Harivamsha, volume II, Appendix II, BORI, 1971 shrIgaNeshAya namaH hari OM itranslated by A. Purushothaman, purushothaman_avaroth @yahoo.com sheShadharmaprakaraNam 46 shrIshailamAhAtmyam yudhiShThira uvAcha rAjAj~nAM shirasA kR^itvA rAmo dharmabhR^itAM varaH | kaM deshaM samanuprAptaH puNyaM paramapAvanam || 46-1 tanme kathaya tattvena ga~NgAsuta namo.astu te | tasmAtkIrtishravAtsadyo naraH pApaiH pramuchyate || 46-2 bhIShma uvAcha shR^iNu pArtha pravakShyAmi shrotR^INAmaghanAshanam | rAmasya charitaM puNyaM sarvama~NgaladAyakam || 46-3 sItAmanveShTukAmo.asua rAmo raghukulottamaH | yaM puNyadesham saMprAptastaM bravImi hi te.adhuna || 46-4 augaLaM ve~NkatAdriM cha shrIshailamatha shAshvatam | kA~nchiM tu kAmadAM rAjaMshchachAra raghusattamaH || 46-5 tatra tatra cha rAjendra dAnaM brAhmaNatarpaNam | gobhUtilahiraNyAdi kanyAdAnashatAni cha | dattvA taddeshjAnviprAnsthApayAmAsa sAttvikAn || 46-6 augaLaM nArasiMham cha gatvA rAmaH pratApavAn | namaskR^itvA nArasiMhamastauShItkamalApatim || 46-7 govinda keshava janArdhana vAsudeva vishvesha vishva madhusUdana vishvarUpa | shrIpadmanAbha puruShottama puShakarAkSha nArAyaNAchyuta nR^isiMha namo namste || 46-8 devAH samastAH khalu yogimukhyA gandharvavidyAdharakiMnarAshcha | yatpAdamUlaM satataM namanti taM nArasiMham sharaNaM gato.asmi || 46-9 vedAnsamastAnkhalu shAstragarbhAn vidyAbalaM kIrtimatiM cha lakShmIm | yasya prasAdAtpuruShA labhante taM nArasiMhaM sharaNam gato.asmi || 46-10 brahmA shivastvaM puruShottamashcha nArAyaNo.asau marutAM patishcha | chandrArkavAyvagnimarutgaNAshcha tvameva taM tvAM satataM nato.asmi || 46-11 sraShTA cha nityaM jagatAmasheSha- strAtA cha hantA vibhuraprameyaH | ekastvameva trividhA vibhinna- staM tvAM nR^isiMhaM satataM nato.asmi || 46-11 iti stutvA raghushreShThaH pUjayAmAsa taM hariM | puShpavR^iShTiH papAtAshu tasya devasya mUrdhani | sAdhu sAdhviti taM brUyurdevA R^iShigaNaiH saha || 46-11 rAghaveNa kR^itaM stotraM pItvAmR^itamanuttamam | paThanti ye dvijavarAsteShAM svargastu shAshvataH | ityuktvA prayayuH sarve devA R^iShigaNaiH saha || 46-12 rAmo.api tatra vai tiShThanmuniM natvAtha gAlavam | kR^itA~njalipuTo rAjanprovAchedaM mahAmatiH || 46-13 brahmastvaM munishArdUla sarvaM vetti bhavAnkhalu | nArasiMhasya devasya mAhAtmyaM vaktumarhasi || 46-14 yadi te mayi chetprItirasti me tadvadasva ha | kShetrasyAsya dvijashreShTha tIrthasyAsya cha vaibhavam || 46-15 gAlava uvAcha AshcharyaM rAghavashreShTha tvatkR^itaM pUrvajanmani | tvameva vetsi tatsarvaM na hi vindAmahe vayaM | tathApi shr^iNu vakShyAmi hyAj~nayA tava suvrata || 46-16 purA yogIshvaro rAma nArasiMho jaganmayaH | hiraNyanidhanaM kR^itvA hyatra pratyakShatAM gataH || 46-17 devadevo jagannathaH praNatArtipraNAshanaH | dikpAlairdevavR^indaishcha sadA saMsevyate.atra vai || 46-18 padA spR^ishanti ye rAma bhuvamatra prayatnataH | vimuktAH sarvapApebhyaH prayAnti harimandiram || 46-19 bhavanAshIti vikhyAtA ga~NgA pApapraNAshinI | suprasannA cha lokAnaM pApinAM muktidAyinI || 46-20 atra devAstrayAstrIMshatsadA tiShThanti rAghava | chintayantaH sadA devaM nArasiMhaM jaganmayam || 46-21 ayameva hariH sAkShAdvAmanatvamupAgataH | balinigrahaNaM kR^itvA divaM prAdAdviDaujasae || 46-22 rAj~nAM tu durvinItAnAM nidhanAya surottamaH | jamadagnisuto bhUtvA kArtavIryaM tathAhanat || 46-23 sa eva tvaM hi rAmo.abhUdikShvAkUNAM shiromaNiH | paulastyasya vadanti tvAM hantAraM lokavairiNaH || 46-24 aprameyamanAlokyamachintyaM bhaktavatsalam | sarvaj~naM tvAm vidurdevAH sampratyartha mahAvane || 46-25 devAnpashya yadushreShTha tvadAlokanatatparAn | divisthAnastuvatastvAM tu hantAraM lokavairiNaH || 46-26 tvaM tu vai dvAparasyAnte yaduvaMshe kR^itodayaH | kR^iShNo viShrutakarmA tvaM bhaviShyati na saMshayaH | evaM vadanti vibudhAstvAmekaM sarvabhUtagam || 46-27 tvAmArAdhya chiraM kAlamatra parvata mUrdhani | R^iShayo brAhmaNAshchaiva tavtpAdaM te prapedire || 46-28 atra vyAghrA mR^igagaNAH pashupakShidrumAdayaH | vyAdhA vanacharA rAma tAnviddhi surapuMgavAn | sevante muktikAmAste tvadpAdakamalaM shubham || 46-29 purA saMchitapuNyAnAM sukhadaM sUryavaMshaja | pApepsUnAM bhayakaraM sthAnamasya vibhorhareH || 46-30 bhIShma uvAcha iti shrutvA raghushreShTho gAlavaM taM praNamya cha | nArasiMhaM namaskR^itya prayayu cha shriyo.achalam || 46-31 dharmarAja tvamevAshu gatvA vigatakalmaShaH | nArasiMhaprasAdena sarvAnkAmAnavApsyasi || 46-32 auvaleshamaho gatvA patito.api vimuchyate | trirAtramuShitAnAM tu kiM punaH puNyavaibhavam || 46-33 yastvetachChR^INuyAnnityaM nArasiMhasya vaibhavam | sa mukta sarvapApebhyo brahmalokaM vrajaddhruvam || 46-34 yudhiShThira uvAcha shrIshailashikhare rAmo rAjaputro mahAmatiH | devaM pinAkinaM natvA tataH kimakarotprabhuH | vada devavrata tvaM me bhUtanAthasya vaibhavam || 46-35 bhIShma uvAcha devadevo virUpAkSho nIlakaNTho mahAdyutiH | shrIshalAkhye girivare sarvakAlaM pravartate || 46-36 shrIshailendraM praviShThAnAM narANAM pApinAmapi | nAsti nAsti punarjanma nAradena prabhAShitam || 46-37 sthAnAni bhuvi devasya vikhyAtAni mahItale | kailAso himashailashcha hyuttare jAhnavItaTe || 46-38 vishveshvaro virUpAkSho mahAkAlo mahAmate | etAni bahumukhyAni sthAnAni smaravairiNaH || 46-39 tatra tatra mahAdevaM prasannaM bhaktavatsalam | natvA naraH pApavR^ito vimukto divamashnute | kailAse shrIgirau devaH prasannaH samatAM gataH || 46-40 tatra vai devatAnAM cha manuShyANAmathAtra cha | sadA prasanno deveshaH pArvatIramaNaH prabhuH | gatAnAmatra vai muktiM dadAti bhuvaneshvaraH || 46-41 shrIshailashikhare dR^iShTe manujaiH pApakarmabhiH | ChittvA sarvANi pApAni teShAM muktiM dadAti cha || 46-42 ekayAmaM dviyAmaM va triyAMaM vA vasanti ye | nAsti nAsti punarjanma sAkShAtkR^iShNena bhAShitam || 46-43 ekarAtroShitAnAM tu pitR^imAtR^ikulAni cha | siddhA bandhujanAshchaiva prApnuvanti hi tatpadam || 46-44 tatrAgataM raghuvaraM j~nAtvA tatra maharShayaH | draShTukAmAstathA jagmurnArAyaNamariMdamam || 46-45 jAmadgnyastathA rAmo bhR^igushchyavanabhArgavau | satyajitsatyakIrtishcha shatAnando dR^iDhavrataH | sha~Nkho yamashcha sanmedhAH kapardI chAtha ka~NkaNaH || 46-47 ete chAnye cha bahavo munayaH samshitavratAH | rAmaM dR^iShTvA mudaM jagmuratulAM raghunandanam || 46-48 rAmaH sampUjya tAnsarvAnarghyapAdyairariMdama | namaskR^itya cha tAnAha prA~njalirmunipuMgavAn || 46-49 kushalaM vo munigaNA dhanyo vaH pAdasevayA | shrIshailesho mayA dR^iShTaH pUjitashcha visheShataH | atra kiM karanIyaM me tadvadantu maharShayaH || 46-50 te.api rAmaM puraskR^itya jAmadagnyaM bahushrutam | chiraMjIvI bhavetyuchurjAmadgnyastato.avadat || 46-51 rAmAbhirAma bhagavanhitAya jagatAM vibhA | kR^itAvatAro bhavatA loke khalu sudurlabhaH || 46-52 pAhi lokAnR^iShigaNAnrAkShasA~njAhi rAghava | tvaddarshanAtsutaptaM me tapasteShAM mahAtmanAm || 46-53 dAtavyamatra bhavatA brAhmaNebhyo dhanaM bahu | annapAnIyadAnAni kartavyAni mahAmate || 46-54 atraiva dAnAtpitarastu sarve tR^iptA divaM yAnti sushobhamAnAH | gandharvamukhyairupasevyamAnA- stathA samastairmunidevasaMghaiH || 46-55 gItAni devAH satataM guNanti kadA tu shaileshamahaM vrajAmi | pratyekamityevamumApatiM tam bhajanti nityaM paripurNachittAH || 46-56 kurvanti dAnAni mahatsu sevAM tIrtheShu majjanti shubhaM vadanti | ye chApi pUravaM kR^itino mahAnta- staireva vandhyaH satataM girIshaH || 46-57 surendraH pUrvadigbhAge sthitvA devagaNaiH saha | pUjAM karoti yatnena muktyarthaM raghunandana || 46-58 dakShiNasyAM dishi yamastiShThanpitR^igaNaiH saha | shrIshaileshaM mahAbhaktyA stauti prIto raghUttama || 46-59 prachetAH pashchimadvAre tiShThanshrIshailavAsinam | pAhi mAM pArvatIkAntetyevaM stauti punaH punaH || 46-60 yakSharADuttare bhAge sadA krIDati shaMbhunA | tasya divyAM tanuM pashyanstuvanhR^iShya~njapanstuvan || 46-61 madhyaM teShAM surANAM tu siddhAnAM sAdhyarakShasAm | kadambaiH pUrite sthAne sthAtumanyairna shakyate | bhUlokasya tu sevArthaM dattaM tridivasam kila || 46-61 shrutvaivaM rAghavashreShTho jAmadagnyAtkurUdvaha | dattvA dAnAni vidhivatdakShiNadvArato yayau || 46-62 shrIshailaM gachChati pumAnyo vA ko vA nR^ipottama | tasyaiva vaMshajAH sarve muktA eva na saMshayaH || 46-63 ya idam puNyamakhyAnaM nAradena prabhAShitam | shR^iNoti satatam bhaktyA shivasAyUjyamashnute || 46-64 April 18, 2009