## Harivamsa Maha Puranam - Part 2 - Vishnu Parva
Chapter 25 - Akrura Arrives
Itranslated by K S Ramachandran ramachandran_ksr@yahoo.ca>
June 5, 2008##
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
atha pa~nchaviMsho.adhyAyaH
akrUrAgamanam
vaishampAyana uvAcha
athAstaM gachChati tada mandarashmau divAkare |
saMdhyAraktatale vyomni shashA~Nke pANDumaNDale ||2-25-1
nIDastheShu viha~NgeShu satsu prAduShkR^itAgniShu |
IShattamaHsaMvR^IttAsu dikShu sarvAsu sarvashaH ||2-25-2
ghoShavAsiShu supteshu vAshantIShu shivAsu cha |
naktaMchareShu hR^iShTeShu pishitAshanakA~NkShiShu ||2-25-3
shakragopAhvayAmode pradoshe.abhyAsataskare |
saMdhyAmayImiva guhaM saMpratiShThe divAkare ||2-25-4
adhishrayaNavelAyAM prAptAyAM gR^ihamedhinAm |
vanyairvaikhAnasairmantrairhUyamAne hutAshane ||2-25-5
upAvR^ittAsu vai goShu duhyamAnAsu cha vraje |
asakR^idvyAharantIShu baddhavatsAsu dhenuShu ||2-25-6
prakIrNadAmanIkeShu gAstathaivAhvayatsu cha |
saninAdeShu gopeShu kAlyamAne cha godhane ||2-25-7
karISheShu prakL^ipteShu dIpyamAneShu sarvashaH |
kAShThabhArAnataskandhairgopairabhyAgataistathA ||2-25-8
ki~nchidabhyudyate some mandarashmau virAjati |
IShadvigAhamAnAyAM rajanyAM divase gate ||2-25-9
prApte dinavyuparame pravR^itte kShaNadAmukhe |
bhAskare tejasi gate saumye tejasyupasthite ||2-25-10
agnihotrAkule kAle saumyendau samupasthite |
agnIShomAtmake saMdhau vartamAne jaganmaye ||2-25-11
pashchimenAgnidIptena pUrveNotpalavarchasA |
dagdhAdrisadR^ishe vyomni ki~nchittArAgaNAkule ||2-25-12
vayobhirvAsamushatAM bandhubhishcha samAgamam |
shaMsadbhiH syandanenAshu prApto dAnapatirvrajam ||2-25-13
pravishanneva paprachCha sAnnidhyaM keshavasya saH |
rauhiNeyasya chAkrUro nandagopasya chAsakR^it ||2-25-14
sa nandagopasya gR^ihaM vAsAya vibudhopamaH |
avatIrya tato yAnAtpravivesha mahAbalaH ||2-25-15
harShapUrNena vaktreNa sAshrunetreNa chaiva hi |
pravishanneva cha dvAri dadarshAdohane gavAm ||2-25-16
vatsamadhye sthitaM kR^iShNaM savatsamiva govR^iSham |
sa taM harShaparItena vachasA gadgadena vai ||2-25-17
ehi keshava tAteti pravyAharata dharmavit |
uttAnashAyinaM dR^iShTvA punardR^iShTvA shriyA vR^itam ||2-25-18
avyaktayauvanam kR^iShnamakrUraH prashashaMsa ha |
ayaM sa puNDarIkAkShaH simhashArdUlavikramaH ||2-25-19
saMpUrNajalameghAbhaH parvatapravarAkR^itiH |
mR^idheShvadharShaNIyena sashrIvatsena vakShasA |
dviShannidhanadakShAbhyAM bhujAbhyAM sAdhu bhUShitaH ||2-25-20
mUrtimAnsa rahasyAtmA jagato.agryasya bhAjanam |
gopaveShadharo viShNurudagrAgryatanUruhaH ||2-25-21
kirITalA~nChanenApi shirasA ChatravarchasA |
kuNDalottamayogyAbhyAM shravaNAbhyAM vibhUShitaH ||2-25-22
hArArheNa cha pInena suvistIrNena vakShasA |
dvAbhyAM bhujAbhyAM vR^ittAbhyAM dIrghAbhyAmupashobhitaH ||2-25-23
strIsahasropacharyeNa vapuShA manmathAdhinA |
pIte vasAno vasane so.ayaM viShNuH sanAtanaH ||2-25-24
dharaNyAshrayabhUtAbhyAM charaNAbhyAmarindamaH |
trailokyAkrAntibhUtAbhyAM bhuvi padbhyAM vyavasthitaH ||2-25-25
ruchirAgrakarashchAsya chakrA~Nkita ivekShate |
dvitIya udyatashchApi gadAsaMyogamichChati ||2-25-26
avatIrNo bhavAyeha prathamaM padamAtmanaH |
shobhate.adya bhuvi shreShThastridashAno dhurandharaH ||2-25-27
ayaM bhaviShye kathito bhaviShyakushalairnaraiH |
gopAlo yAdavaM vaMshaM kShINaM vistArayiShyati ||2-25-28
tejasA yAdavAshchAsya shatasho.atha sahasrashaH |
vaMshamApUrayiShyanti hyoghA iva mahArNavam ||2-25-29
asyedaM shAsane sarvaM jagatsthAsyati shAshvatam |
nihatAmitrasAmantaM sphItaM kR^itayuge tathA ||2-25-30
ayamAsthAya vasudhAM sthApayitvA jagadvashe |
rAj~nAM bhaviShyatyupari na cha rAjA bhaviShyati ||2-25-31
nUnaM tribiH kramairjitvA yathAnena prabhuH kR^itaH |
purA purandaro rAjA devatAnAM triviShTape ||2-25-32
tathaiva vasudhAM jitvA jitapUrvAM tribhiH kramaiH |
sthApayiShyati rAjAnamugrasenaM na saMshayaH ||2-25-33
prasR^iShTavairagAdho.ayaM prashnaishcha bahubhiH shrutaH |
brAhmaNAirbrahmavAdaishcha purANo.ayaM hi gIyate ||2-25-34
spR^ihaNIyo hi lokasya bhaviShyati cha keshavaH |
tathA hyasyotthitA buddhirmAnuShyamupajIvitum ||2-25-35
ahaM tvasyAdya vasatiM pUjayiShye yathAvidhi |
viShNutvaM manasA chaiva pUjayiShyAmi mantravat ||2-25-36
yachcha j~nAtiparij~nAnaM prAdurbhAvashcha vai nR^iShu |
amAnuShaM vedmi chainaM ye chAnye divyachakShuShaH ||2-25-37
so.ahaM kR^iShNena vai rAtrau saMmantrya viditAtmanA |
sahAnena gamiShyAmi savrajo yadi maMsyate ||2-25-38
evaM bahuvidhaM kR^iShNaM dR^iShTvA hetvarthakAraNaiH |
vivesha nandagopasya kR^iShNena saha saMsadam ||2-25-39
iti srImahAbhArate khileShu harivaMshe viShNuparvaNi
akrUrAgamane pa~nchaviMsho.adhyAyaH