## Harivamsa Maha Puranam - Part 2 - Vishnu Parva
Chapter 23- Andhaka Admonishes Kamsa
Itranslated by K S Ramachandran ramachandran_ksr@yahoo.ca, May 31, 2008##
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
atha trayoviMsho.adhyAyaH
andhakavachanam
vaishampAyana uvAcha
kShipraM yaduvR^iShaM dR^iShTvA sarve te yadupu~NgavAH |
nipIDya shravaNAnhastairmenire taM gatAyuSham ||2-23-1
andhako.anudvignamanA dhairyAdavikR^itaM vachaH |
provAcha vadatAM shreShThaH samAje kaMsamojasA |2-23-2
ashlAghyo me mataH putra tavAyaM vAkparishramaH |
ayukto garhitaH sadbhirbAndhaveshu visheShataH ||2-23-3
ayAdavo yadi bhavA~nChR^iNu tAvadyaduchyate |
na hi tvAM yAdavaM vIra balAtkurvanti yAdavAH ||2-23-4
ashlAghyA vR^iShNayaH putra yeShAm tvamanushAsitA |
ikShvAkuvaMshajo rAjA vinivR^ittaH svayaM sakR^it ||2-23-5
bhojo vA yAdavo vAsi kaMso vAsi yathA tathA |
sahajaM te shirastAta jaTI muNDo.api vA bhava ||2-23-6
ugrasenastvayaM shochyo yo.asmAkaM kulapAMsanaH |
durjAtIyena yena tvamIdR^isho janitaH sutaH ||2-23-7f
na chAtmano guNAMstAta pravadanti manIShiNAH |
pareNoktA gunA gauNyaM yAnti vedArthasaMmitAH ||2-23-8
pR^ithivyAM yaduvaMsho.ayaM nindanIyo mahIkShitAm |
bAlaH kulAntakR^inmUDho yeShAM tvamanushAsitA ||2-23-9
asAdhumadbhirvAkyaishcha tvayA sAdhviti bhAShitaiH |
na chApyAsAditaM kAryamAtmA cha vivR^itaH kR^itaH ||1-23-10
guroranavaliptasya mAnyasya mahatAmapi |
kshepaNaM kaH shubhaM manye dvijasyeva vadhe kR^ite ||2-23-11
mAnyAshchaivAbhigamyAshcha vR^iddhAstAta yathAgnayaH |
krodho hi teShAM pradahellokAnantargatAnapi ||2-23-12
budhena tAta dAntena nityamabhyuchChritAtmanA |
dharmasya gatiranveShyA matsyasya gatirapsviva ||2-23-13
kevalaM tvaM tu darpeNa vR^iddhAnagnisamAniha |
vAchA tudasi marmaghnyA amantroktA yathA.a.ahutiH ||2-23-14
vasudevaM cha putrArthe yadimaM parigarhasi |
tatra mithyA pralApante nindAmi kR^ipaNaM vachaH ||2-23-15
dAruNe cha pitA putre naiva dAruNatAM vrajet |
putrArthe hyApadaH kaShTAH pitaraH prApnuvanti hi ||2-23-16
ChAdito vasudevena yadi putraH shishustadA |
manyase yadyakartavyaM tatpR^ichCha pitaram svakam ||2-23-17
garhatA vasudevaM cha yaduvaMshaM cha nindatA |
tvayA yAdavaputrANAM vairajaM viShamarjitam 2-23-18||
akartavyaM yadi kR^itaM vasudevena putrajam |
kimarthamugrasenena shishustvaM na vinAshitaH ||2-23-19
punnAmno narakAtputro yasmAttrAtA pitR^IMstadA |
tasmAdbruvanti putreti putraM dharmavido janAH ||2-23-20
jAtyAM hi yAdavaH kR^ishNAH sa cha sa~NkarShaNo yuvA |
tvaM chApi vidhR^itastAbhyAM jAtavaireNA chetasA ||2-23-21
udbhUtAnIha sarveShAM yadUnAM hR^idayAni vai |
vasudeve tvayA.a.akShipte vAsudeve cha kopite ||2-23-22
kR^iShNe cha bhavato dveShye vasudevavigarhaNAt |
shaMsanti chemAni bhayaM nimittAnyashubhANi te ||2-23-23
sarpANAM darshanaM tIvraM duHsvapnAnAM nishAkShaye |
puryA vaidhavyashaMsIni kAraNAiranumImahe ||2-23-24
esha ghoro grahaH svAtImullikha~Nkhe gabhastibhiH |
chakrama~ngArakashchakre chitrAyAM ghoradarshanaH ||2-23-25
budhena pashchimA sandhyA vyAptA ghoreNa tejasA |
vaishvAnarapathe shukro hyatichAraM chachAra ha ||2-23-26
ketunA dhUmaketostu nakShatrANi trayodasha |
bharaNyAdIni bhinnAni nAnuyAnti nishAkaram ||2-23-27
prAksaMdhyA parighagrastA bhAbhirbAdhati bhAskaram |
pratilomaM cha yAntyeva vyAharanto mR^igadvijAH ||2-23-28
shivA shmashAnAnniShkramya niHshvAsA~NgAravarShiNI |
ubhe sandhye purIM ghorA paryeti bahu vAshatI ||2-23-29
ulkA nirghAtanAdena papAta dharanItale |
chalatyaparvaNi mahI girINAM shikharANi cha ||2-23-30
grastaH svarbhAnunA sUryo divA naktamajAyata |
dhUmotpAtairdisho vyAptAH shuShkAshanisamAhatAH ||2-23-31
prasravanti ghanA raktaM sAshanistanayitnavaH |
chalitA devatAH sthAnAttyajanti vihagA nagAn ||2-23-32
yAni rAjavinAshAya daivaj~nAH kathayanti ha |
tAni sarvANi pashyAmo nimittAnyashubhAni vai ||2-23-33
tvaM chApi svajanadveShI rAjadharmaparA~NmukhaH |
animittAgatakrodhaH sannikR^iShTabhayo hyasi ||2-23-34
yastvam devopamam vR^iddhaM vasudevaM vasUpamam |
mohAtkShipasi durbuddhe kutaste shAntirAtmanaH ||2-23-35
tvadgato yo hi naH snehastaM tyajAmo.adya vai vayam |
ahitaM svasya vaMshasya na tvAM kShaNamupAsmahe ||2-23-36
sa hi dAnapatirdhanyo yo drakShyati vane gatam |
puNDarIkavishAlAkShaM kR^iShNamakliShTakAriNam ||2-23-37
ChinnamUlo hyayaM vaMsho yadUnAM tvatkR^ite kR^itaH |
kR^iShNo j~nAtInsamAnAyya sa sandhAnaM kariShyati ||2-23-38
kShAntameva tavAnena vasudevena dhImatA |
kAlasaMyakparij~nAno brUhi tvaM yadyadichChasi ||2-23-39
mahyaM tu rochate kaMsa vasudevasahAyavAn |
gachCha kR^iShNasya nilayaM sandhistena cha rochatAm ||2 23-40
iti srimahAbhArate khileShu harivaMshe viShNuparvaNi
andhakavachane trayoviMsho.adhyAyaH