##Harivamsha Maha Puranam - Part 2 - Vishnu Parva
Chapter 95 -Pradyumna Addresses Bhanumati
itranslated by K S Ramachandran, ramachandran_ksr @ yahoo.ca,
January 9, 2009##
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
--------------------------------------------------------------
atha pa~nchanavatitamo.adhyAyaH
pradyumnabhAShaNam
vaishampAyana uvAcha
nabho nabhasye.atha nirIkShya mAsi
kAmastadA toyadavR^indakIrNam |
prabhAvatIM chAruvishAlanetrA-
muvAcha pUrNendunikAshavaktraH ||2-95-1
tavAnanAbho varagAtri chandro
na dR^ishyate sundari chArubimbaH |
tvatkeshapAshapratimairniruddho
balAhakaishchArunirantaroru ||2-95-2
saMdR^ishyate subhru taDiddhanasthA
tvaM hemachArvAbharaNnviteva |
mu~nchanti dhArAshcha ghanA nadanta-
stvaddhArayaShTeH sadR^ishA varA~Ngi ||2-95-3
ghanapradesheShu balAkapa~Nktaya-
stvaddantapa~NktipratimA vibhAnti |
nimagnapadmAni saritsu subhru
na bhAnti toyAni rayAkulAni ||2-95-4
amI ghanA vAyuvashopayAtA
balAkamAlAmalachArudantAH |
anyonyamabhyAhanituM pravR^ittA
vaneShu nAgA iva shukladantAH ||2-95-5
dhanustrivarNaM varagAtri pashya
kR^itaM tavApA~NgamivAnanastham |
vibhUShayantaM gamanaM ghanAshcha
praharShaNaM kAmijanasya kAnte ||2-95-6
ghanAnnadantaH pratinardamAnA-
nnirIkShya sushroNi shikhInprahR^IShTAn |
samAhR^itAnuddhatapichChabhArA-
npriyAbhirAmAnupanR^ityamAnAn ||2-95-7
harmyeShu chAnye shashipANDureShu
rAjanti sushroNi mayUrasa~NghAH |
muhUrtashobhAmatichArurUpAM
dattvA patanto valabhIpuTeShu ||2-95-8
praklinnapakShAstarumastakeShu
muhUrtachUDAmaNitAM vidhAya |
prayAnti bhUmiM navashAdvalAnA-
mAsha~NkamAnA dhR^itachArudehAH ||2-95-9
pravAti dhArAntaraniHsR^itashcha
sukho.anilashchandanapa~NkashItaH |
kadambasarjArjunapuShpabhUtaM
samAvahangandhamana~Ngabandhum || 2-95-10
ratishramasvedavinAshahetu-
rnavodabhArAnayane cha hetuH |
na mArutaH syAdyadi chArugAtri
na meghakAlo mama vallabhaH syAt ||2-95-11
evaMvidheShu priyasa~NgameShu
ratAvasAne yadupaiti vAyuH |
ratishramasvedaharaH sugandhI
tataH paraM kiM sukhamasti loke ||2-95-12
jalAplutAnIkShya mahAnadInAM
sugAtri haMsAH pulinAni hR^iShTAH |
gatAH shramaM mAnasavAsalubdhAH
sasArasAH krau~nchaguNAnuvidddhAH ||2-95-13
na bhAnti nadyo na sarAMsi chaiva
hatatviShIvAyatachArunetre |
gateShu haMseShvatha sAraseShu
rathA~NgatulyAhvayaneShu chaiva ||2-95-14
bhogaikadeshena shubhaM shayAnaM
dhruvaM jagannAthamupendramIsham |
nidrAbhyupetA varakAlatajj~nA
shriyaM pragamyottarachArurUpAm ||2-95-15
nidrAyamANe bhagavatyupendre
meghAmbarAkrAntanishAkaro.adya |
padmAmalAbhaH kamalAyatAkShi
kR^iShNasya vaktrAnukR^itiM karoti ||2-95-16
kadambanIpArjunaketakAnAM
srajo dhruvaM kR^iShNamupAnayanti |
puShpANi chAnyAnyR^itavaH samastAH
kR^iShNAtpramAdAnabhikA~NkShamANAH ||2-95-17
nAgAshcharanto viShadigdhavaktrAH
spR^ishanti puShpANyapi pAdapAnyAn |
pepIyamAnAnbhramarairjanAnAM
kautUhalaM te janayantyatIva || 2-95-18
toyAtibhArAmbudavR^indanaddhaM
nabhaH patiShyantamivAbhivIkShya |
nipAnagaMbhIramabhinnavR^iShTaM
manoharaM chArumukhastanoru ||2-95-19
balAkamAlAkulamAlyadAmnA
nirIkSha ramyaM ghanavR^indametat |
sasyAni bhUmAvabhivarShamANaM
jagaddhitArthaM vimalA~NgayaShTe || 2-95-20
. jalAvalambAmbudavR^indakarShIM
ghanairghanAnyodhayatIva vAyuH |
pravR^ittachakro nR^ipatirvanasthA-
ngajAnjgajaiH svairiva vIryadR^iptAn ||2-95-21
abhaumamambho visR^ijanti meghAH
pUtaM pavitraM pavanaiH sugandhi |
harShAvahaM chAtakabarhiNAnAM
varANDajAnAM jaladapriyANAm ||2-95-22
plava~NgamaH ShoDashapakShashAyI
virauti goShThaH saha kAminIbhiH |
R^icho dvijAtiH priyasatyadharmA
yathA sushiShyaiH parivAryamANaH ||2-95-23
guNe mAhAMstoyadakAlajo.aya-
mabuddhameghasvanabhIShitAnAm |
pariShvajantaH parivarddhayanti
vinApi shayyAsamayaM priyANAm || 2-95-24
doSho.ayamekaH salilAgamasya
mAM pratyudArAnvayavarNashIle |
na dR^ishyate yattava vaktratulyo
ghanagrahagrastatanuH shashA~NkaH ||2-95-25
pradR^ishyate bhIru yadA shashA~Nko
ghanAntarastho jagataH pradIpaH |
tadAnupashyanti janAH prahR^iShTA
bandhuM pravAsAdiva sannivR^ittam ||2-95-26
vilApasAkShI priyahInitAnAM
saMdR^ishyate bhIru yadA shashA~NkaH |
netrotsavaH proShitakAmukAnAM
dR^iShTvaiva kAntaM bhavatItyavaimi ||2-95-27
netrotsavaH kAntasamAgatAnAM
dAvAgnitulyaH priyahInitAnAm |
tenaiva dehena varA~NganAnAM
chandro.api tAvatpriyavipriyashcha ||2-95-28
vinApi chandreNa pure pituste
yataH prabhA chandragabhastigaurI |
guNAguNAMshchandramaso na vedmi
yatastato.ahaM prashashaMsayiShye ||2-95-29
avApa yo brAhmaNarAjyamIDyo
durApamanyaiH sukR^itaistapobhiH |
gAyanti viprAH pavamAnasaMj~naM
samAgatAH parvaNi chApyudAram ||2-95-30
pitA budhasyottaravIryakarmA
purUravA yasya suto nR^idevaH |
prANAgnirIDyo.agnimajIjanadyo
naShTaM shamIgarbhabhavaM bhavAtmA ||2-95-31
tathaiva pashchAchchakame mahAtmA
purorvashImapsarasAM variShThAm |
pItaH purA yo.amR^itasarvadeho
munipravIrairvaragAtri ghoraiH ||2-95-32
nR^ipaH kushAgraiH punareva yashcha
dhImAnato.agnirdivi pUjyate cha |
Ayushcha vaMshe nahuShashcha yasya
yo devarAjatvamavApa viraH ||2-95-33
devAtidevo bhagavAnprasUtau
vaMshe hariryatra jagatpraNetA |
bhaimaH pravIraH surakAryaheto-
ryaH subhru dakShasya vR^itaH sutAbhiH ||2-95-34
babhUva rAjAtha vasushcha yasya
vamshe mahAtmA shashivaMshadIpaH |
yashchakravartitvamavApa vIraH
svaiH karmabhiH shakrasamaprabhAvaH ||2-95-35
yadushcha rAjA shashivaMshamukhyo
yo.avApa mahyAmadhirAjabhAvam |
bhojAH kule yasya narAdhipasya
vIrAH prasUtAH surarAjatulyAH ||2-95-36
na kUTakR^idyasya nR^ipo.asti vaMshe
na nAstiko naiShkR^itiko.api vAtha |
ashraddadhAno.apyathavA kadaryaH
shauryeNa vA vAriruhAkShi hInaH ||2-95-37
vaMshe vadhUstvaM kamalAyatAkShi
shlAghyA guNAnAmatipAtrabhUtA |
kuru praNAmaM shikharAgradanti
tasya tvamIshasya satAM priyasya ||2-95-38
nArAyaNAyAtmabhavAyanAya
lokAyanAya tridashAyanAya |
khagendraketoH puruShottamAya
kuru praNAmaM shvashurAya devi ||2-95-39
iti shrImahAbhArate khileShu harivaMshe viShNuparvaNi
pradyumnabhAShaNe pa~nchanavatitamo.adhyAyaH