## Harivamsa Maha Puranam - Part 2 - Vishnu Parva
Chapter 27 - Breaking Kamsa's Bow
Itranslated by K S Ramachandran ramachandran_ksr@yahoo.ca, June 14, 2008##
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
atha saptaviMsho.adhyAyaH
kaMsadhanurbha~NgaH
vaishampAyana uvAcha
te tu yu~NktvA rathavaraM sarva evAmitaujasaH |
kR^iShNena sahitAH prAyaMstathA sa~NkarShaNena cha ||2-27-1
Aseduste purIM ramyAM mathurAM kaMsapAlitAm |
vivishuste purIM ramyAM kAle raktadivAkare ||2-27-2
tau tu svabhavanaM vIrau kR^iShNasa~NkarShaNAvubhau |
praveshitau buddhimatA hyakrUreNArkavarchasau ||2-27-3
tAvAha varavarNAbhau bhIto dAnapatistadA |
tyaktavyA tAta gamane vasudevagR^ihe spR^ihA ||2-27-4
yuvayorhi kR^ite vR^iddhaH kaMsena sa nirasyate |
bhartsyate cha divA rAtrau neha sthAtavyamityapi ||2-27-5
tadyuvAbhyAM hi kartavyaM pitrarthaM sukhamuttamam |
yathA sukhamavApnoti tadvai kAryaM hitAnvitam ||2-27-6
tamuvAcha tataH kR^iShNo yAsyAvAvAmatarkitau |
prekShantau mathurAM vIra rAjamArgaM cha dhArmika |
tasyaiva tu gR^ihaM sAdho gachChAvo yadi manyase ||2-27-7
vaishampAyana uvAcha
akrUro.api namaskR^itya manasA kR^iShNamavyayam |
jagAma kaMsapArshvaM tu prahR^iShTenAntarAtmanA ||2-27-8
anushiShTAu cha tau vIrau prasthitau prekShakAvubhau |
AlAnAbhyAmivonmuktau ku~njarau yuddhakA~NkShiNau ||2-27-9
tau tu mArgagataM dR^iShTvA rajakaM ra~NgakArakam |
ayAchetAM tatastau tu vAsAMsi ruchirANi vai || 2-27-10
rajakaH sa tu tau prAha yuvAM kasya vanecharau |
rAjavAsAMsi yau mauDyAdyAchethAM nirbhayAvubhau ||2-27-11
ahaM kaMsasya vAsAMsi nAnAdeshodbhavAni vai |
kAmarAgANi shatasho ra~njayAmi visheShataH ||2-27-12
yuvAM kasya vane jAtau mR^igaiH saha vivarddhitau |
jAtarAgAvidaM dR^iShTvA raktamAchChAdanaM bahu ||2-27-13
aho vAM jIvitaM tyaktaM yau bhavantAvihAgatau |
mUrkhau prAkR^itavij~nAnau vAso yAchitumichChataH ||2-27-14
tasmai chukopa vai kR^iShNo rajakAyAlpamedhase |
prAptAriShTAya mUrkhAya sR^ijate vA~NmayaM visham ||2-27-15
talenAshanikalpena sa taM mUrddhanyatADayat |
sa gatAsuH papAtorvyAM rajako vyastamastakaH ||2-27-16
taM hataM paridevantyo bhAryAstasya vichukrushuH |
tvaritaM muktakeshyashcha jagmuH kaMsaniveshanam ||2-27-17
tAvapyubhau suvasanau jagmaturmAlyakAraNAt |
vIthImAlyApaNAnAM vai gandhAghrAtau dvipAviva ||2-27-18
guNako nAma tatrAsInmAlyavR^ittiH priyaMvadaH |
prabhUtamAlyApaNavA.NllakShmIvAnpriyadarshanaH ||2-27-19
taM kR^iShNaH shlakShNayA vAchA mAlyArthamabhisR^iShTayA |
dehItyuvAcha tatkAle mAlAkAramakAtaram ||2-27-20
tAbhyAM prIto dadau mAlyaM prabhUtaM mAlyajIvanaH |
bhavatoH svamidaM cheti provAcha priyadarshanau ||2-27-21
prItaH sumanasA kR^iShNo guNakAya varaM dadau |
shrIstvAM matsaMbhavA saumya dhanaughairabhipatsyate ||2-27-22
sa labdhvA varamavyagro mAlyavR^ittiradhomukhaH |
kR^iShNasya patito mUrdhnA pratijagrAha taM varam ||2-27-23
yakShAvimAviti tadA sa mene mAlyajIvakaH |
sa bhR^ishaM bhayasaMvigno nottaraM pratyapadyata ||2-27-24
vasudevasutau tau cha rAjamArgagatAvubhau |
kubjAM dadR^ishaturbhUyaH sAnulepanabhAjanAm ||2-27-25
tAMAha kR^iShNaH kubjeti kasyedamanulepanam |
nayasyambujapatrAkShi kShipramAkhyAtumarhasi ||2-27-26
sasmitA saMmukhI bhUtvA pratyuvAchAmbujekShaNam |
kR^iShNaM jaladagambhIraM vidyutkuTilagAminI ||2-27-27
rAj~naH snAnagR^ihaM yAmi tadgR^ihANAnulepanam |
dR^iShTvaiva tvAravindAkSha vismitAsmi varAnana ||2-27-28
yattvamichChasi me vIra tvaM gR^ihANAnulepanam |
sthitAsmyAgachCha bhadraM te hR^idayasyAsi me priyaH ||2-27-29
kutashchAgamyate saumya yanmAM tvaM nAvabudhyase |
mahArAjasya dayitAM niyuktAmanulepane ||2-27-30
tAmuvAcha hasantIM tu kR^iShNaH kubjAmavasthitAm |
AvayorgAtrasadR^ishaM dIyatAmanulepanam || 2-27-31
vayaM hi deshAtithayo mallAH prAptA varAnane ||
draShTuM dhanurmahaddivyaM rAShTre chaiva mahardhimat ||2-27-32
pratyuvAchAtha sA kR^iShNaM priyo.asi mama darshane |
rAjArhamidamavyagraM tadgR^ihANAnulepanam ||2-27-33
tAvubhAvanuliptA~Ngau chArugAtrau virejatuH |
tIrthagau pa~NkadigdhA~Ngau yamunAyAM yathA vR^iShau ||2-27-34
tAM cha kubjAM sthagormadhye dvya~NgulenAgrapANinA |
shanaiH saMpIDayAmAsa kR^iShNo lIlAvidhAnavit ||2-27-35
sA cha magnaM sthaguM matvA svAyatA~NgI shuchismitA |
jahAsochchaiH stanataTI R^ijuyaShTirlatA yathA || 2-27-36
praNayAchchApi kR^iShNaM sA babhAShe mattakAshinI |
kva yAsyasi mayA ruddhaH kAnta tiShTha gR^ihANa mAm ||2-27-37
tau jAtahAsAvanyonyaM satalAkShepamavyayau |
vIkShamANau prahasitau kubjAyAH shrutivistarau ||2-27-38
kR^iShNastu kubjAM kAmArtAM sasmitaM visasarja ha |
tatastau kubjayA muktau praviShTau rAjasaMsadam ||2-27-39
tAvubhau vrajasaMvR^iddhau gopaveShavibhUShitau|
gUDhacheShTAnanau bhUtvA praviShTau nR^ipaveshma tat ||2-27-40
dhanuHshAlAM gatau tatra bAlAvaparitarkitau |
himavadvanasaMbhUtau simhAviva madotkaTau ||2-27-41
didR^ikShantau mahattatra dhanurAyogabhUShitam |
paprachChatushcha tau vIrAvAyudhAgArikaM tadA ||2-27-42
bhoH kaMsadhanuShAM pAla shrUyatAmAvayorvachaH |
katarattaddhanuH saumya maho.ayaM yasya vartate ||2-27-43
AyogabhUtaM kaMsasya darshayasva yadIchChasi |
sa tayordarshayAmAsa taddhanuH stambhasannibham ||2-27-44
anAropyamasambhedyaM devairapi savAsavaiH |
tadgR^ihItvA tadA kR^iShNastolayAmAsa vIryavAn ||2-27-45
dorbhyAM kamalapatrAkShaH prahR^iShTenAntarAtmanA |
tolayitvA yathAkAmaM taddhanurdaityapUjitam ||2-27-46
AropayAmAsa balI nAmayAmAsa chAsakR^it |
AnAmyamAnaM kR^iShNena prakarShAduragopamam |
dvidhAbhUtamabhUnmadhye dhanurAyogabhUShitam ||2-27-47
bha~NktvA tu taddhanuH shreShThaM kR^iShNastvaritavikramaH |
nishchakrAma mahAvegaH sa cha sa~NkarShaNo yuvA ||2-27-48
dhanuSho bha~NganAdena vAyunirghoshakAriNA |
chachAlAntaHpuraM sarvaM dishashchaiva pupUrire ||2-27-49
nirgamya tvAyudhAgArAjjagmaturgopasannidhau |
vegenAyudhapAlastu gachChansaMbhrAntamAnasaH ||2-27-50
samIpaM nR^ipatergatvA kAkochChvAso.abhyabhAShata |
shrUyatAM mama vij~nApyamAshcharyaM dhanuSho gR^ihe ||2-27-51
nirvR^ittamasminkAle yajjagataH sambhramopamam ||
narau kasyApyasadR^ishau shikhAvitatamUrdhajau ||2-27-52
nIlapItAmbaradharau pItashvetAnulepanau |
tAvantaHpuramaj~nAtau praviShTau kAmaveShiNau |
devaputropamau vIrau bAlAviva hutAshanau ||2-27-53
sthitau dhanurgR^ihe saumyau sahasA khAdivAgatau |
mayA dR^iShTAu parivyaktaM ruchirAchChadanasrajau ||2-27-54
tayorekastu padmAkShaH shyAmaH pItAmbarasrajaH |
jagrAha taddhanUratnaM durgrAhyaM daivatairapi ||2-27-55
tasya bAlo mahachchApaM balAdyantramivAyasam |
AropayitvA vegena nAmayAmAsa lIlayA ||2-27-56
AkR^iShyamANaM tattena vibANaM bAhushAlinA |
muShTideshe vikUjitvA dvidhAbhUtamabhajyata ||2-27-57
tataH prachalitA bhUmirnaiva bhAti cha bhAskaraH |
dhanuSho bha~NganAdena bhramatIva nabhastalam ||2-26-58
tadadbhutaM mahaddR^iShTvA vismayaM paramaM gataH |
bhayAdbhayadashatrubhyastadihAkhyAtumAgataH |
na jAnAmi mahArAja kau tAvamitavikramau ||2-27-59
ekaH kailAsasa~NkAsha eko.a~njanagiriprabhaH |
sa tu tachchAparatnaM vai bha~NktvA stambhamiva dvipaH ||2-27-60
niShpapAtAnilagatiH sAnugo.amitavikramaH |
agamattaM dvidhA kR^itvA na jAne ko.apyasau nR^ipa ||2-27-61
shrutvaiva dhanuSho bha~NgaM kaMso viditavistaraH |
visR^ijyAyudhapAlaM vai pravivesha gR^ihottamam ||2-27-62
iti shrImahAbhArate khileShu harivaMshe viShNuparvaNi
kaMsadhanurbha~Nge saptaviMsho.adhyAyaH