Harivamsha, volume II, Appendix II, BORI, 1971 shrIgaNeshAya namaH hari OM sheShadharmaprakaraNam - 13 itranslated by A. Purushothaman, purushothaman_avaroth @yahoo.com dAnaprashaMsA vaishaMpAyana uvAcha kR^ipAM vij~nAya devasya dharmarAjo mahAmatiH l punarevAparaM dharmaM paprachcha dvijasaMsadi ll 13-1 yudhiShThira uvAcha yaj~namUrte sahasrAkSha dharmamUrte namo.astu te l pUjAbhiShekakarmANi kathayasva mamAnagha ll 13-2 shrIbhagavAnuvAcha shR^iNu pArtha pravakShyAmi puNyakAlam cha pUjanam l pUjAdravyaM cha dharmaM cha brAhmaNAnAM prapUjanam ll 13-3 dvAdashyAM paurNamAsyAM cha ekAdashyAM nR^ipottama l somasUryoparAge cha saMkrAntAvayane shubhe l siddhayoge puNyadine vyatIpAte cha vaighR^itau ll 13-4 puNyakShetre puNyakAle puNyarkShe pANDunandana ll 13-5 shanyashvinyAM budhAshvinyAM mAghamAse nR^ipAtmaja l vastrapUtena payasA tathA pa~nchAmR^itena cha l puShpagandhodakaishchaiva yaH snApayati keshavam ll 13-6 naivedyairvividhAkArairbhakShyamukhyairnR^ipottama l yaH pUjayati mAM pArtha shUlapANimathApi vA ll 13-7 mAtR^itaH pitR^itashchaiva priyAyA vaMshajAnapi l sarvAnvaMshAnsamuddhR^itya devagandharvasevitaH ll 13-8 taptakA~nchanasaMvItairnAnAmaNivirAjitaiH l ki~NkiNIjAlasaMyuktairyAnairhaMsaniyantritaiH ll 13-9 apasrogaNasaMkIrNairvimAnairupashobhitaH l yAmyAdiShu cha lokeShu bhuktvA bhogAnyathechChayA l mama lokamanuprApya tatraiva parimuchyate ll 13-10 shaMkaraM mAm cha sarveshaM bhedabuddhivivarjitaH l yaH pUjayetsadA bhaktyA kA~NkShitaM lokameShyati ll 13-11 ketakIkaravIrAbjachampakAjAtimallikAH l amUni ye prayachChanti puShpANi surabhINi me ll 13-12 tAM pUjAM pratigR^ihNAti rudro vai lokashAsanaH l pAlako.ahaM cha rAjendra hyAvayorantaraM na cha l pUjayasva cha mAM pArtha tatra tvaM sukhameShyasi ll 13-13 tilatailAnvitaM dIpaM mama rudrasya bhArata l dattvA naraH sarvakAmAnsaMprApnoti na saMshayaH ll 13-14 ghR^itadIpaM tu yo dadyAnmahAdevasya saMnidhau l sa muktaH sarvapApebhyaH sarvayaj~naphalaM labhet ll 13-15 yadyadiShTatamaM bhojyaM tattadIshAya dApayet l sarvapApavinirmukto mama lokaM sa gachChati ll 13-16 kArttike mAsi mAghe cha dIpaM mama gR^ihe sadA l vartayasva cha kaunteya brAhmaNAnbhojayasva ha l bhojite brAhmaNe bhR^iShTaM mama tR^iptirbhaveddhruvam ll 13-17 yadyadiShTatamaM bhojyaM tattadviprAya dApayet l sa yAti brahmabhavanaM sarvamohavivarjitam ll 13-18 brUNahApyannadAnena shuddho bhavti bhUpate l nAnnatoyasamaM dAnaM triShu lokeShu vidyate ll 13-19 mahApAtakayukto vA yukto vA sarvapAtakaiH l shR^iNushva chitraM bhUpAla shuddhyatyannajalapradaH ll 13-20 sharIramannajaM prAhuH prANamannaM prachakShate l tasmAdannaprado j~neyaH prANado nAtra saMshayaH ll 13-21 annadasya kule jAtA AsahasraM nR^ipottama l narakaM te na pashyanti tasmAdannaprado varaH ll 13-22 pathi shrAntaM dvijaM dR^iShTvA yastu bhaktyA prapUjayet l sarvadevagaNAH pUrvamannaM datvA tu dharmaja l annadAnena matimAnbrahmalokaM sa gachChati ll 13-23 AyAnmama tithiM rAjansarvadevA anuvratAH l tasmiMstuShTe jagattuShTaM devAstR^ipyanti dharmaja ll 13-24 divaM prapedire muktAstasmAdannaprado varaH l nAstivAkyaM sa kR^itvA yo brAhmaNe gR^ihamAgate l tasya pApaM mahAghoraM rauravaM narakaM bhavet ll 13-25 annaM dadAti yo rAjansa sarvAnkR^itavAnmakhAn l pashurAjyadhanApatyasvargamokShA.NllabhennaraH l annadAnena kaunteya tasmAdannaprado varaH ll 13-26 viprarUpeNa bhoktAhaM viprarUpeNa pUjitaH l dadAmi viprarUpeNa sarvAnkAmAnnR^ipottama ll 13-27 pAdAbhya~NgaM bhaktiyukto brAhmaNAnAM karoti yaH l sa snAtaH sarvatIrtheShu ga~NgAsnAnapuraHsaram ll 13-28 tailAbhya~NgaM mahArAja brAhmaNanAM karoti yaH l sa snAto.abdashataM sAgraM ga~NgAyAM nAtra saMshayaH ll 13-29 uShNodakena yo rAjanbrAhmaNAnsnApayennaraH l sa koTikulasaMyukto vasedbrahmapure naraH ll 13-30 karmaNA manasA vAchA yo rakShedAmayAnvitam l sa yAti vajriNo lokaM punarAvR^ittivarjitam ll 13-31 yo dadAti mahIpAla nivAsaM brAhmaNAya cha l dine dine.ashvamedhasya phalaM prApnoti puShkalam ll 13-32 anyebhyaH prAtigR^ihyApi svAM gAmapi payasvinIm l yo dadAti cha viprAya sa yAti brahmaNaH padam ll 13-33 kapilAM vedaviduShe yo dadAti payasvinIm l sa eva rudro bhUpAla sarvadevaprapUjitaH ll 13-34 viprAya brahmaviduShe dadyAdubhayatomukhIm l tasyaiva vaMshajAH sarve mama loke vasanti hi ll 13-35 yo mR^ityukAle saMprApte gAM dadAti payasvinIm l gavAM darshitamArgeNa brahmalokaM sa gachChati ll 13-36 vyAdhinA pIDito yastu grahanakShatrapIDayA l apamR^ityuM cha tAnsarvAnsa tirtvA sukhamashnute ll 13-37 apatyadhanaratnAni rAjyAni vividhAni cha l godAnAtprApyate martyo niShpApashcha divaM vrajet ll 13-38 tasmAtsarvaprayatnena godAnaM kuru bhUpate l anena te bhavedvR^iddhiH svargamokShau cha suvrata ll 13-39 variShTaH sarvalokAnAm gopradAtA nR^ipottama l matpriyo mama bhaktashcha pUjyo lokeShu vishrutaH ll 13-40 sadA dAneShu niShThasya sadA shAstrAnuvAdinaH l priyaMvadasya sAdhoshcha k^RipA mama sadA bhavet ll 13-41 sarvalokaprabhuM vIraM sarvadhAtAramachyutam l yogIshvaraM sadAnandaM viddhi mAM bharatarShabha ll 13-42 sraShTAraM sarvabhUtAnAM rakShitAraM jagattrayam l samsArottAraNaM devaM viddhi mAM bharatarShabha ll 13-43 dharmadaM dharmashIlAnAM tApasAnAM tapaHphalam l dhyAtR^INAM dhyAnayogaM mAM viddhi tvaM dharmanandana ll 13-44 mayA proktamimaM dharmaM yaH shR^iNoti madAshrayaH l dadAmi tasya vai svargaM yAvadAchandratArakam ll December 21, 2008