## Harivamsa Maha Puranam - Part 2 - Vishnu Parva
Chapter 36 - JarAsaMdha Retires from Battlefield
Itranslated by K S Ramachandran ramachandran_ksr@yahoo.ca,
July 19, 2008
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
atha ShaTtriMsho.adhyAyaH
jarAsaMdhapayAnam
vaishampAyana uvAcha
tato yuddhAni vR^iShNInAM babhUvuH sumahAntyatha |
mAgadhasya mahAmAtrairnR^ipaishchaivAnuyAyibhiH ||2-36-1
rukmiNA vAsudevasya bhIShmakeNAhukasya cha |
krathasya vasudevena kaishikasya tu babhruNA ||2-36-2
gadena chedirAjasya dantavaktrasya sha~NkunA |
tathAnyairvR^iShNivIrANAM nR^ipANAM cha mahAtmanAm ||2-36-3
yuddhamAsIddhi sainyAnAM sainikairbharatarShabha |
ahAni pa~ncha chaikaM cha ShaT saptAShTau cha dAruNam ||2-36-4
gajairgajA hayairashvAH padAtAshcha padAtibhiH |
rathai rathA vimishrAshcha yodhA yuyudhire nR^ipa ||2-36-5
jarAsaMdhasya nR^ipate rAmeNAsItsamAgamaH |
mahendrasyeva vR^itreNa dAruNo romaharShaNaH ||2-36-6
avekShya rukmiNIM kR^iShNo rukmiNaM na vyapothayat |
jvalanArkAMshusa~NkAshAnAshIviShaviShopamAn ||2-36-7
vArayAmAsa kR^iShNo vai sharAMstasya tu shikShayA |
ityeShAM sumahAnAsIdbalaughAnAM parikShayaH ||2-36-8
ubhayoH senayo rAjanmAMsashoNitakardamaH |
kabandhAni samuttasthuH subahUni samantataH ||2-36-9
tasminvimarde yodhAnAM sa~NkhyAvR^ittikarANi cha |
rathI rAmo jarAsaMdhaM sharairAshIviShopamaiH ||2-36-10
AvR^iNvannabhyayAdvIrastaM cha rAjA sa mAgadhaH |
abhyavartata vegena syandanenAshugAminA ||2-36-11
anyonyaM vividhairastrairviddhvA viddhvA vinedatuH |
tau kShINashastrau virathau hatAshvau hatasArathI ||2-36-12
gade gR^ihItvA vikrAntAvanyonyamabhidhAvatAt |
kaMpayantau bhuvaM virau tAvudyatagadAvubhau ||2-36-13
dadarshAte mahAtmAnau girI sashikharAviva |
vyupAramanta yuddhAni pashyatAM tau mahAbhujau |
saMrabdhAvabhidhAvantau gadAyuddheShu vishrutau ||2-36-14
ubhau tau paramAchAryau loke khyAtau mahAbalau |
mattAviva gajau yuddhe tAvanyonyamayuddhyatAm ||2-36-15
tato devAH sagandharvAH siddhAshcha samaharShayaH |
samantatashchApsarasaH samAjagmuH sahasrashaH ||2-36-16
taddevayakShagandharvamaharShibhirala~NkR^itam |
shushubhe.abhyadhikaM rAjandivaM jyotigaNairiva ||2-36-17
abhidudrAva rAmaM tu jarAsaMdho mahAbalaH |
savyaM maNDalamAshritya baladevastu dakShiNam ||2-36-18
praharantau tato.anyonyaM gadAyuddhavishAradau |
dantAbhyAmiva mAta~Ngau nAdayantau disho dasha ||2-36-19
gadAnipAto rAmasya shushruve.ashaniniHsvanaH |
jarAsaMdhasya charaNe parvatasyeva dIryataH ||2-36-20
na sma kaMpayate rAmaM jarAsaMdhakarachyutA |
gadA gadAbhR^itAM shreShThaM vindhyaM girimivAnilaH ||2-36-21
rAmasya tu gadAvegaM vIryAtsa magadheshvaraH |
sehe dhairyeNa mahatA shikShayA cha vyapohayat ||2-36-22
evaM tau tatra sa~NgrAme vicharantau mahAbalau |
maNDalAni vichitrANi vicheraturarindamau ||2-36-23
vyAyachChantau chiraM kAlaM parishrAntau cha tasthatuH |
samAshvAsya muhUrtaM tu punaranyonyamAhatAm ||2-36-24
evaM tau yodhamukhyau tu samaM yuyudhatushchiram |
na cha tau yuddhavaimukhyamubhAveva prajagmatuH ||2-36-25
athApashyadgadAyuddhe visheShaM tasya vIryavAn |
rAmaH kruddho gadAM tyaktvA jagrAha musalottamam ||2-36-26
tamudyantaM tadA dR^iShTvA musalaM ghoradarshanam |
amoghaM baladevena kruddhena tu mahAraNe ||2-36-27
tato.antarikShe vAgAsitsusvarA lokasAkShiNI |
uvAcha baladevaM tam samudyatahalAyudham ||2-36-28
na tvayA rAma vadhyo.ayamalaM khedena mAgadhe |
vidito.asya mayA mR^ityustasmAtsAdhu vyupArama |
achireNaiva kAlena prANAMstyakShyati mAgadhaH ||2-36-29
jarAsaMdhastu tachChrutvA vimanAH samapadyata |
na prajahre tatastasmai punareva halAyudhaH ||2-36-30
tau vyupAramatAM yuddham vR^iShNayaste cha pArthivAH |
asaktamabhavadyuddhaM teShAmeva sudAruNam ||2-36-31
dIrghakAlam mahArAja nighnatAmitaretaram |
parAjite tvapakrAnte jarAsaMdhe mahIpatau ||2-36-32
astaM yAte dinakare nAnusasrustadA nishi |
samAnIya svakaM sainyaM labdhalakShyA mahAbalAH ||2-36-33
purIM pravivishurhR^iShTAH keshavenAbhipAlitAH |
khAchchyutAnyAyudhAnyevaM tAnyevAntardadhustadA ||2-36-34
jarAsaMdho.api nR^ipatirvimanAH svapurIM yayau |
rAjAnashchAnugA ye.asya svarAShTrANyeva te yayuH ||2-36-35
jarAsaMdhaM tu te jitvA menire naiva nirjitam |
vR^iShNayaH kurushArdUla rAjA hyatibalaH sa vai ||2-36-36
dasha chAShTau cha sa~NgrAmA~njarAsaMdhasya yAdavAH |
dadurna chainaM samare hantuM shekurmahAbalAH ||2-36-37
akShauhiNyashcha tasyAsanviMshatishcha mahAmate |
jarAsaMdhasya nR^ipatestadarthaM yAH samAgatAH ||2-36-38
alpatvAdabhibhUtAstu vR^iShNayo bharatarShabha |
bArhadrathena rAjendra rAjabhiH sahitena vai ||2-36-39
bhUyaH kR^itvodyamam prAyAdyAdavAnkR^iShNapAlitAn |
jitvA tu mAgadhaM sa~Nkhye jarAsaMdhaM mahIpatim |
viharanti sma sukhino vR^iShNisiMhA mahArathAH ||2-36-40
iti shrImahAbhArate khileShu harivaMshe viShNuparvaNI
jarAsaMdhApayAnaM nAma ShaTtriMsho.adhyAyaH