Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam 39 bhImeshvaramAhAtmyam bhIShma uvAcha kAverimahimA kena varNyate yugakoTibhiH | nArAyaNastu bhagavAnvetti nAnyo mahItale || 39-1 tIrayorubhayoH kShetraM munInAM shuddhachetasAm | yojane yojanArdhe cha kroshamAtre tu chAshramaH || 39-2 A samudrAttu sahyAdrermadhyaM devairniShevitam | kAverImAshrayantyatra sugocharajale shubhe || 39-3 sarvalokahitArthAya sarvatra hitakAriNaH | R^iShayo muniviprAshcha kAverIM samupAsate || 39-4 sarvatra sulabhasthAne puNyAshramasamanvite | vasanti lokarakShArthaM kAveryAM tu munIshvarAH || 39-5 daityadAnavarakShAMsi hyasurA mR^igajAtiShu | ugreShu rUpamAsthAya charanti saritastaTe || 39-6 mukhyasthAnaM pravakShyAmi kAveryA madhyavartinAm | yasya shravaNamAtreNa sarvapApaiH pramuchyate || 39-7 kAveryAH puNyanadyAstu tIrayorubhayorapi | devA R^iShigaNAshchaiva siddhAshchAraNaguhyakAH | gandharvA lokapAlAshcha sevante puNyakA~NkShayA || 39-8 tarurUpadharA devAshchAraNAH pakShirUpiNaH | R^iShayo viprarUpAshcha vartante tIramAshritAH || 39-9 shAstraj~nA lokavikhyAtAH sadA satkarmashIlinaH | vedashAstrasusaMpannAH sadA dhyAnaparAyaNAH | kAveryAM maraNaM yAnti te gachChanti hareH padam || 39-10 ye tatra pApakarmANashchaNDALAdyA yudhiShThira | dAnavAsurarakShAMsi tAnviddhi bharatarShabha || 39-11 pApAnAM layaheto.astu sadA krIDanti rAkShasAH | tatkaLevaramutsR^ijya prayAnti brahmaNaH padam || 39-12 trirAtraM jAhnavItIre pa~ncharAtraM tu yAmune | sadyaH punAti kAverI pApamAmaraNAntikam || 39-13 gautamyAM saptarAtraM tu narmadAyAM chaturdinam | tu~NgAyAM dasharAtraM tu hemakUTe dashArdhakam || 39-14 tulAmAse tu saMprApte ga~NgAdyAH sakalApagAH | snAtumAyAnti tAH sarvA hyAtmadoShajigIrShayA || 39-15 gajAraNyapurobhAge kAveryA yojanadvaye | bhImeshvareti vikhyAte sarvasiddhaniShevite || 39-16 prasannasalilA devI kAverI pAdapairvR^itA | bhImarUpI shivaH sAkShAttatra tiShThati bhUmipa || 39-17 purA vai kalidoSheNa naLaH paramadAruNaH | aj~nAtavAsamApede kAntiniryAsakAraNAt || 39-18 shvasurastasya vikhyAto bhImarAjo mahAmatiH | labdhuM kanyAM naLaM shaMbhuM tatra chArAdhayatprabhum || 39-19 nIlakaNthaprasAdena kAveryAH snAnavaibhavAt | shuddhAtmA stotramakarochChaMkaraM prati dharmaja || 39-20 nIlakaNThavirUpAkSha vishveshAya cha shUline | sadAshivAya lokAnAmIshvarAya namo namaH || 39-21 mR^ityuMjaya sadAnanda nandivAhana vishvadR^ik | manobhavaharAyeti sarvaj~nAya namo namaH || 39-22 bhasmoddhUlitasarvA~Nga nAgacharmadharAya cha | nAgabhUShaNa lokesha shaMkarAya namo namaH || 39-23 kailAsavAsanilaya pArvatIvallabha prabho | tripurAntaka bhUtAtmanga~NgAdhara namo.astu te || 39-24 trishUlapANine tubhyaM kapAlAbharaNAya cha | girIsha girijAnAtha mR^ityuMjaya namo.astu te | tvameva gatirasmAkaM pAhi pAhi jagatpate || 39-25 iti stuto jagannAtho bhImarAjena shaMkaraH | aShTamUrtidharo bhUtvA rAjAnamidamabravIt || 39-26 abhIShTasiddhirbhavitA jAmAtA cha tavAtmajA | AgamiShyanti bhadraM te tanujA patimeShyati | tava nAmnA bhavelli~Ngamatra vai khyAtimeShyati || 39-27 nAmasamkIrtanaM me.adya tvayA kR^itamariMdama | yaH paThetsatataM bhaktyA mama loko bhaviShyati || 39-28 bhImeshvaramidaM sthAnaM kAveryA madhyamaM shubham | sarvapApaprashamanaM bhuktimuktiphalapradam | atra snAtAH pApino.api pitR^imAtR^ikulAni cha | sahasrANi samuddhR^itya brahmalokaM prayAnti vai || 39-29 dAnaM shrAddhaM tathA homaM japaM snAnamakalmaSham | yaH kuryAtpitarastasya pravishanti triviShTapam || 39-30 adya no bhavitA muktiradya no vaiShNavaM padam | bhavitA naH padaM shaMbhorbrahmaNo marutAM pateH || 39-31 hR^iShyantevaM pitR^igaNA devagandharvakoTibhiH | puNyalokAnprayAntyeva sevitA pitaro.amalAH || 39-32 atra snAtaM naraM dR^iShTvA pApino vA nareshvara | punItAH svargamAyAnti sevitaM puNyakarmabhiH || 39-33 atra bhUtagaNAnviddhi bhUruhAnveNukIchakAn | ye cha kaNThakino vR^ikShA pishAchanviddhi pANDava || 39-34 ahamatra chiraM sthitvA gatAnAmatra karmiNAm | kShayaM karomi papAnAM puNyalokaM dadAmi cha || 39-35 atra snAtvA cha mAM dR^iShTvA kAverImadhyavartinam | natvA divaM naro yAti mama lokaM cha shAshvatam || 39-36 ityuktvAntardhate devo bhUtaiH saha sadAshivaH | bhImarAjo mahAtejA vismayaM paramaM gataH || 39-37 praNipatya jagannAthaM manasA cha punaH punaH | prayayu nagaraM pArtha puNyaM mitraniShevitam || 39-38 atrAdbhutatamaM dR^iShTvA shaMkaraM lokashaMkaram | bhR^igustatra samAsIno japannAste sma vai muniH || 39-39 kadA pashyAmi deveshaM kadA taM naumi nirguNam | kadA me janmasAphalyaM bhavitA shAshvataM tapaH || 39-40 ityuktvAH snApya salilaiH svayaM snAtvA sadAshivam | rudrasUktamahAmantraistoShayAmAsa shaMkaram || 39-41 vaishaMpAyana uvAcha tasminnavasare rAjannaLo nAma mahIpatiH | kalinA pIDitaH samyagAyayau bhImasaMnidhim || 39-42 snAtvA natvA cha kAveryAM bhImanAthaM tu shUlinam | japaM pradakShiNaM kurvansaMdadarsha cha bhArgavam || 39-43 praNipatya munishreShThaM trikAlaj~namakalmaSham | nivedayAmAsa muneH kalibAdhAM suduHsahAm || 39-44 j~nAtvA tadadbhutaM rUpamIdR^ishaM ghoradarshanam | provAcha kR^ipayA vidvAnnaiShadhaM prati dharmavit || 39-45 rAjaMstvavedR^ishaM rUpaM kutsitaM lokaninditam | bhImeshvarasya kR^ipaya svachChatAmeShyati dhruvam || 39-46 tapasA bhImarAjasya kR^ipayA shUlinaH prabho | jaganmohanakaM rUpamachirAttvaM sameShyasi || 39-47 lokeShu pa~ncha vikhyAtaM sadyaH kalimalApaham | kAshIbhImeshvaramidaM tachcha puShkariNIttrayam || 39-48 atra tvaM kR^itakR^ityo.asi pApairadyaH vimochitaH | na tvA devaM virUpAkShaM trikAlaM snAnamAchara || 39-49 R^ituparNo mahArAjaH snAtvAtra suchiraM nR^ipa | kR^ipayA nIlakaNThasya kalidoShaharo.abhavat || 39-50 takShakasya kule jAtaH kArkoTaka iti shrutaH | shAkalyasya tu shApena mAhAnajagaro.abhavat || 39-51 prApito daivayogena bhImanAthasya samnidhim | snAtvA talli~NgamachalaM natvA natvA tu veShTate || 39-52 atikrUrataraM rUpaM vihAya kR^ipayA nR^ipa | bhUShaNatvamavApAshu sattvaM cha kalidoShahA || 39-53 tavA~NgasparshanAddevI bhaimI surasutopamA | kalidoShaharA khyAtA bhaviShyati na saMshayaH || 39-54 kArkoTakasya nAgasya damayantyA naLasya cha | R^ituparNasya rAjarSheH kIrtanaM kalinAshanam || 39-55 snAtvA saMpUjya vidhivadbhImeshamaghanAshanam | R^ituparNapuraM gachCha tena svasthAnameShyasi || 39-56 bhIShma uvAcha ityukto muninA tena naLo vai gatakalmaShaH | sthitvA tu katichitkAlaM tena sArdhaM yudhiShThira | svasthAnaM prApya dharmAtmA bhaimyA saha nananda ha || 39-57 tvaM cha gachCha mahArAja pUjayitvA maheshvaram | achirAtprApyase sthAnaM manasA yadyadichChasi || 39-58 March 27, 2009