harivaMsha, Volume II,  Appendix 1, pp.177-182, BORI 1971
itranslated by A. Purushothaman, purushothaman_avaroth @ yahoo.com
21
rukmiNIsvayaMvare kR^iShNasyAgamanam

yathArhaM cha yathAyogaM prashrayaM pradadau nR^ipaH  ||  21-1
vivAhaM ghoShayAmAsa shishupAlasya mAgadhaH  |
sarvamantaHpuraM chaiva vivAhe sotsukaM kila ||  21 -2
shvobhUte tu vivAhaH syAchchaidyasyeti cha bhUmipAH  |
saMnaddhAH samapadyanta vibhavaiH svairyathAtatham  ||  21-3
shishupAlo.api rAjA tu varaveSheNa saMyutaH  |
kumArairAtmatulyaishcha  niyamastho.abhavattadA  ||  21-4

vaishaMpAyana uvAcha  |

etasminneva kAle tu nArado munisattamaH  |
pR^ithivyAM paryaTanneko vINAsaktakarastadA  ||  21-5
dvAravatyAM tato viShNuM nivasantaM yadUttamam  |
sabhAjay~njagannAthaM prApto dvAravatIM kila  |
pravishya cha puriIM ramyAM keshavenAbhipUjitaH  ||  21-6
tasyAmeva sabhAyAM tu yadubhirvR^iShNbhiH saha  |
viharantaM jagannAthaM dadarsha yadunandanam  ||  21-7
tadabhyAshe  sthitaM rAmamugrasenaM cha sAtyakIm  |
anyAnapi yadUnsarvAndadarsha muditAnmahAn  ||  21-8
taM dR^iShtvA yAdavAH sarve pratyujjagmuH sasaMbhramam  ||  21-9
bhagavAnapi govindo rAmeNa saha keshavaH |
upatasthe yathAyogamarghamAdAya chAsanam |
idamarghyamidaM pAdyamityUche taM munIshvaram  ||  21-10  
tachcha sarvaM yathAprAptamupayujya munIshvaraH  |
Asane cha samAsthAya nyaShIdanmuditastadA  ||  21-11
AsanasthaM munishreShTaM yAdavAH sarva eva te  |
AsanAni yathAyogaM prApnuvansvAni sarvataH  ||  21-12
keshavo.api cha dharmAtmA  rAmeNa saha saMgataH  |
niShasAdAsane shubhre vR^iShNInAmagraNIrhariH  ||  21-13
uvAcha cha munishreShTaM vINAsaktamasa~Ngamam  ||  21-14
kushalaM sarvakAryeShu vada kiM munisattama  |
api te kushalaM vipra tapaso munisattama  ||  21-15
kushalaM tava vINAyA vada vipra yathAtatham  |
jagatAmadya viprendra kA vArtA vada me prabho  ||  21-16
atha vA kushalaM nAma yuShmAkaM niyatAtmanAm  |
diShTyA dR^iShTo.asi  saMprAptaH pAvayAnashcha no vibho  ||  21-17
prItA vayaM munishreShTha pUtAshchaiva tvadAgamAt  |
adyeyaM  yAdavakulaM loke khyAtiM prayAsyati  |
tvAdR^ishAM puNyakIrtInAM saMyogAdvada sAMpratam  ||  21-18
Adyo hi munimukhyAnAM bhavA.Nlloke prathiShyati  |
dhanyAH khalu vayaM vipra yato dR^iShTAstvayA vibho  |
evamAdi jagannAtha kushalaM pR^iShTavAnmunIm  ||  21-19
tachChrutvA kushalaM pR^iShTaM viShNunA prabhaviShNunA  |
muniH prItamanA bhUtvA provAcha yadusaMsadi  ||  21-20
rAmeNa saMgataM kR^iShNamUrdhvabAhumavasthitam  |
sarvAMstathA yadUnvipraH samAbhAShya vachastadA  ||  21-21
kimayaM kushalaprashnaH pR^iShTaH kR^iShNa mayi prabho  |
na yuktaM pratibhAtyetaddevadeva  jagatpate  ||  21-22
yatastvaM sarvabhUtAnAmAdiH kushaladastadA  |
tvadichChayA jagatsarvaM kushale viniyujyate  ||  21-23
vayaM tu  devadevesha nityaM kushalino hare  |
tathA hi mUlabR^ityA vai viShNo tava yuge yuge  ||  21-24
idaM tu chitraM devesha yaduktaM bhavato hare  |
pAvayAna iti shrIma.NllokanAtha sureshvara  ||  21-25   
tvaM hi shuddhaH sadA yogi pUtaH kila mamAgamAt  |
kimanyadvada devesha prasAdAttava mAnada  ||  21-26
prasAdAtishayAdetadyuktaM vaktuM jagatpate  |
idaM nishchitavAnadya prasanno mayi mAnada  ||  21-27
sarvathA kR^itakR^ityo.asmi dR^iShTo yena tvayA vibho  |
prItirme hyatulA viShNo tava saMdarshanena hi  ||  21-28
ityuktvA sa jagannAthaM bhUyaH stotuM prachakrame  |
purANaj~naH sadA vipro munInAmAdiravyayaH  ||  21-29
tattvArthavittadA viShNoH sAkShAdvedArthatattvavit  |
AdAya nihitAM vINAM saMsthApya layamuttamam  ||  21-30
tantrIM cha surdR^iDhAM kR^itvA jagau geyairjagatpatim  |
arthyAbhirvAgbhiriShTAbhiH sarvayAdavasaMsadi  ||  21-31

nArada uvAcha  |

namaH kR^iShNAya haraye vedhase bhUtadhAriNe  |
devadeva jagannAtha namaste chakradhAriNe  ||  21-32
namaste  narasiMhAya daityavakShaHpradAriNe  |
namaste sakaleShAya  nirguNAya guNAtmane  ||  21-33
namo vAmanarUpAya mAyAlokavihAriNe  |
namaste kroDarUpAya daMShtrayA kShitidhAraNe  ||  21-34
namo.asvashirase tubhyaM vedAharaNarUpiNe  |
trivikrama namastybhyaM trayIrUpa janArdana  ||  21-35
nama OmkAramAtrAya trayIrUpAya viShNave  |
nirmalaj~nAnarUpAya vij~nAnanilayAya cha  ||  21-36
udgIthAya namastubhyam rathaMtara namo.astute  |
yaM vidurvedatattvaj~nA brahmAdyAH sanakAdayaH  ||  21-37
vichinvantaH pradIpena vij~nAnAkhyena keshava  |
so.asi deva jagannAtha yo dR^iShTho brahmavAdibhiH  ||  21-38
yaM prApya na nivartante yogino yatachetasaH  |
so.asi deva purANAtmaMstubhyam deva namo namaH  ||  21-39
tvAmAhuH sakalA vedA brahmeti j~nAnanishchaye  |
tvamevedaM jagatsarvaM tvayi sarvaM pratiShThitam  ||  21-40
tvanmAyApaTalachChannAH  prANinaH sarva eva hi  |
ahaMmAnakR^itA bhraShTAH patanti narakeShu cha  |
ye cha tvAM viShNurityAhuste cha tvAM yAnti yatnataH  ||  21-41
ye tu j~nAnasahA martyA vedAntaj~nAnabR^iMhitAH  |
te tu tvAM devadevesha pravishanti purAtanam  ||  21-42
tavaiShA bhagavanmAyA yAmAShritya jaganmayIm  |
prANino niHshvasanti sma duHsahA sA hi nityashaH  |
vihAraH sarva evaiSha prANinAmudayAya  hi ||  21-43
pUrvamAsIjjagannAtha vArAha iti samj~nitaH  |
adadhA bhUtadhAtrIM tvaM prANinAM cha hitAya hi  |
punarashvashirA bhUtvA vedAnAhR^itya tiShThasi  ||  21-44
AsIrvAmanarUpastvamabadhnA balimadhvare  |
AhR^itya rAjyam tasmAttvamindrAya prAhiNorvibho  ||  21-45
AbhUstvam nArasiMhashcha hatavAndaityapuMgavam  ||  21-46   
raghoratha jagannatha vaMshe vaMshavatAM vara  |
AsIshcha rAmasaMj~natvaM rAvaNaM hatavAnvibho  |
niShkaNTakamimaM lokamakarordevasattama  ||  21-47
abhUshcha jAmadagnyastvam gR^ihItvA parashuM prabho  |
hatavAmstvam mahAvIryam kR^itavIryasutaM raNe  |       
niHkShatriyamimam lokamadadAH kAshyapAya vai  ||  21-48
idAnImapi govinda lokAnAM  hitakAmyayA  |
mAnuShaM vapurAstAya dvAravatyAM pratiShThasi  ||  21-49
hatavAnpUtanAM bAlye gokule viharanprabho  |
arjunau hatavAnbhUyo baddholUkhalasampuTaH  ||  21-50
punashcha krIDatA viShNo tvayaiva nihato hayaH  ||  21-51
adadhAstvaM punaH shailaM gavAM saMrakShaNAya hi  |
govardhanaM mahAshailaM sarvagopasya pashyataH  ||  21-52
nanarta bhagavAnbhUyo yamunAyA hrade hare  |
akaroH  kAliyaM viShNo vimadaM yamunAtaTe  ||  21-53
ra~Ngamadhye  hatau viShNo tvayA chANUramuShTikau  |
duHsahaM  lokavidviShTaM hatavAnkaMsabhojasA  ||  21-54
ugraseno.abhiShiktashcha rAjye nihatakaNTake  |
sa idAnIM sthito rAjye tvAmAshrityendravaddivi  ||  21-55
kimanena jagannAtha  sarvaM tvadvashagaM jagat  |
sarvAtmansarvabhUtesha sarvabhAvana bhAvana  |
namste devadevesha namo bhUyo namo namaH   || 21-56
iti stutvA jagannAthamupAraMsItsa nAradaH  |
tachChrutvA yAdavAH sarve paraM vismayamAgatAH  ||  21-57
manasA tuShTuvurviShNuM nAradAchChrutavistarAH  |
dhanyA vayaM jagannAthamAshritya sukhinastathA  |
nirvR^itA vayameveti nAradaM cha shshaMsire  ||  21-58
punaH prItiyutAH sarve vilokya cha parasparam  |
dhanyA vayaM punardhanyA dhanyAnAmagrataH sthitAH  || 21-59

shrIbhagavAnuvAcha  |

kimarthamiha samprApto vada nArada sAMpratam  |
alametaiH stutipadairyathArthairvApi nArada  ||  21-60
tvadAgamanajaM vipra tatkAryaM vada sAMpratam  | 
kutUhalaM mama vibho vR^iShNInAM chaiva sarvashaH  ||  21-62

nArada uvAcha  |

shrUyatAM bhagavanviShNo mamAgamanakAraNam  ||  21-63
hyastane devadeveshaM shUlinaM vR^iShabhadvajam   |
archayitvAH haraM  sharvaM dakShINe sAgare vibhum  ||  21-64
nivR^itto.asmi tamArAdhya dishaM danadapAlitAm  |
tvAM draShTuM devadevesha vasantaM vR^iShNisaMsadi  ||  21-65
vindhyasya dakShINaM  pArshvaM gatavAnbhIShmapAlitAm  |
pravishya cha purIM tAM tu vidarbhasya mahIpateH  |
sthito.ahaM bhIShmakeNAtra pUjito yAdaveshvara  ||  21-66
tatra dR^iShTo hR^iShIkesha rAj~nAM samudayo mahAn  ||  21-67
jarAsaMdhaM puraskR^itya rAjAnaH sarva eva hi  |
yathAsukhaM yathAyogaM dR^iShTAH  keshava mAchiram  ||  21-68
shishupAlo hi nR^ipatishchedinAmIshvarashcha saH  |
pauNDrako vAsudevashcha nityaM tvaM dveShTi yo vibho  ||  21-69
dR^iShTashchAtha mayA rAjA  bhIShmako mAbravIdvachaH  |
sishupAlasya viprarShe rukmiNyA saha saMgamaH  |
bhavitA shvaH prabhAte tu tadarthaM rAjasaMgamaH  ||  21-70
tachChrutvA tvaritaM deva prAptastvAM vR^iShNipuMgava  |
tadgachCha vR^iShNibhiH sArdhaM nagaraM tasya dhImataH  ||  21-71
gR^ihANa rukmiNIM kR^iShNa jitvA nR^ipatipuMgavAn  ||  21-72
shishupAlo.atha rAjA tu varaveSheNa viShThitaH  ||  21-73
udvaheta jagannAtha yadi rAjA sa rukmiNIm  |
AkR^ityamayashasyaM cha bhavato nAtra saMshayaH  ||  21-74
yAchitA sA bhavadbhistu na dattA bhIShmakeNa hi  ||  21-75
ArakShako jarAsaMdhaH pauNDrashcha nR^ipapuMgavaH  |
ekalavyo hR^iShIkesha rukmI tasya tu dAsyati  ||  21-76
bhavantaM yaH sadA dveShTi na tvAmAhvayati prabho  ||  21-77
jarAsaMdhastu vR^iShNInAM  sadA dveShTA na saMshayaH  |
tadgachChatu bhavA~nshIghraM yAnairashvairgajairapi  ||  21-78
ugrasenaM puraskR^itya sAtyakIM cha mahAbalam  |
tamAdAya jagannAtha gatvA yAsyasi mAchiram  ||  21-79
sA cha dR^iShTA  hR^iShIkesha shokopahatachetanA  |
tvayyeva mana AdhAya sadA tvAM smarati prabho  ||  21-80
yadi bhartA bhavechchaidyaH syAnmR^itA rukmiNI hare  |
ujjIvaya hare viShNo rukmiNIM rukmabhUShaNAm  ||  21-81
ityahaM deva saMprAptaH kR^ityasheShaM vichintayAM  |
na kiMchidapi duHsAdhyaM chakrapANe hare tava  ||  21-82
sAdhayAmo vayaM deva gachChetyuktvA jagAma saH  ||  21-83

vaishaMpAyana uvAcha  |

ityuktvA nArade yAte  brahmalokaM sanAtanam  |
vAsudevastu dharmAtmA yadUnAmagraNIrhariH  ||  21-84
gamanAya matiM chakre rukmiNyAharaNe tadA  |
uvAcha cha yadUnsarvAnsajjIbhavata mAchiram  ||  21-85
asminneva muhUrtaM tu yAsyAmaH kuNDinaM prati |
rathamAnaya me shIghraM sArathe dAruka prabho  ||  21-86
AruhyantAM rathA ashvA gajAshcha parikalpitAH  ||  21-87
agratashchAstu  no vIraH sAtyakiH satyavikramaH  |
madhyato balabhadrastu rAjA chaiva tu pR^iShThataH  ||  21-88
ahaM khaDgI gadI chakrI shAr~NgI sha~NkhI talatravAn  |
rathamAstAya gachChAmi dArukeNa sahAyavAn  ||  21-89
hatvA cha rAjashArdUlA~njarAsaMdhapurogamAn  |
shishupAlaM cha rAjAnaM  varaveShaviDambinam  ||  21-90
badhvA vA  bhIShmakaM saMkhye hatvA chaiva tu rukmiNam  |
AnayiShyAmi tAM rAjanrukmiNIM matpriyAM sadA  ||  21-91
sajjIbhavantu rAjAno rathairashvairgajaistathA  |
kiM vilambatha rAjAno yAsyAmaH sarva eva hi  |
ityuktvA vR^iShNayaH sarve gamanAyopachakrire  ||  21-91
kR^iShNasyAj~nAM puraskR^itya sarve te yadupuMgavAH  |
rathAnAruhya  yAtAste saMnaddhAH shastrapANayaH  ||  21-92
sAtyakistu mahArAja  rathamAruhya daMshitaH  |
dhanvI khaDgI rathI bANI sainyAgre pratyadR^ishyata  |
baladevo.api dharAtmA gajamAruhya daMshitaH  ||  21-93
sainyamadhye mahArAja mR^igamadhye yathA hariH  ||  21-94
bhagavAnapi govindo rathaM dArukasaMskR^itam  | 
Aruhya sahasA viShNurdArukeNa samanvitaH |
gantumaichChajjagannAtho hartuM bhojapateH sutAm  ||  21-95
savyamakShNoryugaM kShubdaM rukmiNIshishupAlayoH  |
samAshvastA tadA sA tu sa cha rAjA suduHkhitaH  ||  21-96
vR^iShNayo.api cha rAjendra vAsudevapurogamAH  |
Ahatya duMdubhInsarve sha~NkhAndadhmuH pR^ithakpR^ithak  |
krameNaiva gatAste tu bhIShmakasya purIM prati  ||  21-97


February  16, 2009