Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam 49 siMhAdrimAhAtmyam yudhiShThira uvAcha siMhAdrinAtho deveshaH sAkShAnnarahariH svayam | kathaM tatra vasatyeSha aubale chAtra mAdhavaH || 49-1 vettyetattu bhavAnadya vasUnAM pravaro.asi me | kathAM kathaya tattvaj~na tatsthAnasya cha vaibhavam || 49-2 bhIShma uvAcha shR^nNu pArtha pravakShyAmi shrotR^INAmaghanAshanam | saMsArapAshavichChedaM nArasiMhasya kIrtanam || 49-3 siMhAdrinAthasya kathAM sarvamangaladAyinIm | dvijo vA patito vApi shrutvA pApaiH pramuchyate || 49-4 sa eva bhagavAnviShNuryaj~namUrtiH shivaH prabhuH | brahmA rudraH shashI chArkaH shachIpatipurohitaH || 49-5 devarAjo raveH sUnurvaruNo dhanapAlakaH | sa eko bahudhA bhUtvA pAlayatyakhilaM jagat || 49-6 purA daityavadhaM kR^itvA nArasiMho jagatpatiH | devairabhiShTuto bhItairdivyam yogamathAgamat || 49-7 aubalAkhye girivare divyarUpI bhayaMkaraH | sa vAsamakaroddhImAnaeka eva jaganmayaH || 49-8 yogArUDhaM tamAlokya jitashatrubalaM harim | maruto marutAM nAthaM tuShTuvurjagatIpatiM || 49-9 devA UchuH shrIpate puNDarIkAkSha purANapuruShottama | nArasiMha jagadyone vedarAshe namo.astu te || 49-10 lokanAtha namaste.astu mAyine jalashAyine | sarvalokasya kartre vai pAlakAya namo.astu te || 49-11 saMhartre mApate tubhyaM suyaj~naphaladAyine | nirguNAya namstubhyaM bIjarUpinsureshvara || 49-12 pAhyasmA~njagatInAtha tvatpAdakamalaM gatAn | tvaM pitA sarvalokAnAmasmAkaM tu visheShataH || 49-13 nAnAmohasamAyuktAnnAnAshatrunipIDitAn | pAhi nAstridashAdIsha bhUyo bhUyo namo.astu te || 49-14 bhIShma uvAcha nArasiMhaH stuto devairiti natvA punaH punaH | prAha tAMstridashAdhIshaH prasanno bhaktavatsalaH || 49-15 bhagavAnuvAcha kimarthaM prArthyate devairmahAbhayasamanvitaiH | mayA vaH karaNIyam kimiti tAnpratyuvAcha ha || 49-16 devA UchuH yogamUrtiM visR^ijyaiva divyabhogasamanvitaH | asmAnvai pAtumichChAmo hyanishaM parameshvara || 49-17 bhagavAnuvAcha siMhadrIriti vikhyAtaH purastAtparvatottamaH | tatra vatsyAmi jagatAM hitAya tridasheshvarAH || 49-18 R^iShivipragaNaiH sArdhaM yuShmAbhiH saha putrakAH | atrAshcharyasamAyukto varte tatra mahAgirau || 49-19 atra yogeshvaro nityaM tatra bhogasamanvitaH | pAlayiShve tathA lokAMstridashAnmanujAnapi | bhavantastatra gachChantu sadA bhogepsavo.amalAH || 49-20 ityuktA hariNA devA vimAnashatashobhitam | siMhAdriM prayayuH shIghraM bahujantuniShevitam || 49-21 tatra sthitvA jagannAthaM chiraM devaM janArdanam | nApashyaMstridashaH sarve yogidheyamariMdamam || 49-22 ekaviMshe yuge.atIte tapobhirbahuvistaraiH | nArasiMhamadR^iShTaiva duHkhitA devasaMtatiH || 49-23 siMharUpI sa bhagavAnvichachAra nagottame | sahasrAdityasamkAsho vidyuchch~nchalalochanaH || 49-24 taptahATakakeshAnto vidyuddAmatanuchChadaH | dIptahATakajihvAgro raktalA~NgUlashobhitaH || 49-25 vichitramaNipAdaishcha dantapa~NktimarIchibhiH | bhAsayansarvakakubho divyasiMhashchachAra ha || 49-26 kampamAnAH surendrAste kimetaditi sha~NkitAH | tatra tatra nilIyante girigahvarakoTare || 49-27 atha tasminnavasare divyayogigaNAmalAH | cha~NkhachakradharA vandhyAH stUyamAnA maharShibhiH || 49-28 padmAkShasUtravalayAH pralambivanamAlikAH | divyAyudhadharA vIrA divyakuNDalashobhitAH || 49-29 taptahATakavastriashcha ratnakeyUrashobhitAH | keyUramakuTairdivyairnUpuraiH kanaka~NgadaiH || 49-30 rashanAbhirvichitraibhirdivyaratnamayaiH shubhaiH | shobhamAnA munivarA yogIndrAH parvatopamAH || 49-31 sanatkumAro bhagavAnsanakashcha sanAtanaH | sanatsujAtaH shAntAtmA mahAyogI sanandanaH || 49-32 nAradaH parvatashchaiva kumudo lokapAlakaH | jayo vijayasheShAdyAH kumbhayonimukhA dvijAH || 49-33 aNimAdiguNopetA yogIndrAH sachaturmukhAH | ete chAnye cha bahavo vaikuNThapuravAsinaH || 49-34 vimAnakoTisAhasrairjAmbUnadapariShkR^itaiH | koTisUryapratIkAshAstaM deshamupajagmatuH || 49-35 siMharUpadharaM devaM hariM dR^iShTvA munIshvarAH | divyaiH puShpaiH prakIyArtha praNemurdevavallabham || 49-36 dhyAyantah pramadAyuktAH sukhAsInAH surottamAH | prasIdeti jagannAthamupatasthurmaharShayaH || 49-37 athAntarIkShe jagatAmadhIshaH suparNamAruhya suparNaketuH | tasthau girau devagaNaiH stuto.asau siMhAdrinAtho narasiMhamUrtiH || 49-38 mAyAmR^igo.asau manujendrasUno siMho mahAnAvirabhUtkilAgre | sa eva devo jagatAM vinetA jagatgururdivyamR^igendramUrtiH || 49-39 tatrAvirAsIdgirivaryapR^iShThe vimAnavarye bahumerurUpaH | tanmadhyavartI hariravyayAtmA trastAnsurAnpAti girau pralInAn || 49-40 devairanekaiH paripUjito.asau chiram vasAnIti girau nagendre | divyaishcha bhogairupasevyamAno niveshayAmAsa munIdravaryAn || 49-41 divyabhogasamAyukto divyagandharvakoTibhiH | ArAdhyamAno nR^ipate tatrAste muniravyayaH || 49-42 taM natvA garuDArUDhaM devadevamariMdamam | dhyAtvA cha tridivaM yAti naraH pApavR^ito.api cha || 49-43 tasya devasya purataH sadA devairabhiShTutaH | marutvAnstauti deveshaM muktyarthaM pANDunandana || 49-44 sUryAtmajaH prachetAshcha dhanado yakShajAtibhiH | svAM svAM dishamadhiShThAya sevante tam vidUrataH || 49-45 vishvasR^igvAmadevashcha nArasiMhaM jagadgurum | siMhAdrinAthaM chakrAte sevAM jagati shobhanAm || 49-46 devaiH samastairupasevyamAnaM natvA narA yAnti divaM suresham | pApAni kR^itvA pitR^ibhaktihInA sadA durAchAraratAshcha sarve || 49-47 shrutvA kathAM tasya hareranIsham siMhAdrinAthasya shubhapradAM cha | divaM prayAntyeva narAH sushIlAH purANamUrteH puruShottamasya || 49-48 tasmAttvaM prarthayasveha siMhAdrerIshamavyayam | atha vA gachCha dharmAtmandevadevaM prapUjaya | achirAtprApsyase sthAnaM shriyaM chaivojjvalAM sthirAm || 49-49 yastvetachChR^iNuyAnnityaM yashchApi parikIrtayet | nAshubhaM prApnuyAtkiMchitsomutreha cha mAnavaH || 49-50 April 26, 2009