harivaMsha, Volume II,  Appendix 1, pp.203-205, BORI 1971
itranslated by A. Purushothaman, purushothaman_avaroth @ yahoo.com
26
narakAsureNa manuShyalokabAdhanam  

26a  (pp. 203-204)

vaishaMpAyana uvAcha

saMprApya mAnuShaM  lokaM  narako dAnavottamaH  |
dvAravatyAM  jagannAthe  tasminrakShasi bhUtalam  |
babAdhe mAnuShAnsarvAnR^iShInviprAMshcha  dAnavaH ||  26a-1
rakShatyeva  jagannAthe  viprAnmunigaNAMstathA  |
bAdhate sma tathA daityo  viprAnmunigaNAMshcha  saH  || 26a-2
tataH kadAchiddaityendra urvashIvachanaM smaran  |
badaryAM  hi mahArAja yaShTuM  munigaNAMstadA   |
satreNa shakraM devesham tathA devagaNAnapi  ||  26a-3
dR^iShtvA  tAnmunivIrAMstu  narako dAnavottamaH  |
provAcha vachanaM kAle yaShTavyo.asmi  munIshvarAH   ||  26a-4
asminkAle jagannAtha  indro.ahaM  vibudhAdhipaH  |
jitaH shakro  raNe viprA  lokapAlaiH  sahAmaraiH  |
tata ijyo  namaskAryo  vandyo  lokahitAya vai  ||  26a-5
tadetadvachanaM  shrutvA  narakasya durAtmanaH  |
Ahuste munayaH sarve  badarIvAsatatparAH  ||  26a-6
yakShyAmo  na vayaM daitya dAnavo.asi durAtmavAn  |
indraM  devagaNaiH sArdhaM yakShyAmo  vigatajvarAH  ||  26a-7
tachChrutvA roShatAmrAkSho  dAnavAnidamabravIt  |
vadhyantAmR^iShayaH sarve bhidyantAM yaj~nabhUmayaH  ||  26a-8
na tvAM  yakShyAma  he daitya  ityUchUH kila tApasAH  |
te cha sarvaM tathA chakrurdAnavA duShTachetasaH  ||  26a-9
yaj~nabhUmiM  samAlokya  yaj~nabhArAMshcha sarvashaH  |
agnInsaMmishrayAmAsurdadahurdarbhapu~njakAn  ||  26a-10
kamaNDalUndvidhAkR^itya  jaTA AchChidya  dUrataH  |
prakShipya dAnavAH  sarve narakeNa samanvitAH  ||  26a-11
yaj~navATaM samAloDya  chakrurbhasma tadA nR^ipa  |
tAvattAni  haviMShyatra  bhakShayAmAsurojasA  |
AnItAnyaj~nasiddhyarthaM  pashUnyaj~nasamAgame   |
teShveva  chAgnimukhyeShu  dagdhvA  te dAnavottamAH  ||  26a-12
evaM te dAnavAH sarve  chakrurvighnakriyAM  tadA  |
te cha sarve munivarAH palAyanti disho dasha  ||  26a-13  
tatra yA munikanyAstu  jahAra narakastadA  |
prAgjyotiShaM  jagAmAshu  kanyAbhistAbhireva cha  |
yatheShTaM mumude tatra   priyAbhiH saha  dAnavaH  ||  26a-14


December 16, 2008

26b  (pp. 204-205)

vaishaMpAyana uvAcha

gateShu  daityasainyeShu  munayo dainyapIDitAH  |
tasminnevAshrame  ramye  mantrayitvA parasparam   ||   26b-1
devAya lokanAthAya kR^iShNAya cha mahAtmane  |
nivedayAmaH  pApasya dAnavasya kR^itaM punaH  |
yadi sa pratikuryAddhi  tannaH shreyo  bhaviShyati  ||  26b-2
yadi jIvedasau pApo  narako dAnavottamaH  |
jaganna sthAsyate samyagvinaShTashcha  bhavejjanaH  ||  26b-3
iti saMmantrya  munayo   badarIsaMniveshinaH  |
yaj~nabhAraM tadAchChinnam  narakeNa durAtmanA  |
gR^ihItvA  munayaH   sarve  shiShyairdharmanisaMtatAH  ||  26b-4
keshavAya cha tasmai tu  badarIphalasaMhitam  |
keshavenopabhuktAM  tu tasminnAshramasaMpuTe  |
te gatvA  dUramadhvAnaM  dakShiNaM  mArgamAsthitAH  ||  26b-5
vasiShTo vAmadevashcha  jAbAliratha kAshyapaH  |
kaNvo dhUmro  bR^ihaddurgo  bharadvAjashcha gAlavaH  |
kavaSho dhUmraketushcha  kAshyaH kApilakastathA  ||  26b-6
ete chAnye cha munayo  narakeNa durAtmanA  |
bAdhitAH puNDarIkAkShaM  draShTukAmAstapasvinaH  || 26b-7
shiShyaiH   saha samAyAtA  ArtA dAnavapApinA   |
kR^itavedArthatatvaj~nA  draShTukAmA janArdanam  ||  26b-8
ga~NgAM cha  samanuprApya  sthitAstasyAstaTe tadA  |  
tatra snAtuM   samArabdhA  munayaH saMshitavratAH  ||  26b-9
atra snAtvA vayaM  yAmo draShTuM  lokahitaiShiNam   |
nityashuddhaM  jagannAthaM  vasantaM  dvArakApure  ||  26b-10
iti samchintya munayaH  snAnaM chakruryathAvidhi  |
yena yogyA munivaraA  draShTuM keshavamavyaM  |
tasminga~NgAmbhasi snAtvA  sarve shuddhastapodhanAH  ||  26b-11
avatIrya  tato ga~NgAM naubhirmunivarAstadA  |
krameNa samanuprAptA  dvArakAM kR^iShNapAlitAm  ||  26b-12
pravishyA dvArakAM te tu  vasiShThAdyA  munIshvarAH  |
atItya  yadumukhyAnAM  bhavanAni sahasrashaH  ||  26b-13
yA sabhA lokavikhyAtA  sudharmeti cha viShrutA  |
tasyA dvAraM samAsthAya  dvAHsthaM prochurmaharShayaH  |  26b-14
nivedyatAM dvArapAla  keshavAya mahAtmane  |
badaryAM vai samuShitA  munayaH saMshitavratAH  |
draShTuM tvAM samanuprAptA  pIDitA  dAnavottamaiH  ||  26b-15
tachChrutvA  dvArapAlo.api  keshavAya mahAtmane  |
nivedayAmAsa  tadA yaduktaM  munisattamaiH   ||  26b-16
shrutvA tu devadevesho  munInyaduvarArchitaH  |
praveshyantAmiti proktAH  pradyumnaM   samachodayat  ||  26b-17
arghyaM pAdyaM  tadA pAtramAsanAni  samantataH  |
AnIyantAM  yathAyogaM sa cha sarvaM chakAra ha  |
te praviShTA  munivarAstAM sabhAM sabhyapUjitAM  ||   26b-18



December 18, 2008