harivaMsha, Volume II,  Appendix 1, pp.184-188, BORI 1971
itranslated by A. Purushothaman, purushothaman_avaroth @ yahoo.com
22 A

yAdavairjarAsaMdhasahAyAnAM parAjayaH

vaishaMpAyana uvAcha   

balabhadrahatAH shiShTAH puruShAstatra rakShiNaH   |
nyavedayanta tadvR^ittaM  jarAsaMdhAya mAnada  ||   22 A-1
rukmiNe bhIShmakAyApi pauNDrAya cha mahAtmane  |
dantavaktrAya shUrAya chaidyAya cha sumedhase  ||  22 A-2
shishupAlAya rAj~ne tu varaveShaviDambine  |
anyebhyashchApi rAjabhyaH prashashaMsuryathAtatham  ||  22 A-3
shrutyaivaM tannR^ipabalaM vivAhArthaM  samAgatam  |
kShubdhaM narAvarAnIkaM shirasi prahR^itam yathA  ||  22 A-4
chachAla rAjakaH sarvastotrArdita iva dvipaH  |
aho vIryamaho dhairyaM  kR^iShNasyAkliShTakarmaNaH  ||  22A-5
hatA vayaM nirAnandA avaj~nAtAshcha savashaH  |
ityUchuste nR^ipatayo mAgadhapramukhAstadA  ||  22 A-6
atikShubhdo mahArAjo jarAsaMdho mahAbalaH  |
uvAcha rAj~nastAnsarvAnmAgadhaH krodhamUrchitaH  |
niShpIDya charaNau rAjA dantAnkaTakaTApayan  ||  22 A-7
shrUyatAM  mama vAkyAni rAjAnaH sarva eva hi  |
eSha gopakadAyAdo yatkaroti mamAgrataH  |
tasyAdya phalabhAkso.astu yadi jIvAmi bhUmipAH  ||  22 A-8
eSho.ahaM sagaNaM hatvA gopAlaM nR^ipasaMj~nitam  |
dvArakAM yAdavapurIM bha~NktvAnIya cha rukmiNIM  ||  22 A-9
dAsyAmi nR^ipatishreShThAH kiM tiShThatha vilambatha  |
saMnahyantAm  rathashreShThA ratha AyAtu me tvarAt  ||  22 A-10
ityuktvA sa jarAsaMdhaH  siMhanAdamathAkarot  |
chachAla cha balaM sarvaM jarAsaMdhapriye sthitam  ||  22 A-11
pauNdro.apyatha mahAbAhurvAsudevaH pratApavAn |
Ahatya tu sabhAstambhaM  jarAsaMdhamabhAshata  ||  22 A-12
sthAtavyaM bhavatA rAjansthite mayi narAdhipa  |
bhR^ityo.asmi tava rAjendra kimetatsAhasaM tava  ||  22 A-13
sthite bhR^itye kathaM svAmI kAryam kuryAdvichakShaNaH  |
ahamekaH sa evaikaH kR^iShNo gopakakilbiShaH  ||  22 A-14
hatvA tam gopakaM yuddhe balabhadrasya pashyataH  |
a~NgAni cha mahArAja  chUrNayitvA gadAbhR^itam  |
vR^ikebhyo hi prayachChAmi nAtra kAryA vichAraNA ||  22 A-15
ahameva bhaviShyAmi vAsudevo mahItale  |
hate tasmi~njarAsaMdha gopake mama nAmake  ||  22 A-16
ityuktvA dhanurAdhAya jagarja nR^ipasaMsadi  ||  22 A-17
chaidyo.apyatha  mahArAja sarvakShetrasya pashyataH  |
varaveShapratichChanno lajjayA cha samanvitaH  |
AdAya parigham ghoramidamAha nR^ipottamAn  ||  22 A-18
anenaiva tu  rAjAno yAdavAnsabalAnyudhi  |
hatvA tu yamarAjAya dAsyAmi nR^ipapuMgavAH  |
tiShThadhvamiha rAjAno mamaivAyam parAbhavah  ||  22 A-19
naitadyuktam nR^ipashreShThAH paradArAvamarshanam  |
jAtAnAM kShatriyakule nR^ipANAM nR^ipapuMgavAH  ||  22 A-20
tattu yuktam yadukule kShatriyA na hi te vibho  |
visheShato.atha gopAle ballaveShu vivardhite  ||  22 A-21
gavAM vR^ittiM tu gopAlA vartayanti sadA tathA  |
kR^iShNo.api gokule vR^iddho gopaiH sahacharah kila  ||  22 A-22
paradArAbhiyukto hi keshavaH satataM vibho  |
sarvathA taM durAtmanaM haniShye sagaNaM raNe  |
tAM chAnayAmi rAjAnastiShThadhvamiha bhUmipAH  ||  22 A-23
kva nu te bAndhavAsteShAm yAnAshritya tu yAdavAH  |
avaj~nAM kR^itavanto no yuShmAbhiriha chintyatAM  ||  22 A-24
ityuktvAtha sa chaidyastu yuddhAya samupasthitaH  |
te cha sarve nR^ipatayaH kruddhAH yuddhAya daMshitAH  |
svAropitadhanuShmantaH sA~NgulitrAH sachAmarAH  ||  22 A-25
jarAsaMdho.atha nR^ipatI rathamAruhya daMshitaH  |
yuddhAya vai mahArAja mano dhadhne mahIpatiH  ||  22 A-26
pauNdro.apyatha mahArAja vAsudevo mahAbalaH  |
rathamAruhya sahasA yuddhAyaiva mano dadhe  ||  22 A-27
dantavaktro jarAsaMdhaH shishupAlashcha vIryavAn  |
saMnaddhA niryayuH kruddhA jighAMsanto janArdanam  ||  22 A-28
a~Ngava~Ngakali~NgaishaiH  sArdhaM pauNDreNa vIryavAn  |
niryayau chedirAjashcha bhrAtR^ibhiH saha bandhubhiH  ||  22 A-29
kva vAsudevaH kva cha gopakastathA
kuto nu rAjA yaduvamshajanmanAm  |
kuto nu rAmo madamattagarvitaH
kuto nu vIro yudhi sAtyakiH kila  ||  22 A-30
iti bruvanto nR^ipasattamAstadA
raNAya yuktAH sabalAH samAgadhAH  |
sharaishcha  khaDgairyudhi pAtayanto
mahArathA niryayurugravIryAH  ||  22 A-31

vaishaMpAyana uvAcha  

atha sainye mahArAja   mAgadhasya mahAtmanaH  |
sha~NkhaduMdubhayashchaiva sasvanuryuddhashamsinaH  |
mAdhavo.api mahArAja sha~NkhaM dadhmau pRIthaktadA   ||  22 A-32
bherINAM cha mR^ida~NgAnAM jharjharINAM cha sarvashaH  |
nAdAH samabhavaMstatra yadUnAM sainyasaMchaye  ||  22 A-33
tato yuddhaM samabhavatsenayorubhayostadA  |
jarAsaMdhapramukhato vR^iShNayaH   prasthitAstadA  ||  22 A-34
tAnpratyagR^ihnAtsaMrabdhAnvR^iShNivIrAnmahArathAn  |
jarAsaMdho mahArAjaH sasainyaH  sabalAnugaH  ||  22 A-35
taM pratyagR^ihNansaMrabdhA  vR^iShNivIrA mahAbalAH  |
saMkarShanam puraskR^itya vAsavaM tvamarA iva  ||  22 A-36
ApatantaM hi vegena jarAsaMdhaM  mahAbalam  |
ShaDbhirvivyAdha  nArAchairyuyudhAno mahAmR^idhe  ||  22 A-37
akrUro dantavaktraM tu vivyAdha navabhiH sharaiH  |
tam pratyavidhyatkArUsho bANairdashabhirAshugaiH  ||  22 A-38
vipR^ithuH shishupAlaM tu sharirvivyAdha saptabhiH  |
aShTabhiH pratyavidhyattaM shishupAlaH pratApavAn  ||  22 A-39
gaveShaNo.api chaidyaM tu ShaDbhirvivyAdha mArgaNaiH  |
anirdAntastathAShTAbhirbhR^ihaddurgastu pa~nchabhiH  ||  22 A-40
prativivyAdha tAMshchaidyaH pa~nchabhiH pa~nchabhiH sharaiH  |
jaghAna chAshvAMshchaturashchaturbhirvipR^ithoH sharaiH  |
bR^ihaddurgasya bhallena shirashchiCheda chArihA  |
vipR^ithoH sArathiM prAhiNodyamasAdanam  ||  22 A-41
hatAshvaM tu rathaM tyktvA vipR^ithuH sumahAbalaH  |
Aruroha rathaM tUrNaM bR^ihaddurgasya vIryavAn |
Aruhya javanAnashvAnniyantumupachakrame  ||  22 A-42
te kruddhAH sharavarSheNa sunIthaM samavAkiran  |
nR^ityantaM rathamArgeShu chApahastamabhItavat  ||  22 A-43
shakradevo dantavaktram bibhedorasi karNinA  |
paTushaH pa~nchabhishchApi vivyAdha yudhi mArgaNaiH  ||  22 A-44
tAbhyAM sa viddho dashabhirbANairmarmAtigaiH shitaiH  |
tato balI shakradevaM bibheda dashabhiH  krudhAH  ||  22 A-45
pa~nchabhishchApi vivyAdha so.avidUrAdvidUratham  ||  22 A-46
vidUratho.api taM ShaDbhirvivyAdhAjau shitaiH sharaiH  ||  22 A-47
trIMshatA pratyavidhyattaM balI bANairmahAratham  |
kR^itavarmA bibhedAshu rAjaputraM tribhiH sharaiH  ||  22 A-48
nyahanatsArathIM chAsya dhvajaM chiCheda sUchChritam  |
prativivyAdha taM kruddhaH pauNDraH ShaDbhiH shilImukhaiH  ||  22 A-49
dhanushchAsya pratichCheda bhallena nataparvaNA  |
nikR^ittashatruH kAli~NgaM bibhedA~Ngam cha mArgaNaiH  ||  22 A-50 
tomareNAMsadeshe taM bibheda cha kali~NgajaH  |
gajenAsAdya kahvastu gajama~Ngasya vIryavAn  ||  22 A-51
tomareNa jaghAnAshu bibhedA~NgaM cha vIryavAn  |
chitrakashcha shvaphalkashcha sAtykishcha mahAbalaH  |
kAli~Ngasya rathAnIkaM  nArAchairbibhiduH shitaiH  ||  22 A-52
visR^iShTena halenAjau va~NgarAjasya  vAraNam  |
jaghAna rAmaH saMkruddho va~NgarAjaM sa samyuge  ||  22 A-53
taM hatvA gajamAruhya dhanurAdhAya vIryavAn  |
saMkarShaNo jaghAnograirnArAchaiH kAshikAnbahUn  ||  22 A-54
ShaDbhirmihatya kArUShAnmaheShvAsAMshcha vIryavAn  |
shataM jaghAna saMrabdho mAgadhAnAM mahAratha  ||  22 A-55
nihatya tAnmahArAja  jarAsaMdhaM tato.abhyayAt  ||  22 A-56
tamApanantam vivyAdha nArAchairmAgadhAstribhiH  |
taM bibhedAShTabhiH kruddho nArAchairmusalAyudhaH  ||  22 A-56
chiCheda chAsya bhallena dhvajaM rukmavibhUShitam   |
chApaM cha mahadAyattam sharaireva halAyudhaH  |
rathaM chAsya mahArAja  tilashashcha  samAhanat  ||  22 A-57
sa chChinnadhanvA viratho gadAmAdAya mAgadhaH  |
vivyAdha balabhadraM tu chiCheda cha punaH punaH  |
rathaM cha chUrNayAmAsa gadayAsya sa mAgadhaH  ||  22 A-58
pAtyamAno rathAttasmAdavaplutya halAyudhaH  |
sAtyakestu rathaM prAyAtsarvakShatrasya pashyataH  |
sAtyakistu mahArAja  sharairvivyAdha mAgadham  ||  22 A-59
baladevo mahArAja gadAM saMgR^ihya satvaram  |
jaghAna mAgadhaM samkhye  vajreNeva giriM hariH  ||  22 A-60
tadyuddhamabhavatteShAM ghoraM  devAsuropamam  |
sR^ijatAM sharavarShANi nighnatAmitaretaram  ||  22 A-61
gajairgajAshcha  saMkruddhAH samnipetuH sahasrashaH  |
rathA rathaistu saMrabdhAH sAdibhishchApi sAdinaH  ||  22 A-62
padAtayastathA patti~nshakticharmAsipaNayaH  |
ChindantashchottamA~NgAni vineduryudhi te pr^ithak  ||  22 A-63
asInAM pAtyamAnAnAM kavacheShu mahAsvanaH  |
sharANAM patatAmAjau pakShiNAmiva shushruve  ||  22 A-64
bherIsha~NkhamR^ida~NgAnAM veNUnAM cha mR^idhe dhvaniH  |
babhUva ghoShaH shastrANAM  jyAghoShashcha mahAtmanAm  ||  22 A-65
etasminnantare vIro balabhadro  mahAyashAH  |
jaghAna gadayA vIraM  jarAsaMdhaM mahAmR^idhe  |
mUrChAM jagAma rAjA tu  nipapAta cha bhUtale  ||  22 A-66
sAtyakirva~NgarAjam  tu jaghAna nishitaiH sharaiH  |
tatsainyaM  vimukhaM chAsIjjarAsaMdhe nipAtite  ||  22 A-67
sAtyakirbalabhadrashcha jitvA yodhAnsahasrashaH  |
sha~NkhaM dadhmatU rAjAnau  sarveShAmagrataH sthitau  |
tatashcha vidrute sainye jarAsaMdhe parAjite  ||  22 A-68
tayoH sha~NkhasvanaM shrutvAH gachChanneva janArdanaH  |
jitaM magadharAjasya sainyaM bahunR^ipAshritam  ||  22 A-69
ityevam chintayitvA tu vAsudevaH pratApavAn |
pA~nchajanyaM mahAsha~NkhaM dadhmau yadukuloldbhavaH  ||  22 A-70



February 23, 2009