##Harivamsha Maha Puranam - Part 1 - vishnu Parva - Chapter 4 - Vishnu's Incarnation Itranslated and proofread by K S Rmachandran ramachandran_ksr@yahoo.ca, February 27, 2008## Further proof-read by Gilles Schaufelberger schaufel @ wanadoo.fr If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha chaturtho.adhyAyaH vishnvavatAravarNanam vaishaMpAyana uvAcha kR^ite garbhavidhAne tu devakI devatopamA | jagrAha sapta tAngarbhAnyathAvatsamudAhR^itAn ||2-4-1 ShadgarbhAnnissR^itAnkaMsastA~njaghAna shilAtale | ApannaM saptamaM garbhaM sA ninAyAtha rohiNIm ||2-4-2 ardharAtre sthitaM garbhaM pAtayantI rajasvalA | nidrayA sahasAviShTA papAta dharaNItale ||2-4-3 sA svapnamiva taM dR^iShTvA sve garbhe garbhamAdadhat | apashyantI cha tam garbhaM muhUrtaM vyathitAbhavat ||2-4-4 tAmAha nidrA saMvignAM naishe tamasi rohiNIm | rohiNImiva somasya vasudevasya dhImataH ||2-4-5 karShaNenAsya garbhasya svagarbhe chAhitasya vai | saMkarShaNo nAma sutaH shubhe tava bhaviShyati ||2-4-6 sA taM putramavApyaivaM hR^iShTA ki~nchidavA~NmukhA | vivesha rohiNI veshma suprabhA rohiNI yathA ||2-4-7 tasya garbhasya mArgeNa garbhamAdhatta devakI | yadarthaM sapta te garbhAH kaMsena vinipAtitAH ||2-4-8 taM tu garbhaM prayatnena rarakShustasya mantriNaH | so.apyatra garbhavasatau vasatyAtmechChayA hariH ||2-4-9 yashodApi samAdhatta garbhaM tadahareva tu | viShNoH sharIrajAM nidrAM viShNunirdeshakAriNIm ||2-4-10 garbhakAle tvasaMpUrNe aShTame mAsi te striyau | devakI cha yashodA cha suShuvAte samaM tadA ||2-4-11 yAmeva rajanIM kR^iShNo jaj~ne vR^iShNikulodvahaH | tAmeva rajanIM kanyAM yashodApi vyajAyata ||2-4-12 nandagopasya bhAryaikA vasudevasya chAparA | tulyakAlaM cha garbhiNyau yashodA devakI tathA ||2-4-13 devakyajanayadviShNuM yashodA tAM tu dArikAm | muhUrte.abhijiti prApte sArdharAtre vibhUShite ||2-4-14 sAgarAH samakaMpanta chelushcha dharaNIdharAH | jajvalushchAgnayaH shAntA jAyamAne janArdane ||2-4-15 shivAshchapravavurvAtAH prashAntamabhavadrajaH | jyotIMShyativyakAshanta jAyamAne janArdane ||2-4-16 abhijinnAma nakShatraM jayantI nAma sharvarI | muhUrto vijayo nAma yatra jAto janArdanaH | avyaktaH shAshvataH sUkShmo harirnArAyaNaH prabhuH ||2-4-17 jAyamAno hi bhagavAnnayanairmohayanprabhuH | anAhatA dundubhayo devAnAM prANadandivi ||2-4-18 AkAshAtpuShpavR^iShTiM cha vavarSha tridasheshvaraH | gIrbhirma~NgalayuktAbhiH stuvanto madhusUdanam ||2-4-19 maharShayaH sagandharvA upatasthuH sahApsarAH | jAyamAne hR^iShIkeshe prahR^iShTamabhavajjagat ||2-4-20 indrashcha tridashaiH sArdhaM tuShTAva madhusUdanam | vasudevashcha taM rAtrau jAtaM putramadhokShajam ||2-4-21 shrIvatsalakShaNaM dR^iShTvA yutaM divyaishcha lakShaNaiH | uvAcha vasudevastu rUpaM saMhara vai prabho ||2-4-22 bhIto.aham deva kaMsasya tasmAdevaM bravImyaham | mama putrA hatAstena tava jyeShThAmbujekShaNa ||2-4-23 vaishampAyana uvAcha vasudevavachaH shrutvA rUpaM chAharadachyutaH | anuj~nApya pitR^itvena nanda gopagR^ihaM naya ||2-4-24 vasudevastu saMgR^ihya dArakaM kShiprameva cha | yashodAyA gR^ihaM rAtrau vivesha sutavatsalaH ||2-4-25 yashodAyAstvavij~nAtastatra nikShipya dArakam | pragR^ihya dArikAM chaiva devakIshayane.anyasat ||2-4-26 parivarte kR^ite tAbhyAM garbhAbhyAM bhayaviklavaH | vasudevaH kR^itArtho vai nirjagAma niveshanAt ||2-4-27 ugrasenasutAyAtha kamsAyAnakadundubhiH | nivedayAmAsa tadA tAM kanyAM varavarNinIm ||2-4-28 tachChrutvA tvaritaH kaMso rakShibhiH saha vegibhiH | AjagAma gR^ihadvAraM vasudevasya vIryavAn ||2-4-29 sa tatra tvaritaM dvAri kiM jAtamiti chAbravIt dIyatAM shIghramityevaM vAgbhiH samatarjayat ||2-4-30 tato hAhAkR^itAH sarvA devakIbhavane striyaH | uvAcha devakI dInA bAshpagadgadayA girA ||2-4-31 dArikA tu prajAteti kaMsaM samabhiyAchatI | shrImanto me hatAH sapta putragarbhAstvayA vibho ||2-4-32 dArikeyaM hataivaiShA pashyasva yadi manyase dR^iShTvA kaMsastu tAM kanyAmAkR^iShyata mudA yutaH ||2-4-33 hataivaiShA yadA kanyA jAtetyuktvA vR^ithAmatiH | sA garbhashayane kliShTA garbhAmbuklinnamUrdhajA ||2-4-34 kaMsasya purato nyastA pR^ithivyAM pR^ithivIsamA | sa chainAM gR^ihya puruShaH samAvidhyAvadhUya cha ||2-4-35 udyachChanneva sahasA shilAyAM samapothayat | sAvadhUtA shilApR^iShTe.aniShpiShTA divamutpatat ||2-4-36 hitvA garbhatanuM sA tu sahasA muktamUrdhajA | jagAma kaMsamAdishya divyasraganulepanA ||2-4-37 hArashobhitasarvA~NgI mukuTojjvalabhUShitA | kanyAiva sAbhavannityaM divyA devairabhiShTutA ||2-4-38 nIlapItAmbaradharA gajakumbhopamastanI | rathavistIrNajaghanA chandravaktrA chaturbhujA ||2-4-39 vidyudvispaShTavarNAbhA bAlArkasadR^ishekShaNA | payodharastanavatI saMdhyeva sapayodharA ||2-4-40 sA vai nishi tamograste babhau bhUtagaNAkule | nR^ityatI hasatI chaiva viparItena bhAsvatI ||2-4-41 vihAyasi gatA raudrA papau pAnamanuttamam | jahAsa cha mahAhAsaM kaMsaM cha ruShitAbravIt ||2-4-42 kaMsa kaMsAtmanAshAya yadahaM ghAtitA tvayA | sahasA cha samutkShipya shilAyAmabhipothitA ||2-4-43 tasmAttavAntakAle.ahaM kR^iShyamANasya shatruNA | pATayitvA karairdehamuShNaM pAsyAmi shoNitam ||2-4-44 evamuktvA vacho ghoraM sA yatheShTena vartmanA | svaM sA devAlayaM devI sagaNA vichachAra ha ||2-4-45 sA kanyA vavR^idhe tatra vR^iShNIsa~NghasupUjitA | putravatpAlyamAnA sA vasudevAj~nayA tadA ||2-4-46 viddhi chainAmathotpannAmamshAddevIM prajApateH | ekAnaMshAM yogakanyAM rakShArthaM keshavasya tu ||2-4-47 tAM vai sarve sumanasaH pUjayanti sma yAdavAH | devavaddivyavapuShA kR^iShNaH saMrakShito yayA ||2-4-48 tasyAM gatAyAM kaMsastu tAM mene mR^ityumAtmanaH | vivikte devakIM chaiva vrIDitaH samabhAShata ||2-4-49 kaMsa uvAcha mR^ityoH svasuH kR^ito yatnastava garbhA mayA hatAH | anya evAnyatA devi mama mR^ityurupasthitaH ||2-4-50 nairAshyena kR^ito yatnaH svajane prahR^itaM mayA | daivaM puruShakAreNa na chAtikrAntavAnaham ||2-4-51 tyaja garbhakR^itAM chintAM saMtApaM putrajaM tyaja | hetubhUtastvahaM teShAM sati kAlaviparyaye ||2-4-52 kAla eva nR^iNAM shatruH kAlashcha pariNAmakaH | kAlo nayati sarvaM vai hetubhUtastu madvidhaH ||2-4-53 AgamiShyanti vai devi yathAbhAgamupadravAH | idaM tu kaShTaM yajjantuH kartAhamiti manyate ||2-4-54 mA kArShIH putrajAM chintAM vilApaM shokajaM tyaja | evaMprAyo nR^iNAM yonirnAsti kAlasya saMsthitiH ||2-4-55 eSha te pAdayormUrdhnA putravattava devaki | madgatastyajyatAM roSho jAnAmyapakR^itaM tvayi ||2-4-56 ityuktavantaM kaMsaM sA devakI vAkyamabravIt | sAshrupUrNamukhA dInA bhartAramupavIkShatI | uttiShThottiShTha vatseti kaMsaM mAteva jalpatI ||2-4-57 devakyuvAcha mamAgrato hatA garbhA ye tvayA kAmarUpiNA | kAraNaM tvaM na vai putra kR^itAnto.apyatra kAraNam ||2-4-58 garbhakartanametanme sahanIyaM tvayA kR^itam | pAdayoH patatA mUrdhnA svaM cha karma jugupsatA ||2-4-59 garbhe tu niyato mR^ityurbAlye.api na nivartate | yuvApi mR^ityorvashagaH sthaviro mR^ita eva tu ||2-4-60 kAlabhUtamidaM sarvaM hetubhUtastu tadvidhaH | ajAte darshanaM nAsti yathA vAyustathaiva cha ||2-4-61 jAto.apyajAtatAM yAti vidhAtrA yatra nIyate | tadgachCha putra mA te bhUnmadgataM mR^ityukAraNam ||2-4-62 mR^ityunA.apahR^ite pUrvaM sheSho hetuH pravartate | vidhinA pUrvadR^iShTena prajAsargeNa tattvataH ||2-4-63 mAtApitrostu kAryeNa janmatastUpapadyate | vaishaMpAyana uvAcha nishamya devakIvAkyaM sa kaMsaH svaM niveshanam ||2-4-64 pravivesha sa saMrabdho dahyamAnena chetasA | kR^itye pratihate dIno jagAma vimanA bhR^isham ||2-4-65 iti shrImahAbhArate khileShu harivaMshe viShNuparvaNi shrIkR^iShNajanmani chaturtho.adhyAyaH