##Harivamsha Maha Puranam - Part 1 - Harivamsha Parva Chapter 55 - Brahma's Suggestion Itranslated and proofread by K S Ramachandran ramachandran_ksr@yahoo.ca, February 6, 2008## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com ------------------------------------------------------------------------ atha pa~nchapa~nchAshattamo.adhyAyaH brahmavAkyam vaishaMpAyana uvAcha nAradasya vachaH shrutvA sasmitaM madhusUdanaH | pratyuvAcha shubhaM vAkyaM vareNyaH prabhurIshvaraH ||1-55-1 trailokyasya hitArthAya yanmAM vadasi nArada | tasya saMyakpravR^ittasya shrUyatAmuttaraM vachaH ||1-55-2 viditA dehino jAtA mayaite bhuvi dAnavAH | yAM cha yastanumAdAya daityaH puShyati vigraham ||1-55-3 jAnAmi kaMsaM saMbhUtamugrasenasutaM bhuvi | keshinaM chApi jAnAmi daityaM turagavigraham ||1-55-4 nAgaM kuvalayApIDaM mallau chANUramuShTikau | ariShTaM chApi jAnAmi daityaM vR^iShabharUpiNam ||1-55-5 vidito me kharashchaiva pralambashcha mahAsuraH | sA cha me viditA vipra pUtanA duhitA baleH ||1-55-6 kAliyaM chApi jAnAmi yamunAhradagocharam | vainateyabhayAdyastu yamunAhradamAvishat ||1-55-7 vidito me jarAsandhaH sthito mUrdhni mahIkShitAm | prAgjyotiShapure vApi narakaM sAdhu tarkaye ||1-55-8 mAnuShe pArthive loke mAnuShatvamupAgatam | bANam cha shoNitapure guhapratimatejasam ||1-55-9 dR^iptaM bAhusahasreNa devairapi sudurjayam | mayyAsaktAM cha jAnAmi bhAratIM mahatIM dhuram ||1-55-10 sarvaM tachcha vijAnAmi yathA yAsyanti te nR^ipAH | kShayo bhuvi mayA dR^iShTaH shakraloke cha satkriyA | eShAM puruShadehAnAmaparAvR^ittadehinAm ||1-55-11 saMpravekShyAmyahaM yogamAtmanashcha parasya cha | saMprApya pArthivaM lokaM mAnuShatvamupAgataH ||1-55-12 kamsAdIMshchApi tatsarvAnvadhiShyAmi mahAsurAn | tena tena vidhAnena yena yaH shAntimeShyati ||1-55-13 anupravishya yogena tAstA hi gatayo mayA | amIShAM hi surendrANAM hantavyA ripavo yudhi ||1-55-14 jagatyarthe kR^ito yo.ayamaMshotsargo divaukasaiH | suradevarShigandharvairitashchAnumate mama ||1-55-15 vinishchayo hi prAgeva nAradAyaM kR^ito mayA | nivAsaM nanu me brahmanvidadhAtu pitAmahaH ||1-55-16 yatra deshe yathA jAto yena veSheNa vA vasan | tAnahaM samare hanyAM tanme brUhi pitAmaha ||1-55-17 brahmovAcha nArAyaNemaM siddhArthamupAyaM shR^iNu me vibho | bhuvi yaste janayitA jananI cha bhaviShyati ||1-55-18 yatra tvaM cha mahAbAho jAtaH kulakaro bhuvi | yAdavAnAM mahadvaMshamakhilaM dhArayiShyasi ||1-55-19 tAMshchAsurAnsamutpATya vaMshaM kR^itvAtmano mahat | sthApayiShyasi maryAdAM nR^iNAM tanme nishAmaya ||1-55-20 purA hi kashyapo viShNo varuNasya mahAtmanaH | jahAra yaj~niyA gA vai payodAstu mahAmakhe ||1-55-21 aditiH surabhishchaite dve bhArye kashyapasya tu | pradIyamAnA gAstAstu naichChatAM varuNasya vai ||1-55-22 tato mAM varuNo.abhyetya praNamya shirasA tataH | uvAcha bhagavangAvo guruNA me hR^itA iti ||1-55-23 kR^itakAryo hi gAstAstu nAnujAnAti me guruH | anvavartata bhArye dve aditiM surabhiM tathA||1-55-24 mama tA hyakshaya gavo divyAH kAmaduhaH prabho | charanti sagarNnsarvAnrakShitAH svena tejasA ||1-55-25 kastA dharShayituM shakto mama gAH kashyapAdR^ite | akShayaM yA kSharantyagryam payo devAmR^itopamam ||1-55-26 prabhurvA vyutthito brahmangururvA yadi vetaraH | tvayA niyamyAH sarve vai tvaM hi naH paramA gatiH ||1-55-27 yadi prabhavatAM daNDo loke kAryamajAnatAm | na vidyate lokagurorna syurvai lokasetavaH ||1-55-28 yathA vAstu tathA vAstu kartavye bhagavanprabhuH | mama gAvaH pradIyantAM tato gantAsmi sAgaram ||1-55-29 yA AtmadevatA gAvo yA gAvaH sattvamavyayam | lokAnAM tvatpravR^ittAnAmekaM gobrAhmaNaM smR^itam ||1-55-30 trAtavyAH prathamaM gAvastrAtAstrAyanti tA dvijAn | gobrAhmaNaparitrANe paritrAtaM jagadbhavet ||1-55-31 ityambupatinA prokto varuNenAhamachyuta | gavAM karaNatattvaj~naH kashyape shApamutsR^ijam ||1-55-32 yenAMshena hR^itA gAvaH kashyapena maharShiNA | sa tenAMshena jagati gatvA gopatvameShyati ||1-55-33 yA cha sA surabhirnAma aditishcha surAraNiH | te.apyubhe tasya bhArye vai tenaiva saha yAsyataH ||1-55-34 tAbhyAM cha saha gopatve kashyapo bhuvi raMsyate | sa tasya kashyapasyAMshastejasA kashyapopamaH ||1-55-35 vasudeva iti khyAto goShu tiShThati bhUtale | girirgovardhano nAma mathurAyAstvadUrataH ||1-55-36 tatrAsau goShu nirataH kaMsasya karadAyakaH | tasya bhAryAdvayaM jAtamaditiH surabhishcha te ||1-55-37 devakI rohiNI cheme vasudevasya dhImataH | surabhI rohiNI devI chAditirdevakI tvabhUt ||1-55-38 tatra tvaM shishurevAdau gopAlakR^italakShaNaH | vardhyasva mahAbAho purA traivikrame yathA ||1-55-39 ChAdayitvAtmanAtmAnaM mAyayA yogarUpayA | tatrAvatara lokAnAM bhavAya madhusUdana ||1-55-40 jayAshIrvachanaistvaite vardhayanti divaukasaH || 1-55-41 AtmAnamAtmanA hi tvamavatArya mahItale | devakIM rohiNIM chaiva garbhAbhyAM paritoShaya | gopakanyAsahasrANi ramayaMshchara medinIm ||1-55-42 gAshcha te rakShato viShNo vanAni paridhAvataH | vanamAlAparikShiptaM dhanyA drakShyanti te vapuH ||1-55-43 viShNau padmapalAshAkShe gopAlavasatiM gate | bAle tvayi mahAbAho loko bAlatvameShyati ||1-55-44 tvadbhaktAH puNDarIkAkSha tava chittavashAnugAH | goShu gopA bhaviShyanti sahAyAH satataM tava | vane chArayato gAshcha goShTheShu paridhAvataH ||1-55-45 majjato yamunAyAM cha ratiM prApsyanti te tvayi | jIvitam vasudevasya bhaviShyati sujIvitam ||1-55-46 yastvayA tAta ityuktaH sa putra iti vakShyati | atha vA kasya putratvaM gachChethAH kashyapAdR^ite ||1-55-47 kA cha dhArayituM shaktA tvaM viShNo aditiM vinA | yogenAtmasamutthena gachCha tvaM vijayAya vai | vayamapyAlayAnsvAnsvAngachChAmo madhusUdana ||1-55-48 vaishaMpAyana uvAcha sa devAnabhyanuj~nAya vivikte tridivAlaye | jagAma viShNuH svaM deshaM kShIrodasyottarAM disham ||1-55-49 tatra vai pArvatI nAma guhA meroH sudurgamA | tribhistasyaiva vikrAntairnityaM parvasu pUjitA ||1-55-50 purANaM tatra vinyasya dehaM harirudAradhIH | AtmAnaM yojayAmAsa vasudevagR^ihe prabhuH ||1-55-51 iti shrImahAbhArate khileShu harivaMshe harivaMshaparvaNi pitAmahavAkye pa~nchapa~nchAshattamo.adhyAyaH harivamshe harivaMshaparva samAptam