l tvayA na viditaM kiMchitsarvalokeShu suvrata ll 4-43 shrIbhagavAnuvAcha sa vipro yogayuktAtmA sarvalokeShu mAM smaran l bubhuje viShayan sarvAnsatyavAganahaMkR^itI ll 4-44 varShANAmayutaM shrImAnsthitvA yogabalena vai l ante jagAma mallokaM devarShigaNasevitam ll 4-45 bhUdAnasya prabhAvena madanudhyAnasaMpadA l bhaviShyati hi te pArtha mallokaM chottamottamam ll 4-46 etatte kathithaM pArtha bhUdAnasya phalaM mahat l bravImi sarvaM te dharmaM kiM bhUya shrotumichChasi ll 4-47 dharmaH shruto vA dR^iShTo vA kR^ito vA kathito.api vA l anumodito vA rAjendra nayatIndrapuraM naraM ll 4-48 ya idaM puNyamAkhyAnaM shR^iNoti shraddhayAnvitaH l sarvapApavinirmuktaH svargalokaM sa gachChati ll 4-49 brAhmaNAnAM samAje cha tathA devAlaye paThet l shR^iNvatAM vadatAM chaiva malloko bhavati dhruvam ll 4-50 November 22, 2008