##Harivamsha Maha Puranam - Part 2 - Vishnu Parva
Chapter 1 - Advent of Narada and  Kamsa's Response
Itranslated and proofread by K S Ramachandran
, February 9, 2008## 

Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

 mahAbhArate harivaMshaH
  viShNuparva
  
   atha prathamo.adhyAyaH 
    nAradAgamanam
    
    nArAyaNaM namaskR^itya naraM chaiva narottamam |
    devIM sarasvatIM chaiva tato jayamudIrayet ||
     
     vaishaMpAyana uvAcha 

     j~nAtvA viShNuM kShitigataM bhAgAMshcha tridivaukasAm |
     vinAshashaMsI kaMsasya nArado mathurAM yayau ||2-1-1
     triviShTapAdApatito mathuropavane sthitaH |
     preShayAmAsa kaMsasya ugrasenasutasya vai ||2-1-2
     sa dUtaH kathayAmAsa munerAgamanaM vane |
     sa nAradasyAgamanaM shrutvA tvaritavikramaH 2-1-3
     nirjagAmAsuraH kaMsaH svapuryAH padmalochanaH |
     sa dadarshAtithiM shlAghyaM devarShiM vItakalmaSham ||2-1-4
     tejasA jvalanAkAraM vapuShA sUryavarchasam |
     so.abhivAdyarShaye tasmai pUjAM chakre yathAvidhi ||2-1-5
     AsanaM chAgnivarNAbhaM visR^ijyopajahAra saH |
     niShasAdAsane tasminsa  vai shakrasakho muniH ||2-1-6
     uvAcha chograsenasya sutaM paramakopanam |
     pUjito.ahaM tvayA vIra vidhidR^iShTena karmaNA ||2-1-7
     gate tvevaM mama vachaH shrUyatAM gR^ihyatAM tvayA |
     anusR^itya divolokAnahaM brahmapurogamAn ||2-1-8
     gataH sUryasakhaM tAta vipulaM meruparvatam |
     sa nandanavanaM chaiva dR^iShTvA chaitrarathaM vanam ||2-1-9
     AplutaM sarvatIrtheShu saritsu saha devataiH |
     divyA tridhArA dR^iShTA ye puNyA tripathagA nadI ||2-1-10 
     smaraNAdeva sarveShAmaMhasAM yA vibhedinI |
     upaspR^iShTaM cha tIrtheShu divyeShu cha yathAkramam ||2-1-11
     dR^iShTaM me brahmasadanaM brahmarShigaNasevitam |
     devagandharvanirghoShairapsarobhishcha nAditam ||2-1-12
     so.ahaM kadAchiddevAnAM samAje merumUrdhani |
     saMgR^ihya vINAM saMsaktAmagachChaM brahmaNaH sabhAm ||2-1-13
     so.ahaM tava sitoShNIShAnnAnAratnavibhUShitAn |
     divyAsanagatAndevAnapashyaM sapitAmahAn ||2-1-14
     tatra mantrayatAmevam devatAnAM mayA shrutaH |
     bhavataH sAnugasyaiva vadhopAyaH sudAruNaH ||2-1-15
     tatraiShA devakI yA te mathurAyAM laghusvasA |
     yo.asyAM garbho.aShTamaH kaMsa sa te mR^ityurbhaviShyati ||2-1-16
     devAnAM sa tu sarvasvaM tridivasya gatishcha saH |
     paraM rahasyaM devAnAM sa te mR^ityurbhaviShyati |2-1-17
     parashchaivAparasteShAM svayaMbhUshcha divaukasAm|
     tataste tanmahadbhUtaM divyaM cha kathayAmyaham ||2-1-18
     shlAghyashcha sa hi te mR^ityurbhUtapUrvashcha taM smara |
     yatnashcha kriyatAM kaMsa devakyA garbhakR^intane ||2-1-19
     eShA me tvadgatA prItiryadarthaM chAhamAgataH |
     bhujyantAM sarvakAmArthAH svasti te.astu vrajAmyaham ||2-1-20
     ityuktvA nArade yAte tasya vAkyaM vichintayan |
     jahAsochchaistataH kaMsaH prakAshadashanashchiram ||2-1-21
     provAcha sasmitaM chaiva bhR^ityAnAmagrataH sthitaH |
     hAsyaH khalu sa sarveShu nArado na vishAradaH ||21-1-22
     nAhaM bhIShayituM shakyo devairapi savAsavaiH |
     AsanasthaH shayAno vA pramatto matta eva cha ||2-1-23
     yo.ahaM dorbhyAmudArAbhyAM kShobhayeyaM dharAmimAm |
     ko.asti mAM mAnushe loke yaH kShobhayitumutsahet ||2-1-24
     adya prabhR^iti devAnAmeSha devAnuvartinAm |
     nR^ipakShipashusa~NghAnAM karomi kadanaM mahat ||2-1-25
     Aj~nApyatAM hayaH keshI pralambo dhenukastathA 
     ariShTo vR^iShabhashchaiva pUtanA kAliyastathA  ||2-1-26
     aTadhvaM pR^ithivIM kR^itsnAM yatheshTaM kAmarUpiNaH 
     praharadhvaM cha sarveShu ye.asmAkaM pakShadUShakAH ||2-1-27
     garbhastAnAmapi gatirvij~neyA chaiva dehinAm |
     nAradena hi garbhebhyo bhayaM naH samudAhR^itam ||2-1-28
     bhavanto hi yathAkAmaM modantAM vigatajvarAH |
     mAM cha vo nAthamAshR^itya nAsti devakR^itaM bhayam ||2-1-29
     sa tu kelikilo vipro bhedashIlashcha nAradaH |
     sushliShTAnapi loke.asminbhedaya.Nllabhate ratim ||2-1-30
     kaNDUyamAnaH satataM lokAnaTati cha~nchalaH |
     ghaTamAno narendrANAM tantrairvairANi chaiva hi ||2-1-31
     evaM sa vilapanneva vA~NmAtreNaiva kevalam |
     vivesha kaMso bhavanaM dahyamAnena chetasA ||2-1-32
     
     iti shimahAbhArate khileShu harivaMshe viShNuparvaNI nAradAgamane
kaMsavAkye prathamo.adhyAyaH