harivamshaparva harivaMsha, Volume II, Appendix 1, pp.7-12, BORI 1971 itranslated by A. Purushothaman, purushothaman_avaroth @ yahoo.com 4 shrAddhakarmakriyAkalpaH sanatkumAra uvAcha | ataH paraM pravakShyAmi kriyAkalpaM yathAvidhi | kAmyanaimittikAjasrashrAddhakarmaNi nityashaH || 4-1 AgrahAyaNamUlAH syuraShTakAstisra eva cha | kR^iShNapakShe variShThA cha pUrvA chaindrI cha bhAShitA | prAjApatyA dvitIyA syAttR^itIyA vaishvadevikI || 4-2 AdyApUpaiH smR^itA nityaM mAMsairanyA bhavetsadA | shAkaiH kAryA tR^itIyA syAdeSha dravyagato vidhiH || 4-3 anvaShTakyaM pitR^INAM vai nityameva vidhIyate || 4-4 yA chApanyA chaturthI syAttAM cha kuryAtprayatnataH | AyuH shrAddham budhaH kuryAtsarvasvenApi nityashaH | shreyAMsi kShipramAyAnti paratreha cha modate || 4-5 pitaraH sarvakAleShu tithikAleShu devatAH | sarve puruShamayAnti nipAneShviva dhenavaH || 4-6 mA sma shreyaH prayachCheyuraShTakAyAmapUjitA | moghAstasya bhavantyAshAH paratreha cha nityashaH || 4-7 pUjakAnAM sadotkarSho nAstikanAmavAggatiH | devAMshcha dAyino yAnti tiryaggachChantyadAyinaH || 4-8 puShTiM prajAM smR^itiM medhAM putrAnaishvaryameva cha | kurvANaH paurNamAsyAM tu sarvaM saMpUrNamashnute || 4-9 pratipaddhanalAbhAya labdhaM chAsya na nashyati | dvitIyAyAM tu yaH kuryAddvipadAdhipatirbhavet || 4-10 phalArthinAM tR^itIyA tu shatrughnI pApanAshanI | chaturthyAM vai prakurvANaH shatruchChidrANi pashayati || 4-11 pa~nchabhyAmapi kurvaNaH prApnoti mahatIM shriyam | ShaShTyAM shrAddhANi kurvANaH prApnoti dvijapUjanam || 4-12 kurute yastu saptamyAM shrAddhAni satataM naraH | mahAsatramavApnoti gaNAnAM chAdhipo bhavet || 4-13 pUrNAM vR^ittimavApnoti yo.aShTamhyAM kurute naraH | ShrAddhaM navamyAM kartavyamaishvaryaM nR^iShu kA~NkShatAH || 4-14 kurvandashamyAM tu naro brAhmiM shriyamavApnuyAt | vedAMshchaivApnuyAtsarvAnviprANAM saMmato bhavet || 4-15 ekAdashyAM paraM dAnamaishvaryaM saMtatiM tathA | dvAdashyAM jayalAbhAya rAjyamAyurvasUni cha || 4-16 prajAvR^iddhiM pashUnmedhyAnsvAtantrayM puShTimuttamAm | dIrghamAyurathaishvaryaM kurvANasya trayodashIM || 4-17 yuvAnastu gR^ihe yasya mR^itAsteShAM pradApayet | shastreNa vA hatA ye tu teShAM dadyAchchaturdashIM || 4-18 amAvAsyAM prayatnena shrAddhaM kuryAchChuchiH sadA | sarvAnkAmAnavApnoti svarge chAnantyamashnute || 4-19 annaM dadyAdamAvAsyAM somasyApyAyanaM bhvet | evamApyAyitaH somastrI.NllokAndhArayiShyati || 4-20 siddhachAraNagandharvaiH stUyate nityamUrjitaH | stavaiH puNyairmanoj~naishcha sarvakAmaparichChadaiH || 4-21 nR^ittavAditragItaishcha apsarobhiH sahasrashaH | upanR^itto vimAnasthaH pitR^ibhakto dR^iDhavrataH || 4-22 stuvanti devagandharvAH siddhasaMghAshcha taM sadA | pitR^ibhaktastvamAvAsyAM sarvAnkAmAnavApnuyAt || 4-23 maghAsu kurvanshrAddhAni sarvAnkAmAnavApnuyAt | pratyakShamarchitAstena bhavanti pitaraH sadA | pitR^idevo maghA yasmAttasmAttAsvakShayaM viduH || 4-24 yamastu yAni shradhhAni provAcha shashabindave | tAni me shR^iNu kAmyAni nakShatreShu pR^ithaKpR^ithak || 4-25 shrAddhaM yaH kR^ittikAyoge kurvIta satataM naraH | agnInAdAya sApatyo yajeta vigatajvaraH || 4-26 apatyakAmo rohiNyAM saumyenaujasvitAM vrajet | krUrakarmANi bhAgI syAdArdrAyAM shrAddhamAcharan || 4-27 kShetre putreShu bhAgI syAchChrAddhaM kurvanpunarvasau | puShTikAmaH punaH puShye shrAddhAM kurvati mAnavaH || 4-28 AshleShAsu punardattvA vIrAnputrAnavApnuyAt | shrShTho bhavati bandhUnAM maghAsu shrAddhamAcharan || 4-29 phalgunIShu punaH kR^itvA saubhAgyaM labahte naraH | pradAnashIlaH sApatya uttarAsu karoti yaH || 4-30 saMsatsu mukhyo bhavati haste yastarpayetpitR^In | chitrAyaM kurute yastu putrAnrUpavato labhet || 4-31 svAtinA tu dvijaH kuryAdvANijyena jijIviShuH | putrArthaM tu vishAkhAsu shrAddhamIheta mAnavaH || 4-32 anurAdhAsu kurvANo narashchakraM pravartayet | AdhipatyaM labhechChrAddhaM jyeShThAyAM kurute hi yaH || 4-33 mUlenArogyalAbhaH syAdAShADhAsu mahadyashaH | tathottarAsvaShADhAsu vItashoko bhavennaraH || 4-34 shravaNena na tu lokeShu prApnuyAtparamAM gatiM | rAjyabhogA~nshraviShThAsu prApnuyAtvipulaM dhanam || 4-35 shrAddhaM tvabhijitA kurvanvedAnsA~NgAnavApnuyAt | nakShatre vAruNe kurvanbhiShaksiddhimavApnuyAt || 4-36 pUrvaproShThapade kurvanvindate jIvitaM bahu | uttarAsu punaH kurva.Nllabhate gAH sahasrashaH || 4-37 revatyAM kurute yastu rUpyaM bahu labhennaraH | ashvineShu hayA~nshreShThAnbharaNyAmAyuruttamam || 4-38 imam shrAddhavidhiM kurva~nshashabindhurmahImimAm | akleshenAlabhatkR^itsnAM labdhvA cha prashashAsa ha || 4-39 sanatkumAra uvAcha | rAjataM rajatAkttaM vA pitR^INAM pAtramuchyate | rajatasya kathA vApi darshanaM dAnameva cha | anantyamakShayaM svargyam rAjataM dAnamuchyate || 4-40 pitR^INAM tena dAnena satputrAstArayantyuta | paThyamAnaH sadA shrAddhe niyato brahmavAdibhiH || 4-41 rAjate hi svadhA dugdhA pAtre.asminpitR^ibhiH purA | akShayArthaM mahI yasmAttasmindattamato.akShayaM || 4-42 kR^iShNAjinasya sAMnidhyam darshanaM dAnameva cha | rakShoghnaM brahmavarchasyaM pashUnputrAMshcha tArayet || 4-43 kA~nchanaM rAjataM pAtram dauhitraH kutapastilAH | bastashcha pAvanIyAni tridaNDI yoginastathA || 4-44 shrAddhakarmaNyayaM shreShTho vidhirbrahmansanAtanaH | AyuH puShTiryashaH kIrtiH praj~nAH saMtativardhanaH || 4-45 dishi dakShiNapUrvasyAM vedisthAnaM niveshayet | sarvato.aratnimAtraM tu chaturastraM susaMvR^itaM || 4-46 vakShyAmi vidhivatsthAnaM pitR^INAmiti shAstrataH | dhanyamAyuShyamArogyaM puShTikIrtivivardhanam || 4-47 tatra gartAstrayaH kAryAstrayo dandAshcha khAdirAH | aratnimAtrAste kAryA rajatena vibhUShitAH || 4-48 te vitastyAyatA gartAH sarvatashchatura~NgulAH | prAgdakShiNAyatAH kAryAH sthirA nashuShirAstathA || 4-49 AdbhiH pavitrapUtAbhiH plAvayetsatataM shuchiH | payobhyAmAjagavyAbhyAM shodhanaM vAgmireva cha || 4-50 tarpaNaM satataM hyetattR^iptirbhavati shAshvatI | iha chAmutra cha shrImAnsarvakAmasamanvitaH || 4-51 evaM triShavaNasnAto yo.archayetprayataH sadA | mantreNa vidhivatsamyakso.ashvamedhaphalaM labhet | triHsaptasaMj~nAste yasmAtrailokyam dhAryate hi taiH || 4-52 tasya puShTirathaishvaryamAyuH saMtatireva cha | divi cha bhrAjate lakShmyA mokShaM cha labhate kramAt || 4-53 pApmApahaM pAvanIyamashvamedhaphalaM labhet | mantraM tasmAdahaM vakShye amR^itaM brahmasaMmitam || 4-54 devatAbhyaH pitR^ibhyashcha mahAyogibhyaH eva cha | namaH svadhAyaiH svAhAyaiH nityameva namo namaH || 4-55 AdyAvasAne shrAddhasya trirAvR^ittaM japetsadA | ashvamedhaphalaM hyetadvipraiH satkR^itya pUjitam || 4-56 piNDanirvApaNe chApi japedevaM samAhitaH | pitaraH kShipramAyAnti rAkShasAH pradravanti cha || 4-57 pitryo.ayam triShu lokeShu mantro.ayaM tArayatyuta | paThyamAnaH sadA shrAddhe niyatairbrahmavAdibhiH || 4-58 rAjyakAmo japedevaM sadA mantramatandritaH | vIryashauryArthabuddhishrIchirAyuHkIrtivardhanaH || 4-59 prIyante pitaro yena japena niyamena cha | saptarchaM saMpravakShyAmi sarvakAmapradaM shubham || 4-60 amurtAnAM mUrtimatAm pitR^INAM dIptatejasAm | namasyAmi sadA teShAM dhyAyinAM yogachakShuShAm || 4-61 indrAdInAM cha pitaro dakShamarIchayostathA | pitaraH saptarShINAM cha tAnnamsyAmi kAmadAn || 4-62 manvAdInAM janitR^IMshcha sarvalokanamaskR^itAn | tAnnamskR^itya sarvAnvai pitR^I~njalasamudrayoH || 4-63 nakShatrANAM grahaNAM cha vAyvagnipitarashcha ye | dyAvApR^ithivyoshcha sadA namasyehaM kR^itA~njaliH || 4-64 devarShINAM saMjanitR^InsarvalokanamaskR^itAn | saMghAtR^InsarvalokAnAM namasye.ahAM pitAmahAn || 4-65 prajApatergavAM vahneH somAya cha yamAya cha | yogeshvarebhyashcha sadA namasye.ahaM kR^itA~njaliH || 4-66 namaH pitR^igaNebhyastu saptabhyo ye cha kIrtitAH | svayaMbhuve namasye.ahaM brahmaNe yogachakShuShe || 4-67 etaduktaM cha saptarchaM devarShigaNapUjitam | pavitraM paramaM hyetachChrImadrakShoghnameva cha || 4-68 etena vidhinA yuktastrInvarA.Nllabhate naraH | bhaktyAH paramayA yuktaH shraddhadAno jitendriyaH || 4-69 saparchaM tu japedyastu nityameva samAhitaH | saptadvIpasamudrAyAH prithivyA ekarAD bhavet || 4-70 yena proktastvayaM kalpo namstasmai svayaMbhuve | mahAyogeshvarebhyashcha sadA saMpraNato.asmyaham || 4-71 vartante pitarastAta devAnAM divi devatAH | saptasvete sthitA nityaM sthAneShu pitaro.avyayAH || 4-72 prajApatisutA ete sarveShAM tu mahAtmanAm | Adyo gaNastu yogInAM sa nityo yogavardhanaH || 4-73 dvitIyo devatAnAM tut tR^itIyo dAnavAdinAm | sheShAstu varNinAM j~neyA iti sarve prakIrtitAH || 4-74 pitR^InprINAti yo bhaktyA pitaraH prINayanti tam | yachChanti pitaraH prItAH prajAM puShTiM tathaiva cha | svargamAyuShyamArogyaM yadanyadapi vA~nchitam || 4-75 devakAryAdapi mune pitR^ikAryaM prashasyate | devatAnAM hi pitaraH pUrvamAyatanaM smR^itaM || 4-76 te suprasadAH suprItA lokasyApyAyanaM param | sthiraprasAdAshcha sadA tAnnamasyasva bhArgava || 4-77 March 21, 2009