##Harivamsha Maha Puranam - Part 3 - Bhavishya Parva Chapter 37 Nomination of Local Heads Itranslated by G. Schaufelberger schaufel @ wanadoo.fr October 15, 2008## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha saptatriMsho.adhyAyaH lokAnAmAdhipatyavyavasthApanam vaishampAyana uvAcha trayAnAmapi lokAnAmAdityAnAM cha bhArata | chakAra shakraM rAjAnamAdityasamatejasam ||3-37-1 sa vajrI kavachI viShNuradityAmabhijaj~nivAn | smR^iteH sahAyo dyutimAnyathA so.adhvaryubhiH stutaH ||3-37-2 jAtamAtro.atha bhagavAntsa kushairbrAhmaNairdhR^itaH | tadAprabhR^iti deveshaH kaushikatvamupAgataH ||3-37-3 abhiShichyAdhirAjye tu sahasrAkShaM puraMdaram | brahmA krameNa rAjyAni vyAdeShTumupachakrame ||3-37-4 yaj~nAnAM tapasAM chaiva grahanakShatrayostathA | dvijAnAmauShadhInAM tu somaM rAjye.abhyaShechayat ||3-37-5 dakShaM prajApatInAM tu ambhasAM varuNaM patim | pitR^INAM sarvanidhanaM kAlaM vaishvAnaraM prabhum ||3-37-6 gandhAnAM chaiva sarveShAM bhUtAnAM cha sharIriNAm | shabdAkAshabalAnAM cha vAyurIshastadA kR^itaH ||3-37-7 sarvabhUtapishAchAnAM mR^ityUnAM cha gavAM tathA | utpAtagraharogANAM vyAdhInAM tu tathaiva cha ||3-37-8 vratAnAM chaiva sarveShAM mahAdevaH kR^itaH prabhuH | yakShANAM rAkShasAnAM cha guhyakAnAM dhanasya cha ||3-37-9 ratnAnAM chaiva sarveShAM kR^ito vaishravaNaH prabhuH | sarveShAM daMShTriNAM sheSho nAgAnAmathA vasukiH ||3-37-10 sarIsR^ipANAM sarveShAM prabhurvai takShakaH kR^itaH | sAgarANAM nadInAM cha meghAnAM varShaNasya cha | AdityAnAmavarajaH parjanyo.adhipatiH kR^itaH ||3-37-11 gandharvANAmadhipatistathA chitrarathaH kR^itaH | sarvApsarogaNAnAM cha kAmadevaH prabhuH kR^itaH ||3-37-12 chatuShpadAnAM sarveShAM vAhanAnAM cha sarvashaH | maheshvaradhvajaH shrImAngovR^iSho.adhipatiH kR^itaH ||3-37-13 daityAnAM cha mahAtejA hiraNyAkShaH prabhuH kR^itaH | hiraNyakashipushchaiva yauvarAjye.abhiShechitaH ||3-37-14 gaNAnAM kAlakeyAnAM mahAkAlaH prabhuH kR^itaH | anAyuShAyAH putrANAM vR^itro rAjA tadA kR^itaH ||3-37-15 siMhikAtanayo yastu rAhurnAma mahAsuraH | utpAtAnAmanekAnAmashubhAnAM prabhuH kR^itaH ||3-37-16 R^itUnAmathA sarveShAM yugAnAM chaiva bhArata | pakShANAM chaiva mAsAnAM tathaiva tithiparvANAm ||3-37-17 kalAkAShThAmuhUrtAnAM gaterayanayostathA | kR^itaH saMvatsaro rAjA yogasya gaNitasya cha ||3-37-18 pAkShiNAM chaiva sarveShAM chakShuShAM cha mahAbalaH | suparNo bhoginAM chaiva garuDo.adhipatiH kR^itaH ||3-37-19 aruNo garuDabhrAtA japApuShpachayaprabhaH | yogAnAM chaiva sarveShAM sAdhyAnAmadhipaH kR^itaH ||3-37-20 putro.asya viratho nama kashyapasya prajApateH | rAjA prAchyAM dishi tathA vAsavenAdhipaH kR^itaH ||3-37-21 Adityasya vibhoH putro dharmarAjo mahAyashAH | dakShiNasyAM dishi yamo mahendreNaiva satkR^itaH ||3-37-22 kashyapasyaurasaH putra salilAntargataH sadA | amburAjya iti khyAtaH pratIchyAM dishi pArthivaH ||3-37-23 pulastyaputro dyutimAnmahendrapratimaH prabhuH | ekAkShaH pi~Ngalo nAma saumyAyAM dishi pArthivaH ||3-37-24 evaM vibhajya rAjyAni svayaMbhUrlokabhAvanaH | lokAMshcha tridive divyAnadadatsa pR^ithakpR^ithak ||3-37-25 kasyachitsUryasaMkAshAnkasyachidvahnisannibhAn | kasyachitsuShThu vidyotAnkasyachichchandranirmalAn ||3-37-26 nAnAvarNAnkAmagamAnanekashatasho janAn | sa tAnsukR^itinAM lokAnpApaduShkR^itidurlabhAn ||3-37-27 yeShAM bhAso vibhAntyagre saumyAstArAgaNA iva | ete sukR^itinAM lokA ye jatAH puNyakarmiNaH ||3-37-28 ye yajanti makhaiH puNyaiH samAptavaradakShiNaiH | svadAraniratAH shAntA R^ijavaH satyavAdinaH ||3-37-29 dInAnugrahakartAro brahmaNyA lobhavarjitAH | saMtyaktarajasaH santo yAnti tatra tapo.amalAH ||3-37-30 evaM niyujya tanayAntsvayaM lokapitAmahaH | puShkaraM brahmasadanamAruroha prajApatiH ||3-37-31 sarve svayaMbhudatteShu pAlaneShu divaukasaH | remire sveShu lokeShu mahendreNAbhipAlitAH ||3-37-32 svayaMbhuvA shakrapuraHsarAH surAH kR^itA yathArhaM pratipAlaneShu te | yasho divaM cha pratipedire shubhaM mudaM cha jagmurmakhabhAgabhojinaH ||3-37-33 iti shrImahAbhArate khileShu harivaMshe bhaviShyaparvaNi vArAhe.adhipatisthApane saptatriMsho.adhyAyaH