##Harivamsha Maha Puranam - Vishnu Parva - Chapter 3 - Hymn to Arya Itranslated and proofread by K S Rmachandran ramachandran_ksr@yahoo.ca, February 25, 2008## Further proof-read by Gilles Schaufelberger schaufel @ wanadoo.fr If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha tritIyo.adhyAyaH AryAstavaH vaishaMpAyana uvAcha AryAstavaM pravakShyAmi yathoktaMR^iShibhiH purA | nArAyaNIM namasyAmi devIM tribhuvaneshvarIm ||2-3-1 tvaM hi siddhirdhR^itiH kIrtiH shrIrvidyA sannatirmatiH | saMdhyA rAtriH prabhA nidrA kAlarAtristathaiva cha ||2-3-2 AryA kAtyAyanI devI kaushikI brahmachAriNI | jananI siddhasenasya ugrachArI mahAbalA ||2-3-3 jayA cha vijayA chaiva puShTistuShTiH kShamA dayA | jyeShThA yamasya bhaginI nIlakausheyavAsinI ||2-3-4 bahurUpA virUpA cha anekavidhichAriNI | virUpAkShI vishAlakShI bhaktAnAM parirakShiNI ||2-3-5 parvatAgreShu ghoreShu nadIShu cha guhAsu cha | vAsaste cha mahAdevi vaneShUpavaneShu cha ||2-3-6 shabarairbarbaraishchaiva pulindaishcha supUjitA | mayUrapichChadhvajinI lokAnkramasi sarvashaH ||2-3-7 kukkuTaishChAgalairmeShaissiMhairvyAghraissamAkulA | ghaNTAninAdabahulA vindhyavAsinyabhishrutA ||2-3-8 trishUlI paTTishadharA sUryachandrapatAkinI | navamI kR^iShNapakShasya shuklasyaikAdashI tathA ||2-3-9 bhaginI baladevasya rajanI kalahapriyA | AvAsaH sarvabhUtAnAM niShThA cha paramA gatiH ||2-3-10 nandagopasutA chaiva devAnAM vijayAvahA | chIravAsAH suvAsAshcha raudrI saMdhyAcharI nishA ||2-3-11 prakIrNakeshI mR^ityushcha surAmAMsabalipriyA | lakShmIralakShmIrUpeNa dAnavAnAM vadhAya cha ||2-3-12 sAvitrI chApi devAnAM mAtA mantragaNasya cha | kanyAnAM brahmacharyatvaM saubhAgyaM pramadAsu cha ||2-3-13 antevadI cha yaj~nAnAmR^itvijAM chaiva dakShiNA | karShukANAM cha sIteti bhUtAnAM dharaNIti cha ||2-3-14 siddhiH sAMyAtrikANAM tu velA tvaM sAgarasya cha | yakShANAM prathamA yakShI nAgAnAM suraseti cha ||2-3-15 brahmavAdinyatho dIkShA shobhA cha paramA tathA | jyotiShAM tvaM prabhA devi nakShatrANAM cha rohiNI ||2-3-16 rAjadvAreShu tIrtheShu nadInAM sa~NgameShu cha | pUrNA cha pUrNimA chandre kR^ittivAsA iti smR^itA ||2-3-17 sarasvatI cha vAlmIke smR^itirdvaipAyane tathA | R^ishINAM dharmabuddhistu devAnAM mAnasI tathA | surA devI cha bhUteShu stUyase tvaM svakarmabhiH ||2-3-18 indrasya chArudR^iShTistvaM sahasranayaneti cha | tApasAnAM cha devI tvamaraNI chAgnihotriNAm ||2-3-19 kShudhA cha sarvabhUtAnAM tR^iptistvaM daivateShu cha | svAhA tR^iptirdhR^itirmedhA vasUnAM tvaM vasUmatI ||2-3-20 AshA tvaM mAnuShANAM cha puShTishcha kR^itakarmaNAm | dishashcha vidishashchaiva tathA hyagnishikhA prabhA ||2-3-21 shakunI pUtanA tvaM cha revatI cha sudAruNA | nidrApi sarvabhUtAnAM mohinI kShatriyA tathA ||2-3-22 vidyAnAM brahmavidyA tvamo~NkAro.atha vaShaT tathA | nArINAM pArvatIM cha tvAM paurANImR^iShayo viduH ||2-3-23 arUndhatI cha sAdhvInAM prajApativacho yathA yathArthanAmabhirdivyairindrANI cheti vishR^utA ||2-3-24 tvayA vyAptamidaM sarvaM jagatsthAvaraja~Ngamam | saMgrAmeShu cha sarveShu agniprajvaliteShu cha | nadItIreShu chaureShu kAntAreShu bhayeShu cha ||2-3-25 pravAse rAjabandhe cha shatrUNAM cha pramardane | prANAtyayeShu sarveShu tvaM hi rakShA na saMshayaH ||2-3-26 tvayi me hR^idayaM devi tvayi chittaM manastvayi | rakSha mAM sarvapApebhyaH prasAdaM kartumarhasi ||2-3-27 imaM yaH sustavaM divyamiti vyAsaprakalpitam | yaH paThetprAtarutthAya shuchiH prayatamAnasaH ||2-3-28 tribhirmAsaiH kA~NkShitaM cha phalaM vai saMprayachChasi | ShadbhirmAsairvariShThaM tu varamekaM prayachChasi ||2-3-29 architA tu tribhirmAsairdivyaM chakShuH prayachChasi | saMvatsareNa siddhiM tu yathAkAmaM prayachChasi ||2-3-30 satyaM brahma cha divyaM cha dvaipAyanavacho yathA | nR^iNAM bandhaM vadhaM ghoraM putranAshaM dhanakShayam ||2-3-31 vyAdhimR^ityubhayaM chaiva pUjitA shamayiShyasi | bhaviShyasi mahAbhAge varadA kAmarUpiNI ||2-3-32 mohayitvA cha taM kaMsamekA tvaM bhokShyase jagat | ahamapyAtmano vR^ittiM vidhAsye goShu gopavat | svavR^iddhyarthamahaM chaiva kariShye kaMsagopatAm ||2-3-33 evaM tAM sa samAdishya gato.antardhAnamIshvaraH | sA chApi taM namaskR^itya tathAstviti cha nishchitA ||1-3-34 yashchaitatpaThate stotraM shR^iNuyAdvApyabhIkShNashaH | sarvArthasiddhiM labhate naro nAstyatra saMshayaH ||2-3-35 iti shrimahAbhArate khileShu harivaMshe viShNuparvaNi svapnagarbhavidhAne AryAstutau tritIyo.adhyAyaH