Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam - 25 bhAgIrathyAdimahimAvarNanam shrIbhagavAnuvAcha tIrthAnAmuttamaM tIrthaM kShetrANAM cha tathottamam | ga~NgAyamunayoryogaM vadanti paramarShayaH || 25-1 sitAsitodakaM tIrtham brahmAdyAH sarvadevatAH | munayo mAnavAshchaiva sevante puNyakA~NkShiNaH || 25-2 ga~NgA puNyanadI j~neyA traivikramapadodbhavA | pApahA yamunA proktA tayoryogamanuttamam || 25-3 smR^itArtinAshinI ga~NgA nadInAM pravarA shubhAH | sarvapApakShayakarI sarvopadravanAshinI || 25-4 yAni kShetrANi puNyAni samudrAnte mahItale | teShAM puNyatamaM j~neyaM prayAgAkhyaM mahItale || 25-5 ga~Nge ga~Ngeti yo brUyAdyojanAyutadUrataH | muchyate sarvapApebhyo ga~NgAsnAnaphalaM labhet || 25-6 mama padodbhavA devI vishveshvarasamIpagA | saMsevyAH sarvadA devaiH saMsArachChedalipsubhiH || 25-7 tatsaikataM lalATe tu dhrIyate yena pANDava | tatraiva netraM shirasi vidhorardhaM cha dhArayet || 25-8 yanmajjanaM mahApuNyaM durllabhaM hyakR^itAtmanAM | sAdhUnAM sulabhA ga~NgA prItA mokShapradAyinI || 25-9 yatra snAtAH pApino.api pitR^imAtR^ikulAni cha | sahasrANi samudhR^itya prayAnti mama mandiram || 25-10 sa snAta sarvatIrtheShu ga~NgAM smarati yaH sadA | puNyakShetreShu sarveShu sthitavAnnAtra saMshayaH | yojanatritayaM gatvA ga~NgAyAmiti gachChati || 25-11 yatra snAtaM naraM dR^iShtvA narAH pApavR^itA api | muchyante sarvapApebhyo nAtra kAryA vichAraNA || 25-12 yadambhaHsparshamAtreNa sarvapApavimochitaH | yanmR^idaM mastake dhR^itvA devesho bhavati dhrUvam || 25-13 deho.anulepanaM kR^itvA dehabandho na jAyate || 25-14 kadA yAsyAmyahaM ga~NgAM kadA yAsyAmi tAmaham | anutapyati yo nityaM sa viShNurnAtra saMshayaH || 25-15 yojanatritayaM yastu ga~NgAyAmiti gachChati | sarvapApavinirmukto ga~NgAsnAnaphalaM bhavet || 25-16 seyaM ga~NgA mahApuNyA nadIranyAH pravishya vai | meShAdiShu cha mAseShu pAvayatyakhilaM jagat || 25-17 godAvarI bhImarathI kR^iShNA revA sarasvatI | tu~NgabhadrA cha kAverI kAlindI sarayUrnR^ipa || 25-18 vetrAvatI tAmraparNI shatadrushcha mahAnadI | evamAdiShu sarvAsu nadIShu satataM sthitA || 25-19 yA puNyatithayaH proktAH shAstreShu munipuMgavaiH | tAsu sarvajalasthA sA pAvayatyakhilaM jagat || 25-20 makarasthe ravau ga~NgA jalamAtre vyavasthitA | punAti snAnapAnAdyaiH pAvayatyakhilaM jagat || 25-21 ga~NgAyAH sadR^isho nAsti pApAraNyadavAnalaH | bhavavyAdhiharA ga~NgA tasmAtsevyAH prayatnataH || 25-22 ga~NgAjalakaNenApi yaH sikto manujeshvara | sarvapApavinirmuktaH sa yAti paramAM gatiM || 25-23 AkalpajanmabhiH pApaM saMchitaM yannarairnR^ipa | tatsarvaM layamAyAti prayAge mAghamajjanAt || 25-24 brahmAdayaH surAH sarve rudrAdityA marudgaNAH | gandharvA lokapAlAshcha yakShaguhyakakiMnarAH || 25-25 brAhmI mAhesvarI lakShmIH shuchirmenAditirditiH | ghR^itAchI menakA rambhA hyurvashI cha tilottamA || 25-26 sarvAstA devapatnyashcha devAH sarve yudhiShThira | mAghamAse cha saMkrAntyAM chandrasUryagrahe nR^ipa | vyatipAte puNyadine snAtumAyAnti devatAH || 25-27 asvamedhasahasreNa vAjapeyAyutena cha | yatphalaM prApyate sadbhirga~NgAyAM taddine dine || 25-28 kimatra bahunoktena ga~NgAyAH sAdR^ishaM bhuvi | nAsti nAsti nR^ipashreShTha tasmAtsevyA prayatnataH || 25-29 sarvakAmapradA devI sarvopadravanAshinI | ga~NgA sevyA prayatnena hyakShayaM bhogamichChatA || 25-30 yudhiShThira uvAcha ga~NgAM gantumashaktAnAM kA gatiH puruShottama | tIrthaM kiM puNDarIkAkSha pavitraM pApanAshanam || 25-31 lokaM punAti kiM nAtha pUjyaM kiM puNyakarmaNAM | etanme brUhi lokesha tvadanyaH ko vadenmuniH || 25-32 bhagavAnuvAcha hanta te kathayiShyAmi pavitraM pApanAshanam | sAlagrAmashilAtIrthamashaktAnAM paraM nR^ipa || 25-33 sAlagrAmArchanAdrAjanmAnavA gatakilbiShAH | prayAnti mama lokaM vai dIpyamAnA disho dasha || 25-34 mahadvimAnamArUDhA gandharvairupasevitAH | mama lokaM prayAntyeva vishvAsaM kuru pANDava || 25-35 mumukShubhirahaM pArtha pUjya eva hi sarvadA | sALagrAmashilAchakre vajrakITavinirmite || 25-36 yaH pUjayati mAM chakre sAlagrAme nR^ipottama | rAjasUyasahasreNa teneShTaM prativatsaram || 25-37 api pApasamAyuktA dharmakAryavidUShakAH | sAlagrAmArchanAtpArtha naiva yAnti yamakShayam || 25-38 sALagrAme yathA prItistathA lakShmyAM na vidyate | tathA mama pure pArtha sanakAdiniShevite || 25-39 sAgarAntAmimAM pR^ithvIM dattvA viprAya yatphalam | tatphalaM samavApnoti sAlagrAmashilArchanAt || 25-40 sAlagrAmashilAShaTkaM dviShaTkamatha vApi vA | pUjayetparayA bhaktyA tasya puNyaM vadAmi te || 25-41 ga~NgAtIre.ashvamedhAnAM sahasrANAM phalaM bhavet | yo nityaM pUjayet bhaktyAH sAlagrAmashilA nR^ipa | mama loke chiraM sthitvA chakravartIha jAyate || 25-42 sa snAtaH sarvatIrtheShu savayaj~neShu dIkShitaH | sAlagrAmashilAtoyairyo.abhiShekaM karoti cha || 25-43 ga~NgA godAvarI revA nadyo muktipradAstu yAH | nivasanti sadA tIrthe sAlagrAmashilodbhave || 25-44 sAlagrAmashilAgre tu yaH shrAddhaM kurute nR^ipa | pitarastasya tuShyanti yAvadAchandratArakaM || 25-45 ye pibanti narA nityaM sAlagrAmashilAjalam | j~nAnAj~nAnakR^itaiH pApairmuchyante nAtra samshayaH || 25-46 sAlagrAmashilAchakraM yasya tiShThanti mandire | tanmandiragatAH sarve na pashyanti yamAlayam || 25-47 sAlagrAmashilAtoyam yaH pibedbindumAtrakam | so.api doShairna lipyeta narakeShu na majjati || 25-48 sAlagrAmashilAgre tu yo vA ko vApi bhUtale | mR^itiM yAti sa dharmAtmA sarvalokAdhipo bhavet || 25-49 ahaM pashupatishchaiva vishvasR^iT sakalAmarAH | sAlagrAmashilAchakre nivasAma yathAsukham || 25-50 tattIrthaM ye narA rAjanpibantyanudinaM sukham | sAlokyaM devatAnAM tu labhante nAtra saMshayaH || 25-51 sarvatIrthamayI rAjansarvadevamayI nanu | sarvadharmamayaM sAraM sAlagrAmashilAmalA || 25-52 darshanAtsparshanAnnR^INAM pUjanAtbandhanAdibhiH | sAlagrAmashilA rAjansarvapApaharA shubhA || 25-53 puruShasUktena mantreNa yaH snApayati nityasha | sAlagrAmashilAM bhUpa sa gachChedbrahmaNaH padam || 25-54 puruShasUktavidhAnena dvAravatyAH shilAyutAm | tulasIsha~NkhapayasA pUjako mAmupaiti hi || 25-55 ShaDbhiH ShaDbhishchaturbhishcha chaturviMshativarNayA | dvirdvayordvirdvitIyA cha sAlagrAmaprapUjakAH || 25-56 pAtakairbahubhiH krUrairjanmAntarakR^itairapi | muktA mama padaM yAnti punarAvR^ittivarjitam || 25-57 kimatra bahunoktena sAlagrAmashilArchanam | sadA kuruShva he pArtha sarvatIrthaphalaM bhavet || 25-58 gandharvapramukhA devA dikpAlAshchapsarogaNAH | vAchChanti pUjAM satataM sAlagrAme bhuvaHsthale || 25-59 yudhiShThira uvAcha sAlagrAmasya ga~ngAyAstIrthaM tIrthaniShevitam | phalabhuktaM visheSheNa shrutvAhaM pAvanIkR^itaH || 25-60 tvatto.ahaM shrotumichChAmi bhUyaH kamalalochana | tIrthayorubhayostulyaM vrataM yattadvadasva me || 25-61 shrIbhagavanuvAcha sAdhu pArtha mahAprAj~na prasiddho.asi jagattraye | yasmAddharme sadA bhaktirmahatAmapi durllabhA || 25-62 traikAlikaj~nAnavido munayaH pUrNadarshanAH | ekAdashIM prashaMsanti vratAnAmuttamaM shubhAM || 25-63 ekAdashIvrataM pArtha sarveShAM pApanAshanam | sarvakAmapradaM nR^INAM sarvopadravanAshanam || 25-64 brahmakShatravishAM chaiva shUdrANAM chaiva yoShitAM | mokShadaM kurvatAM bhaktyA mama priyakaraM prabho || 25-65 ekAdashyAM na mu~njIta pakShayorubhayorapi | yadi bhu~nkte sa pApI syAdrauravaM narakaM vrajet || 25-66 upavAsaphalaM lipsurjahyAdbhuktichatuShTayam | pUrvAparadine rAtrAvahorAtre tu madhyame || 25-67 ekAdashyAM dine yastu bhoktumichChAmi suvrata | sa bhoktuM sarvapApAni spR^ihayAlurna saMshayaH || 25-68 yAni kAni cha pApAni brahmahatyAdikAni cha | annamAshritya tiShThanti saMprApte harivAsare || 25-69 mahApAtakayukto vA yukto vA sarvapAtakaiH | ekAdashyAM nirAhAraH sthitvA yAti parAM gatim || 25-70 ekAdashI mahApuNyA mama priyakarA tithiH | saMsevyA sarvadA vipraiH saMsArachChedalipsubhiH || 25-71 svargamokShapradA hyeShA sarvapApapraNAshinI | sarvasaMpatkarI hyeShA sukalatrapradAyinI | suputradAyinI hyeShA sarvavidyApradAyinI || 25-72 bAlye vayasi vArdhakye yauvane vA nareshvara | upoShyaikAdashIM bhaktyA gamiShyanti divaM hi te || 25-73 kimatra bahunoktena mokShadaM pANDunandana | tasmAttvaM sarvakAleShu hyekAdashyAM vrataM kuru || 25-74 iti te kathitaM sarvaM puNyamekAdashIvratam | yachChR^itvA sarvapApebhyo mukto.anantam samushnute || 25-75 February 1, 2009