harivaMsha, Volume II,  Appendix 1, pp.69-70, BORI 1971
itranslated by A. Purushothaman, purushothaman_avaroth @ yahoo.com
16
jarAsaMdhena mathuroparodhaH

Agatya yamunAtIraM jarAputraH pratApavAn  |
vindAnuvindAvAvantyau dautyena samachodayat  ||  16 -1
tau gatvA mathurAM vIrau  dvAHsthena prativeshitau  ||  16-2
AsanasthaM tadA rAjannugrasenaM patiM nR^ipa  |
tatpArshve cha sthitaM kR^iShNaM  balabhadreNa saMgatam  ||  16-3
vasudevaM mahAvIryaM sAtyakiM cha mahAmatim  |
anyAMshcha  yAdavAndR^iShTvA samIpasthAnmahIpateH  ||  16-4
tau tu sarvAnsamAbhAShya kaMsasya pitaraM  tadA  |
UchatuH sukhamAsInau vAsudevaM cha sAgrajam  ||  16-5
Aha yuShmAnmahAvIryo jarAsaMdhaH pratApavAn  |
shrUyatAM mama yadvAkyaM  duHkhitasyAbalasya me  ||  16-6
sutAdvayaM mahArAja draShTumichChAmi duHkhitam  |
vivashaM shokasaMtaptaM duHkhasAgarasaMshritam  ||  16-7
yattu kaMso hataH saMkhyo kR^iShNena hi balIyasA  |
ashskto.ahaM tathA rAjankR^itasya pratikarmaNaH  ||  16-8
yattu yuddhaM balavatA kR^iShNena kR^itamityapi  |
nAtra me vismayaH kAryo balavAnsa hi sAgrajaH  ||  16-9
kiM tu duHkhaM  mahadbhUtaM duHsahaM mama jAyate |
tadduHkhaM duHsahaM manye vaktuM cha mama duHsaham  ||  16-10
magadhendre mahAvIrye sabale mayi mAnada |
chitrametanmahArAja yatkR^itaM mayi jIvati  ||  16-11
kR^iShNena sukR^itaM karma mAM matvA pashumityapi  |
kiM nUnaM duShkaraM karma kR^itvA kR^iShNastu jIvati  ||  16-12
jIvatyevaM jarAputre mAvamaMstA yadUttama  |
jIvitaM tu samAptaM me  kR^iShNe jIvati saMprati  ||  16-13
ityuktvA punarAhedaM krodhavisphAritAnanaH  |
yadi kR^iShNaM sthitaM saMkhye  haniShye  yadi manmukhe  ||  16-14
nAhaM kaMso na vA  keshI nAriShTo na cha pUtanA  |
jarAsaMdhaM mahIpAlaM mAvamaMsthA mahIpate  ||  16-15
imAmapyaparAM  rAjanpratij~nAM shR^iNu keshava  |
yadi tvaM matpuro bhUyAstadA hanmi sabAndhavam  ||  16-16
saMnaddho bhava yuddhAya sthito.ahaM yuddhalAlasaH  |
yatra yatra bhavAnyAti tatra tatrAhamAsthitaH  ||   16-17
jIvati tvayi govinda jarAsaMdho na jIvati  |
AgachCha saha yuddhAya balabhadreNa dhImatA  ||  16-18
kimebhirbahubhirvR^iddhairugrasenapurogamaiH  |
AgachChatu bhavA~nshIghraM balabhadrasahAyavAn  ||  16-19
sAtayake  yuktamevaitatkR^itaM  kR^iShNena kiM prabho  |
vasudeva yadushreShTha  yuktaM putreNa kiM tava  |
akrUra vada satyena yuktaM vAtrAnyathApi vA   ||  16-20
mR^idhe kR^iShNa yadushreShTha sthiro bhava na cha~nchalaH  |
bahunAtra kimuktena na sthiraM tava jIvitam  ||  16-21
shvaH puriM tava rotsyAmi nAtra kAryA vichAraNA  |
ko nvidaM sAhasaM kuryAttvAM   vinA kR^iShNa sAMpratam  ||  16-22
ityuktvA tau mahAvIryoM virAmaM jagmatustadA  ||  16-23
ityukto roShatAmnAkShaH  kR^iShNa Uche vachastadA  |
hataH kaMso mahArAja kimataH sAhasaM kR^itam  |
kiM chitraM vada rAjendra hataH kaMsa  itIha naH  ||  16-24
idaM cha tasmai vaktavyaM bhavadbhyAM rAjasattamau  |
sthito.asmi yuddhasaMrakto jeShyAmi cha raNe ripUn  ||  16-25
tvAM hatvA sabalaM saMkhye rAjyamAdAya sAMpradam  |
ugrasenAya dAsyAmi satyena cha  shapAmyaham  ||  16-26
ityuktvA virarAmaiva keshavaH keshisUdanaH  |
tau tu gatvA tadA sarvaM  tasmai cha  prochatuH prabho  ||  16-27

vaishaMpAyana  uvAcha  |

gate dUtadvaye rAjanmAgadhendraM janAdhipaM  |
taM shrutvA rAjarAjendramAhavepsumamarShaNam  ||  16-28
hantukAmaM jagannAthaM balabhadraM cha mAgadham  |
pratApaj~nA hi yadavo mAgadhasya mahAtmanaH  |
sha~NkamAnA  bhayaM tasmAjjarAsaMdhAnmahIpateH  ||  16-29
sthite  hi lokanAthe.asminsarveShAM balahAriNi  |
sa prAtApo hi balavAnmagadhendrasya sarvataH  ||  16-30


February 4, 2009