##Harivamsha Maha Puranam - Part 3 - Bhavishya Parva Chapter 65 Goddess of Wealth and Others Come over to Bali Itranslated by G. Schaufelberger schaufel @ wanadoo.fr December 8, 2008## Proof-read by K S Rmachandran, ramachandran_ksr @ yahoo.ca. 65-6: dharme adharme should be dharme.adharme, but the verse would not be regular. atha pa~nchaShaShTitamo.adhyAyaH balervijaye shriyaH svayamAgamanakathanam vaishampAyana uvAcha niShprayatneShu deveShu trailokye daityapAlite | jaye balerbalavato mayashambarayostathA ||3-65-1 sudhAsu dikShu sarvAsu pravR^itte dharmakarmaNi | apavR^itte chandramasi ayanasthe divAkare ||3-65-2 prahrAdashambaramayairanuhrAdena chaiva hi | dikShu sarvAsu guptAsu gagane daityapAlite ||3-65-3 daityeShu makhashobhAshcha svargArthaM darshayatsu cha | prakR^itisthe tadA loke vartamAne cha satpathe ||3-65-4 abhAve sarvapApAnAM bhAve chaiva tathA sthite | bhAve tapasi siddhAnAM sarvatrAshramarakShiShu ||3-65-5 chatuShpAde sthite dharme adharme pAdavigrahe | prajApAlanayukteShu bhrAjamAneShu rAjasu ||3-65-6 svadharmasaMprayukteShu sarvAshramanivAsiShu | abhiShikto.asuraiH sarvairdaityarAjo balistadA ||3-65-7 hR^iShTeShvasurasa~NgheShu nadatsu muditeShu cha | athAbhyupagatA lakShmIrbAliM padmAsane sthitA ||3-65-8 padmodyatakarA devI varadA suramohinI | shrIruvAcha bale balavatAM shreShTha mahArAja mahAdyute ||3-65-9 prItAsmi tava bhadraM te devatAnAM parAjaye | yastvayA yudhi vikramya devarAjaH parAjitaH ||3-65-10 dR^iShTvA te paramaM sattvaM tato.ahaM svayamAgatA | nAscharyaM dAnavashreShTha hiraNyakashipoH kule ||3-65-11 prasUtasyAsurendrasya tava karmedamIdR^isham | visheShatastvayA rAjandaityendraH prapitAmahaH ||3-65-12 yena bhuktaM hi nikhilaM trailokyamidamavyayam | visheShatastava vibho sarve dharmapathe sthitAH ||3-65-13 tena trailokyamukhyena bhokShyasyamitavikrama | evamuktvA hi sA devI lakShmIrdaityapatiM balim ||3-65-14 praviShThA varadA saumyA sarvabhUtamanoramA | shiShTAshcha devyaH pravarA hrIH kIrtirdyutireva cha||3-65-15 prabhA dhR^itiH kShamA bhUtirnItirvidyA dayA smR^itiH | kR^itirlajjA tathA medhA lakShmIrIhA gatistathA ||3-65-16 shrutiH prItirilA kIrtiH shAntiH puShTiH kriyAstathA | sarvAshchApsaraso divyA nR^ityagItavishAradAH ||3-65-17 patIM prAptAH sudaiteyaM trailokye sacharAchare | prAptamaishvaryamamitaM balinA brahmavAdinA ||3-65-18 iti shrImahAbhArate khileShu harivaMshe bhaviShyaparvaNi vAmanaprAdurbhAve pa~nchaShaShTitamo.adhyAyaH